| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
উপনন্দৰত্থুকথাৰণ্ণনা
Upanandavatthukathāvaṇṇanā
৩১৯. পাল়িযং উভযত্থ পরিবাহিরোতি কমেন উভযস্সপি মুত্তত্তা ৰুত্তং, ন সব্বথা উভযতো পরিবাহিরত্তা। তেনাহ ‘‘পচ্ছিমে…পে॰… তিট্ঠতী’’তি।
319. Pāḷiyaṃ ubhayattha paribāhiroti kamena ubhayassapi muttattā vuttaṃ, na sabbathā ubhayato paribāhirattā. Tenāha ‘‘pacchime…pe… tiṭṭhatī’’ti.
৩২০. যং তিণ্ণং পহোতীতি মঞ্চপীঠৰিনিমুত্তং যং আসনং তিণ্ণং সুখং নিসীদিতুং পহোতি, ইদং পচ্ছিমদীঘাসনং। এত্থ মঞ্চপীঠরহিতেসু অসমানাসনিকাপি তযো নিসীদিতুং লভন্তি। মঞ্চপীঠেসু পন দ্ৰে। অদীঘাসনেসু মঞ্চপীঠেসু সমানাসনিকা এৰ দ্ৰে নিসীদিতুং লভন্তি দুৰগ্গস্সেৰ অনুঞ্ঞাতত্তা।
320.Yaṃ tiṇṇaṃ pahotīti mañcapīṭhavinimuttaṃ yaṃ āsanaṃ tiṇṇaṃ sukhaṃ nisīdituṃ pahoti, idaṃ pacchimadīghāsanaṃ. Ettha mañcapīṭharahitesu asamānāsanikāpi tayo nisīdituṃ labhanti. Mañcapīṭhesu pana dve. Adīghāsanesu mañcapīṭhesu samānāsanikā eva dve nisīdituṃ labhanti duvaggasseva anuññātattā.
হত্থিনখো হেট্ঠাভাগে এতস্স অত্থীতি হত্থিনখো, পাসাদো। পাসাদস্স নখো নাম হেট্ঠিমভাগো পাদনখসদিসত্তা, সো সব্বদিসাসু অনেকেহি হত্থিরূপেহি সমলঙ্কতো ঠিতো। তস্সূপরি কতো পাসাদো হত্থিকুম্ভে পতিট্ঠিতো ৰিয হোতীতি আহ ‘‘হত্থিকুম্ভে পতিট্ঠিত’’ন্তি। সুৰণ্ণরজতাদিৰিচিত্রানীতি সঙ্ঘিকসেনাসনং সন্ধায ৰুত্তং। পুগ্গলিকং পন সুৰণ্ণাদিৰিচিত্রং ভিক্খুস্স সম্পটিচ্ছিতুমেৰ ন ৰট্টতি ‘‘ন কেনচি পরিযাযেন জাতরূপরজতং সাদিতব্ব’’ন্তি (মহাৰ॰ ২৯৯) ৰুত্তত্তা। তেনেৰেত্থ অট্ঠকথাযং ‘‘সঙ্ঘিকৰিহারে ৰা পুগ্গলিকৰিহারে ৰা’’তি ন ৰুত্তং, গোনকাদিঅকপ্পিযভণ্ডৰিসযে এৰ ৰুত্তং একভিক্খুস্সাপি তেসং গহণে দোসাভাৰা। গিহিৰিকটনীহারেনাতি গিহীহি কতনীহারেন, গিহীহি অত্তনো সন্তকং অত্থরিত্ৰা দিন্ননিযামেনাতি অত্থো। লব্ভন্তীতি নিসীদিতুং লব্ভন্তি।
Hatthinakho heṭṭhābhāge etassa atthīti hatthinakho, pāsādo. Pāsādassa nakho nāma heṭṭhimabhāgo pādanakhasadisattā, so sabbadisāsu anekehi hatthirūpehi samalaṅkato ṭhito. Tassūpari kato pāsādo hatthikumbhe patiṭṭhito viya hotīti āha ‘‘hatthikumbhe patiṭṭhita’’nti. Suvaṇṇarajatādivicitrānīti saṅghikasenāsanaṃ sandhāya vuttaṃ. Puggalikaṃ pana suvaṇṇādivicitraṃ bhikkhussa sampaṭicchitumeva na vaṭṭati ‘‘na kenaci pariyāyena jātarūparajataṃ sāditabba’’nti (mahāva. 299) vuttattā. Tenevettha aṭṭhakathāyaṃ ‘‘saṅghikavihāre vā puggalikavihāre vā’’ti na vuttaṃ, gonakādiakappiyabhaṇḍavisaye eva vuttaṃ ekabhikkhussāpi tesaṃ gahaṇe dosābhāvā. Gihivikaṭanīhārenāti gihīhi katanīhārena, gihīhi attano santakaṃ attharitvā dinnaniyāmenāti attho. Labbhantīti nisīdituṃ labbhanti.
উপনন্দৰত্থুকথাৰণ্ণনা নিট্ঠিতা।
Upanandavatthukathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ৩. ততিযভাণৰারো • 3. Tatiyabhāṇavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / উপনন্দৰত্থুকথা • Upanandavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উপনন্দৰত্থুকথাৰণ্ণনা • Upanandavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপনন্দৰত্থুকথাৰণ্ণনা • Upanandavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / উপনন্দৰত্থুকথা • Upanandavatthukathā
