| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
উপালিপঞ্হকথাৰণ্ণনা
Upālipañhakathāvaṇṇanā
৩৫১. উপালিপঞ্হে যং ৰত্তব্বং, তং অট্ঠকথাযং দস্সিতমেৰ। তত্থ অনুনযন্তোতি অনুজানাপেন্তো, ভেদস্স অনুরূপং ৰা বোধেন্তো, যথা ভেদো হোতি, এৰং ভিন্দিতব্বে ভিক্খূ ৰিঞ্ঞাপেন্তোতি অত্থো। তেনাহ ‘‘ন তুম্হাক’’ন্তিআদি।
351. Upālipañhe yaṃ vattabbaṃ, taṃ aṭṭhakathāyaṃ dassitameva. Tattha anunayantoti anujānāpento, bhedassa anurūpaṃ vā bodhento, yathā bhedo hoti, evaṃ bhinditabbe bhikkhū viññāpentoti attho. Tenāha ‘‘na tumhāka’’ntiādi.
৩৫২. অট্ঠারসভেদকরৰত্থুম্হি দস অকুসলকম্মপথা সংকিলিট্ঠধম্মতায ৰোদানধম্মপঅপক্খত্তা ‘‘অধম্মো’’তি দস্সিতা, তথা উপাদানাদযো, বোধিপক্খিযধম্মানং একন্তানৰজ্জভাৰতো নত্থি অধম্মভাৰো, ভগৰতা পন দেসিতাকারেন হাপেত্ৰা ৰড্ঢেত্ৰা ৰা কথনং যথাধম্মং অকথনন্তি কত্ৰা অধম্মভাৰোতি দস্সেন্তো আহ ‘‘তযো সতিপট্ঠানা’’তিআদি। নিয্যানিকন্তি সপাটিহীরং অপ্পটিহতং হুত্ৰা পৰত্ততীতি অত্থো। তথেৰাতি ইমিনা ‘‘এৰং অম্হাক’’ন্তিআদিনা ৰুত্তমত্থং আকড্ঢতি। কাতব্বং কম্মং ধম্মো নামাতি যথাধম্মং করণতো ধম্মো নাম, ইতরং ৰুত্তৰিপরিযাযতো অধম্মো নাম।
352. Aṭṭhārasabhedakaravatthumhi dasa akusalakammapathā saṃkiliṭṭhadhammatāya vodānadhammapaapakkhattā ‘‘adhammo’’ti dassitā, tathā upādānādayo, bodhipakkhiyadhammānaṃ ekantānavajjabhāvato natthi adhammabhāvo, bhagavatā pana desitākārena hāpetvā vaḍḍhetvā vā kathanaṃ yathādhammaṃ akathananti katvā adhammabhāvoti dassento āha ‘‘tayo satipaṭṭhānā’’tiādi. Niyyānikanti sapāṭihīraṃ appaṭihataṃ hutvā pavattatīti attho. Tathevāti iminā ‘‘evaṃ amhāka’’ntiādinā vuttamatthaṃ ākaḍḍhati. Kātabbaṃ kammaṃ dhammo nāmāti yathādhammaṃ karaṇato dhammo nāma, itaraṃ vuttavipariyāyato adhammo nāma.
রাগৰিনযো…পে॰… অযং ৰিনযো নামাতি রাগাদীনং ৰিনযনতো সংৰরণতো পজহনতো পটিসঙ্খানতো চ ৰিনযো নাম, ৰুত্তৰিপরিযাযেন ইতরো অৰিনযো। ৰত্থুসম্পত্তিআদিৰসেন সব্বেসং ৰিনযকম্মানং অকুপ্পতাতি আহ ‘‘ৰত্থুসম্পত্তি…পে॰… অযং ৰিনযো নামা’’তি। তপ্পটিপক্খতো অৰিনযো ৰেদিতব্বো। তেনাহ ‘‘ৰত্থুৰিপত্তী’’তিআদি। যাসং আপন্নস্স পব্বজ্জা সাৰসেসা, তা আপত্তিযো সাৰসেসা।
Rāgavinayo…pe… ayaṃ vinayo nāmāti rāgādīnaṃ vinayanato saṃvaraṇato pajahanato paṭisaṅkhānato ca vinayo nāma, vuttavipariyāyena itaro avinayo. Vatthusampattiādivasena sabbesaṃ vinayakammānaṃ akuppatāti āha ‘‘vatthusampatti…pe… ayaṃ vinayo nāmā’’ti. Tappaṭipakkhato avinayo veditabbo. Tenāha ‘‘vatthuvipattī’’tiādi. Yāsaṃ āpannassa pabbajjā sāvasesā, tā āpattiyo sāvasesā.
৩৫৪. আপাযিকোতিআদিগাথাসু (ইতিৰু॰ অট্ঠ॰ ১৮) সঙ্ঘস্স ভেদসঙ্খাতে ৰগ্গে রতোতি ৰগ্গরতো। অধম্মিকতায অধম্মে ভেদকরৰত্থুম্হি সঙ্ঘভেদসঙ্খাতে এৰ চ অধম্মে ঠিতোতি অধম্মট্ঠো। যোগক্খেমা পধংসতীতি হিততো পরিহাযতি, চতূহিপি যোগেহি অনুপদ্দুতত্তা যোগক্খেমং নাম অরহত্তং নিব্বানঞ্চ, ততো পনস্স ধংসনে ৰত্তব্বমেৰ নত্থি। দিট্ঠিসীলসামঞ্ঞতো সঙ্ঘতট্ঠেন সঙ্ঘং, ততো এৰ এককম্মাদিৰিধানযোগেন সমগ্গং সহিতং ভিন্দিত্ৰা পুব্বে ৰুত্তলক্খণেন সঙ্ঘভেদেন ভিন্দিত্ৰা। কপ্পন্তি অন্তরকপ্পসঙ্খাতং আযুকপ্পং। নিরযম্হীতি অৰীচিমহানিরযম্হি।
354.Āpāyikotiādigāthāsu (itivu. aṭṭha. 18) saṅghassa bhedasaṅkhāte vagge ratoti vaggarato. Adhammikatāya adhamme bhedakaravatthumhi saṅghabhedasaṅkhāte eva ca adhamme ṭhitoti adhammaṭṭho. Yogakkhemā padhaṃsatīti hitato parihāyati, catūhipi yogehi anupaddutattā yogakkhemaṃ nāma arahattaṃ nibbānañca, tato panassa dhaṃsane vattabbameva natthi. Diṭṭhisīlasāmaññato saṅghataṭṭhena saṅghaṃ, tato eva ekakammādividhānayogena samaggaṃ sahitaṃ bhinditvā pubbe vuttalakkhaṇena saṅghabhedena bhinditvā. Kappanti antarakappasaṅkhātaṃ āyukappaṃ. Nirayamhīti avīcimahānirayamhi.
সুখা সঙ্ঘস্স সামগ্গীতি (ইতিৰু॰ অট্ট॰ ১৯) সুখস্স পচ্চযভাৰতো সামগ্গী ‘‘সুখা’’তি ৰুত্তা যথা ‘‘সুখো বুদ্ধানমুপ্পাদো’’তি (ধ॰ প॰ ১৯৪)। সমগ্গানঞ্চনুগ্গহোতি সমগ্গানং সামগ্গিঅনুমোদনেন অনুগ্গণ্হনং সামগ্গিঅনুরূপং ৰা, যথা তে সামগ্গিং ন ৰিজহন্তি, তথা গহণং ঠপনং অনুবলপ্পদানন্তি অত্থো। সমগ্গং কত্ৰানাতি ভিন্নং সঙ্ঘং সঙ্ঘরাজিপ্পত্তং ৰা সমগ্গং সহিতং কত্ৰা। কপ্পন্তি আযুকপ্পমেৰ। সগ্গম্হি মোদতীতি কামাৰচরদেৰলোকে অঞ্ঞে দেৰে দসহি ঠানেহি অভিভৰিত্ৰা দিব্বসুখং অনুভৰন্তো ইচ্ছিতনিব্বত্তিযা চ মোদতি পমোদতি লল়তি কীল়তি।
Sukhā saṅghassa sāmaggīti (itivu. aṭṭa. 19) sukhassa paccayabhāvato sāmaggī ‘‘sukhā’’ti vuttā yathā ‘‘sukho buddhānamuppādo’’ti (dha. pa. 194). Samaggānañcanuggahoti samaggānaṃ sāmaggianumodanena anuggaṇhanaṃ sāmaggianurūpaṃ vā, yathā te sāmaggiṃ na vijahanti, tathā gahaṇaṃ ṭhapanaṃ anubalappadānanti attho. Samaggaṃ katvānāti bhinnaṃ saṅghaṃ saṅgharājippattaṃ vā samaggaṃ sahitaṃ katvā. Kappanti āyukappameva. Saggamhi modatīti kāmāvacaradevaloke aññe deve dasahi ṭhānehi abhibhavitvā dibbasukhaṃ anubhavanto icchitanibbattiyā ca modati pamodati laḷati kīḷati.
৩৫৫. সিযা নু খো, ভন্তে, সঙ্ঘভেদকোতিআদি পাল়িঅনুসারেনেৰ ৰেদিতব্বং। ‘‘পঞ্চহি, উপালি, আকারেহি সঙ্ঘো ভিজ্জতি কম্মেন উদ্দেসেন ৰোহরন্তো অনুস্সাৰনেন সলাকগ্গাহেনা’’তি এৰং পরিৰারে (পরি॰ ৪৫৮) আগতম্পি সঙ্ঘভেদলক্খণং ইধ ৰুত্তেন কিং নানাকরণন্তি দস্সেতুং ‘‘পরিৰারে পনা’’তিআদিমাহ। এত্থ চ সীমট্ঠকসঙ্ঘে অসন্নিপতিতে ৰিসুং পরিসং গহেত্ৰা কতৰোহারানুস্সাৰনসলাকগ্গাহস্স কম্মং ৰা করোন্তস্স উদ্দেসং ৰা উদ্দিসন্তস্স ভেদো চ হোতি আনন্তরিযকম্মঞ্চ। সমগ্গসঞ্ঞায পন ‘‘ৰট্টতী’’তি সঞ্ঞায ৰা করোন্তস্স ভেদোৰ হোতি, ন আনন্তরিযকম্মং। ততো ঊনপরিসায করোন্তস্স নেৰ সঙ্ঘভেদো ন আনন্তরিযং। সব্বন্তিমেন হি পরিচ্ছেদেন নৰন্নং জনানং যো সঙ্ঘং ভিন্দতি, তস্স আনন্তরিযকম্মং হোতি, অনুৰত্তকানং অধম্মৰাদীনং মহাসাৰজ্জং কম্মং, ধম্মৰাদিনো অনৰজ্জা। সেসমেত্থ উত্তানমেৰাতি।
355.Siyā nu kho, bhante, saṅghabhedakotiādi pāḷianusāreneva veditabbaṃ. ‘‘Pañcahi, upāli, ākārehi saṅgho bhijjati kammena uddesena voharanto anussāvanena salākaggāhenā’’ti evaṃ parivāre (pari. 458) āgatampi saṅghabhedalakkhaṇaṃ idha vuttena kiṃ nānākaraṇanti dassetuṃ ‘‘parivāre panā’’tiādimāha. Ettha ca sīmaṭṭhakasaṅghe asannipatite visuṃ parisaṃ gahetvā katavohārānussāvanasalākaggāhassa kammaṃ vā karontassa uddesaṃ vā uddisantassa bhedo ca hoti ānantariyakammañca. Samaggasaññāya pana ‘‘vaṭṭatī’’ti saññāya vā karontassa bhedova hoti, na ānantariyakammaṃ. Tato ūnaparisāya karontassa neva saṅghabhedo na ānantariyaṃ. Sabbantimena hi paricchedena navannaṃ janānaṃ yo saṅghaṃ bhindati, tassa ānantariyakammaṃ hoti, anuvattakānaṃ adhammavādīnaṃ mahāsāvajjaṃ kammaṃ, dhammavādino anavajjā. Sesamettha uttānamevāti.
উপালিপঞ্হকথাৰণ্ণনা নিট্ঠিতা।
Upālipañhakathāvaṇṇanā niṭṭhitā.
সঙ্ঘভেদকক্খন্ধকৰণ্ণনা নিট্ঠিতা।
Saṅghabhedakakkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / উপালিপঞ্হা • Upālipañhā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / উপালিপঞ্হাকথা • Upālipañhākathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপালিপঞ্হাকথাৰণ্ণনা • Upālipañhākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / উপালিপঞ্হাকথা • Upālipañhākathā
