| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. உபாலிவக்³கோ³
4. Upālivaggo
1. உபாலிஸுத்தவண்ணனா
1. Upālisuttavaṇṇanā
31. சதுத்த²ஸ்ஸ பட²மே அத்த²வஸேதி வுத்³தி⁴விஸேஸே, ஸிக்கா²பத³பஞ்ஞத்திஹேது அதி⁴க³மனீயே ஹிதவிஸேஸேதி அத்தோ². அத்தோ²யேவ வா அத்த²வஸோ, த³ஸ அத்தே² த³ஸ காரணானீதி வுத்தங் ஹோதி. அத² வா அத்தோ² ப²லங் தத³தீ⁴னவுத்திதாய வஸோ ஏதஸ்ஸாதி அத்த²வஸோ, ஹேதூதி ஏவம்பெத்த² அத்தோ² த³ட்ட²ப்³போ³. ‘‘யே மம ஸோதப்³ப³ங் ஸத்³த³ஹாதப்³ப³ங் மஞ்ஞிஸ்ஸந்தி, தேஸங் தங் அஸ்ஸ தீ³க⁴ரத்தங் ஹிதாய ஸுகா²யா’’தி வுத்தத்தா ‘‘யோ ச ததா²க³தஸ்ஸ வசனங் ஸம்படிச்ச²தி, தஸ்ஸ தங் தீ³க⁴ரத்தங் ஹிதாய ஸுகா²ய ஸங்வத்ததீ’’தி வுத்தங். அஸம்படிச்ச²னே ஆதீ³னவந்தி ப⁴த்³தா³லிஸுத்தே விய அஸம்படிச்ச²னே ஆதீ³னவங் த³ஸ்ஸெத்வா. ஸுக²விஹாராபா⁴வே ஸஹஜீவமானஸ்ஸ அபா⁴வதோ ஸஹஜீவிதாபி ஸுக²விஹாரோவ வுத்தோ. ஸுக²விஹாரோ நாம சதுன்னங் இரியாபத²விஹாரானங் பா²ஸுதா.
31. Catutthassa paṭhame atthavaseti vuddhivisese, sikkhāpadapaññattihetu adhigamanīye hitaviseseti attho. Atthoyeva vā atthavaso, dasa atthe dasa kāraṇānīti vuttaṃ hoti. Atha vā attho phalaṃ tadadhīnavuttitāya vaso etassāti atthavaso, hetūti evampettha attho daṭṭhabbo. ‘‘Ye mama sotabbaṃ saddahātabbaṃ maññissanti, tesaṃ taṃ assa dīgharattaṃ hitāya sukhāyā’’ti vuttattā ‘‘yo ca tathāgatassa vacanaṃ sampaṭicchati, tassa taṃ dīgharattaṃ hitāya sukhāya saṃvattatī’’ti vuttaṃ. Asampaṭicchane ādīnavanti bhaddālisutte viya asampaṭicchane ādīnavaṃ dassetvā. Sukhavihārābhāve sahajīvamānassa abhāvato sahajīvitāpi sukhavihārova vutto. Sukhavihāro nāma catunnaṃ iriyāpathavihārānaṃ phāsutā.
மங்குதந்தி நித்தேஜதங். த⁴ம்மேனாதிஆதீ³ஸு த⁴ம்மோதி பூ⁴தங் வத்து². வினயோதி சோத³னா சேவ ஸாரணா ச. ஸத்து²ஸாஸனந்தி ஞத்திஸம்பதா³ சேவ அனுஸ்ஸாவனஸம்பதா³ ச.
Maṅkutanti nittejataṃ. Dhammenātiādīsu dhammoti bhūtaṃ vatthu. Vinayoti codanā ceva sāraṇā ca. Satthusāsananti ñattisampadā ceva anussāvanasampadā ca.
பியஸீலானந்தி ஸிக்கா²காமானங். தேஸஞ்ஹி ஸீலங் பியங் ஹோதி. தேனேவாஹ ‘‘ஸிக்கா²த்தயபாரிபூரியா க⁴டமானா’’தி. ஸந்தி³த்³த⁴மனாதி ஸங்ஸயங் ஆபஜ்ஜமனா . உப்³ப³ள்ஹா ஹொந்தீதி பீளிதா ஹொந்தி. ஸங்க⁴கம்மானீதி ஸதிபி உபோஸத²பவாரணானங் ஸங்க⁴கம்மபா⁴வே கோ³ப³லீப³த்³த³ஞாயேன உபோஸத²ங் பவாரணஞ்ச ட²பெத்வா உபஸம்பதா³தி³ஸேஸஸங்க⁴கம்மானங் க³ஹணங் வேதி³தப்³ப³ங். ஸமக்³கா³னங் பா⁴வோ ஸாமக்³கீ³.
Piyasīlānanti sikkhākāmānaṃ. Tesañhi sīlaṃ piyaṃ hoti. Tenevāha ‘‘sikkhāttayapāripūriyā ghaṭamānā’’ti. Sandiddhamanāti saṃsayaṃ āpajjamanā . Ubbaḷhā hontīti pīḷitā honti. Saṅghakammānīti satipi uposathapavāraṇānaṃ saṅghakammabhāve gobalībaddañāyena uposathaṃ pavāraṇañca ṭhapetvā upasampadādisesasaṅghakammānaṃ gahaṇaṃ veditabbaṃ. Samaggānaṃ bhāvo sāmaggī.
‘‘நாஹங், சுந்த³, தி³ட்ட²த⁴ம்மிகானங்யேவ ஆஸவானங் ஸங்வராய த⁴ம்மங் தே³ஸேமீ’’தி (தீ³॰ நி॰ 3.182) எத்த² விவாத³மூலபூ⁴தா கிலேஸா ஆஸவாதி ஆக³தா.
‘‘Nāhaṃ, cunda, diṭṭhadhammikānaṃyeva āsavānaṃ saṃvarāya dhammaṃ desemī’’ti (dī. ni. 3.182) ettha vivādamūlabhūtā kilesā āsavāti āgatā.
‘‘யேன தே³வூபபத்யஸ்ஸ, க³ந்த⁴ப்³போ³ வா விஹங்க³மோ;
‘‘Yena devūpapatyassa, gandhabbo vā vihaṅgamo;
யக்க²த்தங் யேன க³ச்செ²ய்யங், மனுஸ்ஸத்தஞ்ச அப்³ப³ஜே;
Yakkhattaṃ yena gaccheyyaṃ, manussattañca abbaje;
தே மய்ஹங் ஆஸவா கீ²ணா, வித்³த⁴ஸ்தா வினளீகதா’’தி. (அ॰ நி॰ 4.36) –
Te mayhaṃ āsavā khīṇā, viddhastā vinaḷīkatā’’ti. (a. ni. 4.36) –
எத்த² தேபூ⁴மகங் கம்மங் அவஸேஸா ச அகுஸலா த⁴ம்மா. இத⁴ பன பரூபவாத³விப்படிஸாரவத⁴ப³ந்தா⁴த³யோ சேவ அபாயது³க்க²பூ⁴தா ச நானப்பகாரா உபத்³த³வா ஆஸவாதி ஆஹ ‘‘அஸங்வரே டி²தேன தஸ்மிங்யேவ அத்தபா⁴வே பத்தப்³பா³’’திஆதி³. யதி³ ஹி ப⁴க³வா ஸிக்கா²பத³ங் ந ச பஞ்ஞபெய்ய, ததோ அஸத்³த⁴ம்மப்படிஸேவனஅதி³ன்னாதா³னபாணாதிபாதாதி³ஹேது யே உப்பஜ்ஜெய்யுங் பரூபவாதா³த³யோ தி³ட்ட²த⁴ம்மிகா நானப்பகாரா அனத்தா², யே ச தன்னிமித்தமேவ நிரயாதீ³ஸு நிப்³ப³த்தஸ்ஸ பஞ்சவித⁴ப³ந்த⁴னகம்மகாரணாதி³வஸேன மஹாது³க்கா²னுப⁴வனப்பகாரா அனத்தா², தே ஸந்தா⁴ய இத³ங் வுத்தங் ‘‘தி³ட்ட²த⁴ம்மிகானங் ஆஸவானங் ஸங்வராய ஸம்பராயிகானங் ஆஸவானங் படிகா⁴தாயா’’தி. தி³ட்ட²த⁴ம்மோ வுச்சதி பச்சக்கோ² அத்தபா⁴வோ, தத்த² ப⁴வா தி³ட்ட²த⁴ம்மிகா. தேன வுத்தங் ‘‘தஸ்மிங்யேவ அத்தபா⁴வே பத்தப்³பா³’’தி. ஸம்முகா² க³ரஹனங் அகித்தி, பரம்முகா² க³ரஹனங் அயஸோ. அத² வா ஸம்முகா² பரம்முகா² க³ரஹனங் அகித்தி, பரிவாரஹானி அயஸோதி வேதி³தப்³ப³ங். ஆக³மனமக்³க³த²கனாயாதி ஆக³மனத்³வாரபித³ஹனத்தா²ய. ஸம்பரேதப்³ப³தோ பேச்ச க³ந்தப்³ப³தோ ஸம்பராயோ, பரலோகோதி ஆஹ ‘‘ஸம்பராயே நரகாதீ³ஸூ’’தி.
Ettha tebhūmakaṃ kammaṃ avasesā ca akusalā dhammā. Idha pana parūpavādavippaṭisāravadhabandhādayo ceva apāyadukkhabhūtā ca nānappakārā upaddavā āsavāti āha ‘‘asaṃvare ṭhitena tasmiṃyeva attabhāve pattabbā’’tiādi. Yadi hi bhagavā sikkhāpadaṃ na ca paññapeyya, tato asaddhammappaṭisevanaadinnādānapāṇātipātādihetu ye uppajjeyyuṃ parūpavādādayo diṭṭhadhammikā nānappakārā anatthā, ye ca tannimittameva nirayādīsu nibbattassa pañcavidhabandhanakammakāraṇādivasena mahādukkhānubhavanappakārā anatthā, te sandhāya idaṃ vuttaṃ ‘‘diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāyā’’ti. Diṭṭhadhammo vuccati paccakkho attabhāvo, tattha bhavā diṭṭhadhammikā. Tena vuttaṃ ‘‘tasmiṃyeva attabhāve pattabbā’’ti. Sammukhā garahanaṃ akitti, parammukhā garahanaṃ ayaso. Atha vā sammukhā parammukhā garahanaṃ akitti, parivārahāni ayasoti veditabbaṃ. Āgamanamaggathakanāyāti āgamanadvārapidahanatthāya. Samparetabbato pecca gantabbato samparāyo, paralokoti āha ‘‘samparāye narakādīsū’’ti.
மேது²னாதீ³னி ரஜ்ஜனட்டா²னானி. பாணாதிபாதாதீ³னி து³ஸ்ஸனட்டா²னானி.
Methunādīni rajjanaṭṭhānāni. Pāṇātipātādīni dussanaṭṭhānāni.
ஸங்வரவினயோதி ஸீலஸங்வரோ, ஸதிஸங்வரோ, ஞாணஸங்வரோ, க²ந்திஸங்வரோ, வீரியஸங்வரோதி பஞ்சவிதோ⁴ ஸங்வரோ. யதா²ஸகங் ஸங்வரிதப்³பா³னங் வினேதப்³பா³னஞ்ச காயது³ச்சரிதாதீ³னங் ஸங்வரணதோ ஸங்வரோ, வினயனதோ வினயோதி வுச்சதி . பஹானவினயோதி தத³ங்க³ப்பஹானங் விக்க²ம்ப⁴னப்பஹானங், ஸமுச்சே²த³ப்பஹானங், படிபஸ்ஸத்³தி⁴ப்பஹானங், நிஸ்ஸரணப்பஹானந்தி பஞ்சவித⁴ங் பஹானங் யஸ்மா சாக³ட்டே²ன பஹானங், வினயட்டே²ன வினயோ, தஸ்மா ‘‘பஹானவினயோ’’தி வுச்சதி. ஸமத²வினயோதி ஸத்த அதி⁴கரணஸமதா². பஞ்ஞத்திவினயோதி ஸிக்கா²பத³மேவ. ஸிக்கா²பத³பஞ்ஞத்தியா ஹி விஜ்ஜமானாய ஏவ ஸிக்கா²பத³ஸம்ப⁴வதோ பஞ்ஞத்திவினயோபி ஸிக்கா²பத³பஞ்ஞத்தியா அனுக்³க³ஹிதோ ஹோதி. ஸேஸமெத்த² வுத்தத்த²மேவ.
Saṃvaravinayoti sīlasaṃvaro, satisaṃvaro, ñāṇasaṃvaro, khantisaṃvaro, vīriyasaṃvaroti pañcavidho saṃvaro. Yathāsakaṃ saṃvaritabbānaṃ vinetabbānañca kāyaduccaritādīnaṃ saṃvaraṇato saṃvaro, vinayanato vinayoti vuccati . Pahānavinayoti tadaṅgappahānaṃ vikkhambhanappahānaṃ, samucchedappahānaṃ, paṭipassaddhippahānaṃ, nissaraṇappahānanti pañcavidhaṃ pahānaṃ yasmā cāgaṭṭhena pahānaṃ, vinayaṭṭhena vinayo, tasmā ‘‘pahānavinayo’’ti vuccati. Samathavinayoti satta adhikaraṇasamathā. Paññattivinayoti sikkhāpadameva. Sikkhāpadapaññattiyā hi vijjamānāya eva sikkhāpadasambhavato paññattivinayopi sikkhāpadapaññattiyā anuggahito hoti. Sesamettha vuttatthameva.
உபாலிஸுத்தவண்ணனா நிட்டி²தா.
Upālisuttavaṇṇanā niṭṭhitā.
உபாலிவக்³க³வண்ணனா நிட்டி²தா.
Upālivaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. உபாலிஸுத்தங் • 1. Upālisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. உபாலிஸுத்தவண்ணனா • 1. Upālisuttavaṇṇanā
