| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੯. ਉਪਨਿਸ੍ਸਯਪਚ੍ਚਯਨਿਦ੍ਦੇਸવਣ੍ਣਨਾ
9. Upanissayapaccayaniddesavaṇṇanā
੯. ਉਪਨਿਸ੍ਸਯਪਚ੍ਚਯਨਿਦ੍ਦੇਸੇ ਪੁਰਿਮਾ ਪੁਰਿਮਾਤਿ ਅਨਨ੍ਤਰੂਪਨਿਸ੍ਸਯੇ ਸਮਨਨ੍ਤਰਾਤੀਤਾ ਲਬ੍ਭਨ੍ਤਿ, ਆਰਮ੍ਮਣੂਪਨਿਸ੍ਸਯਪਕਤੂਪਨਿਸ੍ਸਯੇਸੁ ਨਾਨਾવੀਥਿવਸੇਨ ਪੁਰਿਮਤਰਾ। ਤੇ ਤਯੋਪਿ ਰਾਸਯੋ ਕੁਸਲવਸੇਨ ਕੁਸਲਪਦੇ ਲਬ੍ਭਨ੍ਤਿ, ਕੁਸਲੇਨ ਪਨ ਅਕੁਸਲੇ ਸਮਨਨ੍ਤਰਾਤੀਤਾ ਨ ਲਬ੍ਭਨ੍ਤਿ। ਤੇਨੇવ વੁਤ੍ਤਂ – ‘‘ਅਕੁਸਲਾਨਂ ਧਮ੍ਮਾਨਂ ਕੇਸਞ੍ਚਿ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ’’ਤਿ । ਇਦਞ੍ਹਿ – ‘‘ਕੁਸਲੋ ਧਮ੍ਮੋ ਅਕੁਸਲਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ; ਆਰਮ੍ਮਣੂਪਨਿਸ੍ਸਯੋ ਪਕਤੂਪਨਿਸ੍ਸਯੋ। ਆਰਮ੍ਮਣੂਪਨਿਸ੍ਸਯੋ – ਦਾਨਂ ਦਤ੍વਾ ਸੀਲਂ ਸਮਾਦਿਯਿਤ੍વਾ ਉਪੋਸਥਕਮ੍ਮਂ ਕਤ੍વਾ ਤਂ ਗਰੁਂ ਕਤ੍વਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍વਾ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ ਉਪ੍ਪਜ੍ਜਤਿ, ਪੁਬ੍ਬੇ ਸੁਚਿਣ੍ਣਾਨਿ ਗਰੁਂ ਕਤ੍વਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍વਾ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ ਉਪ੍ਪਜ੍ਜਤਿ। ਝਾਨਾ વੁਟ੍ਠਹਿਤ੍વਾ ਝਾਨਂ ਗਰੁਂ ਕਤ੍વਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍વਾ ਰਾਗੋ ਉਪ੍ਪਜ੍ਜਤਿ ਦਿਟ੍ਠਿ ਉਪ੍ਪਜ੍ਜਤਿ। ਪਕਤੂਪਨਿਸ੍ਸਯੋ – ਸਦ੍ਧਂ ਉਪਨਿਸ੍ਸਾਯ ਮਾਨਂ ਜਪ੍ਪੇਤਿ, ਦਿਟ੍ਠਿਂ ਗਣ੍ਹਾਤਿ। ਸੀਲਂ ਸੁਤਂ ਚਾਗਂ ਪਞ੍ਞਂ ਉਪਨਿਸ੍ਸਾਯ ਮਾਨਂ ਜਪ੍ਪੇਤਿ, ਦਿਟ੍ਠਿਂ ਗਣ੍ਹਾਤਿ। ਸਦ੍ਧਾ ਸੀਲਂ ਸੁਤਂ ਚਾਗੋ ਪਞ੍ਞਾ ਰਾਗਸ੍ਸ ਦੋਸਸ੍ਸ ਮੋਹਸ੍ਸ ਮਾਨਸ੍ਸ ਦਿਟ੍ਠਿਯਾ ਪਤ੍ਥਨਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ’’ਤਿ ਇਮਂ ਨਯਂ ਸਨ੍ਧਾਯ વੁਤ੍ਤਂ। ਕੁਸਲੇਨ ਅਬ੍ਯਾਕਤੇ ਤਯੋਪਿ ਲਬ੍ਭਨ੍ਤਿ, ਤਥਾ ਅਕੁਸਲੇਨ ਅਕੁਸਲੇ।
9. Upanissayapaccayaniddese purimā purimāti anantarūpanissaye samanantarātītā labbhanti, ārammaṇūpanissayapakatūpanissayesu nānāvīthivasena purimatarā. Te tayopi rāsayo kusalavasena kusalapade labbhanti, kusalena pana akusale samanantarātītā na labbhanti. Teneva vuttaṃ – ‘‘akusalānaṃ dhammānaṃ kesañci upanissayapaccayena paccayo’’ti . Idañhi – ‘‘kusalo dhammo akusalassa dhammassa upanissayapaccayena paccayo; ārammaṇūpanissayo pakatūpanissayo. Ārammaṇūpanissayo – dānaṃ datvā sīlaṃ samādiyitvā uposathakammaṃ katvā taṃ garuṃ katvā assādeti abhinandati, taṃ garuṃ katvā rāgo uppajjati, diṭṭhi uppajjati, pubbe suciṇṇāni garuṃ katvā assādeti abhinandati, taṃ garuṃ katvā rāgo uppajjati, diṭṭhi uppajjati. Jhānā vuṭṭhahitvā jhānaṃ garuṃ katvā assādeti abhinandati, taṃ garuṃ katvā rāgo uppajjati diṭṭhi uppajjati. Pakatūpanissayo – saddhaṃ upanissāya mānaṃ jappeti, diṭṭhiṃ gaṇhāti. Sīlaṃ sutaṃ cāgaṃ paññaṃ upanissāya mānaṃ jappeti, diṭṭhiṃ gaṇhāti. Saddhā sīlaṃ sutaṃ cāgo paññā rāgassa dosassa mohassa mānassa diṭṭhiyā patthanāya upanissayapaccayena paccayo’’ti imaṃ nayaṃ sandhāya vuttaṃ. Kusalena abyākate tayopi labbhanti, tathā akusalena akusale.
ਅਕੁਸਲੇਨ ਪਨ ਕੁਸਲੇ ਸਮਨਨ੍ਤਰਾਤੀਤਾ ਨ ਲਬ੍ਭਨ੍ਤਿ। ਤੇਨ વੁਤ੍ਤਂ – ‘‘ਕੁਸਲਾਨਂ ਧਮ੍ਮਾਨਂ ਕੇਸਞ੍ਚਿ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ’’ਤਿ। ਇਦਮ੍ਪਿ ਹਿ – ‘‘ਅਕੁਸਲੋ ਧਮ੍ਮੋ ਕੁਸਲਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ। ਪਕਤੂਪਨਿਸ੍ਸਯੋ – ਰਾਗਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ, ਉਪੋਸਥਕਮ੍ਮਂ ਕਰੋਤਿ, ਝਾਨਂ ਉਪ੍ਪਾਦੇਤਿ વਿਪਸ੍ਸਨਂ ਉਪ੍ਪਾਦੇਤਿ, ਮਗ੍ਗਂ ਉਪ੍ਪਾਦੇਤਿ, ਅਭਿਞ੍ਞਂ ਉਪ੍ਪਾਦੇਤਿ, ਸਮਾਪਤ੍ਤਿਂ ਉਪ੍ਪਾਦੇਤਿ; ਦੋਸਂ ਮੋਹਂ ਮਾਨਂ ਦਿਟ੍ਠਿਂ ਪਤ੍ਥਨਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ॰… ਸਮਾਪਤ੍ਤਿਂ ਉਪ੍ਪਾਦੇਤਿ। ਰਾਗੋ ਦੋਸੋ ਮੋਹੋ ਮਾਨੋ ਦਿਟ੍ਠਿ ਪਤ੍ਥਨਾ ਸਦ੍ਧਾਯ ਸੀਲਸ੍ਸ ਸੁਤਸ੍ਸ ਚਾਗਸ੍ਸ ਪਞ੍ਞਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ। ਪਾਣਂ ਹਨ੍ਤ੍વਾ ਤਸ੍ਸ ਪਟਿਘਾਤਤ੍ਥਾਯ ਦਾਨਂ ਦੇਤੀ’’ਤਿਆਦਿਨਾ ਨਯੇਨ ਪਞ੍ਹਾવਾਰੇ ਆਗਤਂ ਪਕਤੂਪਨਿਸ੍ਸਯਮੇવ ਸਨ੍ਧਾਯ વੁਤ੍ਤਂ। ਅਕੁਸਲਂ ਪਨ ਕੁਸਲਸ੍ਸ ਆਰਮ੍ਮਣੂਪਨਿਸ੍ਸਯੋ ਨ ਹੋਤਿ। ਕਸ੍ਮਾ? ਤਂ ਗਰੁਂ ਕਤ੍વਾ ਤਸ੍ਸ ਅਪ੍ਪવਤ੍ਤਨਤੋਤਿ ਯਥਾ ਅਨਨ੍ਤਰੂਪਨਿਸ੍ਸਯੋ, ਏવਂ ਆਰਮ੍ਮਣੂਪਨਿਸ੍ਸਯੋਪੇਤ੍ਥ ਨ ਲਬ੍ਭਤੀਤਿ વੇਦਿਤਬ੍ਬੋ। ਅਕੁਸਲੇਨ ਅਬ੍ਯਾਕਤਪਦੇ ਆਰਮ੍ਮਣੂਪਨਿਸ੍ਸਯੋવ ਨ ਲਬ੍ਭਤਿ। ਨ ਹਿ ਅਬ੍ਯਾਕਤਾ ਧਮ੍ਮਾ ਅਕੁਸਲਂ ਗਰੁਂ ਕਰੋਨ੍ਤਿ । ਯਸ੍ਮਾ ਪਨ ਅਨਨ੍ਤਰਤਾ ਲਬ੍ਭਤਿ, ਤਸ੍ਮਾ ਏਤ੍ਥ ‘‘ਕੇਸਞ੍ਚੀ’’ਤਿ ਨ વੁਤ੍ਤਂ। ਅਬ੍ਯਾਕਤੇਨ ਪਨ ਅਬ੍ਯਾਕਤੇ ਕੁਸਲੇ ਅਕੁਸਲੇਤਿ ਤੀਸੁ ਨਯੇਸੁ ਤਯੋਪਿ ਉਪਨਿਸ੍ਸਯਾ ਲਬ੍ਭਨ੍ਤੇવ। ਪੁਗ੍ਗਲੋਪਿ ਸੇਨਾਸਨਮ੍ਪੀਤਿ ਇਦਂ ਦ੍વਯਂ ਪਕਤੂਪਨਿਸ੍ਸਯવਸੇਨ વੁਤ੍ਤਂ। ਇਦਞ੍ਹਿ ਦ੍વਯਂ ਕੁਸਲਾਕੁਸਲਪવਤ੍ਤਿਯਾ ਬਲવਪਚ੍ਚਯੋ ਹੋਤਿ। ਪਚ੍ਚਯਭਾવੋ ਚਸ੍ਸ ਪਨੇਤ੍ਥ ਪਰਿਯਾਯવਸੇਨ વੇਦਿਤਬ੍ਬੋਤਿ ਅਯਂ ਤਾવੇਤ੍ਥ ਪਾਲ਼ਿવਣ੍ਣਨਾ।
Akusalena pana kusale samanantarātītā na labbhanti. Tena vuttaṃ – ‘‘kusalānaṃ dhammānaṃ kesañci upanissayapaccayena paccayo’’ti. Idampi hi – ‘‘akusalo dhammo kusalassa dhammassa upanissayapaccayena paccayo. Pakatūpanissayo – rāgaṃ upanissāya dānaṃ deti, sīlaṃ samādiyati, uposathakammaṃ karoti, jhānaṃ uppādeti vipassanaṃ uppādeti, maggaṃ uppādeti, abhiññaṃ uppādeti, samāpattiṃ uppādeti; dosaṃ mohaṃ mānaṃ diṭṭhiṃ patthanaṃ upanissāya dānaṃ deti…pe… samāpattiṃ uppādeti. Rāgo doso moho māno diṭṭhi patthanā saddhāya sīlassa sutassa cāgassa paññāya upanissayapaccayena paccayo. Pāṇaṃ hantvā tassa paṭighātatthāya dānaṃ detī’’tiādinā nayena pañhāvāre āgataṃ pakatūpanissayameva sandhāya vuttaṃ. Akusalaṃ pana kusalassa ārammaṇūpanissayo na hoti. Kasmā? Taṃ garuṃ katvā tassa appavattanatoti yathā anantarūpanissayo, evaṃ ārammaṇūpanissayopettha na labbhatīti veditabbo. Akusalena abyākatapade ārammaṇūpanissayova na labbhati. Na hi abyākatā dhammā akusalaṃ garuṃ karonti . Yasmā pana anantaratā labbhati, tasmā ettha ‘‘kesañcī’’ti na vuttaṃ. Abyākatena pana abyākate kusale akusaleti tīsu nayesu tayopi upanissayā labbhanteva. Puggalopi senāsanampīti idaṃ dvayaṃ pakatūpanissayavasena vuttaṃ. Idañhi dvayaṃ kusalākusalapavattiyā balavapaccayo hoti. Paccayabhāvo cassa panettha pariyāyavasena veditabboti ayaṃ tāvettha pāḷivaṇṇanā.
ਅਯਂ ਪਨ ਉਪਨਿਸ੍ਸਯਪਚ੍ਚਯੋ ਨਾਮ ਸਦ੍ਧਿਂ ਏਕਚ੍ਚਾਯ ਪਞ੍ਞਤ੍ਤਿਯਾ ਸਬ੍ਬੇਪਿ ਚਤੁਭੂਮਕਧਮ੍ਮਾ। વਿਭਾਗਤੋ ਪਨ ਆਰਮ੍ਮਣੂਪਨਿਸ੍ਸਯਾਦਿવਸੇਨ ਤਿવਿਧੋ ਹੋਤਿ। ਤਤ੍ਥ ਆਰਮ੍ਮਣੂਪਨਿਸ੍ਸਯੋ ਆਰਮ੍ਮਣਾਧਿਪਤਿਨਾ ਨਿਨ੍ਨਾਨਾਕਰਣੋਤਿ ਹੇਟ੍ਠਾ વੁਤ੍ਤਨਯੇਨੇવ ਨਾਨਪ੍ਪਕਾਰਭੇਦਤੋ ਗਹੇਤਬ੍ਬੋ। ਅਨਨ੍ਤਰੂਪਨਿਸ੍ਸਯੋ ਅਨਨ੍ਤਰਪਚ੍ਚਯੇਨ ਨਿਨ੍ਨਾਨਾਕਰਣੋ, ਸੋਪਿ ਹੇਟ੍ਠਾ વੁਤ੍ਤਨਯੇਨੇવ ਨਾਨਪ੍ਪਕਾਰਭੇਦਤੋ વੇਦਿਤਬ੍ਬੋ। ਪਚ੍ਚਯੁਪ੍ਪਨ੍ਨਤੋਪਿ ਨੇਸਂ ਤਤ੍ਥ વੁਤ੍ਤਨਯੇਨੇવ વਿਨਿਚ੍ਛਯੋ વੇਦਿਤਬ੍ਬੋ। ਪਕਤੂਪਨਿਸ੍ਸਯੋ ਪਨ ਜਾਤਿવਸੇਨ ਕੁਸਲਾਕੁਸਲવਿਪਾਕਕਿਰਿਯਰੂਪਭੇਦਤੋ ਪਞ੍ਚવਿਧੋ ਹੋਤਿ, ਕੁਸਲਾਦੀਨਂ ਪਨ ਭੂਮਿਭੇਦਤੋ ਅਨੇਕવਿਧੋਤਿ ਏવਂ ਤਾવੇਤ੍ਥ ਨਾਨਪ੍ਪਕਾਰਭੇਦਤੋ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Ayaṃ pana upanissayapaccayo nāma saddhiṃ ekaccāya paññattiyā sabbepi catubhūmakadhammā. Vibhāgato pana ārammaṇūpanissayādivasena tividho hoti. Tattha ārammaṇūpanissayo ārammaṇādhipatinā ninnānākaraṇoti heṭṭhā vuttanayeneva nānappakārabhedato gahetabbo. Anantarūpanissayo anantarapaccayena ninnānākaraṇo, sopi heṭṭhā vuttanayeneva nānappakārabhedato veditabbo. Paccayuppannatopi nesaṃ tattha vuttanayeneva vinicchayo veditabbo. Pakatūpanissayo pana jātivasena kusalākusalavipākakiriyarūpabhedato pañcavidho hoti, kusalādīnaṃ pana bhūmibhedato anekavidhoti evaṃ tāvettha nānappakārabhedato viññātabbo vinicchayo.
ਏવਂ ਭਿਨ੍ਨੇ ਪਨੇਤ੍ਥ ਤੇਭੂਮਕਕੁਸਲੋ ਚਤੁਭੂਮਕਸ੍ਸਾਪਿ ਕੁਸਲਸ੍ਸ ਅਕੁਸਲਸ੍ਸ વਿਪਾਕਕਿਰਿਯਸ੍ਸਾਤਿ ਚਤੁਨ੍ਨਂ ਰਾਸੀਨਂ ਪਕਤੂਪਨਿਸ੍ਸਯੋ ਹੋਤਿ। ਲੋਕੁਤ੍ਤਰੋ ਅਕੁਸਲਸ੍ਸੇવ ਨ ਹੋਤਿ। ਅਮ੍ਹਾਕਂ ਆਚਰਿਯੇਨ ‘‘ਲੋਕੁਤ੍ਤਰਧਮ੍ਮੋ ਨਿਬ੍ਬਤ੍ਤਿਤੋ’’ਤਿ ਇਮਿਨਾ ਪਨ ਨਯੇਨ ਅਞ੍ਞੇਸਂ ਅਕੁਸਲਸ੍ਸਾਪਿ ਹੋਤਿ। ਯਸ੍ਸ વਾ ਉਪ੍ਪਜ੍ਜਿਸ੍ਸਤਿ, ਤਸ੍ਸਾਪਿ ਅਨੁਤ੍ਤਰੇਸੁ વਿਮੋਕ੍ਖੇਸੁ ਪਿਹਂ ਉਪਟ੍ਠਾਪਯਤੋ ਇਮਿਨਾ ਨਯੇਨ ਹੋਤਿਯੇવ। ਅਕੁਸਲੋ ਸਬ੍ਬੇਸਮ੍ਪਿ ਚਤੁਭੂਮਕਾਨਂ ਖਨ੍ਧਾਨਂ ਪਕਤੂਪਨਿਸ੍ਸਯੋ ਹੋਤਿ, ਤਥਾ ਤੇਭੂਮਕવਿਪਾਕੋ। ਲੋਕੁਤ੍ਤਰવਿਪਾਕੇ ਹੇਟ੍ਠਿਮਾਨਿ ਤੀਣਿ ਫਲਾਨਿ ਅਕੁਸਲਸ੍ਸੇવ ਨ ਹੋਨ੍ਤਿ, ਉਪਰਿਟ੍ਠਿਮਂ ਕੁਸਲਸ੍ਸਾਪਿ। ਪੁਰਿਮਨਯੇਨ ਪਨ ਅਞ੍ਞੇਸਂ વਾ ਯਸ੍ਸ વਾ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਸਨ੍ਤਾਨੇ ਸਬ੍ਬੋਪਿ ਲੋਕੁਤ੍ਤਰવਿਪਾਕੋ ਸਬ੍ਬੇਸਂ ਕੁਸਲਾਦੀਨਂ ਅਰੂਪਕ੍ਖਨ੍ਧਾਨਂ ਪਕਤੂਪਨਿਸ੍ਸਯੋ ਹੋਤਿ। ਕਿਰਿਯਸਙ੍ਖਾਤੋਪਿ ਪਕਤੂਪਨਿਸ੍ਸਯੋ ਚਤੁਭੂਮਕਾਨਂ ਅਕੁਸਲਾਦਿਖਨ੍ਧਾਨਂ ਹੋਤਿਯੇવ, ਤਥਾ ਰੂਪਸਙ੍ਖਾਤੋ। ਸਯਂ ਪਨ ਰੂਪਂ ਇਮਸ੍ਮਿਂ ਪਟ੍ਠਾਨਮਹਾਪਕਰਣੇ ਆਗਤਨਯੇਨ ਉਪਨਿਸ੍ਸਯਪਚ੍ਚਯਂ ਨ ਲਭਤਿ, ਸੁਤ੍ਤਨ੍ਤਿਕਪਰਿਯਾਯੇਨ ਪਨ ਲਭਤੀਤਿ વਤ੍ਤੁਂ વਟ੍ਟਤਿ। ਏવਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋਤਿ।
Evaṃ bhinne panettha tebhūmakakusalo catubhūmakassāpi kusalassa akusalassa vipākakiriyassāti catunnaṃ rāsīnaṃ pakatūpanissayo hoti. Lokuttaro akusalasseva na hoti. Amhākaṃ ācariyena ‘‘lokuttaradhammo nibbattito’’ti iminā pana nayena aññesaṃ akusalassāpi hoti. Yassa vā uppajjissati, tassāpi anuttaresu vimokkhesu pihaṃ upaṭṭhāpayato iminā nayena hotiyeva. Akusalo sabbesampi catubhūmakānaṃ khandhānaṃ pakatūpanissayo hoti, tathā tebhūmakavipāko. Lokuttaravipāke heṭṭhimāni tīṇi phalāni akusalasseva na honti, upariṭṭhimaṃ kusalassāpi. Purimanayena pana aññesaṃ vā yassa vā uppajjissati, tassa santāne sabbopi lokuttaravipāko sabbesaṃ kusalādīnaṃ arūpakkhandhānaṃ pakatūpanissayo hoti. Kiriyasaṅkhātopi pakatūpanissayo catubhūmakānaṃ akusalādikhandhānaṃ hotiyeva, tathā rūpasaṅkhāto. Sayaṃ pana rūpaṃ imasmiṃ paṭṭhānamahāpakaraṇe āgatanayena upanissayapaccayaṃ na labhati, suttantikapariyāyena pana labhatīti vattuṃ vaṭṭati. Evamettha paccayuppannatopi viññātabbo vinicchayoti.
ਉਪਨਿਸ੍ਸਯਪਚ੍ਚਯਨਿਦ੍ਦੇਸવਣ੍ਣਨਾ।
Upanissayapaccayaniddesavaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਪਟ੍ਠਾਨਪਾਲ਼ਿ • Paṭṭhānapāḷi / (੨) ਪਚ੍ਚਯਨਿਦ੍ਦੇਸੋ • (2) Paccayaniddeso
