Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
উপনন্দৰত্থুকথা
Upanandavatthukathā
৩১৯. অযমত্থোতি অযং ৰক্খমানো অত্থো, এৰং ৰেদিতব্বোতি সম্বন্ধো। তত্থাতি গামকে । তন্তি সেনাসনং, গণ্হন্তেনেৰাতি সম্বন্ধো। ইধাতি সাৰত্থিযং। মুত্তন্তি তে সেনাসনং মুঞ্চিতং হোতি। তত্রাপীতি গামকেপি। উভযত্থাতি সাৰত্থিযং, গামকে চাতি উভযত্থ।
319.Ayamatthoti ayaṃ vakkhamāno attho, evaṃ veditabboti sambandho. Tatthāti gāmake . Tanti senāsanaṃ, gaṇhantenevāti sambandho. Idhāti sāvatthiyaṃ. Muttanti te senāsanaṃ muñcitaṃ hoti. Tatrāpīti gāmakepi. Ubhayatthāti sāvatthiyaṃ, gāmake cāti ubhayattha.
এত্থাতি উপনন্দৰত্থুস্মিং। কথন্তি কেন পকারেন পটিপ্পস্সম্ভতি। ইধাতি সাসনে। একচ্চো গণ্হাতীতি সম্বন্ধো। তত্রাপীতি সামন্তৰিহারেপি । তস্সাতি ভিক্খুস্স। ইধাতি সেনাসনে। আলযমত্তন্তি চিত্তুপ্পাদমত্তং। ইচ্চস্সাতি ইতি অস্স, এৰং অস্স ভিক্খুস্সাতি অত্থো। সব্বত্থাতি সব্বস্মিং ‘‘গহণেন গহণ’’ন্তিআদিকে চতুক্কে। যো পন গচ্ছতীতি সম্বন্ধো। উপচারসীমাতিক্কমেতি নিমিত্তত্থে চেতং ভুম্মৰচনং, ভাৰেন ভাৰলক্খণে ৰা। তত্থাতি অঞ্ঞস্মিং ৰিহারে পচ্চাগচ্ছতি, ৰট্টতি, সেনাসনগ্গাহো ন পটিপ্পস্সম্ভতীতি অধিপ্পাযো।
Etthāti upanandavatthusmiṃ. Kathanti kena pakārena paṭippassambhati. Idhāti sāsane. Ekacco gaṇhātīti sambandho. Tatrāpīti sāmantavihārepi . Tassāti bhikkhussa. Idhāti senāsane. Ālayamattanti cittuppādamattaṃ. Iccassāti iti assa, evaṃ assa bhikkhussāti attho. Sabbatthāti sabbasmiṃ ‘‘gahaṇena gahaṇa’’ntiādike catukke. Yo pana gacchatīti sambandho. Upacārasīmātikkameti nimittatthe cetaṃ bhummavacanaṃ, bhāvena bhāvalakkhaṇe vā. Tatthāti aññasmiṃ vihāre paccāgacchati, vaṭṭati, senāsanaggāho na paṭippassambhatīti adhippāyo.
৩২০. যোতি ভিক্খু। মহন্ততরো ৰা দহরতরো ৰাতি অত্তনো মহন্ততরো ৰা দহরতরো ৰা হোতি। সো ভিক্খু তিৰস্সন্তরো নামাতি যোজনা। একস্স ভিক্খুনো তিণ্ণং ৰস্সানমন্তরে ঠিতো তিৰস্সন্তরো অঞ্ঞো ভিক্খু। তত্থাতি ভিক্খূসু। ইমে সব্বেতি তিৰস্সন্তরদ্ৰিৰস্সন্তরসমানৰস্সিকে ইমে ভিক্খূ, লভন্তীতি সম্বন্ধো। যং তিণ্ণং পহোতীতি মঞ্চপীঠৰিনিমুত্তং যং আসনং তিণ্ণং সুখং নিসীদিতুং পহোতি, তথারূপে আসনেপি দ্ৰে দ্ৰে হুত্ৰা নিসীদিতুং লভন্তীতি যোজনা। অপিসদ্দেন মঞ্চপীঠানি অপেক্খতি। ইদং পচ্ছিমদীঘাসনং। অনুপসম্পন্নেনাপীতি পিসদ্দো পগেৰ উপসম্পন্নেনাতি দস্সেতি।
320.Yoti bhikkhu. Mahantataro vā daharataro vāti attano mahantataro vā daharataro vā hoti. So bhikkhu tivassantaro nāmāti yojanā. Ekassa bhikkhuno tiṇṇaṃ vassānamantare ṭhito tivassantaro añño bhikkhu. Tatthāti bhikkhūsu. Ime sabbeti tivassantaradvivassantarasamānavassike ime bhikkhū, labhantīti sambandho. Yaṃ tiṇṇaṃ pahotīti mañcapīṭhavinimuttaṃ yaṃ āsanaṃ tiṇṇaṃ sukhaṃ nisīdituṃ pahoti, tathārūpe āsanepi dve dve hutvā nisīdituṃ labhantīti yojanā. Apisaddena mañcapīṭhāni apekkhati. Idaṃ pacchimadīghāsanaṃ. Anupasampannenāpīti pisaddo pageva upasampannenāti dasseti.
হত্থিকুম্ভেতি হত্থিসিরোপিণ্ডে। ইমিনা হত্থিসদ্দেন হত্থিকুম্ভো গহিতো অৰযৰূপচারেন ৰা উত্তরপদলোপেন ৰাতি দস্সেতি। হত্থী ৰিযাতি হত্থী, ভূমিভাগো, হত্থিম্হি পতিট্ঠিতো পাদসঙ্খাতো নখো ইমস্সাতি হত্থিনখকো, পাসাদো। এতং ‘‘হত্থিনখকো’’তি নামং এৰংকতস্স পাসাদস্স নামন্তি যোজনা। ‘‘সুৰণ্ণরজতাদিৰিচিত্রানী’’তি পদং ‘‘কৰাটানি মঞ্চপীঠানি তালৰণ্টানী’’তি সব্বপদেসু যোজেতব্বং। যংকিঞ্চি চিত্তকম্মকতং অত্থি, সব্বং ৰট্টতীতি যোজনা। পাসাদস্স দেমাতি সম্বন্ধো। পাটেক্কন্তি পাসাদতো ৰিসুং। পটিগ্গহিতমেৰাতি সব্বং পটিগ্গহিতমেৰ হোতি। গোনকাদীনি অট্ঠারস অত্থরণানি পরিভুঞ্জিতুন্তি সম্বন্ধো। গিহিৰিকটনীহারেনাতি গিহীহি ৰিসেসেন যথাকামং করিযতীতি গিহিৰিকটং, গিহিসন্তকং। ‘‘গিহিৰিকট’’ন্তি নীহারো অভিনীহারো গিহিৰিকটনীহারো, তেন। লব্ভন্তীতি নিসীদিতুমেৰ লব্ভন্তি। তত্রাপীতি ধম্মাসনেপি।
Hatthikumbheti hatthisiropiṇḍe. Iminā hatthisaddena hatthikumbho gahito avayavūpacārena vā uttarapadalopena vāti dasseti. Hatthī viyāti hatthī, bhūmibhāgo, hatthimhi patiṭṭhito pādasaṅkhāto nakho imassāti hatthinakhako, pāsādo. Etaṃ ‘‘hatthinakhako’’ti nāmaṃ evaṃkatassa pāsādassa nāmanti yojanā. ‘‘Suvaṇṇarajatādivicitrānī’’ti padaṃ ‘‘kavāṭāni mañcapīṭhāni tālavaṇṭānī’’ti sabbapadesu yojetabbaṃ. Yaṃkiñci cittakammakataṃ atthi, sabbaṃ vaṭṭatīti yojanā. Pāsādassa demāti sambandho. Pāṭekkanti pāsādato visuṃ. Paṭiggahitamevāti sabbaṃ paṭiggahitameva hoti. Gonakādīni aṭṭhārasa attharaṇāni paribhuñjitunti sambandho. Gihivikaṭanīhārenāti gihīhi visesena yathākāmaṃ kariyatīti gihivikaṭaṃ, gihisantakaṃ. ‘‘Gihivikaṭa’’nti nīhāro abhinīhāro gihivikaṭanīhāro, tena. Labbhantīti nisīditumeva labbhanti. Tatrāpīti dhammāsanepi.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ৩. ততিযভাণৰারো • 3. Tatiyabhāṇavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / উপনন্দৰত্থুকথা • Upanandavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উপনন্দৰত্থুকথাৰণ্ণনা • Upanandavatthukathāvaṇṇanā