| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
உபனந்த³ஸக்யபுத்தவத்து²கதா²
Upanandasakyaputtavatthukathā
364. கா³மகாவாஸங் அக³மாஸீதி அப்பேவ நாம சீவரானி பா⁴ஜெந்தா மய்ஹம்பி ஸங்க³ஹங் கரெய்யுந்தி சீவரபா⁴ஜனகாலங் ஸல்லக்கெ²த்வாவ அக³மாஸி. ஸாதி³யிஸ்ஸஸீதி க³ண்ஹிஸ்ஸஸி. எத்த² ச கிஞ்சாபி தஸ்ஸ பா⁴கோ³ ந பாபுணாதி. அத² கோ² ‘‘நக³ரவாஸிகோ அயங் முக²ரோ த⁴ம்மகதி²கோ’’தி தே பி⁴க்கூ² ‘‘ஸாதி³யிஸ்ஸஸீ’’தி ஆஹங்ஸு. யோ ஸாதி³யெய்ய ஆபத்தி து³க்கடஸ்ஸாதி எத்த² பன கிஞ்சாபி லஹுகா ஆபத்தி, அத² கோ² க³ஹிதானி க³ஹிதட்டா²னே தா³தப்³பா³னி. ஸசேபி நட்டா²னி வா ஜிண்ணானி வா ஹொந்தி, தஸ்ஸேவ கீ³வா. தே³ஹீதி வுத்தே அதெ³ந்தோ து⁴ரனிக்கே²பே ப⁴ண்ட³க்³கே⁴ன காரேதப்³போ³.
364.Gāmakāvāsaṃagamāsīti appeva nāma cīvarāni bhājentā mayhampi saṅgahaṃ kareyyunti cīvarabhājanakālaṃ sallakkhetvāva agamāsi. Sādiyissasīti gaṇhissasi. Ettha ca kiñcāpi tassa bhāgo na pāpuṇāti. Atha kho ‘‘nagaravāsiko ayaṃ mukharo dhammakathiko’’ti te bhikkhū ‘‘sādiyissasī’’ti āhaṃsu. Yo sādiyeyya āpatti dukkaṭassāti ettha pana kiñcāpi lahukā āpatti, atha kho gahitāni gahitaṭṭhāne dātabbāni. Sacepi naṭṭhāni vā jiṇṇāni vā honti, tasseva gīvā. Dehīti vutte adento dhuranikkhepe bhaṇḍagghena kāretabbo.
ஏகாதி⁴ப்பாயந்தி ஏகங் அதி⁴ப்பாயங்; ஏகங் புக்³க³லபடிவீஸமேவ தே³தா²தி அத்தோ². இதா³னி யதா² ஸோ தா³தப்³போ³, தங் த³ஸ்ஸேதுங் தந்திங் ட²பெந்தோ இத⁴ பனாதிஆதி³மாஹ. தத்த² ஸசே அமுத்ர உபட்³ட⁴ங் அமுத்ர உபட்³ட⁴ந்தி ஏகேகஸ்மிங் ஏகாஹமேகாஹங் வா ஸத்தாஹங் ஸத்தாஹங் வா ஸசே வஸதி, ஏகேகஸ்மிங் விஹாரே யங் ஏகோ புக்³க³லோ லப⁴தி, ததோ ததோ உபட்³ட⁴ங் உபட்³ட⁴ங் தா³தப்³ப³ங். ஏவங் ஏகாதி⁴ப்பாயோ தி³ன்னோ ஹோதி. யத்த² வா பன ப³ஹுதரந்தி ஸசே ஏகஸ்மிங் விஹாரே வஸந்தோ இதரஸ்மிங் ஸத்தாஹவாரேன அருணமேவ உட்டா²பேதி, ஏவங் புரிமஸ்மிங் ப³ஹுதரங் வஸதி நாம. தஸ்மா ததோ ப³ஹுதரங் வஸிதவிஹாரதோ தஸ்ஸ படிவீஸோ தா³தப்³போ³. ஏவம்பி ஏகாதி⁴ப்பாயோ தி³ன்னோ ஹோதி. இத³ஞ்ச நானாலாபே⁴ஹி நானூபசாரேஹி ஏகஸீமவிஹாரேஹி கதி²தங், நானாஸீமவிஹாரே பன ஸேனாஸனக்³கா³ஹோ படிப்பஸ்ஸம்ப⁴தி. தஸ்மா தத்த² சீவரபடிவீஸோ ந பாபுணாதி. ஸேஸங் பன ஆமிஸபே⁴ஸஜ்ஜாதி³ ஸப்³ப³ங் ஸப்³ப³த்த² அந்தோஸீமக³தஸ்ஸ பாபுணாதி.
Ekādhippāyanti ekaṃ adhippāyaṃ; ekaṃ puggalapaṭivīsameva dethāti attho. Idāni yathā so dātabbo, taṃ dassetuṃ tantiṃ ṭhapento idha panātiādimāha. Tattha sace amutra upaḍḍhaṃ amutra upaḍḍhanti ekekasmiṃ ekāhamekāhaṃ vā sattāhaṃ sattāhaṃ vā sace vasati, ekekasmiṃ vihāre yaṃ eko puggalo labhati, tato tato upaḍḍhaṃ upaḍḍhaṃ dātabbaṃ. Evaṃ ekādhippāyo dinno hoti. Yattha vā pana bahutaranti sace ekasmiṃ vihāre vasanto itarasmiṃ sattāhavārena aruṇameva uṭṭhāpeti, evaṃ purimasmiṃ bahutaraṃ vasati nāma. Tasmā tato bahutaraṃ vasitavihārato tassa paṭivīso dātabbo. Evampi ekādhippāyo dinno hoti. Idañca nānālābhehi nānūpacārehi ekasīmavihārehi kathitaṃ, nānāsīmavihāre pana senāsanaggāho paṭippassambhati. Tasmā tattha cīvarapaṭivīso na pāpuṇāti. Sesaṃ pana āmisabhesajjādi sabbaṃ sabbattha antosīmagatassa pāpuṇāti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 223. உபனந்த³ஸக்யபுத்தவத்து² • 223. Upanandasakyaputtavatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபனந்த³ஸக்யபுத்தவத்து²கதா²வண்ணனா • Upanandasakyaputtavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உபனந்த³ஸக்யபுத்தவத்து²கதா²வண்ணனா • Upanandasakyaputtavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபனந்த³ஸக்யபுத்தவத்து²கதா²வண்ணனா • Upanandasakyaputtavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 223. உபனந்த³ஸக்யபுத்தவத்து²கதா² • 223. Upanandasakyaputtavatthukathā
