| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
ဥပာလိပဉ္ဟာကထာ
Upālipañhākathā
၃၅၁. ဧကတောတိ ဧတ္ထ တောပစ္စယသ္သ သတ္တမ္ယတ္ထေ ပဝတ္တဘာဝံ ဒသ္သေန္တော အာဟ ‘‘ဓမ္မဝာဒီပက္ခေ’’တိ။ ‘‘အနုနယန္တော’’တိ ဣမိနာ အနုသ္သာဝေတီတိ ဧတ္ထ အနုသဒ္ဒသ္သ အတ္ထံ ဒသ္သေတိ။ အနုနယန္တောတိ ပုနပ္ပုနံ နယန္တော။ သာဝနာကာရံ ဒသ္သေန္တော အာဟ ‘‘န တုမ္ဟာကံယေဝာ’’တိအာဒိ။ အယံ အဓမ္မော ဝာ အယံ အဝိနယော ဝာ ဣဒံ အသတ္ထုသာသနံ ဝာ ယဒိ ဘဝေယ္ယာတိ ယောဇနာ။ ‘‘ဗောဓေတီ’’တိ ဣမိနာ သာဝေတီတိ ဧတ္ထ သုဓာတုယာ အတ္ထံ ဒသ္သေတိ။ ‘‘အနုသ္သာဝေတ္ဝာ’’တိ ဣမိနာ ‘‘အနုသ္သာဝေတိ, သလာကံ ဂာဟေတီ’’တိ ဧတ္ထ အနုသ္သာဝနကိရိယာ ပုဗ္ဗဘာဂေ ပဝတ္တာ, သလာကဂ္ဂာဟကိရိယာ ပစ္ဆာဘာဂေတိ ဒသ္သေတိ။
351.Ekatoti ettha topaccayassa sattamyatthe pavattabhāvaṃ dassento āha ‘‘dhammavādīpakkhe’’ti. ‘‘Anunayanto’’ti iminā anussāvetīti ettha anusaddassa atthaṃ dasseti. Anunayantoti punappunaṃ nayanto. Sāvanākāraṃ dassento āha ‘‘na tumhākaṃyevā’’tiādi. Ayaṃ adhammo vā ayaṃ avinayo vā idaṃ asatthusāsanaṃ vā yadi bhaveyyāti yojanā. ‘‘Bodhetī’’ti iminā sāvetīti ettha sudhātuyā atthaṃ dasseti. ‘‘Anussāvetvā’’ti iminā ‘‘anussāveti, salākaṃ gāhetī’’ti ettha anussāvanakiriyā pubbabhāge pavattā, salākaggāhakiriyā pacchābhāgeti dasseti.
ဧတ္တာဝတာတိ ဧတ္တကေန အနုသ္သာဝနသလာကဂ္ဂာဟမတ္တေန။ န ပန သင္ဃော ဘိန္နော ဟောတိ, အနုသ္သာဝေတ္ဝာ သလာကံ ဂာဟေတ္ဝာ အာဝေဏိကံ သင္ဃကမ္မေ ကတေယေဝ သင္ဃော ဘိန္နော ဟောတီတိ အဓိပ္ပာယော။
Ettāvatāti ettakena anussāvanasalākaggāhamattena. Na pana saṅgho bhinno hoti, anussāvetvā salākaṃ gāhetvā āveṇikaṃ saṅghakamme kateyeva saṅgho bhinno hotīti adhippāyo.
ဧတ္ထ ဌတ္ဝာ ကသ္သစိ စောဒကသ္သ အနုယောဂော သိယာတိ ယောဇနာ။ ကိန္တိ သိယာတိ အာဟ ‘‘ဧဝံ ဒေဝဒတ္တော’’တိအာဒိ။ တတ္ထ ဧဝန္တိ ပကတတ္တေ သင္ဃေ ဘိန္ဒေ သတီတိ အတ္ထော။ ကထန္တိ ကေနာကာရေန။ ပုန ကထန္တိ ကသ္မာ ကာရဏာ။ ရညောတိ အဇာတသတ္တုရညော, ကာရိတကမ္မံ။ ‘‘ဃာတာပိတတ္တာ’’တိ ဗိမ္ဗိသာရရာဇာနံ ဃာတာပိတတ္တာ။ တတ္ထာတိ ‘‘ဘိက္ခု ခော ဥပာလီ’’တိအာဒိဝစနေ, ဌတ္ဝာ ပရိဟာရံ ဝဒာမာတိ ယောဇနာ။ ဝိရဒ္ဓတ္တာတိ ဝိရာဓိတတ္တာ။ တမတ္ထံ ဝိတ္ထာရေန္တော အာဟ ‘‘တေန ဟီ’’တိအာဒိ။ တတ္ထ တေန ဟီတိ ဥယ္ယောဇနတ္ထေ နိပာတော။ ဧဝဉ္ဟီတိ ဧဝမေဝ။ တသ္သာတိ ဒေဝဒတ္တသ္သ။ ကုမာရော ပနာတိ အဇာတသတ္တုကုမာရော ပန, ကတမတ္တေယေဝ န ဝုတ္တာတိ သမ္ဗန္ဓော။ တသ္သာတိ ဒေဝဒတ္တသ္သ။ တသ္မာတိ ယသ္မာ သင္ဃဘေဒတော ပုဗ္ဗေ ရုဟိတုပ္ပာဒကမ္မံ ကရောန္တသ္သာပိ ပစ္ဆာ အဘဗ္ဗဘာဝော ရောပိတော, တသ္မာ။
Ettha ṭhatvā kassaci codakassa anuyogo siyāti yojanā. Kinti siyāti āha ‘‘evaṃ devadatto’’tiādi. Tattha evanti pakatatte saṅghe bhinde satīti attho. Kathanti kenākārena. Puna kathanti kasmā kāraṇā. Raññoti ajātasatturañño, kāritakammaṃ. ‘‘Ghātāpitattā’’ti bimbisārarājānaṃ ghātāpitattā. Tatthāti ‘‘bhikkhu kho upālī’’tiādivacane, ṭhatvā parihāraṃ vadāmāti yojanā. Viraddhattāti virādhitattā. Tamatthaṃ vitthārento āha ‘‘tena hī’’tiādi. Tattha tena hīti uyyojanatthe nipāto. Evañhīti evameva. Tassāti devadattassa. Kumāro panāti ajātasattukumāro pana, katamatteyeva na vuttāti sambandho. Tassāti devadattassa. Tasmāti yasmā saṅghabhedato pubbe ruhituppādakammaṃ karontassāpi pacchā abhabbabhāvo ropito, tasmā.
ဘေဒကရဝတ္ထူသု ဧဝံ ဝိနိစ္ဆယော ဝေဒိတဗ္ဗောတိ ယောဇနာ။ ဓမ္မာဓမ္မာဒီနံ သုတ္တန္တဝိနယပရိယာယေန ဝိသေသံ ဒသ္သေန္တော အာဟ ‘‘သုတ္တန္တပရိယာယေနာ’’တိအာဒိ။ တတ္ထ သုတ္တန္တပရိယာယေနာတိ သုတ္တန္တဒေသနာယ, သုတ္တန္တဒေသနာနယတောတိ ဝုတ္တံ ဟောတိ။ တထာတိ တတော အညထာ။
Bhedakaravatthūsu evaṃ vinicchayo veditabboti yojanā. Dhammādhammādīnaṃ suttantavinayapariyāyena visesaṃ dassento āha ‘‘suttantapariyāyenā’’tiādi. Tattha suttantapariyāyenāti suttantadesanāya, suttantadesanānayatoti vuttaṃ hoti. Tathāti tato aññathā.
တတ္ထာတိ ဒ္ဝီသု ဓမ္မာဓမ္မေသု။ ဧဝံ အမ္ဟာကန္တိ ဧဝံ ကရိယမာနေ အမ္ဟာကံ။ ဧဝံ သုတ္တန္တပရိယာယေန ဓမ္မာဓမ္မာနံ ဝိသေသံ ဒသ္သေတ္ဝာ ဣဒာနိ ဝိနယပရိယာယေန တေသံ တံ ဒသ္သေန္တော အာဟ ‘‘ဝိနယပရိယာယေန ပနာ’’တိအာဒိ။ ဘူတေန ဝတ္ထုနာ ကာတဗ္ဗန္တိ သမ္ဗန္ဓော။ ဧဝံ ‘‘အဘူတေန ဝတ္ထုနာ’’တိ ဧတ္ထာပိ။
Tatthāti dvīsu dhammādhammesu. Evaṃ amhākanti evaṃ kariyamāne amhākaṃ. Evaṃ suttantapariyāyena dhammādhammānaṃ visesaṃ dassetvā idāni vinayapariyāyena tesaṃ taṃ dassento āha ‘‘vinayapariyāyena panā’’tiādi. Bhūtena vatthunā kātabbanti sambandho. Evaṃ ‘‘abhūtena vatthunā’’ti etthāpi.
ဧဝံ ဒ္ဝိန္နံ ပရိယာယာနံ ဝသေန ဓမ္မာဓမ္မဒုကသ္သ ဝိသေသံ ဒသ္သေတ္ဝာ ဣဒာနိ ဝိနယာဝိနယဒုကသ္သ ဝိသေသံ ဒသ္သေန္တော အာဟ ‘‘သုတ္တန္တပရိယာယေနာ’’တိအာဒိ ။ တတ္ထ သုတ္တန္တနယေန ရာဂာဒယော ဝိနေတီတိ ဝိနယော, ဝိနယနယေန ကာယံ ဝာစံ ဝိနေတီတိ ဝိနယောတိ ဝစနတ္ထော ကာတဗ္ဗော။
Evaṃ dvinnaṃ pariyāyānaṃ vasena dhammādhammadukassa visesaṃ dassetvā idāni vinayāvinayadukassa visesaṃ dassento āha ‘‘suttantapariyāyenā’’tiādi . Tattha suttantanayena rāgādayo vinetīti vinayo, vinayanayena kāyaṃ vācaṃ vinetīti vinayoti vacanattho kātabbo.
ဧဝံ ဒ္ဝိန္နံ ပရိယာယာနံ ဝသေန ဝိနယာဝိနယဒုကသ္သ ဝိသေသံ ဒသ္သေတ္ဝာ ဣဒာနိ ဘာသိတာဘာသိတဒုကသ္သ ဝိသေသံ ဒသ္သေန္တော အာဟ ‘‘သုတ္တန္တပရိယာယေန စတ္တာရော သတိပဋ္ဌာနာ’’တိအာဒိ။ တတ္ထ ‘‘အဋ္ဌင္ဂိကော မဂ္ဂော’’တိ ဣဒံ ဝစနံ တထာဂတေန ဘာသိတံ လပိတန္တိ ယောဇနာ။
Evaṃ dvinnaṃ pariyāyānaṃ vasena vinayāvinayadukassa visesaṃ dassetvā idāni bhāsitābhāsitadukassa visesaṃ dassento āha ‘‘suttantapariyāyena cattāro satipaṭṭhānā’’tiādi. Tattha ‘‘aṭṭhaṅgiko maggo’’ti idaṃ vacanaṃ tathāgatena bhāsitaṃ lapitanti yojanā.
ဧဝံ ဒ္ဝိန္နံ ပရိယာယာနံ ဝသေန ဘာသိတာဘာသိတဒုကသ္သ ဝိသေသံ ဒသ္သေတ္ဝာ ဣဒာနိ အာစိဏ္ဏာနာစိဏ္ဏဒုကသ္သ ဝိသေသံ ဒသ္သေန္တော အာဟ ‘‘သုတ္တန္တပရိယာယေန ဒေဝသိက’’န္တိအာဒိ။ တတ္ထ ‘‘ဒေဝသိက’’န္တိ ပဒံ ‘‘သမာပဇ္ဇနံ, ဝောလောကန’’န္တိ တီသုယေဝ ပဒေသု ယောဇေတဗ္ဗံ။ အဋ္ဌုပ္ပတ္တိဝသေနာတိ ကာရဏုပ္ပတ္တိဝသေန။ ကာရဏဉ္ဟိ အရတိ ဖလံ ဧတသ္မာတိ အတ္ထောတိ ဝုစ္စတိ, အတ္ထသ္သ ဥပ္ပတ္တိ အတ္ထုပ္ပတ္တိ, သာယေဝ အဋ္ဌုပ္ပတ္တိ တ္ထကာရသ္သ ဋ္ဌကာရံ ကတ္ဝာ, အဋ္ဌုပ္ပတ္တိယာ ဝသော အဋ္ဌုပ္ပတ္တိဝသော, တေန။ ဣဒံ ပဒံ ‘‘သုတ္တန္တဒေသနာ ဇာတကကထာ’’တိ ဒ္ဝီဟိပိ ပဒေဟိ ယောဇေတဗ္ဗံ။ ဣဒန္တိ ဖလသမာပတ္တိသမာပဇ္ဇနာဒိ။ အာစိဏ္ဏန္တိ အာ ဗန္ဓိတံ, ပုနပ္ပုနံ ဝာ ဥပစိတံ ဝဍ္ဎိတံ, ပဂုဏံ ဝာ။ စာရိယပက္ကမနန္တိ စာရိယတ္ထံ ပက္ကမနံ။
Evaṃ dvinnaṃ pariyāyānaṃ vasena bhāsitābhāsitadukassa visesaṃ dassetvā idāni āciṇṇānāciṇṇadukassa visesaṃ dassento āha ‘‘suttantapariyāyena devasika’’ntiādi. Tattha ‘‘devasika’’nti padaṃ ‘‘samāpajjanaṃ, volokana’’nti tīsuyeva padesu yojetabbaṃ. Aṭṭhuppattivasenāti kāraṇuppattivasena. Kāraṇañhi arati phalaṃ etasmāti atthoti vuccati, atthassa uppatti atthuppatti, sāyeva aṭṭhuppatti tthakārassa ṭṭhakāraṃ katvā, aṭṭhuppattiyā vaso aṭṭhuppattivaso, tena. Idaṃ padaṃ ‘‘suttantadesanā jātakakathā’’ti dvīhipi padehi yojetabbaṃ. Idanti phalasamāpattisamāpajjanādi. Āciṇṇanti ā bandhitaṃ, punappunaṃ vā upacitaṃ vaḍḍhitaṃ, paguṇaṃ vā. Cāriyapakkamananti cāriyatthaṃ pakkamanaṃ.
ဧဝံ ဒ္ဝိန္နံ ပရိယာယာနံ ဝသေန အာစိဏ္ဏာနာစိဏ္ဏဒုကသ္သ ဝိသေသံ ဒသ္သေတ္ဝာ ဣဒာနိ ပညတ္တဒုကသ္သ ဝိသေသံ ဒသ္သေန္တော အာဟ ‘‘သုတ္တန္တပရိယာယေန စတ္တာရော သတိပဋ္ဌာနာ’’တိအာဒိ။ တံ ဘာသိတာဘာသိတဒုကသဒိသမေဝ။ ဧဝံ ဒ္ဝိန္နံ သုတ္တန္တဝိနယပရိယာယာနံ ဝသေန ပဉ္စန္နံ ဒုကာနံ ဝိသေသော ဒသ္သိတော။
Evaṃ dvinnaṃ pariyāyānaṃ vasena āciṇṇānāciṇṇadukassa visesaṃ dassetvā idāni paññattadukassa visesaṃ dassento āha ‘‘suttantapariyāyena cattāro satipaṭṭhānā’’tiādi. Taṃ bhāsitābhāsitadukasadisameva. Evaṃ dvinnaṃ suttantavinayapariyāyānaṃ vasena pañcannaṃ dukānaṃ viseso dassito.
အာပတ္တာနာပတ္တိဒုကေ ‘‘န မောစနာဓိပ္ပာယသ္သာ’’တိ ပာဌသ္သ အနန္တရေ ပစ္ဆိမဝာက္ယေ ဌိတော အာဒိသဒ္ဒော အာနေတဗ္ဗော။ ဣတိ အာဒိနာ နယေနာတိ ဟိ အတ္ထော။ တတ္ထ တတ္ထာတိ တသ္မိံ တသ္မိံ သိက္ခာပဒေ။ ဣဒံ ပဒံ ပစ္ဆိမဝာက္ယေပိ အနုဝတ္တေတဗ္ဗံ။
Āpattānāpattiduke ‘‘na mocanādhippāyassā’’ti pāṭhassa anantare pacchimavākye ṭhito ādisaddo ānetabbo. Iti ādinā nayenāti hi attho. Tattha tatthāti tasmiṃ tasmiṃ sikkhāpade. Idaṃ padaṃ pacchimavākyepi anuvattetabbaṃ.
လဟုကဂရုကဒုကေ ပဉ္စာပတ္တိက္ခန္ဓာတိ ထုလ္လစ္စယပာစိတ္တိယပာဋိဒေသနီယဒုက္ကဋဒုဗ္ဘာသိတဝသေန ပဉ္စ အာပတ္တိရာသယော။ ဒ္ဝေ အာပတ္တိက္ခန္ဓာတိ ပာရာဇိကသင္ဃာဒိသေသဝသေန ဒ္ဝေ အာပတ္တိရာသယော။
Lahukagarukaduke pañcāpattikkhandhāti thullaccayapācittiyapāṭidesanīyadukkaṭadubbhāsitavasena pañca āpattirāsayo. Dve āpattikkhandhāti pārājikasaṅghādisesavasena dve āpattirāsayo.
သာဝသေသာနာဝသေသဒုကေ ဆ အာပတ္တိက္ခန္ဓာတိ ပာရာဇိကာပတ္တိတော အဝသေသာ ဆ အာပတ္တိရာသယော။
Sāvasesānāvasesaduke cha āpattikkhandhāti pārājikāpattito avasesā cha āpattirāsayo.
ဒုဋ္ဌုလ္လာဒုဋ္ဌုလ္လဒုကေ လဟုကဂရုကဒုကသဒိသမေဝ။ အယံ ပန ဝိသေသော – ဂရုကာပတ္တိ ဒုဋ္ဌုလ္လာ နာမ , လဟုကာပတ္တိ အဒုဋ္ဌုလ္လာ နာမာတိ ဧဝံ ဝိနယပရိယာယဝသေနေဝ စတုန္နံ ဒုကာနံ ဝိသေသော ဒသ္သိတော။
Duṭṭhullāduṭṭhulladuke lahukagarukadukasadisameva. Ayaṃ pana viseso – garukāpatti duṭṭhullā nāma , lahukāpatti aduṭṭhullā nāmāti evaṃ vinayapariyāyavaseneva catunnaṃ dukānaṃ viseso dassito.
ဧတ္ထာတိ ‘‘အဓမ္မံ ဓမ္မောတိ ဒီပေန္တီ’’တိအာဒိဝစနေ။ စတုန္နံ သင္ဃကမ္မာနန္တိ အပလောကနာဒိဝသေန စတုန္နံ သင္ဃကမ္မာနံ။ ကရောန္တေဟိ ဟေတုဘူတေဟိ, ဟေတ္ဝတ္ထေ စေတံ ကရဏဝစနံ။
Etthāti ‘‘adhammaṃ dhammoti dīpentī’’tiādivacane. Catunnaṃ saṅghakammānanti apalokanādivasena catunnaṃ saṅghakammānaṃ. Karontehi hetubhūtehi, hetvatthe cetaṃ karaṇavacanaṃ.
တတ္ထာတိ ‘‘တေ ဣမေဟီ’’တိအာဒိဝစနေ။ အပကသ္သန္တီတိ ဧတ္ထ ကသဓာတုသ္သ ဂတ္ယတ္ထံ ဒသ္သေန္တော အာဟ ‘‘ပရိသံ အာကဍ္ဎန္တီ’’တိ။ ဝိဇဋေန္တီတိ ဝိဇဋံ ကရောန္တိ, ဝိသုံ ကရောန္တီတိ အတ္ထော။ ဧကမန္တံ ဥသ္သာဒေန္တီတိ ဧကသ္မိံ အန္တေ ဥသ္သဒံ ကရောန္တိ။ အဝပကသ္သန္တီတိ ဧတ္ထ ဒ္ဝိန္နံ ဥပသဂ္ဂာနံ ဝသေန အတိဝိယတ္ထော ဒဋ္ဌဗ္ဗောတိ အာဟ ‘‘အတိ ဝိယ အာကဍ္ဎန္တီ’’တိ။ အတိဝိယတ္ထံ အာဝိကရောန္တော အာဟ ‘‘ယထာ ဝိသံသဋ္ဌာဝ ဟောန္တိ, ဧဝံ ကရောန္တီ’’တိ။ ယထာတိ ယေနာကာရေန ကရိယမာနေတိ သမ္ဗန္ဓော။ ‘‘ဝိသု’’န္တိ ဣမိနာ အာဝေဏိသဒ္ဒော ‘‘ဝိသု’’န္တိအတ္ထဝာစကော အနိပ္ဖန္နပာဋိပဒိကောတိ ဒသ္သေတိ။ ဝတ္ထူသူတိ ဘေဒကရဝတ္ထူသု။ ဣမံ ဂဏ္ဟထာတိ ဣမံ ဝာဒံ ဂဏ္ဟထ။ ဝိသုန္တိ အာဝေဏိံ။ ဣမသ္မိံ ခန္ဓကေ ဝုတ္တဝစနံ ပရိဝာရပာဠိယာ သံသန္ဒေန္တော အာဟ ‘‘ပရိဝာရေ ပနာ’’တိအာဒိ။ တတ္ထ ပဉ္စဟိ အာကာရေဟီတိ ‘‘ကမ္မေန ဥဒ္ဒေသေန ဝောဟရန္တော အနုသ္သာဝနေန သလာကဂ္ဂာဟေနာ’’တိ (ပရိ. ၄၅၈) ဧဝံ ပဉ္စဟိ ကာရဏေဟိ။ တသ္သာတိ ပရိဝာရေ ဝုတ္တဝစနသ္သ။ ဣဓာတိ ဣမသ္မိံ သင္ဃဘေဒကက္ခန္ဓကေ, ဝုတ္တေန ဣမိနာ သင္ဃဘေဒလက္ခဏေနာတိ ယောဇနာ။ ‘‘အတ္ထတော နာနာကရဏံ နတ္ထီ’’တိ ဣမိနာ သဒ္ဒတော နာနာကရဏံ အတ္ထီတိ ဒီပေတိ။ အသ္သာတိ သင္ဃဘေဒလက္ခဏသ္သ။ တံ ပန နာနာကရဏာဘာဝန္တိ ယောဇနာ။ တတ္ထေဝာတိ ပရိဝာရေ ဧဝ။ သဗ္ဗတ္ထာတိ သဗ္ဗသ္မိံ သင္ဃဘေဒကက္ခန္ဓကေ။
Tatthāti ‘‘te imehī’’tiādivacane. Apakassantīti ettha kasadhātussa gatyatthaṃ dassento āha ‘‘parisaṃ ākaḍḍhantī’’ti. Vijaṭentīti vijaṭaṃ karonti, visuṃ karontīti attho. Ekamantaṃ ussādentīti ekasmiṃ ante ussadaṃ karonti. Avapakassantīti ettha dvinnaṃ upasaggānaṃ vasena ativiyattho daṭṭhabboti āha ‘‘ati viya ākaḍḍhantī’’ti. Ativiyatthaṃ āvikaronto āha ‘‘yathā visaṃsaṭṭhāva honti, evaṃ karontī’’ti. Yathāti yenākārena kariyamāneti sambandho. ‘‘Visu’’nti iminā āveṇisaddo ‘‘visu’’ntiatthavācako anipphannapāṭipadikoti dasseti. Vatthūsūti bhedakaravatthūsu. Imaṃ gaṇhathāti imaṃ vādaṃ gaṇhatha. Visunti āveṇiṃ. Imasmiṃ khandhake vuttavacanaṃ parivārapāḷiyā saṃsandento āha ‘‘parivāre panā’’tiādi. Tattha pañcahi ākārehīti ‘‘kammena uddesena voharanto anussāvanena salākaggāhenā’’ti (pari. 458) evaṃ pañcahi kāraṇehi. Tassāti parivāre vuttavacanassa. Idhāti imasmiṃ saṅghabhedakakkhandhake, vuttena iminā saṅghabhedalakkhaṇenāti yojanā. ‘‘Atthato nānākaraṇaṃ natthī’’ti iminā saddato nānākaraṇaṃ atthīti dīpeti. Assāti saṅghabhedalakkhaṇassa. Taṃ pana nānākaraṇābhāvanti yojanā. Tatthevāti parivāre eva. Sabbatthāti sabbasmiṃ saṅghabhedakakkhandhake.
ဣတိ သင္ဃဘေဒကက္ခန္ဓကဝဏ္ဏနာယ ယောဇနာ သမတ္တာ။
Iti saṅghabhedakakkhandhakavaṇṇanāya yojanā samattā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / စူဠဝဂ္ဂပာဠိ • Cūḷavaggapāḷi / ဥပာလိပဉ္ဟာ • Upālipañhā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / ဥပာလိပဉ္ဟာကထာ • Upālipañhākathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဥပာလိပဉ္ဟကထာဝဏ္ဏနာ • Upālipañhakathāvaṇṇanā
