| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
উপালিপঞ্হাকথা
Upālipañhākathā
৩৫১. একতো উপালি একোতি ধম্মৰাদিপক্খে একো। একতো দ্ৰেতি অধম্মৰাদিপক্খে দ্ৰে। চতুত্থো অনুস্সাৰেতীতি সঙ্ঘং ভিন্দিস্সামীতি অধম্মৰাদিচতুত্থো হুত্ৰা অনুস্সাৰেতি; অনুনযন্তো সাৰেতি ‘‘ন তুম্হাকংযেৰ নরকভযং অত্থি, অম্হাকম্পি অত্থি, ন অম্হাকং অৰীচিমগ্গো পিহিতো, ন মযং অকুসলা ন ভাযাম। যদি হি অযং অধম্মো অৰিনযো অসত্থুসাসনং ৰা ভৰেয্য, ন মযং গণ্হেয্যামা’’তিআদিনা নযেন ‘‘অধম্মং ধম্মো’’তি এৰং অট্ঠারস ভেদকরৰত্থূনি বোধেতীতি অত্থো। সলাকং গাহেতীতি এৰং অনুস্সাৰেত্ৰা পন ‘‘ইদং গণ্হথ, ইদং রোচেথা’’তি ৰদন্তো সলাকং গাহেতি।
351.Ekato upāli ekoti dhammavādipakkhe eko. Ekato dveti adhammavādipakkhe dve. Catuttho anussāvetīti saṅghaṃ bhindissāmīti adhammavādicatuttho hutvā anussāveti; anunayanto sāveti ‘‘na tumhākaṃyeva narakabhayaṃ atthi, amhākampi atthi, na amhākaṃ avīcimaggo pihito, na mayaṃ akusalā na bhāyāma. Yadi hi ayaṃ adhammo avinayo asatthusāsanaṃ vā bhaveyya, na mayaṃ gaṇheyyāmā’’tiādinā nayena ‘‘adhammaṃ dhammo’’ti evaṃ aṭṭhārasa bhedakaravatthūni bodhetīti attho. Salākaṃ gāhetīti evaṃ anussāvetvā pana ‘‘idaṃ gaṇhatha, idaṃ rocethā’’ti vadanto salākaṃ gāheti.
একতো উপালি দ্ৰে হোন্তীতিআদীসুপি এসেৰ নযো। এৰং খো উপালি সঙ্ঘরাজি চেৰ হোতি সঙ্ঘভেদো চাতি এৰং হোতি; ন পন এত্তাৰতা সঙ্ঘো ভিন্নো হোতি।
Ekato upāli dve hontītiādīsupi eseva nayo. Evaṃ kho upāli saṅgharāji ceva hoti saṅghabhedo cāti evaṃ hoti; na pana ettāvatā saṅgho bhinno hoti.
ভিক্খু খো উপালি পকতত্তো সমানসংৰাসকো সমানসীমাযং ঠিতো সঙ্ঘং ভিন্দতীতি এত্থ সিযা এৰং ‘‘দেৰদত্তো কথং পকতত্তো’’তি। কথং তাৰ ন পকতত্তো, রঞ্ঞো ঘাতাপিতত্তা রুহিরুপ্পাদস্স চ কতত্তাতি? তত্থ ৰদাম – আণত্তিযা তাৰ ৰিরদ্ধত্তা রঞ্ঞো ঘাতাপনং নত্থি। ‘‘তেন হি ত্ৰং, কুমার, পিতরং হন্ত্ৰা রাজা হোহি, অহং ভগৰন্তং হন্ত্ৰা বুদ্ধো ভৰিস্সামী’’তি এৰঞ্হি তস্স আণত্তি। কুমারো পন রাজা হুত্ৰা পচ্ছা পিতরং মারেসি; এৰং তাৰ আণত্তিযা ৰিরদ্ধত্তা রঞ্ঞো ঘাতাপনং নত্থি। রুহিরুপ্পাদে পন কতমত্তেযেৰ রুহিরুপ্পাদপচ্চযা ভগৰতা অভব্বতা ন ৰুত্তা, ন চ সক্কা ভগৰতো ৰচনং ৰিনাযেৰ তস্স অভব্বতা আরোপেতুং।
Bhikkhu kho upāli pakatatto samānasaṃvāsako samānasīmāyaṃ ṭhito saṅghaṃ bhindatīti ettha siyā evaṃ ‘‘devadatto kathaṃ pakatatto’’ti. Kathaṃ tāva na pakatatto, rañño ghātāpitattā ruhiruppādassa ca katattāti? Tattha vadāma – āṇattiyā tāva viraddhattā rañño ghātāpanaṃ natthi. ‘‘Tena hi tvaṃ, kumāra, pitaraṃ hantvā rājā hohi, ahaṃ bhagavantaṃ hantvā buddho bhavissāmī’’ti evañhi tassa āṇatti. Kumāro pana rājā hutvā pacchā pitaraṃ māresi; evaṃ tāva āṇattiyā viraddhattā rañño ghātāpanaṃ natthi. Ruhiruppāde pana katamatteyeva ruhiruppādapaccayā bhagavatā abhabbatā na vuttā, na ca sakkā bhagavato vacanaṃ vināyeva tassa abhabbatā āropetuṃ.
‘‘রুহিরুপ্পাদকো, ভিক্খৰে, অনুপসম্পন্নো ন উপসম্পাদেতব্বো, উপসম্পন্নো নাসেতব্বো’’তি –
‘‘Ruhiruppādako, bhikkhave, anupasampanno na upasampādetabbo, upasampanno nāsetabbo’’ti –
ইদং পন ভগৰতা সঙ্ঘভেদতো পচ্ছা ৰুত্তং, তস্মা পকতত্তেনেৰ তেন সঙ্ঘো ভিন্নোতি।
Idaṃ pana bhagavatā saṅghabhedato pacchā vuttaṃ, tasmā pakatatteneva tena saṅgho bhinnoti.
অধম্মং ধম্মোতি দীপেন্তীতিআদীসু অট্ঠারসসু ভেদকরৰত্থূসু সুত্তন্তপরিযাযেন তাৰ দস কুসলকম্মপথা ধম্মো, দস অকুসলকম্মপথা অধম্মো। তথা চত্তারো সতিপট্ঠানা, চত্তারো সম্মপ্পধানা, চত্তারো ইদ্ধিপাদা, পঞ্চিন্দ্রিযানি, পঞ্চ বলানি, সত্ত বোজ্ঝঙ্গা, অরিযো অট্ঠঙ্গিকো মগ্গোতি সত্ততিংস বোধিপক্খিযধম্মা ধম্মো নাম; তযো সতিপট্ঠানা , তযো সম্মপ্পধানা, তযো ইদ্ধিপাদা, ছ ইন্দ্রিযানি, ছ বলানি, অট্ঠ বোজ্ঝঙ্গা, নৰঙ্গিকো মগ্গোতি চ চত্তারো উপাদানা, পঞ্চ নীৰরণা, সত্ত অনুসযা, অট্ঠ মিচ্ছত্তাতি চ অযং অধম্মো।
Adhammaṃ dhammoti dīpentītiādīsu aṭṭhārasasu bhedakaravatthūsu suttantapariyāyena tāva dasa kusalakammapathā dhammo, dasa akusalakammapathā adhammo. Tathā cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggoti sattatiṃsa bodhipakkhiyadhammā dhammo nāma; tayo satipaṭṭhānā , tayo sammappadhānā, tayo iddhipādā, cha indriyāni, cha balāni, aṭṭha bojjhaṅgā, navaṅgiko maggoti ca cattāro upādānā, pañca nīvaraṇā, satta anusayā, aṭṭha micchattāti ca ayaṃ adhammo.
তত্থ যংকিঞ্চি একং অধম্মকোট্ঠাসং গহেত্ৰা ‘‘ইমং অধম্মং ধম্মোতি করিস্সাম; এৰং অম্হাকং আচরিযকুলং নিস্সায নিয্যানিকং ভৰিস্সতি, মযঞ্চ লোকে পাকটা ভৰিস্সামা’’তি তং অধম্মং ‘‘ধম্মো অয’’ন্তি কথযন্তা অধম্মং ধম্মোতি দীপেন্তি নাম। তথেৰ ধম্মকোট্ঠাসেসু চ একং গহেত্ৰা অযং অধম্মোতি কথেন্তা ধম্মং অধম্মোতি দীপেন্তি নাম। ৰিনযপরিযাযেন পন ভূতেন ৰত্থুনা চোদেত্ৰা সারেত্ৰা যথাপটিঞ্ঞায কাতব্বং কম্মং ধম্মো নাম, অভূতেন ৰত্থুনা অচোদেত্ৰা অসারেত্ৰা অপটিঞ্ঞায কাতব্বং কম্মং অধম্মো নাম।
Tattha yaṃkiñci ekaṃ adhammakoṭṭhāsaṃ gahetvā ‘‘imaṃ adhammaṃ dhammoti karissāma; evaṃ amhākaṃ ācariyakulaṃ nissāya niyyānikaṃ bhavissati, mayañca loke pākaṭā bhavissāmā’’ti taṃ adhammaṃ ‘‘dhammo aya’’nti kathayantā adhammaṃ dhammoti dīpenti nāma. Tatheva dhammakoṭṭhāsesu ca ekaṃ gahetvā ayaṃ adhammoti kathentā dhammaṃ adhammoti dīpenti nāma. Vinayapariyāyena pana bhūtena vatthunā codetvā sāretvā yathāpaṭiññāya kātabbaṃ kammaṃ dhammo nāma, abhūtena vatthunā acodetvā asāretvā apaṭiññāya kātabbaṃ kammaṃ adhammo nāma.
সুত্তন্তপরিযাযেন রাগৰিনযো দোসৰিনযো মোহৰিনযো সংৰরো পহানং পটিসঙ্খাতি অযং ৰিনযো নাম, রাগাদীনং অৰিনযো অসংৰরো অপ্পহানং অপ্পটিসঙ্খাতি অযং অৰিনযো নাম। ৰিনযপরিযাযেন ৰত্থুসম্পত্তি ঞত্তিসম্পত্তি অনুস্সাৰনসম্পত্তি সীমাসম্পত্তি পরিসাসম্পত্তীতি অযং ৰিনযো নাম, ৰত্থুৰিপত্তি…পে॰… পরিসাৰিপত্তীতি অযং অৰিনযো নাম।
Suttantapariyāyena rāgavinayo dosavinayo mohavinayo saṃvaro pahānaṃ paṭisaṅkhāti ayaṃ vinayo nāma, rāgādīnaṃ avinayo asaṃvaro appahānaṃ appaṭisaṅkhāti ayaṃ avinayo nāma. Vinayapariyāyena vatthusampatti ñattisampatti anussāvanasampatti sīmāsampatti parisāsampattīti ayaṃ vinayo nāma, vatthuvipatti…pe… parisāvipattīti ayaṃ avinayo nāma.
সুত্তন্তপরিযাযেন চত্তারো সতিপট্ঠানা… অট্ঠঙ্গিকো মগ্গোতি ইদং ভাসিতং লপিতং তথাগতেন ; তযো সতিপট্ঠানা, তযো সম্মপ্পধানা, তযো ইদ্ধিপাদা, ছ ইন্দ্রিযানি, ছ বলানি, অট্ঠ বোজ্ঝঙ্গা, নৰঙ্গিকো মগ্গোতি ইদং অভাসিতং অলপিতং তথাগতেন। ৰিনযপরিযাযেন চত্তারো পারাজিকা, তেরস সঙ্ঘাদিসেসা, দ্ৰে অনিযতা, তিংস নিস্সগ্গিযা পাচিত্তিযাতি ইদং ভাসিতং লপিতং তথাগতেন; তযো পারাজিকা, চুদ্দস সঙ্ঘাদিসেসা, তযো অনিযতা, একত্তিংস নিস্সগ্গিযা পাচিত্তিযাতি ইদং অভাসিতং অলপিতং তথাগতেন।
Suttantapariyāyena cattāro satipaṭṭhānā… aṭṭhaṅgiko maggoti idaṃ bhāsitaṃ lapitaṃ tathāgatena ; tayo satipaṭṭhānā, tayo sammappadhānā, tayo iddhipādā, cha indriyāni, cha balāni, aṭṭha bojjhaṅgā, navaṅgiko maggoti idaṃ abhāsitaṃ alapitaṃ tathāgatena. Vinayapariyāyena cattāro pārājikā, terasa saṅghādisesā, dve aniyatā, tiṃsa nissaggiyā pācittiyāti idaṃ bhāsitaṃ lapitaṃ tathāgatena; tayo pārājikā, cuddasa saṅghādisesā, tayo aniyatā, ekattiṃsa nissaggiyā pācittiyāti idaṃ abhāsitaṃ alapitaṃ tathāgatena.
সুত্তন্তপরিযাযেন দেৰসিকং ফলসমাপত্তিসমাপজ্জনং, মহাকরুণাসমাপত্তিসমাপজ্জনং, বুদ্ধচক্খুনা লোকৰোলোকনং, অট্ঠুপ্পত্তিৰসেন সুত্তন্তদেসনা, জাতককথাতি ইদং আচিণ্ণং; ন দেৰসিকং ফলসমাপত্তিসমাপজ্জনং…পে॰… ন জাতককথাতি ইদং অনাচিণ্ণং। ৰিনযপরিযাযেন নিমন্তিতস্স ৰস্সাৰাসং ৰসিত্ৰা অপলোকেত্ৰা চারিযপক্কমনং, পৰারেত্ৰা চারিযপক্কমনং, আগন্তুকেহি সদ্ধিং পঠমং পটিসন্থারকরণন্তি ইদং আচিণ্ণং; তস্সেৰ আচিণ্ণস্স অকরণং অনাচিণ্ণং নাম।
Suttantapariyāyena devasikaṃ phalasamāpattisamāpajjanaṃ, mahākaruṇāsamāpattisamāpajjanaṃ, buddhacakkhunā lokavolokanaṃ, aṭṭhuppattivasena suttantadesanā, jātakakathāti idaṃ āciṇṇaṃ; na devasikaṃ phalasamāpattisamāpajjanaṃ…pe… na jātakakathāti idaṃ anāciṇṇaṃ. Vinayapariyāyena nimantitassa vassāvāsaṃ vasitvā apaloketvā cāriyapakkamanaṃ, pavāretvā cāriyapakkamanaṃ, āgantukehi saddhiṃ paṭhamaṃ paṭisanthārakaraṇanti idaṃ āciṇṇaṃ; tasseva āciṇṇassa akaraṇaṃ anāciṇṇaṃ nāma.
সুত্তন্তপরিযাযেন চত্তারো সতিপট্ঠানা…পে॰… অট্ঠঙ্গিকো মগ্গোতি ইদং পঞ্ঞত্তং নাম; তযো সতিপট্ঠানা…পে॰… নৰঙ্গিকো মগ্গোতি ইদং অপঞ্ঞত্তং নাম। ৰিনযপরিযাযেন চত্তারো পারাজিকা…পে॰… তিংস নিস্সগ্গিযা পাচিত্তিযাতি ইদং পঞ্ঞত্তং নাম; তযো পারাজিকা…পে॰… একত্তিংস নিস্সগ্গিযা পাচিত্তিযাতি ইদং অপঞ্ঞত্তং নাম।
Suttantapariyāyena cattāro satipaṭṭhānā…pe… aṭṭhaṅgiko maggoti idaṃ paññattaṃ nāma; tayo satipaṭṭhānā…pe… navaṅgiko maggoti idaṃ apaññattaṃ nāma. Vinayapariyāyena cattāro pārājikā…pe… tiṃsa nissaggiyā pācittiyāti idaṃ paññattaṃ nāma; tayo pārājikā…pe… ekattiṃsa nissaggiyā pācittiyāti idaṃ apaññattaṃ nāma.
‘‘অনাপত্তি অজানন্তস্স, অথেয্যচিত্তস্স, ন মরণাধিপ্পাযস্স, অনুল্লপনাধিপ্পাযস্স, ন মোচনাধিপ্পাযস্সা’’তি তত্থ তত্থ ৰুত্তা অনাপত্তি অনাপত্তি নাম। ‘‘জানন্তস্স, থেয্যচিত্তস্সা’’তিআদিনা নযেন ৰুত্তা আপত্তি আপত্তি নাম। পঞ্চাপত্তিক্খন্ধা লহুকাপত্তি নাম, দ্ৰে আপত্তিক্খন্ধা গরুকাপত্তি নাম। ছ আপত্তিক্খন্ধা সাৰসেসাপত্তি নাম, একো পারাজিকাপত্তিক্খন্ধো অনৰসেসাপত্তি নাম। দ্ৰে আপত্তিক্খন্ধা দুট্ঠুল্লাপত্তি নাম, পঞ্চাপত্তিক্খন্ধা অদুট্ঠুল্লাপত্তি নাম।
‘‘Anāpatti ajānantassa, atheyyacittassa, na maraṇādhippāyassa, anullapanādhippāyassa, na mocanādhippāyassā’’ti tattha tattha vuttā anāpatti anāpatti nāma. ‘‘Jānantassa, theyyacittassā’’tiādinā nayena vuttā āpatti āpatti nāma. Pañcāpattikkhandhā lahukāpatti nāma, dve āpattikkhandhā garukāpatti nāma. Cha āpattikkhandhā sāvasesāpatti nāma, eko pārājikāpattikkhandho anavasesāpatti nāma. Dve āpattikkhandhā duṭṭhullāpatti nāma, pañcāpattikkhandhā aduṭṭhullāpatti nāma.
পুরিমনযেনেৰ পনেত্থ ৰুত্তপ্পকারং ধম্মং ‘‘অধম্মো অয’’ন্তি কথযন্তা ‘‘ধম্মং অধম্মো’’তি দীপেন্তি নাম। অৰিনযং ‘‘ৰিনযো অয’’ন্তি…পে॰… অদুট্ঠুল্লাপত্তিং ‘‘দুট্ঠুল্লাপত্তি অয’’ন্তি কথযন্তা ‘‘অদুট্ঠুল্লাপত্তিং দুট্ঠুল্লাপত্তী’’তি দীপেন্তি নাম। এৰং ‘‘অধম্মং ধম্মো’’তি ৰা…পে॰… ‘‘অদুট্ঠুল্লাপত্তিং দুট্ঠুল্লাপত্তী’’তি ৰা দীপেত্ৰা পক্খং লভিত্ৰা চতুন্নং সঙ্ঘকম্মানং অঞ্ঞতরং সঙ্ঘকম্মং একসীমাযং ৰিসুং করোন্তেহি সঙ্ঘো ভিন্নো নাম হোতি। তেন ৰুত্তং – ‘‘তে ইমেহি অট্ঠারসহি ৰত্থূহি অপকস্সন্তী’’তিআদি।
Purimanayeneva panettha vuttappakāraṃ dhammaṃ ‘‘adhammo aya’’nti kathayantā ‘‘dhammaṃ adhammo’’ti dīpenti nāma. Avinayaṃ ‘‘vinayo aya’’nti…pe… aduṭṭhullāpattiṃ ‘‘duṭṭhullāpatti aya’’nti kathayantā ‘‘aduṭṭhullāpattiṃ duṭṭhullāpattī’’ti dīpenti nāma. Evaṃ ‘‘adhammaṃ dhammo’’ti vā…pe… ‘‘aduṭṭhullāpattiṃ duṭṭhullāpattī’’ti vā dīpetvā pakkhaṃ labhitvā catunnaṃ saṅghakammānaṃ aññataraṃ saṅghakammaṃ ekasīmāyaṃ visuṃ karontehi saṅgho bhinno nāma hoti. Tena vuttaṃ – ‘‘te imehi aṭṭhārasahi vatthūhi apakassantī’’tiādi.
তত্থ অপকস্সন্তীতি পরিসং আকড্ঢন্তি, ৰিজটেন্তি, একমন্তং উস্সারেন্তি চ। অৰপকাসন্তীতি অতি ৰিয পকাসেন্তি যথা ৰিসংসট্ঠাৰ হোন্তি, এৰং করোন্তি। আৰেনিন্তি ৰিসুং। এত্তাৰতা খো উপালি সঙ্ঘো ভিন্নো হোতীতি এৰং অট্ঠারসসু ভেদকরৰত্থূসু যংকিঞ্চি একম্পি ৰত্থুং দীপেত্ৰা তেন তেন কারণেন ‘‘ইমং গণ্হথ, ইমং রোচেথা’’তি সঞ্ঞাপেত্ৰা সলাকং গাহাপেত্ৰা ৰিসুং সঙ্ঘকম্মে কতে সঙ্ঘো ভিন্নো হোতি। পরিৰারে পন ‘‘পঞ্চহি উপালি আকারেহি সঙ্ঘো ভিজ্জতী’’তিআদি ৰুত্তং, তস্স ইমিনা ইধ ৰুত্তেন সঙ্ঘভেদলক্খণেন অত্থতো নানাকরণং নত্থি। তং পনস্স নানাকরণাভাৰং তত্থেৰ পকাসযিস্সাম। সেসং সব্বত্থ উত্তানমেৰাতি।
Tattha apakassantīti parisaṃ ākaḍḍhanti, vijaṭenti, ekamantaṃ ussārenti ca. Avapakāsantīti ati viya pakāsenti yathā visaṃsaṭṭhāva honti, evaṃ karonti. Āveninti visuṃ. Ettāvatā kho upāli saṅgho bhinno hotīti evaṃ aṭṭhārasasu bhedakaravatthūsu yaṃkiñci ekampi vatthuṃ dīpetvā tena tena kāraṇena ‘‘imaṃ gaṇhatha, imaṃ rocethā’’ti saññāpetvā salākaṃ gāhāpetvā visuṃ saṅghakamme kate saṅgho bhinno hoti. Parivāre pana ‘‘pañcahi upāli ākārehi saṅgho bhijjatī’’tiādi vuttaṃ, tassa iminā idha vuttena saṅghabhedalakkhaṇena atthato nānākaraṇaṃ natthi. Taṃ panassa nānākaraṇābhāvaṃ tattheva pakāsayissāma. Sesaṃ sabbattha uttānamevāti.
উপালিপঞ্হাকথা নিট্ঠিতা।
Upālipañhākathā niṭṭhitā.
সঙ্ঘভেদকক্খন্ধকৰণ্ণনা নিট্ঠিতা।
Saṅghabhedakakkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / উপালিপঞ্হা • Upālipañhā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উপালিপঞ্হকথাৰণ্ণনা • Upālipañhakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপালিপঞ্হাকথাৰণ্ণনা • Upālipañhākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / উপালিপঞ্হাকথা • Upālipañhākathā
