| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
ឧបនន្ទវត្ថុកថាវណ្ណនា
Upanandavatthukathāvaṇṇanā
៣១៩. បាឡិយំ ឧភយត្ថ បរិពាហិរោតិ កមេន ឧភយស្សបិ មុត្តត្តា វុត្តំ, ន សព្ពថា ឧភយតោ បរិពាហិរត្តា។ តេនាហ ‘‘បច្ឆិមេ…បេ.… តិដ្ឋតី’’តិ។
319. Pāḷiyaṃ ubhayattha paribāhiroti kamena ubhayassapi muttattā vuttaṃ, na sabbathā ubhayato paribāhirattā. Tenāha ‘‘pacchime…pe… tiṭṭhatī’’ti.
៣២០. យំ តិណ្ណំ បហោតីតិ មញ្ចបីឋវិនិមុត្តំ យំ អាសនំ តិណ្ណំ សុខំ និសីទិតុំ បហោតិ, ឥទំ បច្ឆិមទីឃាសនំ។ ឯត្ថ មញ្ចបីឋរហិតេសុ អសមានាសនិកាបិ តយោ និសីទិតុំ លភន្តិ។ មញ្ចបីឋេសុ បន ទ្វេ។ អទីឃាសនេសុ មញ្ចបីឋេសុ សមានាសនិកា ឯវ ទ្វេ និសីទិតុំ លភន្តិ ទុវគ្គស្សេវ អនុញ្ញាតត្តា។
320.Yaṃ tiṇṇaṃ pahotīti mañcapīṭhavinimuttaṃ yaṃ āsanaṃ tiṇṇaṃ sukhaṃ nisīdituṃ pahoti, idaṃ pacchimadīghāsanaṃ. Ettha mañcapīṭharahitesu asamānāsanikāpi tayo nisīdituṃ labhanti. Mañcapīṭhesu pana dve. Adīghāsanesu mañcapīṭhesu samānāsanikā eva dve nisīdituṃ labhanti duvaggasseva anuññātattā.
ហត្ថិនខោ ហេដ្ឋាភាគេ ឯតស្ស អត្ថីតិ ហត្ថិនខោ, បាសាទោ។ បាសាទស្ស នខោ នាម ហេដ្ឋិមភាគោ បាទនខសទិសត្តា, សោ សព្ពទិសាសុ អនេកេហិ ហត្ថិរូបេហិ សមលង្កតោ ឋិតោ។ តស្សូបរិ កតោ បាសាទោ ហត្ថិកុម្ភេ បតិដ្ឋិតោ វិយ ហោតីតិ អាហ ‘‘ហត្ថិកុម្ភេ បតិដ្ឋិត’’ន្តិ។ សុវណ្ណរជតាទិវិចិត្រានីតិ សង្ឃិកសេនាសនំ សន្ធាយ វុត្តំ។ បុគ្គលិកំ បន សុវណ្ណាទិវិចិត្រំ ភិក្ខុស្ស សម្បដិច្ឆិតុមេវ ន វដ្ដតិ ‘‘ន កេនចិ បរិយាយេន ជាតរូបរជតំ សាទិតព្ព’’ន្តិ (មហាវ. ២៩៩) វុត្តត្តា។ តេនេវេត្ថ អដ្ឋកថាយំ ‘‘សង្ឃិកវិហារេ វា បុគ្គលិកវិហារេ វា’’តិ ន វុត្តំ, គោនកាទិអកប្បិយភណ្ឌវិសយេ ឯវ វុត្តំ ឯកភិក្ខុស្សាបិ តេសំ គហណេ ទោសាភាវា។ គិហិវិកដនីហារេនាតិ គិហីហិ កតនីហារេន, គិហីហិ អត្តនោ សន្តកំ អត្ថរិត្វា ទិន្ននិយាមេនាតិ អត្ថោ។ លព្ភន្តីតិ និសីទិតុំ លព្ភន្តិ។
Hatthinakho heṭṭhābhāge etassa atthīti hatthinakho, pāsādo. Pāsādassa nakho nāma heṭṭhimabhāgo pādanakhasadisattā, so sabbadisāsu anekehi hatthirūpehi samalaṅkato ṭhito. Tassūpari kato pāsādo hatthikumbhe patiṭṭhito viya hotīti āha ‘‘hatthikumbhe patiṭṭhita’’nti. Suvaṇṇarajatādivicitrānīti saṅghikasenāsanaṃ sandhāya vuttaṃ. Puggalikaṃ pana suvaṇṇādivicitraṃ bhikkhussa sampaṭicchitumeva na vaṭṭati ‘‘na kenaci pariyāyena jātarūparajataṃ sāditabba’’nti (mahāva. 299) vuttattā. Tenevettha aṭṭhakathāyaṃ ‘‘saṅghikavihāre vā puggalikavihāre vā’’ti na vuttaṃ, gonakādiakappiyabhaṇḍavisaye eva vuttaṃ ekabhikkhussāpi tesaṃ gahaṇe dosābhāvā. Gihivikaṭanīhārenāti gihīhi katanīhārena, gihīhi attano santakaṃ attharitvā dinnaniyāmenāti attho. Labbhantīti nisīdituṃ labbhanti.
ឧបនន្ទវត្ថុកថាវណ្ណនា និដ្ឋិតា។
Upanandavatthukathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi / ៣. តតិយភាណវារោ • 3. Tatiyabhāṇavāro
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ចូឡវគ្គ-អដ្ឋកថា • Cūḷavagga-aṭṭhakathā / ឧបនន្ទវត្ថុកថា • Upanandavatthukathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ឧបនន្ទវត្ថុកថាវណ្ណនា • Upanandavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ឧបនន្ទវត្ថុកថាវណ្ណនា • Upanandavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ឧបនន្ទវត្ថុកថា • Upanandavatthukathā
