| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
223. උපනන්‌දසක්‍යපුත්‌තවත්‌ථුකථා
223. Upanandasakyaputtavatthukathā
364. එත්‌ථාති උපනන්‌දවත්‌ථුම්‌හි. තස්‌සාති උපනන්‌දස්‌ස. ගාමකාවාසිනොති ගාමකෙ ආවාසිනො. අයන්‌ති උපනන්‌දො. මුඛරොති මුඛං ඛරං එතස්‌සාති මුඛරො ඛකාරලොපො, අථ වා මුඛං එතස්‌සත්‌ථීති මුඛරො මන්‌තුත්‌ථෙ පවත්‌තො රපච්‌චයො නින්‌දත්‌ථවාචකො. ලහුකාපත්‌තීති දුක්‌කටාපත්‌ති. තස්‌සෙවාති ගහිතභික්‌ඛුස්‌සෙව. ධුරනික්‌ඛෙපෙ සතීති යොජනා.
364.Etthāti upanandavatthumhi. Tassāti upanandassa. Gāmakāvāsinoti gāmake āvāsino. Ayanti upanando. Mukharoti mukhaṃ kharaṃ etassāti mukharo khakāralopo, atha vā mukhaṃ etassatthīti mukharo mantutthe pavatto rapaccayo nindatthavācako. Lahukāpattīti dukkaṭāpatti. Tassevāti gahitabhikkhusseva. Dhuranikkhepe satīti yojanā.
එකස්‌ස පුග්‌ගලස්‌සත්‌ථාය අධිප්‌පියතෙ ඉච්‌ඡියතෙති එකාධිප්‌පායො, එකපුග්‌ගලපටිවීසො, තෙනාහ ‘‘එකපුග්‌ගලපටිවීසමෙවා’’ති. යථා යථාති යෙන යෙනාකාරෙන. යොති පටිවීසො. ‘‘තථා තථා’’ති අජ්‌ඣාහරිතබ්‌බො. තත්‌ථාති ‘‘ඉධ පනා’’තිආදිවචනෙ. එකෙකස්‌මිං ආවාසෙති සම්‌බන්‌ධො. වාසද්‌දො අඤ්‌ඤෙපි ද්‌වීහද්‌වීහාදිවාරෙ සඞ්‌ගණ්‌හාති. යන්‌ති පටිවීසං. එකො පුග්‌ගලොති එකො නිච්‌චාවාසො පුග්‌ගලො. එවන්‌ති උපඩ්‌ඪෙ දිය්‍යමානෙ. යත්‌ථ වා පනාති එත්‌ථ යසද්‌දස්‌ස විසයං දස්‌සෙතුං වුත්‌තං ‘‘එවං පුරිමස්‌මි’’න්‌ති. පුරිමස්‌මිං ආවාසෙති සම්‌බන්‌ධො . තතොති එත්‌ථ තසද්‌දස්‌ස විසයං දස්‌සෙන්‌තො ආහ ‘‘බහුතරං වසිතවිහාරතො’’ති. ඉදඤ්‌චාති ‘‘අමුත්‍ර උපඩ්‌ඪො චීවරපටිවීසො දාතබ්‌බො’’ති වචනඤ්‌ච. එකසීමවිහාරෙහීති එකිස්‌සං උපචාරසීමායං ඨිතෙහි විහාරෙහි. නානාසීමවිහාරෙති නානාඋපචාරසීමායං ඨිතෙ විහාරෙ. සෙනාසනග්‌ගාහොති පුරිමඋපචාරසීමායං සෙනාසනග්‌ගාහො. තත්‌ථාති පස්‌සම්‌භනවිහාරෙ. සෙසන්‌ති චීවරතො සෙසං. සබ්‌බත්‌ථාති සබ්‌බෙසු විහාරෙසු. අන්‌තොසීමගතස්‌සාති අන්‌තොඋපචාරසීමායං ගතස්‌ස, භික්‌ඛුනොති සම්‌බන්‌ධො. චීවරං සෙනාසනග්‌ගාහස්‌සෙව පාපුණාති, සෙසං පන ආමිසභෙසජ්‌ජාදිසබ්‌බං අඤ්‌ඤවිහාරතො ආගන්‌ත්‌වා අන්‌තොසීමගතස්‌ස පාපුණාතීති අධිප්‌පායො.
Ekassa puggalassatthāya adhippiyate icchiyateti ekādhippāyo, ekapuggalapaṭivīso, tenāha ‘‘ekapuggalapaṭivīsamevā’’ti. Yathā yathāti yena yenākārena. Yoti paṭivīso. ‘‘Tathā tathā’’ti ajjhāharitabbo. Tatthāti ‘‘idha panā’’tiādivacane. Ekekasmiṃ āvāseti sambandho. Vāsaddo aññepi dvīhadvīhādivāre saṅgaṇhāti. Yanti paṭivīsaṃ. Eko puggaloti eko niccāvāso puggalo. Evanti upaḍḍhe diyyamāne. Yattha vā panāti ettha yasaddassa visayaṃ dassetuṃ vuttaṃ ‘‘evaṃ purimasmi’’nti. Purimasmiṃ āvāseti sambandho . Tatoti ettha tasaddassa visayaṃ dassento āha ‘‘bahutaraṃ vasitavihārato’’ti. Idañcāti ‘‘amutra upaḍḍho cīvarapaṭivīso dātabbo’’ti vacanañca. Ekasīmavihārehīti ekissaṃ upacārasīmāyaṃ ṭhitehi vihārehi. Nānāsīmavihāreti nānāupacārasīmāyaṃ ṭhite vihāre. Senāsanaggāhoti purimaupacārasīmāyaṃ senāsanaggāho. Tatthāti passambhanavihāre. Sesanti cīvarato sesaṃ. Sabbatthāti sabbesu vihāresu. Antosīmagatassāti antoupacārasīmāyaṃ gatassa, bhikkhunoti sambandho. Cīvaraṃ senāsanaggāhasseva pāpuṇāti, sesaṃ pana āmisabhesajjādisabbaṃ aññavihārato āgantvā antosīmagatassa pāpuṇātīti adhippāyo.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 223. උපනන්‌දසක්‍යපුත්‌තවත්‌ථු • 223. Upanandasakyaputtavatthu
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / උපනන්‌දසක්‍යපුත්‌තවත්‌ථුකථා • Upanandasakyaputtavatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / උපනන්‌දසක්‍යපුත්‌තවත්‌ථුකථාවණ්‌ණනා • Upanandasakyaputtavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / උපනන්‌දසක්‍යපුත්‌තවත්‌ථුකථාවණ්‌ණනා • Upanandasakyaputtavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / උපනන්‌දසක්‍යපුත්‌තවත්‌ථුකථාවණ්‌ණනා • Upanandasakyaputtavatthukathāvaṇṇanā
