| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
உபாலிபஞ்ஹாகதா²
Upālipañhākathā
351. ஏகதோ உபாலி ஏகோதி த⁴ம்மவாதி³பக்கே² ஏகோ. ஏகதோ த்³வேதி அத⁴ம்மவாதி³பக்கே² த்³வே. சதுத்தோ² அனுஸ்ஸாவேதீதி ஸங்க⁴ங் பி⁴ந்தி³ஸ்ஸாமீதி அத⁴ம்மவாதி³சதுத்தோ² ஹுத்வா அனுஸ்ஸாவேதி; அனுனயந்தோ ஸாவேதி ‘‘ந தும்ஹாகங்யேவ நரகப⁴யங் அத்தி², அம்ஹாகம்பி அத்தி², ந அம்ஹாகங் அவீசிமக்³கோ³ பிஹிதோ, ந மயங் அகுஸலா ந பா⁴யாம. யதி³ ஹி அயங் அத⁴ம்மோ அவினயோ அஸத்து²ஸாஸனங் வா ப⁴வெய்ய, ந மயங் க³ண்ஹெய்யாமா’’திஆதி³னா நயேன ‘‘அத⁴ம்மங் த⁴ம்மோ’’தி ஏவங் அட்டா²ரஸ பே⁴த³கரவத்தூ²னி போ³தே⁴தீதி அத்தோ². ஸலாகங் கா³ஹேதீதி ஏவங் அனுஸ்ஸாவெத்வா பன ‘‘இத³ங் க³ண்ஹத², இத³ங் ரோசேதா²’’தி வத³ந்தோ ஸலாகங் கா³ஹேதி.
351.Ekato upāli ekoti dhammavādipakkhe eko. Ekato dveti adhammavādipakkhe dve. Catuttho anussāvetīti saṅghaṃ bhindissāmīti adhammavādicatuttho hutvā anussāveti; anunayanto sāveti ‘‘na tumhākaṃyeva narakabhayaṃ atthi, amhākampi atthi, na amhākaṃ avīcimaggo pihito, na mayaṃ akusalā na bhāyāma. Yadi hi ayaṃ adhammo avinayo asatthusāsanaṃ vā bhaveyya, na mayaṃ gaṇheyyāmā’’tiādinā nayena ‘‘adhammaṃ dhammo’’ti evaṃ aṭṭhārasa bhedakaravatthūni bodhetīti attho. Salākaṃ gāhetīti evaṃ anussāvetvā pana ‘‘idaṃ gaṇhatha, idaṃ rocethā’’ti vadanto salākaṃ gāheti.
ஏகதோ உபாலி த்³வே ஹொந்தீதிஆதீ³ஸுபி ஏஸேவ நயோ. ஏவங் கோ² உபாலி ஸங்க⁴ராஜி சேவ ஹோதி ஸங்க⁴பே⁴தோ³ சாதி ஏவங் ஹோதி; ந பன எத்தாவதா ஸங்கோ⁴ பி⁴ன்னோ ஹோதி.
Ekato upāli dve hontītiādīsupi eseva nayo. Evaṃ kho upāli saṅgharāji ceva hoti saṅghabhedo cāti evaṃ hoti; na pana ettāvatā saṅgho bhinno hoti.
பி⁴க்கு² கோ² உபாலி பகதத்தோ ஸமானஸங்வாஸகோ ஸமானஸீமாயங் டி²தோ ஸங்க⁴ங் பி⁴ந்த³தீதி எத்த² ஸியா ஏவங் ‘‘தே³வத³த்தோ கத²ங் பகதத்தோ’’தி. கத²ங் தாவ ந பகதத்தோ, ரஞ்ஞோ கா⁴தாபிதத்தா ருஹிருப்பாத³ஸ்ஸ ச கதத்தாதி? தத்த² வதா³ம – ஆணத்தியா தாவ விரத்³த⁴த்தா ரஞ்ஞோ கா⁴தாபனங் நத்தி². ‘‘தேன ஹி த்வங், குமார, பிதரங் ஹந்த்வா ராஜா ஹோஹி, அஹங் ப⁴க³வந்தங் ஹந்த்வா பு³த்³தோ⁴ ப⁴விஸ்ஸாமீ’’தி ஏவஞ்ஹி தஸ்ஸ ஆணத்தி. குமாரோ பன ராஜா ஹுத்வா பச்சா² பிதரங் மாரேஸி; ஏவங் தாவ ஆணத்தியா விரத்³த⁴த்தா ரஞ்ஞோ கா⁴தாபனங் நத்தி². ருஹிருப்பாதே³ பன கதமத்தேயேவ ருஹிருப்பாத³பச்சயா ப⁴க³வதா அப⁴ப்³ப³தா ந வுத்தா, ந ச ஸக்கா ப⁴க³வதோ வசனங் வினாயேவ தஸ்ஸ அப⁴ப்³ப³தா ஆரோபேதுங்.
Bhikkhu kho upāli pakatatto samānasaṃvāsako samānasīmāyaṃ ṭhito saṅghaṃ bhindatīti ettha siyā evaṃ ‘‘devadatto kathaṃ pakatatto’’ti. Kathaṃ tāva na pakatatto, rañño ghātāpitattā ruhiruppādassa ca katattāti? Tattha vadāma – āṇattiyā tāva viraddhattā rañño ghātāpanaṃ natthi. ‘‘Tena hi tvaṃ, kumāra, pitaraṃ hantvā rājā hohi, ahaṃ bhagavantaṃ hantvā buddho bhavissāmī’’ti evañhi tassa āṇatti. Kumāro pana rājā hutvā pacchā pitaraṃ māresi; evaṃ tāva āṇattiyā viraddhattā rañño ghātāpanaṃ natthi. Ruhiruppāde pana katamatteyeva ruhiruppādapaccayā bhagavatā abhabbatā na vuttā, na ca sakkā bhagavato vacanaṃ vināyeva tassa abhabbatā āropetuṃ.
‘‘ருஹிருப்பாத³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’தி –
‘‘Ruhiruppādako, bhikkhave, anupasampanno na upasampādetabbo, upasampanno nāsetabbo’’ti –
இத³ங் பன ப⁴க³வதா ஸங்க⁴பே⁴த³தோ பச்சா² வுத்தங், தஸ்மா பகதத்தேனேவ தேன ஸங்கோ⁴ பி⁴ன்னோதி.
Idaṃ pana bhagavatā saṅghabhedato pacchā vuttaṃ, tasmā pakatatteneva tena saṅgho bhinnoti.
அத⁴ம்மங் த⁴ம்மோதி தீ³பெந்தீதிஆதீ³ஸு அட்டா²ரஸஸு பே⁴த³கரவத்தூ²ஸு ஸுத்தந்தபரியாயேன தாவ த³ஸ குஸலகம்மபதா² த⁴ம்மோ, த³ஸ அகுஸலகம்மபதா² அத⁴ம்மோ. ததா² சத்தாரோ ஸதிபட்டா²னா, சத்தாரோ ஸம்மப்பதா⁴னா, சத்தாரோ இத்³தி⁴பாதா³, பஞ்சிந்த்³ரியானி, பஞ்ச ப³லானி, ஸத்த பொ³ஜ்ஜ²ங்கா³, அரியோ அட்ட²ங்கி³கோ மக்³கோ³தி ஸத்ததிங்ஸ போ³தி⁴பக்கி²யத⁴ம்மா த⁴ம்மோ நாம; தயோ ஸதிபட்டா²னா , தயோ ஸம்மப்பதா⁴னா, தயோ இத்³தி⁴பாதா³, ச² இந்த்³ரியானி, ச² ப³லானி, அட்ட² பொ³ஜ்ஜ²ங்கா³, நவங்கி³கோ மக்³கோ³தி ச சத்தாரோ உபாதா³னா, பஞ்ச நீவரணா, ஸத்த அனுஸயா, அட்ட² மிச்ச²த்தாதி ச அயங் அத⁴ம்மோ.
Adhammaṃ dhammoti dīpentītiādīsu aṭṭhārasasu bhedakaravatthūsu suttantapariyāyena tāva dasa kusalakammapathā dhammo, dasa akusalakammapathā adhammo. Tathā cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggoti sattatiṃsa bodhipakkhiyadhammā dhammo nāma; tayo satipaṭṭhānā , tayo sammappadhānā, tayo iddhipādā, cha indriyāni, cha balāni, aṭṭha bojjhaṅgā, navaṅgiko maggoti ca cattāro upādānā, pañca nīvaraṇā, satta anusayā, aṭṭha micchattāti ca ayaṃ adhammo.
தத்த² யங்கிஞ்சி ஏகங் அத⁴ம்மகொட்டா²ஸங் க³ஹெத்வா ‘‘இமங் அத⁴ம்மங் த⁴ம்மோதி கரிஸ்ஸாம; ஏவங் அம்ஹாகங் ஆசரியகுலங் நிஸ்ஸாய நிய்யானிகங் ப⁴விஸ்ஸதி, மயஞ்ச லோகே பாகடா ப⁴விஸ்ஸாமா’’தி தங் அத⁴ம்மங் ‘‘த⁴ம்மோ அய’’ந்தி கத²யந்தா அத⁴ம்மங் த⁴ம்மோதி தீ³பெந்தி நாம. ததே²வ த⁴ம்மகொட்டா²ஸேஸு ச ஏகங் க³ஹெத்வா அயங் அத⁴ம்மோதி கதெ²ந்தா த⁴ம்மங் அத⁴ம்மோதி தீ³பெந்தி நாம. வினயபரியாயேன பன பூ⁴தேன வத்து²னா சோதெ³த்வா ஸாரெத்வா யதா²படிஞ்ஞாய காதப்³ப³ங் கம்மங் த⁴ம்மோ நாம, அபூ⁴தேன வத்து²னா அசோதெ³த்வா அஸாரெத்வா அபடிஞ்ஞாய காதப்³ப³ங் கம்மங் அத⁴ம்மோ நாம.
Tattha yaṃkiñci ekaṃ adhammakoṭṭhāsaṃ gahetvā ‘‘imaṃ adhammaṃ dhammoti karissāma; evaṃ amhākaṃ ācariyakulaṃ nissāya niyyānikaṃ bhavissati, mayañca loke pākaṭā bhavissāmā’’ti taṃ adhammaṃ ‘‘dhammo aya’’nti kathayantā adhammaṃ dhammoti dīpenti nāma. Tatheva dhammakoṭṭhāsesu ca ekaṃ gahetvā ayaṃ adhammoti kathentā dhammaṃ adhammoti dīpenti nāma. Vinayapariyāyena pana bhūtena vatthunā codetvā sāretvā yathāpaṭiññāya kātabbaṃ kammaṃ dhammo nāma, abhūtena vatthunā acodetvā asāretvā apaṭiññāya kātabbaṃ kammaṃ adhammo nāma.
ஸுத்தந்தபரியாயேன ராக³வினயோ தோ³ஸவினயோ மோஹவினயோ ஸங்வரோ பஹானங் படிஸங்கா²தி அயங் வினயோ நாம, ராகா³தீ³னங் அவினயோ அஸங்வரோ அப்பஹானங் அப்படிஸங்கா²தி அயங் அவினயோ நாம. வினயபரியாயேன வத்து²ஸம்பத்தி ஞத்திஸம்பத்தி அனுஸ்ஸாவனஸம்பத்தி ஸீமாஸம்பத்தி பரிஸாஸம்பத்தீதி அயங் வினயோ நாம, வத்து²விபத்தி…பே॰… பரிஸாவிபத்தீதி அயங் அவினயோ நாம.
Suttantapariyāyena rāgavinayo dosavinayo mohavinayo saṃvaro pahānaṃ paṭisaṅkhāti ayaṃ vinayo nāma, rāgādīnaṃ avinayo asaṃvaro appahānaṃ appaṭisaṅkhāti ayaṃ avinayo nāma. Vinayapariyāyena vatthusampatti ñattisampatti anussāvanasampatti sīmāsampatti parisāsampattīti ayaṃ vinayo nāma, vatthuvipatti…pe… parisāvipattīti ayaṃ avinayo nāma.
ஸுத்தந்தபரியாயேன சத்தாரோ ஸதிபட்டா²னா… அட்ட²ங்கி³கோ மக்³கோ³தி இத³ங் பா⁴ஸிதங் லபிதங் ததா²க³தேன ; தயோ ஸதிபட்டா²னா, தயோ ஸம்மப்பதா⁴னா, தயோ இத்³தி⁴பாதா³, ச² இந்த்³ரியானி, ச² ப³லானி, அட்ட² பொ³ஜ்ஜ²ங்கா³, நவங்கி³கோ மக்³கோ³தி இத³ங் அபா⁴ஸிதங் அலபிதங் ததா²க³தேன. வினயபரியாயேன சத்தாரோ பாராஜிகா, தேரஸ ஸங்கா⁴தி³ஸேஸா, த்³வே அனியதா, திங்ஸ நிஸ்ஸக்³கி³யா பாசித்தியாதி இத³ங் பா⁴ஸிதங் லபிதங் ததா²க³தேன; தயோ பாராஜிகா, சுத்³த³ஸ ஸங்கா⁴தி³ஸேஸா, தயோ அனியதா, ஏகத்திங்ஸ நிஸ்ஸக்³கி³யா பாசித்தியாதி இத³ங் அபா⁴ஸிதங் அலபிதங் ததா²க³தேன.
Suttantapariyāyena cattāro satipaṭṭhānā… aṭṭhaṅgiko maggoti idaṃ bhāsitaṃ lapitaṃ tathāgatena ; tayo satipaṭṭhānā, tayo sammappadhānā, tayo iddhipādā, cha indriyāni, cha balāni, aṭṭha bojjhaṅgā, navaṅgiko maggoti idaṃ abhāsitaṃ alapitaṃ tathāgatena. Vinayapariyāyena cattāro pārājikā, terasa saṅghādisesā, dve aniyatā, tiṃsa nissaggiyā pācittiyāti idaṃ bhāsitaṃ lapitaṃ tathāgatena; tayo pārājikā, cuddasa saṅghādisesā, tayo aniyatā, ekattiṃsa nissaggiyā pācittiyāti idaṃ abhāsitaṃ alapitaṃ tathāgatena.
ஸுத்தந்தபரியாயேன தே³வஸிகங் ப²லஸமாபத்திஸமாபஜ்ஜனங், மஹாகருணாஸமாபத்திஸமாபஜ்ஜனங், பு³த்³த⁴சக்கு²னா லோகவோலோகனங், அட்டு²ப்பத்திவஸேன ஸுத்தந்ததே³ஸனா, ஜாதககதா²தி இத³ங் ஆசிண்ணங்; ந தே³வஸிகங் ப²லஸமாபத்திஸமாபஜ்ஜனங்…பே॰… ந ஜாதககதா²தி இத³ங் அனாசிண்ணங். வினயபரியாயேன நிமந்திதஸ்ஸ வஸ்ஸாவாஸங் வஸித்வா அபலோகெத்வா சாரியபக்கமனங், பவாரெத்வா சாரியபக்கமனங், ஆக³ந்துகேஹி ஸத்³தி⁴ங் பட²மங் படிஸந்தா²ரகரணந்தி இத³ங் ஆசிண்ணங்; தஸ்ஸேவ ஆசிண்ணஸ்ஸ அகரணங் அனாசிண்ணங் நாம.
Suttantapariyāyena devasikaṃ phalasamāpattisamāpajjanaṃ, mahākaruṇāsamāpattisamāpajjanaṃ, buddhacakkhunā lokavolokanaṃ, aṭṭhuppattivasena suttantadesanā, jātakakathāti idaṃ āciṇṇaṃ; na devasikaṃ phalasamāpattisamāpajjanaṃ…pe… na jātakakathāti idaṃ anāciṇṇaṃ. Vinayapariyāyena nimantitassa vassāvāsaṃ vasitvā apaloketvā cāriyapakkamanaṃ, pavāretvā cāriyapakkamanaṃ, āgantukehi saddhiṃ paṭhamaṃ paṭisanthārakaraṇanti idaṃ āciṇṇaṃ; tasseva āciṇṇassa akaraṇaṃ anāciṇṇaṃ nāma.
ஸுத்தந்தபரியாயேன சத்தாரோ ஸதிபட்டா²னா…பே॰… அட்ட²ங்கி³கோ மக்³கோ³தி இத³ங் பஞ்ஞத்தங் நாம; தயோ ஸதிபட்டா²னா…பே॰… நவங்கி³கோ மக்³கோ³தி இத³ங் அபஞ்ஞத்தங் நாம. வினயபரியாயேன சத்தாரோ பாராஜிகா…பே॰… திங்ஸ நிஸ்ஸக்³கி³யா பாசித்தியாதி இத³ங் பஞ்ஞத்தங் நாம; தயோ பாராஜிகா…பே॰… ஏகத்திங்ஸ நிஸ்ஸக்³கி³யா பாசித்தியாதி இத³ங் அபஞ்ஞத்தங் நாம.
Suttantapariyāyena cattāro satipaṭṭhānā…pe… aṭṭhaṅgiko maggoti idaṃ paññattaṃ nāma; tayo satipaṭṭhānā…pe… navaṅgiko maggoti idaṃ apaññattaṃ nāma. Vinayapariyāyena cattāro pārājikā…pe… tiṃsa nissaggiyā pācittiyāti idaṃ paññattaṃ nāma; tayo pārājikā…pe… ekattiṃsa nissaggiyā pācittiyāti idaṃ apaññattaṃ nāma.
‘‘அனாபத்தி அஜானந்தஸ்ஸ, அதெ²ய்யசித்தஸ்ஸ, ந மரணாதி⁴ப்பாயஸ்ஸ, அனுல்லபனாதி⁴ப்பாயஸ்ஸ, ந மோசனாதி⁴ப்பாயஸ்ஸா’’தி தத்த² தத்த² வுத்தா அனாபத்தி அனாபத்தி நாம. ‘‘ஜானந்தஸ்ஸ, தெ²ய்யசித்தஸ்ஸா’’திஆதி³னா நயேன வுத்தா ஆபத்தி ஆபத்தி நாம. பஞ்சாபத்திக்க²ந்தா⁴ லஹுகாபத்தி நாம, த்³வே ஆபத்திக்க²ந்தா⁴ க³ருகாபத்தி நாம. ச² ஆபத்திக்க²ந்தா⁴ ஸாவஸேஸாபத்தி நாம, ஏகோ பாராஜிகாபத்திக்க²ந்தோ⁴ அனவஸேஸாபத்தி நாம. த்³வே ஆபத்திக்க²ந்தா⁴ து³ட்டு²ல்லாபத்தி நாம, பஞ்சாபத்திக்க²ந்தா⁴ அது³ட்டு²ல்லாபத்தி நாம.
‘‘Anāpatti ajānantassa, atheyyacittassa, na maraṇādhippāyassa, anullapanādhippāyassa, na mocanādhippāyassā’’ti tattha tattha vuttā anāpatti anāpatti nāma. ‘‘Jānantassa, theyyacittassā’’tiādinā nayena vuttā āpatti āpatti nāma. Pañcāpattikkhandhā lahukāpatti nāma, dve āpattikkhandhā garukāpatti nāma. Cha āpattikkhandhā sāvasesāpatti nāma, eko pārājikāpattikkhandho anavasesāpatti nāma. Dve āpattikkhandhā duṭṭhullāpatti nāma, pañcāpattikkhandhā aduṭṭhullāpatti nāma.
புரிமனயேனேவ பனெத்த² வுத்தப்பகாரங் த⁴ம்மங் ‘‘அத⁴ம்மோ அய’’ந்தி கத²யந்தா ‘‘த⁴ம்மங் அத⁴ம்மோ’’தி தீ³பெந்தி நாம. அவினயங் ‘‘வினயோ அய’’ந்தி…பே॰… அது³ட்டு²ல்லாபத்திங் ‘‘து³ட்டு²ல்லாபத்தி அய’’ந்தி கத²யந்தா ‘‘அது³ட்டு²ல்லாபத்திங் து³ட்டு²ல்லாபத்தீ’’தி தீ³பெந்தி நாம. ஏவங் ‘‘அத⁴ம்மங் த⁴ம்மோ’’தி வா…பே॰… ‘‘அது³ட்டு²ல்லாபத்திங் து³ட்டு²ல்லாபத்தீ’’தி வா தீ³பெத்வா பக்க²ங் லபி⁴த்வா சதுன்னங் ஸங்க⁴கம்மானங் அஞ்ஞதரங் ஸங்க⁴கம்மங் ஏகஸீமாயங் விஸுங் கரொந்தேஹி ஸங்கோ⁴ பி⁴ன்னோ நாம ஹோதி. தேன வுத்தங் – ‘‘தே இமேஹி அட்டா²ரஸஹி வத்தூ²ஹி அபகஸ்ஸந்தீ’’திஆதி³.
Purimanayeneva panettha vuttappakāraṃ dhammaṃ ‘‘adhammo aya’’nti kathayantā ‘‘dhammaṃ adhammo’’ti dīpenti nāma. Avinayaṃ ‘‘vinayo aya’’nti…pe… aduṭṭhullāpattiṃ ‘‘duṭṭhullāpatti aya’’nti kathayantā ‘‘aduṭṭhullāpattiṃ duṭṭhullāpattī’’ti dīpenti nāma. Evaṃ ‘‘adhammaṃ dhammo’’ti vā…pe… ‘‘aduṭṭhullāpattiṃ duṭṭhullāpattī’’ti vā dīpetvā pakkhaṃ labhitvā catunnaṃ saṅghakammānaṃ aññataraṃ saṅghakammaṃ ekasīmāyaṃ visuṃ karontehi saṅgho bhinno nāma hoti. Tena vuttaṃ – ‘‘te imehi aṭṭhārasahi vatthūhi apakassantī’’tiādi.
தத்த² அபகஸ்ஸந்தீதி பரிஸங் ஆகட்³ட⁴ந்தி, விஜடெந்தி, ஏகமந்தங் உஸ்ஸாரெந்தி ச. அவபகாஸந்தீதி அதி விய பகாஸெந்தி யதா² விஸங்ஸட்டா²வ ஹொந்தி, ஏவங் கரொந்தி. ஆவேனிந்தி விஸுங். எத்தாவதா கோ² உபாலி ஸங்கோ⁴ பி⁴ன்னோ ஹோதீதி ஏவங் அட்டா²ரஸஸு பே⁴த³கரவத்தூ²ஸு யங்கிஞ்சி ஏகம்பி வத்து²ங் தீ³பெத்வா தேன தேன காரணேன ‘‘இமங் க³ண்ஹத², இமங் ரோசேதா²’’தி ஸஞ்ஞாபெத்வா ஸலாகங் கா³ஹாபெத்வா விஸுங் ஸங்க⁴கம்மே கதே ஸங்கோ⁴ பி⁴ன்னோ ஹோதி. பரிவாரே பன ‘‘பஞ்சஹி உபாலி ஆகாரேஹி ஸங்கோ⁴ பி⁴ஜ்ஜதீ’’திஆதி³ வுத்தங், தஸ்ஸ இமினா இத⁴ வுத்தேன ஸங்க⁴பே⁴த³லக்க²ணேன அத்த²தோ நானாகரணங் நத்தி². தங் பனஸ்ஸ நானாகரணாபா⁴வங் தத்தே²வ பகாஸயிஸ்ஸாம. ஸேஸங் ஸப்³ப³த்த² உத்தானமேவாதி.
Tattha apakassantīti parisaṃ ākaḍḍhanti, vijaṭenti, ekamantaṃ ussārenti ca. Avapakāsantīti ati viya pakāsenti yathā visaṃsaṭṭhāva honti, evaṃ karonti. Āveninti visuṃ. Ettāvatā kho upāli saṅgho bhinno hotīti evaṃ aṭṭhārasasu bhedakaravatthūsu yaṃkiñci ekampi vatthuṃ dīpetvā tena tena kāraṇena ‘‘imaṃ gaṇhatha, imaṃ rocethā’’ti saññāpetvā salākaṃ gāhāpetvā visuṃ saṅghakamme kate saṅgho bhinno hoti. Parivāre pana ‘‘pañcahi upāli ākārehi saṅgho bhijjatī’’tiādi vuttaṃ, tassa iminā idha vuttena saṅghabhedalakkhaṇena atthato nānākaraṇaṃ natthi. Taṃ panassa nānākaraṇābhāvaṃ tattheva pakāsayissāma. Sesaṃ sabbattha uttānamevāti.
உபாலிபஞ்ஹாகதா² நிட்டி²தா.
Upālipañhākathā niṭṭhitā.
ஸங்க⁴பே⁴த³கக்க²ந்த⁴கவண்ணனா நிட்டி²தா.
Saṅghabhedakakkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / உபாலிபஞ்ஹா • Upālipañhā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபாலிபஞ்ஹகதா²வண்ணனா • Upālipañhakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ச²ஸக்யபப்³ப³ஜ்ஜாகதா²வண்ணனா • Chasakyapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபாலிபஞ்ஹாகதா²வண்ணனா • Upālipañhākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / உபாலிபஞ்ஹாகதா² • Upālipañhākathā
