| Library / Tipiṭaka / ತಿಪಿಟಕ • Tipiṭaka / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā |
ಉಪನನ್ದವತ್ಥುಕಥಾವಣ್ಣನಾ
Upanandavatthukathāvaṇṇanā
೩೧೯. ಯಂ ತಯಾ ತತ್ಥ ಸೇನಾಸನಂ ಗಹಿತಂ…ಪೇ॰… ಇಧ ಮುತ್ತಂ ಹೋತೀತಿ ಯಂ ತಯಾ ತತ್ಥ ಗಾಮಕಾವಾಸೇ ಪಚ್ಛಾ ಸೇನಾಸನಂ ಗಹಿತಂ, ತಂ ತೇ ಗಣ್ಹನ್ತೇನೇವ ಇಧ ಸಾವತ್ಥಿಯಂ ಪಠಮಗಹಿತಸೇನಾಸನಂ ಮುತ್ತಂ ಹೋತಿ। ಇಧ ದಾನಾಹಂ …ಪೇ॰… ತತ್ರಾಪಿ ಮುತ್ತನ್ತಿ ‘‘ಇದಾನಾಹಂ, ಆವುಸೋ, ಇಮಸ್ಮಿಂ ಗಾಮಕಾವಾಸೇ ಗಹಿತಸೇನಾಸನಂ ಮುಞ್ಚಾಮೀ’’ತಿ ವದನ್ತೇನ ತತ್ರಾಪಿ ಗಾಮಕಾವಾಸೇ ಗಹಿತಸೇನಾಸನಂ ಮುತ್ತಂ।
319.Yaṃ tayā tattha senāsanaṃ gahitaṃ…pe… idha muttaṃ hotīti yaṃ tayā tattha gāmakāvāse pacchā senāsanaṃ gahitaṃ, taṃ te gaṇhanteneva idha sāvatthiyaṃ paṭhamagahitasenāsanaṃ muttaṃ hoti. Idha dānāhaṃ…pe… tatrāpi muttanti ‘‘idānāhaṃ, āvuso, imasmiṃ gāmakāvāse gahitasenāsanaṃ muñcāmī’’ti vadantena tatrāpi gāmakāvāse gahitasenāsanaṃ muttaṃ.
೩೨೦. ದೀಘಾಸನಂ ನಾಮ ಮಞ್ಚಪೀಠವಿನಿಮುತ್ತಂ ಯಂ ಕಿಞ್ಚಿ ಏಕತೋ ಸುಖಂ ನಿಸೀದಿತುಂ ಪಹೋತಿ। ಹತ್ಥಿಮ್ಹಿ ನಖೋ ಅಸ್ಸಾತಿ ಹತ್ಥಿನಖೋ। ‘‘ಪಾಸಾದಸ್ಸ ನಖೋ ನಾಮ ಹೇಟ್ಠಿಮಪರಿಚ್ಛೇದೋ, ಸೋ ಚ ಹತ್ಥಿಕುಮ್ಭೇ ಪತಿಟ್ಠಿತೋ’’ತಿ ಗಣ್ಠಿಪದೇಸು ವುತ್ತಂ। ಗಿಹಿವಿಕತನೀಹಾರೇನ ಲಬ್ಭನ್ತೀತಿ ಗಿಹಿವಿಕತನೀಹಾರೇನ ಪರಿಭುಞ್ಜಿತುಂ ಲಬ್ಭನ್ತಿ, ತೇಹಿ ಅತ್ಥರಿತ್ವಾ ದಿನ್ನಾನೇವ ನಿಸೀದಿತುಂ ಲಬ್ಭನ್ತಿ, ನ ಸಯಂ ಅತ್ಥತಾನಿ ಅತ್ಥರಾಪಿತಾನಿ ವಾ।
320.Dīghāsanaṃ nāma mañcapīṭhavinimuttaṃ yaṃ kiñci ekato sukhaṃ nisīdituṃ pahoti. Hatthimhi nakho assāti hatthinakho. ‘‘Pāsādassa nakho nāma heṭṭhimaparicchedo, so ca hatthikumbhe patiṭṭhito’’ti gaṇṭhipadesu vuttaṃ. Gihivikatanīhārena labbhantīti gihivikatanīhārena paribhuñjituṃ labbhanti, tehi attharitvā dinnāneva nisīdituṃ labbhanti, na sayaṃ atthatāni attharāpitāni vā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ೩. ತತಿಯಭಾಣವಾರೋ • 3. Tatiyabhāṇavāro
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಉಪನನ್ದವತ್ಥುಕಥಾ • Upanandavatthukathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಉಪನನ್ದವತ್ಥುಕಥಾವಣ್ಣನಾ • Upanandavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಉಪನನ್ದವತ್ಥುಕಥಾವಣ್ಣನಾ • Upanandavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಉಪನನ್ದವತ್ಥುಕಥಾ • Upanandavatthukathā
