| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
உபனிதி⁴கதா²வண்ணனா
Upanidhikathāvaṇṇanā
112. உபனிதி⁴கதா²யங் ‘‘ஸங்கோ³பனத்தா²ய அத்தனோ ஹத்தே² நிக்கி²த்தஸ்ஸ ப⁴ண்ட³ஸ்ஸ கு³த்தட்டா²னே படிஸாமனபயோக³ங் வினா அஞ்ஞஸ்மிங் பயோகே³ அகதேபி ரஜ்ஜஸங்கோ²பா⁴தி³காலே ‘ந தா³னி தஸ்ஸ த³ஸ்ஸாமி, ந மய்ஹங் தா³னி த³ஸ்ஸதீ’தி உபோ⁴ஹிபி ஸகஸகட்டா²னே நிஸீதி³த்வா து⁴ரனிக்கே²பே கதே பாராஜிகமேவ படிஸாமனபயோக³ஸ்ஸ கதத்தா’’தி வத³ந்தி. அத்தனோ ஹத்தே² நிக்கி²த்தத்தாதி எத்த² அத்தனோ ஹத்தே² ஸங்கோ³பனத்தா²ய நிக்கி²த்தகாலதோ பட்டா²ய தப்படிப³த்³த⁴த்தா ஆரக்கா²ய ப⁴ண்ட³ஸாமிகட்டா²னே டி²தத்தா டா²னஸ்ஸ ச ததா³யத்ததாய டா²னாசாவனஸ்ஸ அலப்³ப⁴னதோ நத்தி² அவஹாரோதி அதி⁴ப்பாயோ.
112. Upanidhikathāyaṃ ‘‘saṅgopanatthāya attano hatthe nikkhittassa bhaṇḍassa guttaṭṭhāne paṭisāmanapayogaṃ vinā aññasmiṃ payoge akatepi rajjasaṅkhobhādikāle ‘na dāni tassa dassāmi, na mayhaṃ dāni dassatī’ti ubhohipi sakasakaṭṭhāne nisīditvā dhuranikkhepe kate pārājikameva paṭisāmanapayogassa katattā’’ti vadanti. Attano hatthe nikkhittattāti ettha attano hatthe saṅgopanatthāya nikkhittakālato paṭṭhāya tappaṭibaddhattā ārakkhāya bhaṇḍasāmikaṭṭhāne ṭhitattā ṭhānassa ca tadāyattatāya ṭhānācāvanassa alabbhanato natthi avahāroti adhippāyo.
த⁴ம்மங் வாசாபெத்வாதி த⁴ம்மங் கதா²பெத்வா. ஏஸேவ நயோதி உத்³தா⁴ரேயேவ பாராஜிகங். கஸ்மா? அஞ்ஞேஹி அஸாதா⁴ரணஸ்ஸ அபி⁴ஞ்ஞாணஸ்ஸ வுத்தத்தா. ‘‘அஞ்ஞங் தாதி³ஸமேவ க³ண்ஹந்தே யுஜ்ஜதீதி இத³ங் ஸஞ்ஞாணங் கதெ²ந்தேனேவ ‘அஸுகஸ்மிங் டா²னே’தி ஓகாஸஸ்ஸ ச நியமிதத்தா தஸ்மிங் டா²னே டி²தங் பத்தங் அபனெத்வா தஸ்மிங் ஓகாஸே அஞ்ஞங் தாதி³ஸமேவ பச்சா² ட²பிதங் பத்தங் ஸந்தா⁴ய கதி²த’’ந்தி தீஸுபி க³ண்டி²பதே³ஸு வுத்தங். சோரேன ஸல்லக்கி²தபத்தஸ்ஸ க³ஹணாபா⁴வேபி ‘‘இத³ங் தே²னெத்வா க³ண்ஹிஸ்ஸாமீ’’தி தஸ்மிங் ஓகாஸே டி²தே தாதி³ஸே வத்து²மத்தே தஸ்ஸ தெ²ய்யசித்தஸப்³பா⁴வதோ அஞ்ஞங் தாதி³ஸமேவ க³ண்ஹந்தே யுஜ்ஜதீதி சோரஸ்ஸ அவஹாரோ த³ஸ்ஸிதோ. பத³வாரேனாதி தே²ரேன நீஹரித்வா தி³ன்னங் பத்தங் க³ஹெத்வா க³ச்ச²தோ சோரஸ்ஸ பத³வாரேன. தங் அதாதி³ஸமேவ க³ண்ஹந்தே யுஜ்ஜதீதி ‘‘மமாயங் பத்தோ ந ஹோதீ’’தி வா ‘‘மயா கதி²தோ அயங் பத்தோ ந ஹோதீ’’தி வா ஜானித்வா தெ²ய்யசித்தேன க³ண்ஹந்தஸ்ஸ ‘‘இத³ங் தே²னெத்வா க³ண்ஹிஸ்ஸாமீ’’தி வத்து²மத்தே தெ²ய்யசித்தங் உப்பாதெ³த்வா க³ண்ஹந்தஸ்ஸ ச அவஹாரஸப்³பா⁴வதோ வுத்தங்.
Dhammaṃ vācāpetvāti dhammaṃ kathāpetvā. Eseva nayoti uddhāreyeva pārājikaṃ. Kasmā? Aññehi asādhāraṇassa abhiññāṇassa vuttattā. ‘‘Aññaṃ tādisameva gaṇhante yujjatīti idaṃ saññāṇaṃ kathenteneva ‘asukasmiṃ ṭhāne’ti okāsassa ca niyamitattā tasmiṃ ṭhāne ṭhitaṃ pattaṃ apanetvā tasmiṃ okāse aññaṃ tādisameva pacchā ṭhapitaṃ pattaṃ sandhāya kathita’’nti tīsupi gaṇṭhipadesu vuttaṃ. Corena sallakkhitapattassa gahaṇābhāvepi ‘‘idaṃ thenetvā gaṇhissāmī’’ti tasmiṃ okāse ṭhite tādise vatthumatte tassa theyyacittasabbhāvato aññaṃ tādisameva gaṇhante yujjatīti corassa avahāro dassito. Padavārenāti therena nīharitvā dinnaṃ pattaṃ gahetvā gacchato corassa padavārena. Taṃ atādisameva gaṇhante yujjatīti ‘‘mamāyaṃ patto na hotī’’ti vā ‘‘mayā kathito ayaṃ patto na hotī’’ti vā jānitvā theyyacittena gaṇhantassa ‘‘idaṃ thenetvā gaṇhissāmī’’ti vatthumatte theyyacittaṃ uppādetvā gaṇhantassa ca avahārasabbhāvato vuttaṃ.
கா³மத்³வாரந்தி ஸமணஸாருப்பங் வோஹாரமத்தமேதங், அந்தோகா³மங் இச்சேவ வுத்தங் ஹோதி. வுத்தனயேனேவ தே²ரஸ்ஸ பாராஜிகந்தி தெ²ய்யசித்தேனேவ பரஸந்தகஸ்ஸ க³ஹிதத்தா உத்³தா⁴ரேயேவ தே²ரஸ்ஸ பாராஜிகங். சோரஸ்ஸ து³க்கடந்தி அஸுத்³த⁴சித்தேன க³ஹிதத்தா க³ஹிதகாலே சோரஸ்ஸ து³க்கடங். வுத்தனயேனேவ உபி⁴ன்னம்பி து³க்கடந்தி சோரஸ்ஸ ஸாமிகேன தி³ன்னத்தா பாராஜிகங் நத்தி², அஸுத்³த⁴சித்தேன க³ஹிதத்தா து³க்கடங், தே²ரஸ்ஸ பன அத்தனோ ஸந்தகேபி அஸுத்³த⁴சித்ததாய து³க்கடந்தி.
Gāmadvāranti samaṇasāruppaṃ vohāramattametaṃ, antogāmaṃ icceva vuttaṃ hoti. Vuttanayeneva therassapārājikanti theyyacitteneva parasantakassa gahitattā uddhāreyeva therassa pārājikaṃ. Corassa dukkaṭanti asuddhacittena gahitattā gahitakāle corassa dukkaṭaṃ. Vuttanayeneva ubhinnampi dukkaṭanti corassa sāmikena dinnattā pārājikaṃ natthi, asuddhacittena gahitattā dukkaṭaṃ, therassa pana attano santakepi asuddhacittatāya dukkaṭanti.
ஆணத்தியா க³ஹிதத்தாதி எத்த² ‘‘பத்தசீவரங் க³ண்ஹ, அஸுகங் நாம கா³மங் க³ந்த்வா பிண்டா³ய சரிஸ்ஸாமா’’தி ஏவங் தே²ரேன கதஆணத்தியா விஹாரஸ்ஸ பரபா⁴கே³ உபசாரதோ பட்டா²ய யாவ தஸ்ஸ கா³மஸ்ஸ பரதோ உபசாரோ, தாவ ஸப்³ப³ங் கெ²த்தமேவ ஜாதந்தி அதி⁴ப்பாயோ. மக்³க³தோ ஓக்கம்மாதி எத்த² உபி⁴ன்னங் ஸகடசக்கமக்³கா³னங் அந்தராளம்பி மக்³கோ³யேவாதி த³ட்ட²ப்³ப³ங். அட்ட²த்வா அனிஸீதி³த்வாதி எத்த² விஹாரங் பவிஸித்வா ஸீஸாதீ³ஸு பா⁴ரங் பூ⁴மியங் அனிக்கி²பித்வாவ திட்ட²ந்தோ நிஸீத³ந்தோ வா விஸ்ஸமித்வா தெ²ய்யசித்தே வூபஸந்தே புன தெ²ய்யசித்தங் உப்பாதெ³த்வா க³ச்ச²தி சே, பாது³த்³தா⁴ரேன காரேதப்³போ³. ஸசே பூ⁴மியங் நிக்கி²பித்வா புன தங் க³ஹெத்வா க³ச்ச²தி, உத்³தா⁴ரேன காரேதப்³போ³. கஸ்மா? ஆணாபகஸ்ஸ ஆணத்தியா யங் கத்தப்³ப³ங், தஸ்ஸ தாவ பரினிட்டி²தத்தா. கேசி பன ‘‘புரிமஸ்மிங் தெ²ய்யசித்தே அவூபஸந்தேபி வுத்தனயேனேவ விஸ்ஸமித்வா க³ச்ச²தோ பாது³த்³தா⁴ரேன உத்³தா⁴ரேன வா காரேதப்³போ³’’தி வத³ந்தி, ‘‘அஸுகங் நாம கா³மந்தி அனியமெத்வா ‘அந்தோகா³மங் பவிஸிஸ்ஸாமா’தி அவிஸேஸேன வுத்தே விஹாரஸாமந்தா ஸப்³போ³பி கோ³சரகா³மோ கெ²த்தமேவா’’திபி வத³ந்தி. ஸேஸந்தி மக்³கு³க்கமனவிஹாராபி⁴முக²க³மனாதி³ ஸப்³ப³ங். புரிமஸதி³ஸமேவாதி அனாணத்தியா க³ஹிதேபி ஸாமிகஸ்ஸ கதெ²த்வா க³ஹிதத்தா ஹெட்டா² வுத்தவிஹாரூபசாராதி³ ஸப்³ப³ங் கெ²த்தமேவாதி கத்வா வுத்தங்.
Āṇattiyā gahitattāti ettha ‘‘pattacīvaraṃ gaṇha, asukaṃ nāma gāmaṃ gantvā piṇḍāya carissāmā’’ti evaṃ therena kataāṇattiyā vihārassa parabhāge upacārato paṭṭhāya yāva tassa gāmassa parato upacāro, tāva sabbaṃ khettameva jātanti adhippāyo. Maggato okkammāti ettha ubhinnaṃ sakaṭacakkamaggānaṃ antarāḷampi maggoyevāti daṭṭhabbaṃ. Aṭṭhatvā anisīditvāti ettha vihāraṃ pavisitvā sīsādīsu bhāraṃ bhūmiyaṃ anikkhipitvāva tiṭṭhanto nisīdanto vā vissamitvā theyyacitte vūpasante puna theyyacittaṃ uppādetvā gacchati ce, pāduddhārena kāretabbo. Sace bhūmiyaṃ nikkhipitvā puna taṃ gahetvā gacchati, uddhārena kāretabbo. Kasmā? Āṇāpakassa āṇattiyā yaṃ kattabbaṃ, tassa tāva pariniṭṭhitattā. Keci pana ‘‘purimasmiṃ theyyacitte avūpasantepi vuttanayeneva vissamitvā gacchato pāduddhārena uddhārena vā kāretabbo’’ti vadanti, ‘‘asukaṃ nāma gāmanti aniyametvā ‘antogāmaṃ pavisissāmā’ti avisesena vutte vihārasāmantā sabbopi gocaragāmo khettamevā’’tipi vadanti. Sesanti maggukkamanavihārābhimukhagamanādi sabbaṃ. Purimasadisamevāti anāṇattiyā gahitepi sāmikassa kathetvā gahitattā heṭṭhā vuttavihārūpacārādi sabbaṃ khettamevāti katvā vuttaṃ.
ஏஸேவ நயோதி ‘‘அந்தராமக்³கே³ தெ²ய்யசித்தங் உப்பாதெ³த்வா’’திஆதி³னா வுத்தனயங் அதிதி³ஸதி. நிமித்தே வா கதேதி ‘‘சீவரங் மே கிலிட்ட²ங், கோ நு கோ² ரஜித்வா த³ஸ்ஸதீ’’திஆதி³னா நிமித்தே கதே. வுத்தனயேனேவாதி அனாணத்தஸ்ஸ தே²ரேன ஸத்³தி⁴ங் பத்தசீவரங் க³ஹெத்வா க³மனவாரே வுத்தனயேனேவ. ஏகபஸ்ஸே வாதி விஹாரஸ்ஸ மஹந்ததாய அத்தானங் அத³ஸ்ஸெத்வா ஏகஸ்மிங் பஸ்ஸே வஸந்தோ வா. தெ²ய்யசித்தேன பரிபு⁴ஞ்ஜந்தோ ஜீராபேதீதி தெ²ய்யசித்தே உப்பன்னே டா²னாசாவனங் அகத்வா நிவத்த²பாருதனீஹாரேனேவ பரிபு⁴ஞ்ஜந்தோ ஜீராபேதி, டா²னா சாவெந்தஸ்ஸ பன தெ²ய்யசித்தே ஸதி பாராஜிகமேவ ஸீஸே பா⁴ரங் க²ந்தே⁴ கரணாதீ³ஸு விய. யதா² ததா² வா நஸ்ஸதீதி அக்³கி³ஆதி³னா வா உபசிகாதீ³ஹி கா²தி³தங் வா நஸ்ஸதி.
Eseva nayoti ‘‘antarāmagge theyyacittaṃ uppādetvā’’tiādinā vuttanayaṃ atidisati. Nimitte vā kateti ‘‘cīvaraṃ me kiliṭṭhaṃ, ko nu kho rajitvā dassatī’’tiādinā nimitte kate. Vuttanayenevāti anāṇattassa therena saddhiṃ pattacīvaraṃ gahetvā gamanavāre vuttanayeneva. Ekapasse vāti vihārassa mahantatāya attānaṃ adassetvā ekasmiṃ passe vasanto vā. Theyyacittena paribhuñjanto jīrāpetīti theyyacitte uppanne ṭhānācāvanaṃ akatvā nivatthapārutanīhāreneva paribhuñjanto jīrāpeti, ṭhānā cāventassa pana theyyacitte sati pārājikameva sīse bhāraṃ khandhe karaṇādīsu viya. Yathā tathā vā nassatīti aggiādinā vā upacikādīhi khāditaṃ vā nassati.
அஞ்ஞோ வா கோசீதி இமினா பன யேன ட²பிதங், ஸோபி ஸங்க³ஹிதோதி வேதி³தப்³ப³ங். தவ தூ²லஸாடகோ லத்³தோ⁴திஆதி³னா முஸாவாதே³ து³க்கடங் அதி³ன்னாதா³னபயோக³த்தா. இதரங் க³ண்ஹதோ உத்³தா⁴ரே பாராஜிகந்தி எத்த² ‘‘பவிஸித்வா தவ ஸாடகங் க³ண்ஹாஹீ’’தி இமினாவ உபனிதி⁴பா⁴வதோ முத்தத்தா ஸாமிகஸ்ஸ இதரங் க³ண்ஹதோபி அத்தனோ ஸாடகே ஆலயஸ்ஸ ஸப்³பா⁴வதோ ச உத்³தா⁴ரே பாராஜிகங் வுத்தங். ந ஜானந்தீதி தேன வுத்தங் வசனங் அஸுணந்தா ந ஜானந்தி. ஏஸேவ நயோதி எத்த² ஸசே ஜானித்வாபி சித்தேன ந ஸம்படிச்ச²ந்தி, ஏஸேவ நயோதி த³ட்ட²ப்³ப³ங். படிக்கி²பந்தீதி எத்த² சித்தேன படிக்கே²போபி ஸங்க³ஹிதோவாதி வேதி³தப்³ப³ங். யாசிதா வா அயாசிதா வாதி எத்த² யாசிதா யதி³ சித்தேனபி ஸம்படிச்ச²ந்தி, நட்டே² கீ³வா. அயாசிதா பன யதி³பி சித்தேன ஸம்படிச்ச²ந்தி, நத்தி² கீ³வா.
Añño vā kocīti iminā pana yena ṭhapitaṃ, sopi saṅgahitoti veditabbaṃ. Tava thūlasāṭako laddhotiādinā musāvāde dukkaṭaṃ adinnādānapayogattā. Itaraṃ gaṇhato uddhāre pārājikanti ettha ‘‘pavisitvā tava sāṭakaṃ gaṇhāhī’’ti imināva upanidhibhāvato muttattā sāmikassa itaraṃ gaṇhatopi attano sāṭake ālayassa sabbhāvato ca uddhāre pārājikaṃ vuttaṃ. Na jānantīti tena vuttaṃ vacanaṃ asuṇantā na jānanti. Eseva nayoti ettha sace jānitvāpi cittena na sampaṭicchanti, eseva nayoti daṭṭhabbaṃ. Paṭikkhipantīti ettha cittena paṭikkhepopi saṅgahitovāti veditabbaṃ. Yācitā vā ayācitā vāti ettha yācitā yadi cittenapi sampaṭicchanti, naṭṭhe gīvā. Ayācitā pana yadipi cittena sampaṭicchanti, natthi gīvā.
க³ஹெத்வா ட²பேதீதி எத்த² சாலெத்வா தஸ்மிங்யேவ டா²னே ட²பிதேபி நட்டே² கீ³வா. உபசாரே விஜ்ஜமானேதி ப⁴ண்டா³கா³ரஸ்ஸ ஸமீபே உச்சாரபஸ்ஸாவட்டா²னே விஜ்ஜமானே. மயி ச மதே ஸங்க⁴ஸ்ஸ ச ஸேனாஸனே வினட்டே²தி எத்த² ‘‘கேவலங் ஸங்க⁴ஸ்ஸ ஸேனாஸனங் மா நஸ்ஸீதி இமினாவ அதி⁴ப்பாயேன விவரிதும்பி வட்டதியேவா’’தி வத³ந்தி. ஸஹாயேஹி ப⁴விதப்³ப³ந்தி தேஹிபி கிஞ்சி கிஞ்சி தா³தப்³ப³ந்தி வுத்தங் ஹோதி. அயங் ஸாமீசீதி ப⁴ண்டா³கா³ரே வஸந்தானங் இத³ங் வத்தங்.
Gahetvā ṭhapetīti ettha cāletvā tasmiṃyeva ṭhāne ṭhapitepi naṭṭhe gīvā. Upacāre vijjamāneti bhaṇḍāgārassa samīpe uccārapassāvaṭṭhāne vijjamāne. Mayi ca mate saṅghassa ca senāsane vinaṭṭheti ettha ‘‘kevalaṃ saṅghassa senāsanaṃ mā nassīti imināva adhippāyena vivaritumpi vaṭṭatiyevā’’ti vadanti. Sahāyehi bhavitabbanti tehipi kiñci kiñci dātabbanti vuttaṃ hoti. Ayaṃ sāmīcīti bhaṇḍāgāre vasantānaṃ idaṃ vattaṃ.
லோலமஹாதே²ரோதி மந்தோ³ மோமூஹோ ஹஸிதகீளிதப்பஸுதோ வா மஹாதே²ரோ. அத்தனோ அத்தனோ வஸனக³ப்³பே⁴ஸு ஸபா⁴க³பி⁴க்கூ²னங் பரிக்கா²ரங் ட²பெந்தீதி யோஜேதப்³ப³ங். இதரேஹீதி தஸ்மிங்யேவ க³ப்³பே⁴ வஸந்தேஹி இதரபி⁴க்கூ²ஹி. விஹாரவாரே நியுத்தோ விஹாரவாரிகோ, வாரங் கத்வா விஹாரரக்க²ணகோ. நிவாபந்தி ப⁴த்தவேதனங். படிபத²ங் க³தேஸூதி சோரானங் ஆக³மனங் ஞத்வா ‘‘பட²மதரங்யேவ க³ந்த்வா ஸத்³த³ங் கரிஸ்ஸாமா’’தி சோரானங் அபி⁴முக²ங் க³தேஸு. நிஸ்ஸிதகே ஜக்³கெ³ந்தீதி அத்தனோ அத்தனோ நிஸ்ஸிதகே ஸிக்கா²சரியாய போஸெந்தாபி நிஸ்ஸிதகே விஹாரங் ஜக்³கா³பெந்தி. ‘‘அஸஹாயஸ்ஸ அது³தியஸ்ஸா’’தி பாடோ² யுத்தோ, பச்சி²மங் புரிமஸ்ஸேவ வேவசனங். அஸஹாயஸ்ஸ வா அத்தது³தியஸ்ஸ வாதி இமஸ்மிங் பன பாடே² ஏகேன ஆனீதங் த்³வின்னங் நப்பஹோதீதி அத்தது³தியஸ்ஸபி வாரோ நிவாரிதோதி வத³ந்தி, தங் ‘‘யஸ்ஸ ஸபா⁴கோ³ பி⁴க்கு² ப⁴த்தங் ஆனெத்வா தா³தா நத்தீ²’’தி இமினா ந ஸமேதீதி வீமங்ஸிதப்³ப³ங். உபஜீவந்தேன டா²தப்³ப³ந்தி அப்³போ⁴காஸிகேன ருக்க²மூலிகேனபி பாகவட்டங் உபனிஸ்ஸாய ஜீவந்தேன பத்தசீவரரக்க²ணத்தா²ய விஹாரவாரே ஸம்பத்தே டா²தப்³ப³ங். பரிபுச்ச²ந்தி புச்சி²தபஞ்ஹவிஸ்ஸஜ்ஜனங் அட்ட²கத²ங் வா. தி³கு³ணந்தி வஸ்ஸக்³கே³ன பாபிதங் வினாவ த்³வே கொட்டா²ஸேதி வத³ந்தி. பக்க²வாரேனாதி அட்³ட⁴மாஸவாரேன.
Lolamahātheroti mando momūho hasitakīḷitappasuto vā mahāthero. Attano attano vasanagabbhesu sabhāgabhikkhūnaṃ parikkhāraṃ ṭhapentīti yojetabbaṃ. Itarehīti tasmiṃyeva gabbhe vasantehi itarabhikkhūhi. Vihāravāre niyutto vihāravāriko, vāraṃ katvā vihārarakkhaṇako. Nivāpanti bhattavetanaṃ. Paṭipathaṃ gatesūti corānaṃ āgamanaṃ ñatvā ‘‘paṭhamataraṃyeva gantvā saddaṃ karissāmā’’ti corānaṃ abhimukhaṃ gatesu. Nissitake jaggentīti attano attano nissitake sikkhācariyāya posentāpi nissitake vihāraṃ jaggāpenti. ‘‘Asahāyassa adutiyassā’’ti pāṭho yutto, pacchimaṃ purimasseva vevacanaṃ. Asahāyassa vā attadutiyassa vāti imasmiṃ pana pāṭhe ekena ānītaṃ dvinnaṃ nappahotīti attadutiyassapi vāro nivāritoti vadanti, taṃ ‘‘yassa sabhāgo bhikkhu bhattaṃ ānetvā dātā natthī’’ti iminā na sametīti vīmaṃsitabbaṃ. Upajīvantena ṭhātabbanti abbhokāsikena rukkhamūlikenapi pākavaṭṭaṃ upanissāya jīvantena pattacīvararakkhaṇatthāya vihāravāre sampatte ṭhātabbaṃ. Paripucchanti pucchitapañhavissajjanaṃ aṭṭhakathaṃ vā. Diguṇanti vassaggena pāpitaṃ vināva dve koṭṭhāseti vadanti. Pakkhavārenāti aḍḍhamāsavārena.
உபனிதி⁴கதா²வண்ணனா நிட்டி²தா.
Upanidhikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபனிதி⁴கதா²வண்ணனா • Upanidhikathāvaṇṇanā
