| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ಉಪನನ್ದವತ್ಥುಕಥಾ
Upanandavatthukathā
೩೧೯. ಅಯಮತ್ಥೋತಿ ಅಯಂ ವಕ್ಖಮಾನೋ ಅತ್ಥೋ, ಏವಂ ವೇದಿತಬ್ಬೋತಿ ಸಮ್ಬನ್ಧೋ। ತತ್ಥಾತಿ ಗಾಮಕೇ । ತನ್ತಿ ಸೇನಾಸನಂ, ಗಣ್ಹನ್ತೇನೇವಾತಿ ಸಮ್ಬನ್ಧೋ। ಇಧಾತಿ ಸಾವತ್ಥಿಯಂ। ಮುತ್ತನ್ತಿ ತೇ ಸೇನಾಸನಂ ಮುಞ್ಚಿತಂ ಹೋತಿ। ತತ್ರಾಪೀತಿ ಗಾಮಕೇಪಿ। ಉಭಯತ್ಥಾತಿ ಸಾವತ್ಥಿಯಂ, ಗಾಮಕೇ ಚಾತಿ ಉಭಯತ್ಥ।
319.Ayamatthoti ayaṃ vakkhamāno attho, evaṃ veditabboti sambandho. Tatthāti gāmake . Tanti senāsanaṃ, gaṇhantenevāti sambandho. Idhāti sāvatthiyaṃ. Muttanti te senāsanaṃ muñcitaṃ hoti. Tatrāpīti gāmakepi. Ubhayatthāti sāvatthiyaṃ, gāmake cāti ubhayattha.
ಏತ್ಥಾತಿ ಉಪನನ್ದವತ್ಥುಸ್ಮಿಂ। ಕಥನ್ತಿ ಕೇನ ಪಕಾರೇನ ಪಟಿಪ್ಪಸ್ಸಮ್ಭತಿ। ಇಧಾತಿ ಸಾಸನೇ। ಏಕಚ್ಚೋ ಗಣ್ಹಾತೀತಿ ಸಮ್ಬನ್ಧೋ। ತತ್ರಾಪೀತಿ ಸಾಮನ್ತವಿಹಾರೇಪಿ । ತಸ್ಸಾತಿ ಭಿಕ್ಖುಸ್ಸ। ಇಧಾತಿ ಸೇನಾಸನೇ। ಆಲಯಮತ್ತನ್ತಿ ಚಿತ್ತುಪ್ಪಾದಮತ್ತಂ। ಇಚ್ಚಸ್ಸಾತಿ ಇತಿ ಅಸ್ಸ, ಏವಂ ಅಸ್ಸ ಭಿಕ್ಖುಸ್ಸಾತಿ ಅತ್ಥೋ। ಸಬ್ಬತ್ಥಾತಿ ಸಬ್ಬಸ್ಮಿಂ ‘‘ಗಹಣೇನ ಗಹಣ’’ನ್ತಿಆದಿಕೇ ಚತುಕ್ಕೇ। ಯೋ ಪನ ಗಚ್ಛತೀತಿ ಸಮ್ಬನ್ಧೋ। ಉಪಚಾರಸೀಮಾತಿಕ್ಕಮೇತಿ ನಿಮಿತ್ತತ್ಥೇ ಚೇತಂ ಭುಮ್ಮವಚನಂ, ಭಾವೇನ ಭಾವಲಕ್ಖಣೇ ವಾ। ತತ್ಥಾತಿ ಅಞ್ಞಸ್ಮಿಂ ವಿಹಾರೇ ಪಚ್ಚಾಗಚ್ಛತಿ, ವಟ್ಟತಿ, ಸೇನಾಸನಗ್ಗಾಹೋ ನ ಪಟಿಪ್ಪಸ್ಸಮ್ಭತೀತಿ ಅಧಿಪ್ಪಾಯೋ।
Etthāti upanandavatthusmiṃ. Kathanti kena pakārena paṭippassambhati. Idhāti sāsane. Ekacco gaṇhātīti sambandho. Tatrāpīti sāmantavihārepi . Tassāti bhikkhussa. Idhāti senāsane. Ālayamattanti cittuppādamattaṃ. Iccassāti iti assa, evaṃ assa bhikkhussāti attho. Sabbatthāti sabbasmiṃ ‘‘gahaṇena gahaṇa’’ntiādike catukke. Yo pana gacchatīti sambandho. Upacārasīmātikkameti nimittatthe cetaṃ bhummavacanaṃ, bhāvena bhāvalakkhaṇe vā. Tatthāti aññasmiṃ vihāre paccāgacchati, vaṭṭati, senāsanaggāho na paṭippassambhatīti adhippāyo.
೩೨೦. ಯೋತಿ ಭಿಕ್ಖು। ಮಹನ್ತತರೋ ವಾ ದಹರತರೋ ವಾತಿ ಅತ್ತನೋ ಮಹನ್ತತರೋ ವಾ ದಹರತರೋ ವಾ ಹೋತಿ। ಸೋ ಭಿಕ್ಖು ತಿವಸ್ಸನ್ತರೋ ನಾಮಾತಿ ಯೋಜನಾ। ಏಕಸ್ಸ ಭಿಕ್ಖುನೋ ತಿಣ್ಣಂ ವಸ್ಸಾನಮನ್ತರೇ ಠಿತೋ ತಿವಸ್ಸನ್ತರೋ ಅಞ್ಞೋ ಭಿಕ್ಖು। ತತ್ಥಾತಿ ಭಿಕ್ಖೂಸು। ಇಮೇ ಸಬ್ಬೇತಿ ತಿವಸ್ಸನ್ತರದ್ವಿವಸ್ಸನ್ತರಸಮಾನವಸ್ಸಿಕೇ ಇಮೇ ಭಿಕ್ಖೂ, ಲಭನ್ತೀತಿ ಸಮ್ಬನ್ಧೋ। ಯಂ ತಿಣ್ಣಂ ಪಹೋತೀತಿ ಮಞ್ಚಪೀಠವಿನಿಮುತ್ತಂ ಯಂ ಆಸನಂ ತಿಣ್ಣಂ ಸುಖಂ ನಿಸೀದಿತುಂ ಪಹೋತಿ, ತಥಾರೂಪೇ ಆಸನೇಪಿ ದ್ವೇ ದ್ವೇ ಹುತ್ವಾ ನಿಸೀದಿತುಂ ಲಭನ್ತೀತಿ ಯೋಜನಾ। ಅಪಿಸದ್ದೇನ ಮಞ್ಚಪೀಠಾನಿ ಅಪೇಕ್ಖತಿ। ಇದಂ ಪಚ್ಛಿಮದೀಘಾಸನಂ। ಅನುಪಸಮ್ಪನ್ನೇನಾಪೀತಿ ಪಿಸದ್ದೋ ಪಗೇವ ಉಪಸಮ್ಪನ್ನೇನಾತಿ ದಸ್ಸೇತಿ।
320.Yoti bhikkhu. Mahantataro vā daharataro vāti attano mahantataro vā daharataro vā hoti. So bhikkhu tivassantaro nāmāti yojanā. Ekassa bhikkhuno tiṇṇaṃ vassānamantare ṭhito tivassantaro añño bhikkhu. Tatthāti bhikkhūsu. Ime sabbeti tivassantaradvivassantarasamānavassike ime bhikkhū, labhantīti sambandho. Yaṃ tiṇṇaṃ pahotīti mañcapīṭhavinimuttaṃ yaṃ āsanaṃ tiṇṇaṃ sukhaṃ nisīdituṃ pahoti, tathārūpe āsanepi dve dve hutvā nisīdituṃ labhantīti yojanā. Apisaddena mañcapīṭhāni apekkhati. Idaṃ pacchimadīghāsanaṃ. Anupasampannenāpīti pisaddo pageva upasampannenāti dasseti.
ಹತ್ಥಿಕುಮ್ಭೇತಿ ಹತ್ಥಿಸಿರೋಪಿಣ್ಡೇ। ಇಮಿನಾ ಹತ್ಥಿಸದ್ದೇನ ಹತ್ಥಿಕುಮ್ಭೋ ಗಹಿತೋ ಅವಯವೂಪಚಾರೇನ ವಾ ಉತ್ತರಪದಲೋಪೇನ ವಾತಿ ದಸ್ಸೇತಿ। ಹತ್ಥೀ ವಿಯಾತಿ ಹತ್ಥೀ, ಭೂಮಿಭಾಗೋ, ಹತ್ಥಿಮ್ಹಿ ಪತಿಟ್ಠಿತೋ ಪಾದಸಙ್ಖಾತೋ ನಖೋ ಇಮಸ್ಸಾತಿ ಹತ್ಥಿನಖಕೋ, ಪಾಸಾದೋ। ಏತಂ ‘‘ಹತ್ಥಿನಖಕೋ’’ತಿ ನಾಮಂ ಏವಂಕತಸ್ಸ ಪಾಸಾದಸ್ಸ ನಾಮನ್ತಿ ಯೋಜನಾ। ‘‘ಸುವಣ್ಣರಜತಾದಿವಿಚಿತ್ರಾನೀ’’ತಿ ಪದಂ ‘‘ಕವಾಟಾನಿ ಮಞ್ಚಪೀಠಾನಿ ತಾಲವಣ್ಟಾನೀ’’ತಿ ಸಬ್ಬಪದೇಸು ಯೋಜೇತಬ್ಬಂ। ಯಂಕಿಞ್ಚಿ ಚಿತ್ತಕಮ್ಮಕತಂ ಅತ್ಥಿ, ಸಬ್ಬಂ ವಟ್ಟತೀತಿ ಯೋಜನಾ। ಪಾಸಾದಸ್ಸ ದೇಮಾತಿ ಸಮ್ಬನ್ಧೋ। ಪಾಟೇಕ್ಕನ್ತಿ ಪಾಸಾದತೋ ವಿಸುಂ। ಪಟಿಗ್ಗಹಿತಮೇವಾತಿ ಸಬ್ಬಂ ಪಟಿಗ್ಗಹಿತಮೇವ ಹೋತಿ। ಗೋನಕಾದೀನಿ ಅಟ್ಠಾರಸ ಅತ್ಥರಣಾನಿ ಪರಿಭುಞ್ಜಿತುನ್ತಿ ಸಮ್ಬನ್ಧೋ। ಗಿಹಿವಿಕಟನೀಹಾರೇನಾತಿ ಗಿಹೀಹಿ ವಿಸೇಸೇನ ಯಥಾಕಾಮಂ ಕರಿಯತೀತಿ ಗಿಹಿವಿಕಟಂ, ಗಿಹಿಸನ್ತಕಂ। ‘‘ಗಿಹಿವಿಕಟ’’ನ್ತಿ ನೀಹಾರೋ ಅಭಿನೀಹಾರೋ ಗಿಹಿವಿಕಟನೀಹಾರೋ, ತೇನ। ಲಬ್ಭನ್ತೀತಿ ನಿಸೀದಿತುಮೇವ ಲಬ್ಭನ್ತಿ। ತತ್ರಾಪೀತಿ ಧಮ್ಮಾಸನೇಪಿ।
Hatthikumbheti hatthisiropiṇḍe. Iminā hatthisaddena hatthikumbho gahito avayavūpacārena vā uttarapadalopena vāti dasseti. Hatthī viyāti hatthī, bhūmibhāgo, hatthimhi patiṭṭhito pādasaṅkhāto nakho imassāti hatthinakhako, pāsādo. Etaṃ ‘‘hatthinakhako’’ti nāmaṃ evaṃkatassa pāsādassa nāmanti yojanā. ‘‘Suvaṇṇarajatādivicitrānī’’ti padaṃ ‘‘kavāṭāni mañcapīṭhāni tālavaṇṭānī’’ti sabbapadesu yojetabbaṃ. Yaṃkiñci cittakammakataṃ atthi, sabbaṃ vaṭṭatīti yojanā. Pāsādassa demāti sambandho. Pāṭekkanti pāsādato visuṃ. Paṭiggahitamevāti sabbaṃ paṭiggahitameva hoti. Gonakādīni aṭṭhārasa attharaṇāni paribhuñjitunti sambandho. Gihivikaṭanīhārenāti gihīhi visesena yathākāmaṃ kariyatīti gihivikaṭaṃ, gihisantakaṃ. ‘‘Gihivikaṭa’’nti nīhāro abhinīhāro gihivikaṭanīhāro, tena. Labbhantīti nisīditumeva labbhanti. Tatrāpīti dhammāsanepi.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ೩. ತತಿಯಭಾಣವಾರೋ • 3. Tatiyabhāṇavāro
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಉಪನನ್ದವತ್ಥುಕಥಾ • Upanandavatthukathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಉಪನನ್ದವತ್ಥುಕಥಾವಣ್ಣನಾ • Upanandavatthukathāvaṇṇanā
