| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
உபனிதி⁴கதா²வண்ணனா
Upanidhikathāvaṇṇanā
112. உபனிதி⁴கதா²யங் ஸங்கோ³பனத்தா²ய அத்தனோ ஹத்தே² நிக்கி²த்தஸ்ஸ ப⁴ண்ட³ஸ்ஸ கு³த்தட்டா²னே படிஸாமனப்பயோக³ங் வினா நாஹங் க³ண்ஹாமீதிஆதி³னா அஞ்ஞஸ்மிங் பயோகே³ அகதே ரஜ்ஜஸங்கோ²பா⁴தி³காலே ‘‘ந தா³னி தஸ்ஸ த³ஸ்ஸாமி, ந மய்ஹங் தா³னி த³ஸ்ஸதீ’’தி உபோ⁴ஹிபி ஸகஸகட்டா²னே நிஸீதி³த்வா து⁴ரனிக்கே²பே கதேபி அவஹாரோ நத்தி². கேசி பனெத்த² ‘‘பாராஜிகமேவ படிஸாமனப்பயோக³ஸ்ஸ கதத்தா’’தி வத³ந்தி, தங் தேஸங் மதிமத்தங், ந ஸாரதோ பச்சேதப்³ப³ங். படிஸாமனகாலே ஹிஸ்ஸ தெ²ய்யசித்தங் நத்தி², ‘‘ந தா³னி தஸ்ஸ த³ஸ்ஸாமீ’’தி தெ²ய்யசித்துப்பத்திக்க²ணே பன ஸாமினோ து⁴ரனிக்கே²பசித்துப்பத்தியா ஹேதுபூ⁴தோ காயவசீபயோகோ³ நத்தி², யேன ஸோ ஆபத்திங் ஆபஜ்ஜெய்ய. ந ஹி அகிரியஸமுட்டா²னாயங் ஆபத்தீதி. தா³னே ஸஉஸ்ஸாஹோ, ரக்க²தி தாவாதி அவஹாரங் ஸந்தா⁴ய அவுத்தத்தா நாஹங் க³ண்ஹாமீதிஆதி³னா முஸாவாத³கரணே பாசித்தியமேவ ஹோதி, ந து³க்கடங் தெ²ய்யசித்தாபா⁴வேன ஸஹபயோக³ஸ்ஸாபி அபா⁴வதோதி க³ஹேதப்³ப³ங். யதி³பி முகே²ன த³ஸ்ஸாமீதி வத³தி…பே॰… பாராஜிகந்தி எத்த² கதரபயோகே³ன ஆபத்தி, ந தாவ பட²மேன ப⁴ண்ட³படிஸாமனப்பயோகே³ன ததா³ தெ²ய்யசித்தாபா⁴வா, நாபி ‘‘த³ஸ்ஸாமீ’’தி கத²னப்பயோகே³ன ததா³ தெ²ய்யசித்தே விஜ்ஜமானேபி பயோக³ஸ்ஸ கப்பியத்தாதி? வுச்சதே – ஸாமினா ‘‘தே³ஹீ’’தி ப³ஹுஸோ யாசியமானோபி அத³த்வா யேன பயோகே³ன அத்தனோ அதா³துகாமதங் ஸாமிகஸ்ஸ ஞாபேதி, யேன ச ஸோ ‘‘அதா³துகாமோ அயங் விக்கி²பதீ’’தி ஞத்வா து⁴ரங் நிக்கி²பதி, தேனேவ பயோகே³னஸ்ஸ ஆபத்தி. ந ஹெத்த² உபனிக்கி²த்தப⁴ண்டே³ பரியாயேன முத்தி அத்தி². அதா³துகாமதாய ஹி கதா³ தே தி³ன்னங், கத்த² தே தி³ன்னந்திஆதி³பரியாயவசனேனாபி ஸாமிகஸ்ஸ து⁴ரே நிக்கி²பாபிதே ஆபத்தியேவ. தேனேவ அட்ட²கதா²யங் வுத்தங் – ‘‘கிங் தும்ஹே ப⁴ணத²…பே॰… ஏவங் உபி⁴ன்னங் து⁴ரனிக்கே²பேன பி⁴க்கு²னோ பாராஜிக’’ந்தி (பாரா॰ அட்ட²॰ 1.111). பரஸந்தகஸ்ஸ பரேஹி க³ண்ஹாபனே ஏவ பரியாயதோ முத்தி, ந ஸப்³ப³த்தா²தி க³ஹேதப்³ப³ங். அத்தனோ ஹத்தே² நிக்கி²த்தத்தாதி எத்த² அத்தனோ ஹத்தே² ஸாமினா தி³ன்னதாய ப⁴ண்டா³கா³ரிகட்டா²னே டி²தத்தா ச டா²னாசாவனேபி நத்தி² அவஹாரோ, தெ²ய்யசித்தேன பன க³ஹணே து³க்கடதோ ந முச்சதீதி வேதி³தப்³ப³ங்.
112. Upanidhikathāyaṃ saṅgopanatthāya attano hatthe nikkhittassa bhaṇḍassa guttaṭṭhāne paṭisāmanappayogaṃ vinā nāhaṃ gaṇhāmītiādinā aññasmiṃ payoge akate rajjasaṅkhobhādikāle ‘‘na dāni tassa dassāmi, na mayhaṃ dāni dassatī’’ti ubhohipi sakasakaṭṭhāne nisīditvā dhuranikkhepe katepi avahāro natthi. Keci panettha ‘‘pārājikameva paṭisāmanappayogassa katattā’’ti vadanti, taṃ tesaṃ matimattaṃ, na sārato paccetabbaṃ. Paṭisāmanakāle hissa theyyacittaṃ natthi, ‘‘na dāni tassa dassāmī’’ti theyyacittuppattikkhaṇe pana sāmino dhuranikkhepacittuppattiyā hetubhūto kāyavacīpayogo natthi, yena so āpattiṃ āpajjeyya. Na hi akiriyasamuṭṭhānāyaṃ āpattīti. Dāne saussāho, rakkhati tāvāti avahāraṃ sandhāya avuttattā nāhaṃ gaṇhāmītiādinā musāvādakaraṇe pācittiyameva hoti, na dukkaṭaṃ theyyacittābhāvena sahapayogassāpi abhāvatoti gahetabbaṃ. Yadipi mukhena dassāmīti vadati…pe… pārājikanti ettha katarapayogena āpatti, na tāva paṭhamena bhaṇḍapaṭisāmanappayogena tadā theyyacittābhāvā, nāpi ‘‘dassāmī’’ti kathanappayogena tadā theyyacitte vijjamānepi payogassa kappiyattāti? Vuccate – sāminā ‘‘dehī’’ti bahuso yāciyamānopi adatvā yena payogena attano adātukāmataṃ sāmikassa ñāpeti, yena ca so ‘‘adātukāmo ayaṃ vikkhipatī’’ti ñatvā dhuraṃ nikkhipati, teneva payogenassa āpatti. Na hettha upanikkhittabhaṇḍe pariyāyena mutti atthi. Adātukāmatāya hi kadā te dinnaṃ, kattha te dinnantiādipariyāyavacanenāpi sāmikassa dhure nikkhipāpite āpattiyeva. Teneva aṭṭhakathāyaṃ vuttaṃ – ‘‘kiṃ tumhe bhaṇatha…pe… evaṃ ubhinnaṃ dhuranikkhepena bhikkhuno pārājika’’nti (pārā. aṭṭha. 1.111). Parasantakassa parehi gaṇhāpane eva pariyāyato mutti, na sabbatthāti gahetabbaṃ. Attano hatthe nikkhittattāti ettha attano hatthe sāminā dinnatāya bhaṇḍāgārikaṭṭhāne ṭhitattā ca ṭhānācāvanepi natthi avahāro, theyyacittena pana gahaṇe dukkaṭato na muccatīti veditabbaṃ.
ஏஸேவ நயோதி உத்³தா⁴ரேயேவ சோரஸ்ஸ பாராஜிகங், கஸ்மா? அஞ்ஞேஹி ஸாதா⁴ரணஸ்ஸ அபி⁴ஞ்ஞாணஸ்ஸ வுத்தத்தா. அஞ்ஞங் தாதி³ஸமேவ க³ண்ஹந்தே யுஜ்ஜதீதி ஸஞ்ஞாணதோ ஓகாஸதோ ச தேன ஸதி³ஸமேவ அஞ்ஞங் க³ண்ஹந்தே யுஜ்ஜதி, சோரேன ஸல்லக்கி²தப்பதே³ஸதோ தங் அபனெத்வா கேஹிசி தத்த² தாதி³ஸே அஞ்ஞஸ்மிங் பத்தே ட²பிதே தங் க³ண்ஹந்தேயேவ யுஜ்ஜதீதி அதி⁴ப்பாயோ, தேன சோரேன தி³வா ஸல்லக்கி²தபத்தங் அஞ்ஞத்த² அபனெத்வா தத³ஞ்ஞே தாதி³ஸே பத்தே தத்த² ட²பிதேபி சோரஸ்ஸ பச்சா² ரத்திபா⁴கே³ உப்பஜ்ஜமானங் தெ²ய்யசித்தங் தி³வா ஸல்லக்கி²தப்பதே³ஸே ட²பிதங் அஞ்ஞங் தாதி³ஸங் பத்தமேவ ஆலம்பி³த்வா உப்பஜ்ஜதீதி த³ஸ்ஸிதங் ஹோதி. பத³வாரேனாதி தே²ரேன நீஹரித்வா தி³ன்னங் பத்தங் க³ஹெத்வா க³ச்ச²தோ சோரஸ்ஸ பத³வாரேன. அதாதி³ஸமேவ க³ண்ஹந்தே யுஜ்ஜதீதி அதாதி³ஸஸ்ஸ தே²ரேன க³ஹணக்க²ணே அவஹாராபா⁴வதோ பச்சா² ஹத்த²பத்தங் ‘‘த’’ந்தி வா ‘‘அஞ்ஞ’’ந்தி வா ஸஞ்ஞாய ‘‘இத³ங் க³ஹெத்வா க³ச்சா²மீ’’தி க³மனே பத³வாரேனேவ அவஹாரோ யுஜ்ஜதீதி அதி⁴ப்பாயோ.
Eseva nayoti uddhāreyeva corassa pārājikaṃ, kasmā? Aññehi sādhāraṇassa abhiññāṇassa vuttattā. Aññaṃ tādisameva gaṇhante yujjatīti saññāṇato okāsato ca tena sadisameva aññaṃ gaṇhante yujjati, corena sallakkhitappadesato taṃ apanetvā kehici tattha tādise aññasmiṃ patte ṭhapite taṃ gaṇhanteyeva yujjatīti adhippāyo, tena corena divā sallakkhitapattaṃ aññattha apanetvā tadaññe tādise patte tattha ṭhapitepi corassa pacchā rattibhāge uppajjamānaṃ theyyacittaṃ divā sallakkhitappadese ṭhapitaṃ aññaṃ tādisaṃ pattameva ālambitvā uppajjatīti dassitaṃ hoti. Padavārenāti therena nīharitvā dinnaṃ pattaṃ gahetvā gacchato corassa padavārena. Atādisameva gaṇhante yujjatīti atādisassa therena gahaṇakkhaṇe avahārābhāvato pacchā hatthapattaṃ ‘‘ta’’nti vā ‘‘añña’’nti vā saññāya ‘‘idaṃ gahetvā gacchāmī’’ti gamane padavāreneva avahāro yujjatīti adhippāyo.
பாராஜிகங் நத்தீ²தி பத³வாரேபி பாராஜிகங் நத்தி² உபனிதி⁴ப⁴ண்டே³ வியாதி க³ஹேதப்³ப³ங். கா³மத்³வாரந்தி ப³ஹிகா³மே விஹாரஸ்ஸ பதிட்டி²தத்தா கா³மப்பவேஸஸ்ஸ ஆரம்ப⁴ப்பதே³ஸத³ஸ்ஸனவஸேன வுத்தங், அந்தோகா³மந்தி அத்தோ². த்³வின்னம்பி உத்³தா⁴ரேயேவ பாராஜிகந்தி தே²ரஸ்ஸ அப⁴ண்டா³கா³ரிகத்தா வுத்தங். யதி³ ஹி ஸோ ப⁴ண்டா³கா³ரிகோ ப⁴வெய்ய, ஸப்³ப³ம்பி உபனிக்கி²த்தமேவ ஸியா, உபனிக்கி²த்தப⁴ண்டே³ ச தெ²ய்யசித்தேன க³ண்ஹதோபி ந தாவ தே²ரஸ்ஸ அவஹாரோ ஹோதி, சோரஸ்ஸேவ அவஹாரோ. உபி⁴ன்னம்பி து³க்கடந்தி தே²ரஸ்ஸ அத்தனோ ஸந்தகதாய சோரஸ்ஸ ஸாமிகேன தி³ன்னத்தா அவஹாரோ ந ஜாதோ, உபி⁴ன்னம்பி அஸுத்³த⁴சித்தேன க³ஹிதத்தா து³க்கடந்தி அத்தோ².
Pārājikaṃ natthīti padavārepi pārājikaṃ natthi upanidhibhaṇḍe viyāti gahetabbaṃ. Gāmadvāranti bahigāme vihārassa patiṭṭhitattā gāmappavesassa ārambhappadesadassanavasena vuttaṃ, antogāmanti attho. Dvinnampi uddhāreyevapārājikanti therassa abhaṇḍāgārikattā vuttaṃ. Yadi hi so bhaṇḍāgāriko bhaveyya, sabbampi upanikkhittameva siyā, upanikkhittabhaṇḍe ca theyyacittena gaṇhatopi na tāva therassa avahāro hoti, corasseva avahāro. Ubhinnampi dukkaṭanti therassa attano santakatāya corassa sāmikena dinnattā avahāro na jāto, ubhinnampi asuddhacittena gahitattā dukkaṭanti attho.
ஆணத்தியா க³ஹிதத்தாதி ‘‘பத்தசீவரங் க³ண்ஹா’’தி ஏவங் தே²ரேன கதஆணத்தியா க³ஹிதத்தா. அடவிங் பவிஸதி, பத³வாரேன காரேதப்³போ³தி ‘‘பத்தசீவரங் க³ண்ஹ, அஸுகங் நாம கா³மங் க³ந்த்வா பிண்டா³ய சரிஸ்ஸாமா’’தி தே²ரேன விஹாரதோ பட்டா²ய கா³மமக்³கே³பி ஸகலேபி கா³மே விசரணஸ்ஸ நியமிதத்தா மக்³க³தோ ஓக்கம்ம க³ச்ச²ந்தஸ்ஸேவ பத³வாரேன ஆபத்தி வுத்தா. விஹாரஸ்ஸ ஹி பரபா⁴கே³ உபசாரதோ பட்டா²ய யாவ தஸ்ஸ கா³மஸ்ஸ பரதோ உபசாரோ, தாவ ஸப்³ப³ங் த³ஹரஸ்ஸ தே²ராணத்தியா ஸஞ்சரணூபசாரோவ ஹோதி, ந பன ததோ பரங். தேனேவ ‘‘உபசாராதிக்கமே பாராஜிகங். கா³மூபசாராதிக்கமே பாராஜிக’’ந்தி ச வுத்தங். படினிவத்தனே சீவரதோ⁴வனாதி³அத்தா²ய பேஸனேபி ஏஸேவ நயோ. அட்ட²த்வா அனிஸீதி³த்வாதி எத்த² விஹாரங் பவிஸித்வா ஸீஸாதீ³ஸு பா⁴ரங் பூ⁴மியங் அனிக்கி²பித்வா திட்ட²ந்தோ வா நிஸீத³ந்தோ வா விஸ்ஸமித்வா தெ²ய்யசித்தே வூபஸந்தே புன தெ²ய்யசித்தங் உப்பாதெ³த்வா க³ச்ச²தி சே, பாது³த்³தா⁴ரேன காரேதப்³போ³. ஸசே பூ⁴மியங் நிக்கி²பித்வா புன தங் க³ஹெத்வா க³ச்ச²தி, உத்³தா⁴ரேன காரேதப்³போ³. கஸ்மா? ஆணாபகஸ்ஸ ஆணத்தியா யங் கத்தப்³ப³ங், தஸ்ஸ தாவதா பரினிட்டி²தத்தா. ‘‘அஸுகங் நாம கா³ம’’ந்தி அனியமெத்வா ‘‘அந்தோகா³மங் க³மிஸ்ஸாமா’’தி அவிஸேஸேன வுத்தே விஹாரஸாமந்தா புப்³பே³ பிண்டா³ய பவிட்ட²புப்³பா³ ஸப்³பே³ கோ³சரகா³மாபி கெ²த்தமேவாதி வத³ந்தி. ஸேஸந்தி மக்³கு³க்கமனவிஹாராபி⁴முக²க³மனாதி³ ஸப்³ப³ங். புரிமஸதி³ஸமேவாதி அனாணத்தியா க³ஹிதேபி ஸாமிகஸ்ஸ கதெ²த்வா க³ஹிதத்தா ஹெட்டா² வுத்தவிஹாரூபசாராதி³ ஸப்³ப³ங் கெ²த்தமேவாதி கத்வா வுத்தங். ஏஸேவ நயோதி அந்தராமக்³கே³ தெ²ய்யசித்தங் உப்பாதெ³த்வாதிஆதி³னா (பாரா॰ அட்ட²॰ 1.112) வுத்தங் நயங் அதிதி³ஸதி.
Āṇattiyā gahitattāti ‘‘pattacīvaraṃ gaṇhā’’ti evaṃ therena kataāṇattiyā gahitattā. Aṭaviṃ pavisati, padavārena kāretabboti ‘‘pattacīvaraṃ gaṇha, asukaṃ nāma gāmaṃ gantvā piṇḍāya carissāmā’’ti therena vihārato paṭṭhāya gāmamaggepi sakalepi gāme vicaraṇassa niyamitattā maggato okkamma gacchantasseva padavārena āpatti vuttā. Vihārassa hi parabhāge upacārato paṭṭhāya yāva tassa gāmassa parato upacāro, tāva sabbaṃ daharassa therāṇattiyā sañcaraṇūpacārova hoti, na pana tato paraṃ. Teneva ‘‘upacārātikkame pārājikaṃ. Gāmūpacārātikkame pārājika’’nti ca vuttaṃ. Paṭinivattane cīvaradhovanādiatthāya pesanepi eseva nayo. Aṭṭhatvā anisīditvāti ettha vihāraṃ pavisitvā sīsādīsu bhāraṃ bhūmiyaṃ anikkhipitvā tiṭṭhanto vā nisīdanto vā vissamitvā theyyacitte vūpasante puna theyyacittaṃ uppādetvā gacchati ce, pāduddhārena kāretabbo. Sace bhūmiyaṃ nikkhipitvā puna taṃ gahetvā gacchati, uddhārena kāretabbo. Kasmā? Āṇāpakassa āṇattiyā yaṃ kattabbaṃ, tassa tāvatā pariniṭṭhitattā. ‘‘Asukaṃ nāma gāma’’nti aniyametvā ‘‘antogāmaṃ gamissāmā’’ti avisesena vutte vihārasāmantā pubbe piṇḍāya paviṭṭhapubbā sabbe gocaragāmāpi khettamevāti vadanti. Sesanti maggukkamanavihārābhimukhagamanādi sabbaṃ. Purimasadisamevāti anāṇattiyā gahitepi sāmikassa kathetvā gahitattā heṭṭhā vuttavihārūpacārādi sabbaṃ khettamevāti katvā vuttaṃ. Eseva nayoti antarāmagge theyyacittaṃ uppādetvātiādinā (pārā. aṭṭha. 1.112) vuttaṃ nayaṃ atidisati.
நிமித்தே வா கதேதி சீவரங் மே கிலிட்ட²ங், கோ நு கோ² ரஜித்வா த³ஸ்ஸதீதிஆதி³னா நிமித்தே கதே. வுத்தனயேனேவாதி அனாணத்தஸ்ஸ தே²ரேன ஸத்³தி⁴ங் பத்தசீவரங் க³ஹெத்வா க³மனவாரே வுத்தனயேனேவ. ஏகபஸ்ஸேதி விஹாரஸ்ஸ மஹந்ததாய அத்தானங் அத³ஸ்ஸெத்வா ஏகஸ்மிங் பஸ்ஸே. தெ²ய்யசித்தேன பரிபு⁴ஞ்ஜந்தோ ஜீராபேதீதி தெ²ய்யசித்தே உப்பன்னே டா²னாசாவனங் அகத்வா நிவத்த²பாருதனீஹாரேனேவ பரிபு⁴ஞ்ஜந்தோ ஜீராபேதி, டா²னா சாவெந்தஸ்ஸ பன தெ²ய்யசித்தே ஸதி பாராஜிகமேவ ஸீஸே பா⁴ரங் க²ந்தே⁴ கரணாதீ³ஸு விய (பாரா॰ 101). யதா² வா ததா² வா நஸ்ஸதீதி அக்³கி³ஆதி³னா நஸ்ஸதி, அஞ்ஞோ வா கோசீதி இமினா யேன ட²பிதங், ஸோபி ஸங்க³ஹிதோதி வேதி³தப்³ப³ங்.
Nimitte vā kateti cīvaraṃ me kiliṭṭhaṃ, ko nu kho rajitvā dassatītiādinā nimitte kate. Vuttanayenevāti anāṇattassa therena saddhiṃ pattacīvaraṃ gahetvā gamanavāre vuttanayeneva. Ekapasseti vihārassa mahantatāya attānaṃ adassetvā ekasmiṃ passe. Theyyacittena paribhuñjanto jīrāpetīti theyyacitte uppanne ṭhānācāvanaṃ akatvā nivatthapārutanīhāreneva paribhuñjanto jīrāpeti, ṭhānā cāventassa pana theyyacitte sati pārājikameva sīse bhāraṃ khandhe karaṇādīsu viya (pārā. 101). Yathā vā tathā vā nassatīti aggiādinā nassati, añño vā kocīti iminā yena ṭhapitaṃ, sopi saṅgahitoti veditabbaṃ.
இதரஸ்ஸாதி சோரஸ்ஸ. இதரங் க³ண்ஹதோ உத்³தா⁴ரே பாராஜிகந்தி எத்த² ‘‘பவிஸித்வா தவ ஸாடகங் க³ண்ஹாஹீ’’தி இமினாவ உபனிதி⁴பா⁴வதோ மோசிதத்தா, ஸாமிகஸ்ஸ இதரங் க³ண்ஹதோ அத்தனோ ஸாடகே ஆலயஸ்ஸ ஸப்³பா⁴வதோ ச ‘‘உத்³தா⁴ரே பாராஜிக’’ந்தி வுத்தங். ஸாமிகோ சே ‘‘மம ஸந்தகங் இத³ங் வா ஹோது, அஞ்ஞங் வா, கிங் தேன, அலங் மய்ஹங் இமினா’’தி ஏவங் ஸுட்டு² நிராலயோ ஹோதி, சோரஸ்ஸ பாராஜிகங் நத்தீ²தி க³ஹேதப்³ப³ங். ந ஜானந்தீதி தேன வுத்தவசனங் அஸுணந்தா ந ஜானந்தி. ஏஸேவ நயோதி எத்த² ஸசே ஜானித்வாபி சித்தேன ந ஸம்படிச்ச²ந்தி, ஏஸேவ நயோதி த³ட்ட²ப்³ப³ங். படிக்கி²பந்தீதி எத்த² சித்தேன படிக்கே²போபி ஸங்க³ஹிதோவாதி வேதி³தப்³ப³ங். உபசாரே விஜ்ஜமானேதி ப⁴ண்டா³கா³ரஸ்ஸ ஸமீபே உச்சாரபஸ்ஸாவட்டா²னே விஜ்ஜமானே. மயி ச மதே ஸங்க⁴ஸ்ஸ ச ஸேனாஸனே வினட்டே²தி எத்த² ‘‘தங் மாரெஸ்ஸாமா’’தி எத்தகே வுத்தேபி விவரிதுங் வட்டதி கி³லானபக்கே² டி²தத்தா அவிஸயோதி வுத்தத்தா. மரணதோ ஹி பரங் கே³லஞ்ஞங் அவிஸயத்தஞ்ச நத்தி². ‘‘த்³வாரங் சி²ந்தி³த்வா பரிக்கா²ரங் ஹரிஸ்ஸாமா’’தி எத்தகே வுத்தேபி விவரிதுங் வட்டதியேவ. ஸஹாயேஹி ப⁴விதப்³ப³ந்தி தேஹிபி பி⁴க்கா²சாராதீ³ஹி பரியேஸித்வா அத்தனோ ஸந்தகேபி கிஞ்சி கிஞ்சி தா³தப்³ப³ந்தி வுத்தங் ஹோதி. அயங் ஸாமீசீதி ப⁴ண்டா³கா³ரே வஸந்தானங் இத³ங் வத்தங்.
Itarassāti corassa. Itaraṃ gaṇhato uddhāre pārājikanti ettha ‘‘pavisitvā tava sāṭakaṃ gaṇhāhī’’ti imināva upanidhibhāvato mocitattā, sāmikassa itaraṃ gaṇhato attano sāṭake ālayassa sabbhāvato ca ‘‘uddhāre pārājika’’nti vuttaṃ. Sāmiko ce ‘‘mama santakaṃ idaṃ vā hotu, aññaṃ vā, kiṃ tena, alaṃ mayhaṃ iminā’’ti evaṃ suṭṭhu nirālayo hoti, corassa pārājikaṃ natthīti gahetabbaṃ. Na jānantīti tena vuttavacanaṃ asuṇantā na jānanti. Eseva nayoti ettha sace jānitvāpi cittena na sampaṭicchanti, eseva nayoti daṭṭhabbaṃ. Paṭikkhipantīti ettha cittena paṭikkhepopi saṅgahitovāti veditabbaṃ. Upacāre vijjamāneti bhaṇḍāgārassa samīpe uccārapassāvaṭṭhāne vijjamāne. Mayi ca mate saṅghassa ca senāsane vinaṭṭheti ettha ‘‘taṃ māressāmā’’ti ettake vuttepi vivarituṃ vaṭṭati gilānapakkhe ṭhitattā avisayoti vuttattā. Maraṇato hi paraṃ gelaññaṃ avisayattañca natthi. ‘‘Dvāraṃ chinditvā parikkhāraṃ harissāmā’’ti ettake vuttepi vivarituṃ vaṭṭatiyeva. Sahāyehi bhavitabbanti tehipi bhikkhācārādīhi pariyesitvā attano santakepi kiñci kiñci dātabbanti vuttaṃ hoti. Ayaṃ sāmīcīti bhaṇḍāgāre vasantānaṃ idaṃ vattaṃ.
லோலமஹாதே²ரோதி மந்தோ³ மோமூஹோ ஆகிண்ணவிஹாரீ. இதரேஹீதி தஸ்மிங்யேவ க³ப்³பே⁴ வஸந்தேஹி இதரபி⁴க்கூ²ஹி. விஹாரரக்க²ணவாரே நியுத்தோ விஹாரவாரிகோ, வுட்³ட⁴படிபாடியா அத்தனோ வாரே விஹாரரக்க²ணகோ. நிவாபந்தி ப⁴த்தவேதனங். சோரானங் படிபத²ங் க³தேஸூதி சோரானங் ஆக³மனங் ஞத்வா ‘‘பட²மதரஞ்ஞேவ க³ந்த்வா ஸத்³த³ங் கரிஸ்ஸாமா’’தி சோரானங் அபி⁴முக²ங் க³தேஸு, ‘‘சோரேஹி ஹடப⁴ண்ட³ங் ஆஹரிஸ்ஸாமா’’தி தத³னுபத²ங் க³தேஸுபி ஏஸேவ நயோ. நிப³த்³த⁴ங் கத்வாதி ‘‘அஸுககுலே யாகு³ப⁴த்தங் விஹாரவாரிகானஞ்ஞேவா’’தி ஏவங் நியமனங் கத்வா. த்³வே திஸ்ஸோ யாகு³ஸலாகா சத்தாரி பஞ்ச ஸலாகப⁴த்தானி ச லப⁴மானோவாதி இத³ங் நித³ஸ்ஸனமத்தங், ததோ ஊனங் வா ஹோது அதி⁴கங் வா அத்தனோ வெய்யாவச்சகரஸ்ஸ ச யாபனமத்தங் லப⁴னமேவ பமாணந்தி க³ஹேதப்³ப³ங். நிஸ்ஸிதகே ஜக்³கெ³ந்தீதி தேஹி விஹாரங் ஜக்³கா³பெந்தீதி அத்தோ². அஸஹாயகஸ்ஸாதி ஸஹாயரஹிதஸ்ஸ. அத்தது³தியஸ்ஸாதி அப்பிச்ச²ஸ்ஸ அத்தா ஸரீரமேவ து³தியோ அஸ்ஸ நாஞ்ஞோதி அத்தது³தியோ. தது³ப⁴யஸ்ஸாபி அத்த²ஸ்ஸ விபா⁴வனங் யஸ்ஸாதிஆதி³, ஏதேன ஸப்³பே³ன ஏகேகஸ்ஸ வாரோ ந பாபேதப்³போ³தி த³ஸ்ஸிதந்தி வேதி³தப்³ப³ங். பாகவத்தத்தா²யாதி நிச்சங் பசிதப்³ப³யாகு³ப⁴த்தஸங்கா²தவத்தத்தா²ய. ட²பெந்தீதி தா³யகா ட²பெந்தி. தங் க³ஹெத்வாதி தங் ஆராமிகாதீ³ஹி தி³ய்யமானங் பா⁴க³ங் க³ஹெத்வா. ந கா³ஹாபேதப்³போ³தி எத்த² அப்³போ⁴காஸிகஸ்ஸாபி அத்தனோ அதி⁴கபரிக்கா²ரோ வா ட²பிதோ அத்தி², சீவராதி³ஸங்கி⁴கபா⁴கே³பி ஆலயோ வா அத்தி², ஸோபி கா³ஹாபேதப்³போ³வ. தி³கு³ணந்தி அஞ்ஞேஹி லப்³ப⁴மானதோ தி³கு³ணங். பக்க²வாரேனாதி அட்³ட⁴மாஸவாரேன.
Lolamahātheroti mando momūho ākiṇṇavihārī. Itarehīti tasmiṃyeva gabbhe vasantehi itarabhikkhūhi. Vihārarakkhaṇavāre niyutto vihāravāriko, vuḍḍhapaṭipāṭiyā attano vāre vihārarakkhaṇako. Nivāpanti bhattavetanaṃ. Corānaṃ paṭipathaṃ gatesūti corānaṃ āgamanaṃ ñatvā ‘‘paṭhamataraññeva gantvā saddaṃ karissāmā’’ti corānaṃ abhimukhaṃ gatesu, ‘‘corehi haṭabhaṇḍaṃ āharissāmā’’ti tadanupathaṃ gatesupi eseva nayo. Nibaddhaṃ katvāti ‘‘asukakule yāgubhattaṃ vihāravārikānaññevā’’ti evaṃ niyamanaṃ katvā. Dve tisso yāgusalākā cattāri pañca salākabhattāni ca labhamānovāti idaṃ nidassanamattaṃ, tato ūnaṃ vā hotu adhikaṃ vā attano veyyāvaccakarassa ca yāpanamattaṃ labhanameva pamāṇanti gahetabbaṃ. Nissitake jaggentīti tehi vihāraṃ jaggāpentīti attho. Asahāyakassāti sahāyarahitassa. Attadutiyassāti appicchassa attā sarīrameva dutiyo assa nāññoti attadutiyo. Tadubhayassāpi atthassa vibhāvanaṃ yassātiādi, etena sabbena ekekassa vāro na pāpetabboti dassitanti veditabbaṃ. Pākavattatthāyāti niccaṃ pacitabbayāgubhattasaṅkhātavattatthāya. Ṭhapentīti dāyakā ṭhapenti. Taṃ gahetvāti taṃ ārāmikādīhi diyyamānaṃ bhāgaṃ gahetvā. Na gāhāpetabboti ettha abbhokāsikassāpi attano adhikaparikkhāro vā ṭhapito atthi, cīvarādisaṅghikabhāgepi ālayo vā atthi, sopi gāhāpetabbova. Diguṇanti aññehi labbhamānato diguṇaṃ. Pakkhavārenāti aḍḍhamāsavārena.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபனிதி⁴கதா²வண்ணனா • Upanidhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
