| Library / Tipiṭaka / ติปิฎก • Tipiṭaka / มหาวคฺค-อฎฺฐกถา • Mahāvagga-aṭṭhakathā |
อุปนนฺทสกฺยปุตฺตวตฺถุกถา
Upanandasakyaputtavatthukathā
๓๖๔. คามกาวาสํ อคมาสีติ อเปฺปว นาม จีวรานิ ภาเชนฺตา มยฺหมฺปิ สงฺคหํ กเรยฺยุนฺติ จีวรภาชนกาลํ สลฺลเกฺขตฺวาว อคมาสิฯ สาทิยิสฺสสีติ คณฺหิสฺสสิฯ เอตฺถ จ กิญฺจาปิ ตสฺส ภาโค น ปาปุณาติฯ อถ โข ‘‘นครวาสิโก อยํ มุขโร ธมฺมกถิโก’’ติ เต ภิกฺขู ‘‘สาทิยิสฺสสี’’ติ อาหํสุฯ โย สาทิเยยฺย อาปตฺติ ทุกฺกฎสฺสาติ เอตฺถ ปน กิญฺจาปิ ลหุกา อาปตฺติ, อถ โข คหิตานิ คหิตฎฺฐาเน ทาตพฺพานิฯ สเจปิ นฎฺฐานิ วา ชิณฺณานิ วา โหนฺติ, ตเสฺสว คีวาฯ เทหีติ วุเตฺต อเทโนฺต ธุรนิเกฺขเป ภณฺฑเคฺฆน กาเรตโพฺพฯ
364.Gāmakāvāsaṃagamāsīti appeva nāma cīvarāni bhājentā mayhampi saṅgahaṃ kareyyunti cīvarabhājanakālaṃ sallakkhetvāva agamāsi. Sādiyissasīti gaṇhissasi. Ettha ca kiñcāpi tassa bhāgo na pāpuṇāti. Atha kho ‘‘nagaravāsiko ayaṃ mukharo dhammakathiko’’ti te bhikkhū ‘‘sādiyissasī’’ti āhaṃsu. Yo sādiyeyya āpatti dukkaṭassāti ettha pana kiñcāpi lahukā āpatti, atha kho gahitāni gahitaṭṭhāne dātabbāni. Sacepi naṭṭhāni vā jiṇṇāni vā honti, tasseva gīvā. Dehīti vutte adento dhuranikkhepe bhaṇḍagghena kāretabbo.
เอกาธิปฺปายนฺติ เอกํ อธิปฺปายํ; เอกํ ปุคฺคลปฎิวีสเมว เทถาติ อโตฺถฯ อิทานิ ยถา โส ทาตโพฺพ, ตํ ทเสฺสตุํ ตนฺติํ ฐเปโนฺต อิธ ปนาติอาทิมาหฯ ตตฺถ สเจ อมุตฺร อุปฑฺฒํ อมุตฺร อุปฑฺฒนฺติ เอเกกสฺมิํ เอกาหเมกาหํ วา สตฺตาหํ สตฺตาหํ วา สเจ วสติ, เอเกกสฺมิํ วิหาเร ยํ เอโก ปุคฺคโล ลภติ, ตโต ตโต อุปฑฺฒํ อุปฑฺฒํ ทาตพฺพํฯ เอวํ เอกาธิปฺปาโย ทิโนฺน โหติฯ ยตฺถ วา ปน พหุตรนฺติ สเจ เอกสฺมิํ วิหาเร วสโนฺต อิตรสฺมิํ สตฺตาหวาเรน อรุณเมว อุฎฺฐาเปติ, เอวํ ปุริมสฺมิํ พหุตรํ วสติ นามฯ ตสฺมา ตโต พหุตรํ วสิตวิหารโต ตสฺส ปฎิวีโส ทาตโพฺพฯ เอวมฺปิ เอกาธิปฺปาโย ทิโนฺน โหติฯ อิทญฺจ นานาลาเภหิ นานูปจาเรหิ เอกสีมวิหาเรหิ กถิตํ, นานาสีมวิหาเร ปน เสนาสนคฺคาโห ปฎิปฺปสฺสมฺภติฯ ตสฺมา ตตฺถ จีวรปฎิวีโส น ปาปุณาติฯ เสสํ ปน อามิสเภสชฺชาทิ สพฺพํ สพฺพตฺถ อโนฺตสีมคตสฺส ปาปุณาติฯ
Ekādhippāyanti ekaṃ adhippāyaṃ; ekaṃ puggalapaṭivīsameva dethāti attho. Idāni yathā so dātabbo, taṃ dassetuṃ tantiṃ ṭhapento idha panātiādimāha. Tattha sace amutra upaḍḍhaṃ amutra upaḍḍhanti ekekasmiṃ ekāhamekāhaṃ vā sattāhaṃ sattāhaṃ vā sace vasati, ekekasmiṃ vihāre yaṃ eko puggalo labhati, tato tato upaḍḍhaṃ upaḍḍhaṃ dātabbaṃ. Evaṃ ekādhippāyo dinno hoti. Yattha vā pana bahutaranti sace ekasmiṃ vihāre vasanto itarasmiṃ sattāhavārena aruṇameva uṭṭhāpeti, evaṃ purimasmiṃ bahutaraṃ vasati nāma. Tasmā tato bahutaraṃ vasitavihārato tassa paṭivīso dātabbo. Evampi ekādhippāyo dinno hoti. Idañca nānālābhehi nānūpacārehi ekasīmavihārehi kathitaṃ, nānāsīmavihāre pana senāsanaggāho paṭippassambhati. Tasmā tattha cīvarapaṭivīso na pāpuṇāti. Sesaṃ pana āmisabhesajjādi sabbaṃ sabbattha antosīmagatassa pāpuṇāti.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๒๒๓. อุปนนฺทสกฺยปุตฺตวตฺถุ • 223. Upanandasakyaputtavatthu
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / อุปนนฺทสกฺยปุตฺตวตฺถุกถาวณฺณนา • Upanandasakyaputtavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / อุปนนฺทสกฺยปุตฺตวตฺถุกถาวณฺณนา • Upanandasakyaputtavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / อุปนนฺทสกฺยปุตฺตวตฺถุกถาวณฺณนา • Upanandasakyaputtavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๒๒๓. อุปนนฺทสกฺยปุตฺตวตฺถุกถา • 223. Upanandasakyaputtavatthukathā
