| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২৪১. উপালিপুচ্ছাকথা
241. Upālipucchākathā
৪০০. অথ খো আযস্মা উপালি যেন ভগৰা তেনুপসঙ্কমি, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা উপালি ভগৰন্তং এতদৰোচ – ‘‘যো নু খো, ভন্তে, সমগ্গো সঙ্ঘো সম্মুখাকরণীযং কম্মং অসম্মুখা করোতি, ধম্মকম্মং নু খো তং, ভন্তে, ৰিনযকম্ম’’ন্তি? ‘‘অধম্মকম্মং তং, উপালি, অৰিনযকম্ম’’ন্তি। ‘‘যো নু খো, ভন্তে, সমগ্গো সঙ্ঘো পটিপুচ্ছাকরণীযং কম্মং অপ্পটিপুচ্ছা করোতি…পে॰… পটিঞ্ঞাযকরণীযং কম্মং অপটিঞ্ঞায করোতি… সতিৰিনযারহস্স অমূল়্হৰিনযং দেতি… অমূল়্হৰিনযারহস্স তস্সপাপিযসিকাকম্মং করোতি… তস্সপাপিযসিকাকম্মারহস্স তজ্জনীযকম্মং করোতি… তজ্জনীযকম্মারহস্স নিযস্সকম্মং করোতি … নিযস্সকম্মারহস্স পব্বাজনীযকম্মং করোতি… পব্বাজনীযকম্মারহস্স পটিসারণীযকম্মং করোতি… পটিসারণীযকম্মারহস্স উক্খেপনীযকম্মং করোতি… উক্খেপনীযকম্মারহস্স পরিৰাসং দেতি… পরিৰাসারহং মূলায পটিকস্সতি… মূলাযপটিকস্সনারহস্স মানত্তং দেতি… মানত্তারহং অব্ভেতি… অব্ভানারহং উপসম্পাদেতি, ধম্মকম্মং নু খো তং, ভন্তে, ৰিনযকম্ম’’ন্তি? ‘‘অধম্মকম্মং তং, উপালি, অৰিনযকম্মং’’।
400. Atha kho āyasmā upāli yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā upāli bhagavantaṃ etadavoca – ‘‘yo nu kho, bhante, samaggo saṅgho sammukhākaraṇīyaṃ kammaṃ asammukhā karoti, dhammakammaṃ nu kho taṃ, bhante, vinayakamma’’nti? ‘‘Adhammakammaṃ taṃ, upāli, avinayakamma’’nti. ‘‘Yo nu kho, bhante, samaggo saṅgho paṭipucchākaraṇīyaṃ kammaṃ appaṭipucchā karoti…pe… paṭiññāyakaraṇīyaṃ kammaṃ apaṭiññāya karoti… sativinayārahassa amūḷhavinayaṃ deti… amūḷhavinayārahassa tassapāpiyasikākammaṃ karoti… tassapāpiyasikākammārahassa tajjanīyakammaṃ karoti… tajjanīyakammārahassa niyassakammaṃ karoti … niyassakammārahassa pabbājanīyakammaṃ karoti… pabbājanīyakammārahassa paṭisāraṇīyakammaṃ karoti… paṭisāraṇīyakammārahassa ukkhepanīyakammaṃ karoti… ukkhepanīyakammārahassa parivāsaṃ deti… parivāsārahaṃ mūlāya paṭikassati… mūlāyapaṭikassanārahassa mānattaṃ deti… mānattārahaṃ abbheti… abbhānārahaṃ upasampādeti, dhammakammaṃ nu kho taṃ, bhante, vinayakamma’’nti? ‘‘Adhammakammaṃ taṃ, upāli, avinayakammaṃ’’.
‘‘যো খো, উপালি, সমগ্গো সঙ্ঘো সম্মুখাকরণীযং কম্মং অসম্মুখা করোতি, এৰং খো, উপালি, অধম্মকম্মং হোতি অৰিনযকম্মং, এৰঞ্চ পন সঙ্ঘো সাতিসারো হোতি। যো খো, উপালি, সমগ্গো সঙ্ঘো পটিপুচ্ছাকরণীযং কম্মং অপ্পটিপুচ্ছা করোতি…পে॰… পটিঞ্ঞাযকরণীযং কম্মং অপটিঞ্ঞায করোতি… সতিৰিনযারহস্স অমূল়্হৰিনযং দেতি… অমূল়্হৰিনযারহস্স তস্সপাপিযসিকাকম্মং করোতি… তস্সপাপিযসিকাকম্মারহস্স তজ্জনীযকম্মং করোতি… তজ্জনীযকম্মারহস্স নিযস্সকম্মং করোতি… নিযস্সকম্মারহস্স পব্বাজনীযকম্মং করোতি… পব্বাজনীযকম্মারহস্স পটিসারণীযকম্মং করোতি… পটিসারণীযকম্মারহস্স উক্খেপনীযকম্মং করোতি… উক্খেপনীযকম্মারহস্স পরিৰাসং দেতি… পরিৰাসারহং মূলায পটিকস্সতি… মূলাযপটিকস্সনারহস্স মানত্তং দেতি… মানত্তারহং অব্ভেতি… অব্ভানারহং উপসম্পাদেতি, এৰং খো, উপালি, অধম্মকম্মং হোতি অৰিনযকম্মং। এৰঞ্চ পন সঙ্ঘো সাতিসারো হোতী’’তি।
‘‘Yo kho, upāli, samaggo saṅgho sammukhākaraṇīyaṃ kammaṃ asammukhā karoti, evaṃ kho, upāli, adhammakammaṃ hoti avinayakammaṃ, evañca pana saṅgho sātisāro hoti. Yo kho, upāli, samaggo saṅgho paṭipucchākaraṇīyaṃ kammaṃ appaṭipucchā karoti…pe… paṭiññāyakaraṇīyaṃ kammaṃ apaṭiññāya karoti… sativinayārahassa amūḷhavinayaṃ deti… amūḷhavinayārahassa tassapāpiyasikākammaṃ karoti… tassapāpiyasikākammārahassa tajjanīyakammaṃ karoti… tajjanīyakammārahassa niyassakammaṃ karoti… niyassakammārahassa pabbājanīyakammaṃ karoti… pabbājanīyakammārahassa paṭisāraṇīyakammaṃ karoti… paṭisāraṇīyakammārahassa ukkhepanīyakammaṃ karoti… ukkhepanīyakammārahassa parivāsaṃ deti… parivāsārahaṃ mūlāya paṭikassati… mūlāyapaṭikassanārahassa mānattaṃ deti… mānattārahaṃ abbheti… abbhānārahaṃ upasampādeti, evaṃ kho, upāli, adhammakammaṃ hoti avinayakammaṃ. Evañca pana saṅgho sātisāro hotī’’ti.
৪০১. ‘‘যো নু খো, ভন্তে, সমগ্গো সঙ্ঘো সম্মুখাকরণীযং কম্মং সম্মুখা করোতি, ধম্মকম্মং নু খো তং, ভন্তে, ৰিনযকম্ম’’ন্তি? ‘‘ধম্মকম্মং তং, উপালি, ৰিনযকম্ম’’ন্তি। ‘‘যো নু খো, ভন্তে, সমগ্গো সঙ্ঘো পটিপুচ্ছাকরণীযং কম্মং পটিপুচ্ছা করোতি…পে॰… পটিঞ্ঞাযকরণীযং কম্মং পটিঞ্ঞায করোতি… সতিৰিনযারহস্স সতিৰিনযং দেতি… অমূল়্হৰিনযারহস্স অমূল়্হৰিনযং দেতি… তস্সপাপিযসিকাকম্মারহস্স তস্সপাপিযসিকাকম্মং করোতি… তজ্জনীযকম্মারহস্স তজ্জনীযকম্মং করোতি… নিযস্সকম্মারহস্স নিযস্সকম্মং করোতি… পব্বাজনীযকম্মারহস্স পব্বাজনীযকম্মং করোতি… পটিসারণীযকম্মারহস্স পটিসারণীযকম্মং করোতি… উক্খেপনীযকম্মারহস্স উক্খেপনীযকম্মং করোতি… পরিৰাসারহস্স পরিৰাসং দেতি মূলাযপটিকস্সনারহং মূলায পটিকস্সতি… মানত্তারহস্স মানত্তং দেতি… অব্ভানারহং অব্ভেতি… উপসম্পদারহং উপসম্পাদেতি, ধম্মকম্মং নু খো তং, ভন্তে, ৰিনযকম্ম’’ন্তি? ‘‘ধম্মকম্মং তং, উপালি, ৰিনযকম্মং।
401. ‘‘Yo nu kho, bhante, samaggo saṅgho sammukhākaraṇīyaṃ kammaṃ sammukhā karoti, dhammakammaṃ nu kho taṃ, bhante, vinayakamma’’nti? ‘‘Dhammakammaṃ taṃ, upāli, vinayakamma’’nti. ‘‘Yo nu kho, bhante, samaggo saṅgho paṭipucchākaraṇīyaṃ kammaṃ paṭipucchā karoti…pe… paṭiññāyakaraṇīyaṃ kammaṃ paṭiññāya karoti… sativinayārahassa sativinayaṃ deti… amūḷhavinayārahassa amūḷhavinayaṃ deti… tassapāpiyasikākammārahassa tassapāpiyasikākammaṃ karoti… tajjanīyakammārahassa tajjanīyakammaṃ karoti… niyassakammārahassa niyassakammaṃ karoti… pabbājanīyakammārahassa pabbājanīyakammaṃ karoti… paṭisāraṇīyakammārahassa paṭisāraṇīyakammaṃ karoti… ukkhepanīyakammārahassa ukkhepanīyakammaṃ karoti… parivāsārahassa parivāsaṃ deti mūlāyapaṭikassanārahaṃ mūlāya paṭikassati… mānattārahassa mānattaṃ deti… abbhānārahaṃ abbheti… upasampadārahaṃ upasampādeti, dhammakammaṃ nu kho taṃ, bhante, vinayakamma’’nti? ‘‘Dhammakammaṃ taṃ, upāli, vinayakammaṃ.
‘‘যো খো, উপালি, সমগ্গো সঙ্ঘো সম্মুখাকরণীযং কম্মং সম্মুখা করোতি, এৰং খো, উপালি, ধম্মকম্মং হোতি ৰিনযকম্মং। এৰঞ্চ পন সঙ্ঘো অনতিসারো হোতি। যো খো, উপালি, সমগ্গো সঙ্ঘো পটিপুচ্ছাকরণীযং কম্মং পটিপুচ্ছা করোতি… পটিঞ্ঞাযকরণীযং কম্মং পটিঞ্ঞায করোতি… সতিৰিনযারহস্স সতিৰিনযং দেতি… অমূল়্হৰিনযারহস্স অমূল়্হৰিনযং দেতি… তস্সপাপিযসিকাকম্মারহস্স তস্সপাপিযসিকাকম্মং করোতি… তজ্জনীযকম্মারহস্স তজ্জনীযকম্মং করোতি… নিযস্সকম্মারহস্স নিযস্সকম্মং করোতি… পব্বাজনীযকম্মারহস্স পব্বাজনীযকম্মং করোতি … পটিসারণীযকম্মারহস্স পটিসারণীযকম্মং করোতি… উক্খেপনীযকম্মারহস্স উক্খেপনীযকম্মং করোতি… পরিৰাসারহস্স পরিৰাসং দেতি… মূলাযপটিকস্সনারহং মূলায পটিকস্সতি… মানত্তারহস্স মানত্তং দেতি… অব্ভানারহং অব্ভেতি… উপসম্পদারহং উপসম্পাদেতি, এৰং খো, উপালি, ধম্মকম্মং হোতি ৰিনযকম্মং। এৰঞ্চ পন সঙ্ঘো অনতিসারো হোতী’’তি।
‘‘Yo kho, upāli, samaggo saṅgho sammukhākaraṇīyaṃ kammaṃ sammukhā karoti, evaṃ kho, upāli, dhammakammaṃ hoti vinayakammaṃ. Evañca pana saṅgho anatisāro hoti. Yo kho, upāli, samaggo saṅgho paṭipucchākaraṇīyaṃ kammaṃ paṭipucchā karoti… paṭiññāyakaraṇīyaṃ kammaṃ paṭiññāya karoti… sativinayārahassa sativinayaṃ deti… amūḷhavinayārahassa amūḷhavinayaṃ deti… tassapāpiyasikākammārahassa tassapāpiyasikākammaṃ karoti… tajjanīyakammārahassa tajjanīyakammaṃ karoti… niyassakammārahassa niyassakammaṃ karoti… pabbājanīyakammārahassa pabbājanīyakammaṃ karoti … paṭisāraṇīyakammārahassa paṭisāraṇīyakammaṃ karoti… ukkhepanīyakammārahassa ukkhepanīyakammaṃ karoti… parivāsārahassa parivāsaṃ deti… mūlāyapaṭikassanārahaṃ mūlāya paṭikassati… mānattārahassa mānattaṃ deti… abbhānārahaṃ abbheti… upasampadārahaṃ upasampādeti, evaṃ kho, upāli, dhammakammaṃ hoti vinayakammaṃ. Evañca pana saṅgho anatisāro hotī’’ti.
৪০২. ‘‘যো নু খো, ভন্তে, সমগ্গো সঙ্ঘো সতিৰিনযারহস্স অমূল়্হৰিনযং দেতি, অমূল়্হৰিনযারহস্স সতিৰিনযং দেতি, ধম্মকম্মং নু খো তং, ভন্তে, ৰিনযকম্ম’’ন্তি? ‘‘অধম্মকম্মং তং, উপালি, অৰিনযকম্ম’’ন্তি। ‘‘যো নু খো, ভন্তে, সমগ্গো সঙ্ঘো অমূল়্হৰিনযারহস্স তস্সপাপিযসিকাকম্মং করোতি, তস্সপাপিযসিকাকম্মারহস্স অমূল়্হৰিনযং দেতি…পে॰… তস্সপাপিযসিকাকম্মারহস্স তজ্জনীযকম্মং করোতি, তজ্জনীযকম্মারহস্স তস্সপাপিযসিকাকম্মং করোতি… তজ্জনীযকম্মারহস্স নিযস্সকম্মং করোতি, নিযস্সকম্মারহস্স তজ্জনীযকম্মং করোতি… নিযস্সকম্মারহস্স পব্বাজনীযকম্মং করোতি, পব্বাজনীযকম্মারহস্স নিযস্সকম্মং করোতি… পব্বাজনীযকম্মারহস্স পটিসারণীযকম্মং করোতি, পটিসারণীযকম্মারহস্স পব্বাজনীযকম্মং করোতি… পটিসারণীযকম্মারহস্স উক্খেপনীযকম্মং করোতি, উক্খেপনীযকম্মারহস্স পটিসারণীযকম্মং করোতি… উক্খেপনীযকম্মারহস্স পরিৰাসং দেতি, পরিৰাসারহস্স উক্খেপনীযকম্মং করোতি… পরিৰাসারহং মূলায পটিকস্সতি, মূলাযপটিকস্সনারহস্স পরিৰাসং দেতি… মূলাযপটিকস্সনারহস্স মানত্তং দেতি, মানত্তারহং মূলায পটিকস্সতি… মানত্তারহং অব্ভেতি, অব্ভানারহস্স মানত্তং দেতি… অব্ভানারহং উপসম্পাদেতি, উপসম্পদারহং অব্ভেতি, ধম্মকম্মং নু খো তং, ভন্তে, ৰিনযকম্ম’’ন্তি? ‘‘অধম্মকম্মং তং, উপালি, অৰিনযকম্ম’’ন্তি।
402. ‘‘Yo nu kho, bhante, samaggo saṅgho sativinayārahassa amūḷhavinayaṃ deti, amūḷhavinayārahassa sativinayaṃ deti, dhammakammaṃ nu kho taṃ, bhante, vinayakamma’’nti? ‘‘Adhammakammaṃ taṃ, upāli, avinayakamma’’nti. ‘‘Yo nu kho, bhante, samaggo saṅgho amūḷhavinayārahassa tassapāpiyasikākammaṃ karoti, tassapāpiyasikākammārahassa amūḷhavinayaṃ deti…pe… tassapāpiyasikākammārahassa tajjanīyakammaṃ karoti, tajjanīyakammārahassa tassapāpiyasikākammaṃ karoti… tajjanīyakammārahassa niyassakammaṃ karoti, niyassakammārahassa tajjanīyakammaṃ karoti… niyassakammārahassa pabbājanīyakammaṃ karoti, pabbājanīyakammārahassa niyassakammaṃ karoti… pabbājanīyakammārahassa paṭisāraṇīyakammaṃ karoti, paṭisāraṇīyakammārahassa pabbājanīyakammaṃ karoti… paṭisāraṇīyakammārahassa ukkhepanīyakammaṃ karoti, ukkhepanīyakammārahassa paṭisāraṇīyakammaṃ karoti… ukkhepanīyakammārahassa parivāsaṃ deti, parivāsārahassa ukkhepanīyakammaṃ karoti… parivāsārahaṃ mūlāya paṭikassati, mūlāyapaṭikassanārahassa parivāsaṃ deti… mūlāyapaṭikassanārahassa mānattaṃ deti, mānattārahaṃ mūlāya paṭikassati… mānattārahaṃ abbheti, abbhānārahassa mānattaṃ deti… abbhānārahaṃ upasampādeti, upasampadārahaṃ abbheti, dhammakammaṃ nu kho taṃ, bhante, vinayakamma’’nti? ‘‘Adhammakammaṃ taṃ, upāli, avinayakamma’’nti.
‘‘যো খো, উপালি, সমগ্গো সঙ্ঘো সতিৰিনযারহস্স অমূল়্হৰিনযং দেতি, অমূল়্হৰিনযারহস্স সতিৰিনযং দেতি, এৰং খো, উপালি, অধম্মকম্মং হোতি অৰিনযকম্মং। এৰঞ্চ পন সঙ্ঘো সাতিসারো হোতি। যো খো, উপালি, সমগ্গো সঙ্ঘো অমূল়্হৰিনযারহস্স তস্সপাপিযসিকাকম্মং করোতি, তস্সপাপিযসিকাকম্মারহস্স অমূল়্হৰিনযং দেতি…পে॰… তস্সপাপিযসিকাকম্মারহস্স তজ্জনীযকম্মং করোতি, তজ্জনীযকম্মারহস্স তস্সপাপিযসিকাকম্মং করোতি… তজ্জনীযকম্মারহস্স নিযস্সকম্মং করোতি , নিযস্সকম্মারহস্স তজ্জনীযকম্মং করোতি… নিযস্সকম্মারহস্স পব্বাজনীযকম্মং করোতি, পব্বাজনীযকম্মারহস্স নিযস্সকম্মং করোতি… পব্বাজনীযকম্মারহস্স পটিসারণীযকম্মং করোতি, পটিসারণীযকম্মারহস্স পব্বাজনীযকম্মং করোতি… পটিসারণীযকম্মারহস্স উক্খেপনীযকম্মং করোতি, উক্খেপনীযকম্মারহস্স পটিসারণীযকম্মং করোতি… উক্খেপনীযকম্মারহস্স পরিৰাসং দেতি, পরিৰাসারহস্স উক্খেপনীযকম্মং করোতি… পরিৰাসারহং মূলায পটিকস্সতি, মূলাযপটিকস্সনারহস্স পরিৰাসং দেতি… মূলাযপটিকস্সনারহস্স মানত্তং দেতি, মানত্তারহং মূলায পটিকস্সতি – মানত্তারহং অব্ভেতি, অব্ভানারহস্স মানত্তং দেতি… অব্ভানারহং উপসম্পাদেতি, উপসম্পদারহং অব্ভেতি, এৰং খো, উপালি, অধম্মকম্মং হোতি অৰিনযকম্মং। এৰঞ্চ পন সঙ্ঘো সাতিসারো হোতী’’তি।
‘‘Yo kho, upāli, samaggo saṅgho sativinayārahassa amūḷhavinayaṃ deti, amūḷhavinayārahassa sativinayaṃ deti, evaṃ kho, upāli, adhammakammaṃ hoti avinayakammaṃ. Evañca pana saṅgho sātisāro hoti. Yo kho, upāli, samaggo saṅgho amūḷhavinayārahassa tassapāpiyasikākammaṃ karoti, tassapāpiyasikākammārahassa amūḷhavinayaṃ deti…pe… tassapāpiyasikākammārahassa tajjanīyakammaṃ karoti, tajjanīyakammārahassa tassapāpiyasikākammaṃ karoti… tajjanīyakammārahassa niyassakammaṃ karoti , niyassakammārahassa tajjanīyakammaṃ karoti… niyassakammārahassa pabbājanīyakammaṃ karoti, pabbājanīyakammārahassa niyassakammaṃ karoti… pabbājanīyakammārahassa paṭisāraṇīyakammaṃ karoti, paṭisāraṇīyakammārahassa pabbājanīyakammaṃ karoti… paṭisāraṇīyakammārahassa ukkhepanīyakammaṃ karoti, ukkhepanīyakammārahassa paṭisāraṇīyakammaṃ karoti… ukkhepanīyakammārahassa parivāsaṃ deti, parivāsārahassa ukkhepanīyakammaṃ karoti… parivāsārahaṃ mūlāya paṭikassati, mūlāyapaṭikassanārahassa parivāsaṃ deti… mūlāyapaṭikassanārahassa mānattaṃ deti, mānattārahaṃ mūlāya paṭikassati – mānattārahaṃ abbheti, abbhānārahassa mānattaṃ deti… abbhānārahaṃ upasampādeti, upasampadārahaṃ abbheti, evaṃ kho, upāli, adhammakammaṃ hoti avinayakammaṃ. Evañca pana saṅgho sātisāro hotī’’ti.
৪০৩. ‘‘যো নু খো, ভন্তে, সমগ্গো সঙ্ঘো সতিৰিনযারহস্স সতিৰিনযং দেতি, অমূল়্হৰিনযারহস্স অমূল়্হৰিনযং দেতি, ধম্মকম্মং নু খো তং, ভন্তে, ৰিনযকম্ম’’ন্তি? ‘‘ধম্মকম্মং তং, উপালি, ৰিনযকম্ম’’ন্তি। ‘‘যো নু খো, ভন্তে, সমগ্গো সঙ্ঘো অমূল়্হৰিনযারহস্স অমূল়্হৰিনযং দেতি…পে॰… তস্সপাপিযসিকাকম্মারহস্স তস্সপাপিযসিকাকম্মং করোতি…পে॰… তজ্জনীযকম্মারহস্স তজ্জনীযকম্মং করোতি…পে॰… নিযস্সকম্মারহস্স নিযস্সকম্মং করোতি…পে॰… পব্বাজনীযকম্মারহস্স পব্বাজনীযকম্মং করোতি…পে॰… পটিসারণীযকম্মারহস্স পটিসারণীযকম্মং করোতি…পে॰… উক্খেপনীযকম্মারহস্স উক্খেপনীযকম্মং করোতি…পে॰… পরিৰাসারহস্স পরিৰাসং দেতি…পে॰… মূলাযপটিকস্সনারহং মূলায পটিকস্সতি…পে॰… মানত্তারহস্স মানত্তং দেতি…পে॰… অব্ভানারহং অব্ভেতি, উপসম্পদারহং উপসম্পাদেতি, ধম্মকম্মং নু খো তং, ভন্তে, ৰিনযকম্ম’’ন্তি? ‘‘ধম্মকম্মং তং, উপালি, ৰিনযকম্মং’’।
403. ‘‘Yo nu kho, bhante, samaggo saṅgho sativinayārahassa sativinayaṃ deti, amūḷhavinayārahassa amūḷhavinayaṃ deti, dhammakammaṃ nu kho taṃ, bhante, vinayakamma’’nti? ‘‘Dhammakammaṃ taṃ, upāli, vinayakamma’’nti. ‘‘Yo nu kho, bhante, samaggo saṅgho amūḷhavinayārahassa amūḷhavinayaṃ deti…pe… tassapāpiyasikākammārahassa tassapāpiyasikākammaṃ karoti…pe… tajjanīyakammārahassa tajjanīyakammaṃ karoti…pe… niyassakammārahassa niyassakammaṃ karoti…pe… pabbājanīyakammārahassa pabbājanīyakammaṃ karoti…pe… paṭisāraṇīyakammārahassa paṭisāraṇīyakammaṃ karoti…pe… ukkhepanīyakammārahassa ukkhepanīyakammaṃ karoti…pe… parivāsārahassa parivāsaṃ deti…pe… mūlāyapaṭikassanārahaṃ mūlāya paṭikassati…pe… mānattārahassa mānattaṃ deti…pe… abbhānārahaṃ abbheti, upasampadārahaṃ upasampādeti, dhammakammaṃ nu kho taṃ, bhante, vinayakamma’’nti? ‘‘Dhammakammaṃ taṃ, upāli, vinayakammaṃ’’.
‘‘যো খো, উপালি, সমগ্গো সঙ্ঘো সতিৰিনযারহস্স সতিৰিনযং দেতি, অমূল়্হৰিনযারহস্স অমূল়্হৰিনযং দেতি, এৰং খো, উপালি, ধম্মকম্মং হোতি ৰিনযকম্মং। এৰঞ্চ পন সঙ্ঘো অনতিসারো হোতি । যো খো, উপালি, সমগ্গো সঙ্ঘো অমূল়্হৰিনযারহস্স অমূল়্হৰিনযং দেতি …পে॰… তস্সপাপিযসিকাকম্মারহস্স তস্সপাপিযসিকাকম্মং করোতি…পে॰… তজ্জনীযকম্মারহস্স তজ্জনীযকম্মং করোতি…পে॰… নিযস্সকম্মারহস্স নিযস্সকম্মং করোতি…পে॰… পব্বাজনীযকম্মারহস্স পব্বাজনীযকম্মং করোতি…পে॰… পটিসারণীযকম্মারহস্স পটিসারণীযকম্মং করোতি…পে॰… উক্খেপনীযকম্মারহস্স উক্খেপনীযকম্মং করোতি…পে॰… পরিৰাসারহস্স পরিৰাসং দেতি…পে॰… মূলায পটিকস্সনারহং মূলায পটিকস্সতি…পে॰… মানত্তারহস্স মানত্তং দেতি…পে॰… অব্ভানারহং অব্ভেতি, উপসম্পদারহং উপসম্পাদেতি, এৰং খো, উপালি, ধম্মকম্মং হোতি ৰিনযকম্মং। এৰঞ্চ পন সঙ্ঘো অনতিসারো হোতী’’তি।
‘‘Yo kho, upāli, samaggo saṅgho sativinayārahassa sativinayaṃ deti, amūḷhavinayārahassa amūḷhavinayaṃ deti, evaṃ kho, upāli, dhammakammaṃ hoti vinayakammaṃ. Evañca pana saṅgho anatisāro hoti . Yo kho, upāli, samaggo saṅgho amūḷhavinayārahassa amūḷhavinayaṃ deti …pe… tassapāpiyasikākammārahassa tassapāpiyasikākammaṃ karoti…pe… tajjanīyakammārahassa tajjanīyakammaṃ karoti…pe… niyassakammārahassa niyassakammaṃ karoti…pe… pabbājanīyakammārahassa pabbājanīyakammaṃ karoti…pe… paṭisāraṇīyakammārahassa paṭisāraṇīyakammaṃ karoti…pe… ukkhepanīyakammārahassa ukkhepanīyakammaṃ karoti…pe… parivāsārahassa parivāsaṃ deti…pe… mūlāya paṭikassanārahaṃ mūlāya paṭikassati…pe… mānattārahassa mānattaṃ deti…pe… abbhānārahaṃ abbheti, upasampadārahaṃ upasampādeti, evaṃ kho, upāli, dhammakammaṃ hoti vinayakammaṃ. Evañca pana saṅgho anatisāro hotī’’ti.
৪০৪. অথ খো ভগৰা ভিক্খূ আমন্তেসি – যো খো, ভিক্খৰে, সমগ্গো সঙ্ঘো সতিৰিনযারহস্স অমূল়্হৰিনযং দেতি, এৰং খো, ভিক্খৰে, অধম্মকম্মং হোতি অৰিনযকম্মং। এৰঞ্চ পন সঙ্ঘো সাতিসারো হোতি। যো খো, ভিক্খৰে, সমগ্গো সঙ্ঘো সতিৰিনযারহস্স তস্সপাপিযসিকাকম্মং করোতি…পে॰… সতিৰিনযারহস্স তজ্জনীযকম্মং করোতি… সতিৰিনযারহস্স নিযস্সকম্মং করোতি… সতিৰিনযারহস্স পব্বাজনীযকম্মং করোতি… সতিৰিনযারহস্স পটিসারণীযকম্মং করোতি… সতিৰিনযারহস্স উক্খেপনীযকম্মং করোতি … সতিৰিনযারহস্স পরিৰাসং দেতি… সতিৰিনযারহং মূলায পটিকস্সতি… সতিৰিনযারহস্স মানত্তং দেতি… সতিৰিনযারহং অব্ভেতি… সতিৰিনযারহং উপসম্পাদেতি, এৰং খো , ভিক্খৰে, অধম্মকম্মং হোতি অৰিনযকম্মং। এৰঞ্চ পন সঙ্ঘো সাতিসারো হোতি।
404. Atha kho bhagavā bhikkhū āmantesi – yo kho, bhikkhave, samaggo saṅgho sativinayārahassa amūḷhavinayaṃ deti, evaṃ kho, bhikkhave, adhammakammaṃ hoti avinayakammaṃ. Evañca pana saṅgho sātisāro hoti. Yo kho, bhikkhave, samaggo saṅgho sativinayārahassa tassapāpiyasikākammaṃ karoti…pe… sativinayārahassa tajjanīyakammaṃ karoti… sativinayārahassa niyassakammaṃ karoti… sativinayārahassa pabbājanīyakammaṃ karoti… sativinayārahassa paṭisāraṇīyakammaṃ karoti… sativinayārahassa ukkhepanīyakammaṃ karoti … sativinayārahassa parivāsaṃ deti… sativinayārahaṃ mūlāya paṭikassati… sativinayārahassa mānattaṃ deti… sativinayārahaṃ abbheti… sativinayārahaṃ upasampādeti, evaṃ kho , bhikkhave, adhammakammaṃ hoti avinayakammaṃ. Evañca pana saṅgho sātisāro hoti.
৪০৫. যো খো, ভিক্খৰে, সমগ্গো সঙ্ঘো অমূল়্হৰিনযারহস্স তস্সপাপিযসিকাকম্মং করোতি, এৰং খো, ভিক্খৰে, অধম্মকম্মং হোতি অৰিনযকম্মং। এৰঞ্চ পন সঙ্ঘো সাতিসারো হোতি। যো খো, ভিক্খৰে, সমগ্গো সঙ্ঘো অমূল়্হৰিনযারহস্স তজ্জনীযকম্মং করোতি…পে॰… অমূল়্হৰিনযারহস্স নিযস্সকম্মং করোতি… অমূল়্হৰিনযারহস্স পব্বাজনীযকম্মং করোতি… অমূল়্হৰিনযারহস্স পটিসারণীযকম্মং করোতি… অমূল়্হৰিনযারহস্স উক্খেপনীযকম্মং করোতি… অমূল়্হৰিনযারহস্স পরিৰাসং দেতি… অমূল়্হৰিনযারহং মূলায পটিকস্সতি… অমূল়্হৰিনযারহস্স মানত্তং দেতি… অমূল়্হৰিনযারহং অব্ভেতি… অমূল়্হৰিনযারহং উপসম্পাদেতি… অমূল়্হৰিনযারহস্স সতিৰিনযং দেতি, এৰং খো, ভিক্খৰে, অধম্মকম্মং হোতি অৰিনযকম্মং। এৰঞ্চ পন সঙ্ঘো সাতিসারো হোতি।
405. Yo kho, bhikkhave, samaggo saṅgho amūḷhavinayārahassa tassapāpiyasikākammaṃ karoti, evaṃ kho, bhikkhave, adhammakammaṃ hoti avinayakammaṃ. Evañca pana saṅgho sātisāro hoti. Yo kho, bhikkhave, samaggo saṅgho amūḷhavinayārahassa tajjanīyakammaṃ karoti…pe… amūḷhavinayārahassa niyassakammaṃ karoti… amūḷhavinayārahassa pabbājanīyakammaṃ karoti… amūḷhavinayārahassa paṭisāraṇīyakammaṃ karoti… amūḷhavinayārahassa ukkhepanīyakammaṃ karoti… amūḷhavinayārahassa parivāsaṃ deti… amūḷhavinayārahaṃ mūlāya paṭikassati… amūḷhavinayārahassa mānattaṃ deti… amūḷhavinayārahaṃ abbheti… amūḷhavinayārahaṃ upasampādeti… amūḷhavinayārahassa sativinayaṃ deti, evaṃ kho, bhikkhave, adhammakammaṃ hoti avinayakammaṃ. Evañca pana saṅgho sātisāro hoti.
৪০৬. যো খো, ভিক্খৰে, সমগ্গো সঙ্ঘো তস্সপাপিযসিকাকম্মারহস্স তজ্জনীযকম্মং করোতি…পে॰… তজ্জনীযকম্মারহস্স… নিযস্সকম্মারহস্স… পব্বাজনীযকম্মারহস্স… পটিসারণীযকম্মারহস্স… উক্খেপনীযকম্মারহস্স… পরিৰাসারহং… মূলাযপটিকস্সনারহস্স… মানত্তারহং… অব্ভানারহং… উপসম্পদারহস্স সতিৰিনযং দেতি, এৰং খো, ভিক্খৰে, অধম্মকম্মং হোতি অৰিনযকম্মং। এৰঞ্চ পন সঙ্ঘো সাতিসারো হোতি। যো খো, ভিক্খৰে, সমগ্গো সঙ্ঘো উপসম্পদারহস্স অমূল়্হৰিনযং দেতি…পে॰… উপসম্পদারহস্স তস্সপাপিযসিকাকম্মং করোতি… উপসম্পদারহস্স তজ্জনীযকম্মং করোতি… উপসম্পদারহস্স নিযস্সকম্মং করোতি… উপসম্পদারহস্স পব্বাজনীযকম্মং করোতি… উপসম্পদারহস্স পটিসারণীযকম্মং করোতি… উপসম্পদারহস্স উক্খেপনীযকম্মং করোতি… উপসম্পদারহস্স পরিৰাসং দেতি… উপসম্পদারহং মূলায পটিকস্সতি… উপসম্পদারহস্স মানত্তং দেতি… উপসম্পদারহং অব্ভেতি, এৰং খো, ভিক্খৰে, অধম্মকম্মং হোতি অৰিনযকম্মং। এৰঞ্চ পন সঙ্ঘো সাতিসারো হোতীতি।
406. Yo kho, bhikkhave, samaggo saṅgho tassapāpiyasikākammārahassa tajjanīyakammaṃ karoti…pe… tajjanīyakammārahassa… niyassakammārahassa… pabbājanīyakammārahassa… paṭisāraṇīyakammārahassa… ukkhepanīyakammārahassa… parivāsārahaṃ… mūlāyapaṭikassanārahassa… mānattārahaṃ… abbhānārahaṃ… upasampadārahassa sativinayaṃ deti, evaṃ kho, bhikkhave, adhammakammaṃ hoti avinayakammaṃ. Evañca pana saṅgho sātisāro hoti. Yo kho, bhikkhave, samaggo saṅgho upasampadārahassa amūḷhavinayaṃ deti…pe… upasampadārahassa tassapāpiyasikākammaṃ karoti… upasampadārahassa tajjanīyakammaṃ karoti… upasampadārahassa niyassakammaṃ karoti… upasampadārahassa pabbājanīyakammaṃ karoti… upasampadārahassa paṭisāraṇīyakammaṃ karoti… upasampadārahassa ukkhepanīyakammaṃ karoti… upasampadārahassa parivāsaṃ deti… upasampadārahaṃ mūlāya paṭikassati… upasampadārahassa mānattaṃ deti… upasampadārahaṃ abbheti, evaṃ kho, bhikkhave, adhammakammaṃ hoti avinayakammaṃ. Evañca pana saṅgho sātisāro hotīti.
উপালিপুচ্ছাকথা নিট্ঠিতা।
Upālipucchākathā niṭṭhitā.
উপালিপুচ্ছাভাণৰারো নিট্ঠিতো দুতিযো।
Upālipucchābhāṇavāro niṭṭhito dutiyo.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / উপালিপুচ্ছাকথা • Upālipucchākathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপালিপুচ্ছাকথাৰণ্ণনা • Upālipucchākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২৪১. উপালিপুচ্ছাকথা • 241. Upālipucchākathā
