| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
9. убаниссаяабажжаяанид̣̇д̣̇зсаван̣н̣анаа
9. Upanissayapaccayaniddesavaṇṇanā
9. убаниссаяабажжаяанид̣̇д̣̇зсз буримаа буримаад̇и ананд̇аруубаниссаяз самананд̇араад̇ийд̇аа лаб̣бханд̇и, аарамман̣уубаниссаяабагад̇уубаниссаязсу наанаавийт̇ивасзна буримад̇араа. д̇з д̇аяоби раасаяо гусалавасзна гусалабад̣̇з лаб̣бханд̇и, гусалзна бана агусалз самананд̇араад̇ийд̇аа на лаб̣бханд̇и. д̇знзва вуд̇д̇ам̣ – ‘‘агусалаанам̣ д̇хаммаанам̣ гзсан̃жи убаниссаяабажжаязна бажжаяо’’д̇и . ид̣̇ан̃хи – ‘‘гусало д̇хаммо агусаласса д̇хаммасса убаниссаяабажжаязна бажжаяо; аарамман̣уубаниссаяо багад̇уубаниссаяо. аарамман̣уубаниссаяо – д̣̇аанам̣ д̣̇ад̇ваа сийлам̣ самаад̣̇ияид̇ваа убосат̇агаммам̣ гад̇ваа д̇ам̣ г̇арум̣ гад̇ваа ассаад̣̇зд̇и абхинанд̣̇ад̇и, д̇ам̣ г̇арум̣ гад̇ваа рааг̇о уббаж̇ж̇ад̇и, д̣̇идти уббаж̇ж̇ад̇и, буб̣б̣з сужин̣н̣аани г̇арум̣ гад̇ваа ассаад̣̇зд̇и абхинанд̣̇ад̇и, д̇ам̣ г̇арум̣ гад̇ваа рааг̇о уббаж̇ж̇ад̇и, д̣̇идти уббаж̇ж̇ад̇и. жхаанаа вудтахид̇ваа жхаанам̣ г̇арум̣ гад̇ваа ассаад̣̇зд̇и абхинанд̣̇ад̇и, д̇ам̣ г̇арум̣ гад̇ваа рааг̇о уббаж̇ж̇ад̇и д̣̇идти уббаж̇ж̇ад̇и. багад̇уубаниссаяо – сад̣̇д̇хам̣ убаниссааяа маанам̣ ж̇аббзд̇и, д̣̇идтим̣ г̇ан̣хаад̇и. сийлам̣ суд̇ам̣ жааг̇ам̣ бан̃н̃ам̣ убаниссааяа маанам̣ ж̇аббзд̇и, д̣̇идтим̣ г̇ан̣хаад̇и. сад̣̇д̇хаа сийлам̣ суд̇ам̣ жааг̇о бан̃н̃аа рааг̇асса д̣̇осасса мохасса маанасса д̣̇идтияаа бад̇т̇анааяа убаниссаяабажжаязна бажжаяо’’д̇и имам̣ наяам̣ санд̇хааяа вуд̇д̇ам̣. гусалзна аб̣яаагад̇з д̇аяоби лаб̣бханд̇и, д̇ат̇аа агусалзна агусалз.
9. Upanissayapaccayaniddese purimā purimāti anantarūpanissaye samanantarātītā labbhanti, ārammaṇūpanissayapakatūpanissayesu nānāvīthivasena purimatarā. Te tayopi rāsayo kusalavasena kusalapade labbhanti, kusalena pana akusale samanantarātītā na labbhanti. Teneva vuttaṃ – ‘‘akusalānaṃ dhammānaṃ kesañci upanissayapaccayena paccayo’’ti . Idañhi – ‘‘kusalo dhammo akusalassa dhammassa upanissayapaccayena paccayo; ārammaṇūpanissayo pakatūpanissayo. Ārammaṇūpanissayo – dānaṃ datvā sīlaṃ samādiyitvā uposathakammaṃ katvā taṃ garuṃ katvā assādeti abhinandati, taṃ garuṃ katvā rāgo uppajjati, diṭṭhi uppajjati, pubbe suciṇṇāni garuṃ katvā assādeti abhinandati, taṃ garuṃ katvā rāgo uppajjati, diṭṭhi uppajjati. Jhānā vuṭṭhahitvā jhānaṃ garuṃ katvā assādeti abhinandati, taṃ garuṃ katvā rāgo uppajjati diṭṭhi uppajjati. Pakatūpanissayo – saddhaṃ upanissāya mānaṃ jappeti, diṭṭhiṃ gaṇhāti. Sīlaṃ sutaṃ cāgaṃ paññaṃ upanissāya mānaṃ jappeti, diṭṭhiṃ gaṇhāti. Saddhā sīlaṃ sutaṃ cāgo paññā rāgassa dosassa mohassa mānassa diṭṭhiyā patthanāya upanissayapaccayena paccayo’’ti imaṃ nayaṃ sandhāya vuttaṃ. Kusalena abyākate tayopi labbhanti, tathā akusalena akusale.
агусалзна бана гусалз самананд̇араад̇ийд̇аа на лаб̣бханд̇и. д̇зна вуд̇д̇ам̣ – ‘‘гусалаанам̣ д̇хаммаанам̣ гзсан̃жи убаниссаяабажжаязна бажжаяо’’д̇и. ид̣̇амби хи – ‘‘агусало д̇хаммо гусаласса д̇хаммасса убаниссаяабажжаязна бажжаяо. багад̇уубаниссаяо – рааг̇ам̣ убаниссааяа д̣̇аанам̣ д̣̇зд̇и, сийлам̣ самаад̣̇ияад̇и, убосат̇агаммам̣ гарод̇и, жхаанам̣ уббаад̣̇зд̇и вибассанам̣ уббаад̣̇зд̇и, маг̇г̇ам̣ уббаад̣̇зд̇и, абхин̃н̃ам̣ уббаад̣̇зд̇и, самаабад̇д̇им̣ уббаад̣̇зд̇и; д̣̇осам̣ мохам̣ маанам̣ д̣̇идтим̣ бад̇т̇анам̣ убаниссааяа д̣̇аанам̣ д̣̇зд̇и…бз… самаабад̇д̇им̣ уббаад̣̇зд̇и. рааг̇о д̣̇осо мохо маано д̣̇идти бад̇т̇анаа сад̣̇д̇хааяа сийласса суд̇асса жааг̇асса бан̃н̃ааяа убаниссаяабажжаязна бажжаяо. баан̣ам̣ ханд̇ваа д̇асса бадигхаад̇ад̇т̇ааяа д̣̇аанам̣ д̣̇зд̇ий’’д̇иаад̣̇инаа наязна бан̃хааваарз ааг̇ад̇ам̣ багад̇уубаниссаяамзва санд̇хааяа вуд̇д̇ам̣. агусалам̣ бана гусаласса аарамман̣уубаниссаяо на ход̇и. гасмаа? д̇ам̣ г̇арум̣ гад̇ваа д̇асса аббавад̇д̇анад̇од̇и яат̇аа ананд̇аруубаниссаяо, звам̣ аарамман̣уубаниссаяобзд̇т̇а на лаб̣бхад̇ийд̇и взд̣̇ид̇аб̣б̣о. агусалзна аб̣яаагад̇абад̣̇з аарамман̣уубаниссаяова на лаб̣бхад̇и. на хи аб̣яаагад̇аа д̇хаммаа агусалам̣ г̇арум̣ гаронд̇и . яасмаа бана ананд̇арад̇аа лаб̣бхад̇и, д̇асмаа зд̇т̇а ‘‘гзсан̃жий’’д̇и на вуд̇д̇ам̣. аб̣яаагад̇зна бана аб̣яаагад̇з гусалз агусалзд̇и д̇ийсу наязсу д̇аяоби убаниссаяаа лаб̣бханд̇зва. буг̇г̇алоби сзнаасанамбийд̇и ид̣̇ам̣ д̣̇ваяам̣ багад̇уубаниссаяавасзна вуд̇д̇ам̣. ид̣̇ан̃хи д̣̇ваяам̣ гусалаагусалабавад̇д̇ияаа б̣алавабажжаяо ход̇и. бажжаяабхааво жасса банзд̇т̇а барияааяавасзна взд̣̇ид̇аб̣б̣од̇и аяам̣ д̇аавзд̇т̇а баал̣иван̣н̣анаа.
Akusalena pana kusale samanantarātītā na labbhanti. Tena vuttaṃ – ‘‘kusalānaṃ dhammānaṃ kesañci upanissayapaccayena paccayo’’ti. Idampi hi – ‘‘akusalo dhammo kusalassa dhammassa upanissayapaccayena paccayo. Pakatūpanissayo – rāgaṃ upanissāya dānaṃ deti, sīlaṃ samādiyati, uposathakammaṃ karoti, jhānaṃ uppādeti vipassanaṃ uppādeti, maggaṃ uppādeti, abhiññaṃ uppādeti, samāpattiṃ uppādeti; dosaṃ mohaṃ mānaṃ diṭṭhiṃ patthanaṃ upanissāya dānaṃ deti…pe… samāpattiṃ uppādeti. Rāgo doso moho māno diṭṭhi patthanā saddhāya sīlassa sutassa cāgassa paññāya upanissayapaccayena paccayo. Pāṇaṃ hantvā tassa paṭighātatthāya dānaṃ detī’’tiādinā nayena pañhāvāre āgataṃ pakatūpanissayameva sandhāya vuttaṃ. Akusalaṃ pana kusalassa ārammaṇūpanissayo na hoti. Kasmā? Taṃ garuṃ katvā tassa appavattanatoti yathā anantarūpanissayo, evaṃ ārammaṇūpanissayopettha na labbhatīti veditabbo. Akusalena abyākatapade ārammaṇūpanissayova na labbhati. Na hi abyākatā dhammā akusalaṃ garuṃ karonti . Yasmā pana anantaratā labbhati, tasmā ettha ‘‘kesañcī’’ti na vuttaṃ. Abyākatena pana abyākate kusale akusaleti tīsu nayesu tayopi upanissayā labbhanteva. Puggalopi senāsanampīti idaṃ dvayaṃ pakatūpanissayavasena vuttaṃ. Idañhi dvayaṃ kusalākusalapavattiyā balavapaccayo hoti. Paccayabhāvo cassa panettha pariyāyavasena veditabboti ayaṃ tāvettha pāḷivaṇṇanā.
аяам̣ бана убаниссаяабажжаяо наама сад̣̇д̇хим̣ згажжааяа бан̃н̃ад̇д̇ияаа саб̣б̣зби жад̇убхуумагад̇хаммаа. вибхааг̇ад̇о бана аарамман̣уубаниссаяаад̣̇ивасзна д̇ивид̇хо ход̇и. д̇ад̇т̇а аарамман̣уубаниссаяо аарамман̣аад̇хибад̇инаа ниннаанаагаран̣од̇и хздтаа вуд̇д̇анаязнзва наанаббагаарабхзд̣̇ад̇о г̇ахзд̇аб̣б̣о. ананд̇аруубаниссаяо ананд̇арабажжаязна ниннаанаагаран̣о, соби хздтаа вуд̇д̇анаязнзва наанаббагаарабхзд̣̇ад̇о взд̣̇ид̇аб̣б̣о. бажжаяуббаннад̇оби нзсам̣ д̇ад̇т̇а вуд̇д̇анаязнзва винижчаяо взд̣̇ид̇аб̣б̣о. багад̇уубаниссаяо бана ж̇аад̇ивасзна гусалаагусалавибаагагирияаруубабхзд̣̇ад̇о бан̃жавид̇хо ход̇и, гусалаад̣̇ийнам̣ бана бхуумибхзд̣̇ад̇о анзгавид̇ход̇и звам̣ д̇аавзд̇т̇а наанаббагаарабхзд̣̇ад̇о вин̃н̃аад̇аб̣б̣о винижчаяо.
Ayaṃ pana upanissayapaccayo nāma saddhiṃ ekaccāya paññattiyā sabbepi catubhūmakadhammā. Vibhāgato pana ārammaṇūpanissayādivasena tividho hoti. Tattha ārammaṇūpanissayo ārammaṇādhipatinā ninnānākaraṇoti heṭṭhā vuttanayeneva nānappakārabhedato gahetabbo. Anantarūpanissayo anantarapaccayena ninnānākaraṇo, sopi heṭṭhā vuttanayeneva nānappakārabhedato veditabbo. Paccayuppannatopi nesaṃ tattha vuttanayeneva vinicchayo veditabbo. Pakatūpanissayo pana jātivasena kusalākusalavipākakiriyarūpabhedato pañcavidho hoti, kusalādīnaṃ pana bhūmibhedato anekavidhoti evaṃ tāvettha nānappakārabhedato viññātabbo vinicchayo.
звам̣ бхиннз банзд̇т̇а д̇збхуумагагусало жад̇убхуумагассааби гусаласса агусаласса вибаагагирияассаад̇и жад̇уннам̣ раасийнам̣ багад̇уубаниссаяо ход̇и. логуд̇д̇аро агусалассзва на ход̇и. амхаагам̣ аажариязна ‘‘логуд̇д̇арад̇хаммо ниб̣б̣ад̇д̇ид̇о’’д̇и иминаа бана наязна ан̃н̃зсам̣ агусалассааби ход̇и. яасса ваа уббаж̇ж̇иссад̇и, д̇ассааби ануд̇д̇арзсу вимогкзсу бихам̣ убадтаабаяад̇о иминаа наязна ход̇иязва. агусало саб̣б̣зсамби жад̇убхуумагаанам̣ канд̇хаанам̣ багад̇уубаниссаяо ход̇и, д̇ат̇аа д̇збхуумагавибааго. логуд̇д̇аравибаагз хздтимаани д̇ийн̣и палаани агусалассзва на хонд̇и, убаридтимам̣ гусалассааби. буриманаязна бана ан̃н̃зсам̣ ваа яасса ваа уббаж̇ж̇иссад̇и, д̇асса санд̇аанз саб̣б̣оби логуд̇д̇аравибааго саб̣б̣зсам̣ гусалаад̣̇ийнам̣ аруубагканд̇хаанам̣ багад̇уубаниссаяо ход̇и. гирияасан̇каад̇оби багад̇уубаниссаяо жад̇убхуумагаанам̣ агусалаад̣̇иканд̇хаанам̣ ход̇иязва, д̇ат̇аа руубасан̇каад̇о. саяам̣ бана руубам̣ имасмим̣ бадтаанамахаабагаран̣з ааг̇ад̇анаязна убаниссаяабажжаяам̣ на лабхад̇и, суд̇д̇анд̇игабарияааязна бана лабхад̇ийд̇и вад̇д̇ум̣ ваддад̇и. звамзд̇т̇а бажжаяуббаннад̇оби вин̃н̃аад̇аб̣б̣о винижчаяод̇и.
Evaṃ bhinne panettha tebhūmakakusalo catubhūmakassāpi kusalassa akusalassa vipākakiriyassāti catunnaṃ rāsīnaṃ pakatūpanissayo hoti. Lokuttaro akusalasseva na hoti. Amhākaṃ ācariyena ‘‘lokuttaradhammo nibbattito’’ti iminā pana nayena aññesaṃ akusalassāpi hoti. Yassa vā uppajjissati, tassāpi anuttaresu vimokkhesu pihaṃ upaṭṭhāpayato iminā nayena hotiyeva. Akusalo sabbesampi catubhūmakānaṃ khandhānaṃ pakatūpanissayo hoti, tathā tebhūmakavipāko. Lokuttaravipāke heṭṭhimāni tīṇi phalāni akusalasseva na honti, upariṭṭhimaṃ kusalassāpi. Purimanayena pana aññesaṃ vā yassa vā uppajjissati, tassa santāne sabbopi lokuttaravipāko sabbesaṃ kusalādīnaṃ arūpakkhandhānaṃ pakatūpanissayo hoti. Kiriyasaṅkhātopi pakatūpanissayo catubhūmakānaṃ akusalādikhandhānaṃ hotiyeva, tathā rūpasaṅkhāto. Sayaṃ pana rūpaṃ imasmiṃ paṭṭhānamahāpakaraṇe āgatanayena upanissayapaccayaṃ na labhati, suttantikapariyāyena pana labhatīti vattuṃ vaṭṭati. Evamettha paccayuppannatopi viññātabbo vinicchayoti.
убаниссаяабажжаяанид̣̇д̣̇зсаван̣н̣анаа.
Upanissayapaccayaniddesavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / бадтаанабаал̣и • Paṭṭhānapāḷi / (2) бажжаяанид̣̇д̣̇зсо • (2) Paccayaniddeso
