| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. உபாலிஸுத்தவண்ணனா
9. Upālisuttavaṇṇanā
99. நவமே து³ரபி⁴ஸம்ப⁴வானீதி ஸம்ப⁴விதுங் து³க்கா²னி து³ஸ்ஸஹானி, ந ஸக்கா அப்பேஸக்கே²ஹி அஜ்ஜோ²கா³ஹிதுந்தி வுத்தங் ஹோதி. அரஞ்ஞவனபத்தா²னீதி அரஞ்ஞானி ச வனபத்தா²னி ச. ஆரஞ்ஞகங்க³னிப்பா²த³னேன அரஞ்ஞானி, கா³மந்தங் அதிக்கமித்வா மனுஸ்ஸானங் அனுபசாரட்டா²னபா⁴வேன வனபத்தா²னி. பந்தானீதி பரியந்தானி அதிதூ³ரானி. து³க்கரங் பவிவேகந்தி காயவிவேகோ து³க்கரோ. து³ரபி⁴ரமந்தி அபி⁴ரமிதுங் ந ஸுகரங். ஏகத்தேதி ஏகீபா⁴வே. கிங் த³ஸ்ஸேதி? காயவிவேகே கதேபி தத்த² சித்தங் அபி⁴ரமாபேதுங் து³க்கரங். த்³வயங்த்³வயாராமோ ஹி அயங் லோகோதி. ஹரந்தி மஞ்ஞேதி ஹரந்தி விய க⁴ஸந்தி விய. மனோதி சித்தங். ஸமாதி⁴ங் அலப⁴மானஸ்ஸாதி உபசாரஸமாதி⁴ங் வா அப்பனாஸமாதி⁴ங் வா அலப⁴ந்தஸ்ஸ . கிங் த³ஸ்ஸேதி? ஈதி³ஸஸ்ஸ பி⁴க்கு²னோ திணபண்ணமிகா³தி³ஸத்³தே³ஹி விவிதே⁴ஹி ச பீ⁴ஸனகேஹி வனானி சித்தங் விக்கி²பந்தி மஞ்ஞேதி. ஸங்ஸீதி³ஸ்ஸதீதி காமவிதக்கேன ஸங்ஸீதி³ஸ்ஸதி. உப்லவிஸ்ஸதீதி ப்³யாபாத³விஹிங்ஸாவிதக்கேஹி உத்³த⁴ங் ப்லவிஸ்ஸதி.
99. Navame durabhisambhavānīti sambhavituṃ dukkhāni dussahāni, na sakkā appesakkhehi ajjhogāhitunti vuttaṃ hoti. Araññavanapatthānīti araññāni ca vanapatthāni ca. Āraññakaṅganipphādanena araññāni, gāmantaṃ atikkamitvā manussānaṃ anupacāraṭṭhānabhāvena vanapatthāni. Pantānīti pariyantāni atidūrāni. Dukkaraṃ pavivekanti kāyaviveko dukkaro. Durabhiramanti abhiramituṃ na sukaraṃ. Ekatteti ekībhāve. Kiṃ dasseti? Kāyaviveke katepi tattha cittaṃ abhiramāpetuṃ dukkaraṃ. Dvayaṃdvayārāmo hi ayaṃ lokoti. Haranti maññeti haranti viya ghasanti viya. Manoti cittaṃ. Samādhiṃ alabhamānassāti upacārasamādhiṃ vā appanāsamādhiṃ vā alabhantassa . Kiṃ dasseti? Īdisassa bhikkhuno tiṇapaṇṇamigādisaddehi vividhehi ca bhīsanakehi vanāni cittaṃ vikkhipanti maññeti. Saṃsīdissatīti kāmavitakkena saṃsīdissati. Uplavissatīti byāpādavihiṃsāvitakkehi uddhaṃ plavissati.
கண்ணஸங்தோ⁴விகந்தி கண்ணே தோ⁴வந்தேன கீளிதப்³ப³ங். பிட்டி²ஸங்தோ⁴விகந்தி பிட்டி²ங் தோ⁴வந்தேன கீளிதப்³ப³ங். தத்த² உத³கங் ஸொண்டா³ய க³ஹெத்வா த்³வீஸு கண்ணேஸு ஆஸிஞ்சனங் கண்ணஸங்தோ⁴விகா நாம, பிட்டி²யங் ஆஸிஞ்சனங் பிட்டி²ஸங்தோ⁴விகா நாம. கா³த⁴ங் விந்த³தீதி பதிட்ட²ங் லப⁴தி. கோ சாஹங் கோ ச ஹத்தி²னாகோ³தி அஹங் கோ, ஹத்தி²னாகோ³ கோ, அஹம்பி திரச்சா²னக³தோ, அயம்பி, மய்ஹம்பி சத்தாரோ பாதா³, இமஸ்ஸபி, நனு உபோ⁴பி மயங் ஸமஸமாதி.
Kaṇṇasaṃdhovikanti kaṇṇe dhovantena kīḷitabbaṃ. Piṭṭhisaṃdhovikanti piṭṭhiṃ dhovantena kīḷitabbaṃ. Tattha udakaṃ soṇḍāya gahetvā dvīsu kaṇṇesu āsiñcanaṃ kaṇṇasaṃdhovikā nāma, piṭṭhiyaṃ āsiñcanaṃ piṭṭhisaṃdhovikā nāma. Gādhaṃ vindatīti patiṭṭhaṃ labhati. Ko cāhaṃ ko ca hatthināgoti ahaṃ ko, hatthināgo ko, ahampi tiracchānagato, ayampi, mayhampi cattāro pādā, imassapi, nanu ubhopi mayaṃ samasamāti.
வங்ககந்தி குமாரகானங் கீளனகங் கு²த்³த³கனங்க³லங். க⁴டிகந்தி தீ³க⁴த³ண்ட³கேன ரஸ்ஸத³ண்ட³கங் பஹரணகீளங். மொக்க²சிகந்தி ஸங்பரிவத்தககீளங், ஆகாஸே த³ண்ட³கங் க³ஹெத்வா பூ⁴மியங் வா ஸீஸங் ட²பெத்வா ஹெட்டு²பரியபா⁴வேன பரிவத்தனகீளந்தி வுத்தங் ஹோதி. சிங்கு³லகந்தி தாலபண்ணாதீ³ஹி கதங் வாதப்பஹாரேன பரிப்³ப⁴மனசக்கங். பத்தாள்ஹகங் வுச்சதி பண்ணனாளி, தாய வாலுகாதீ³னி மினந்தா கீளந்தி. ரத²கந்தி கு²த்³த³கரத²ங். த⁴னுகந்தி கு²த்³த³கத⁴னுமேவ.
Vaṅkakanti kumārakānaṃ kīḷanakaṃ khuddakanaṅgalaṃ. Ghaṭikanti dīghadaṇḍakena rassadaṇḍakaṃ paharaṇakīḷaṃ. Mokkhacikanti saṃparivattakakīḷaṃ, ākāse daṇḍakaṃ gahetvā bhūmiyaṃ vā sīsaṃ ṭhapetvā heṭṭhupariyabhāvena parivattanakīḷanti vuttaṃ hoti. Ciṅgulakanti tālapaṇṇādīhi kataṃ vātappahārena paribbhamanacakkaṃ. Pattāḷhakaṃ vuccati paṇṇanāḷi, tāya vālukādīni minantā kīḷanti. Rathakanti khuddakarathaṃ. Dhanukanti khuddakadhanumeva.
இத⁴ கோ² பன வோதி எத்த² வோதி நிபாதமத்தங், இத⁴ கோ² பனாதி அத்தோ². இங்க⁴ த்வங், உபாலி, ஸங்கே⁴ விஹராஹீதி எத்த² இங்கா⁴தி சோத³னத்தே² நிபாதோ. தேன தே²ரங் ஸங்க⁴மஜ்ஜே² விஹாரத்தா²ய சோதே³தி, நாஸ்ஸ அரஞ்ஞவாஸங் அனுஜானாதி. கஸ்மா? அரஞ்ஞஸேனாஸனே வஸதோ கிரஸ்ஸ வாஸது⁴ரமேவ பூரிஸ்ஸதி, ந க³ந்த²து⁴ரங். ஸங்க⁴மஜ்ஜே² வஸந்தோ பன த்³வே து⁴ரானி பூரெத்வா அரஹத்தங் பாபுணிஸ்ஸதி, வினயபிடகே ச பாமொக்கோ² ப⁴விஸ்ஸதி. அத²ஸ்ஸாஹங் பரிஸமஜ்ஜே² புப்³ப³பத்த²னங் புப்³பா³பி⁴னீஹாரஞ்ச கதெ²த்வா இமங் பி⁴க்கு²ங் வினயத⁴ரானங் அக்³க³ட்டா²னே ட²பெஸ்ஸாமீதி இமமத்த²ங் பஸ்ஸமானோ ஸத்தா² தே²ரஸ்ஸ அரஞ்ஞவாஸங் நானுஜானீதி. த³ஸமங் உத்தானத்த²மேவாதி.
Idha kho pana voti ettha voti nipātamattaṃ, idha kho panāti attho. Iṅgha tvaṃ, upāli, saṅghe viharāhīti ettha iṅghāti codanatthe nipāto. Tena theraṃ saṅghamajjhe vihāratthāya codeti, nāssa araññavāsaṃ anujānāti. Kasmā? Araññasenāsane vasato kirassa vāsadhurameva pūrissati, na ganthadhuraṃ. Saṅghamajjhe vasanto pana dve dhurāni pūretvā arahattaṃ pāpuṇissati, vinayapiṭake ca pāmokkho bhavissati. Athassāhaṃ parisamajjhe pubbapatthanaṃ pubbābhinīhārañca kathetvā imaṃ bhikkhuṃ vinayadharānaṃ aggaṭṭhāne ṭhapessāmīti imamatthaṃ passamāno satthā therassa araññavāsaṃ nānujānīti. Dasamaṃ uttānatthamevāti.
உபாலிவக்³கோ³ பஞ்சமோ.
Upālivaggo pañcamo.
து³தியபண்ணாஸகங் நிட்டி²தங்.
Dutiyapaṇṇāsakaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. உபாலிஸுத்தங் • 9. Upālisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9-10. உபாலிஸுத்தாதி³வண்ணனா • 9-10. Upālisuttādivaṇṇanā
