| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. உபனீயஸுத்தவண்ணனா
3. Upanīyasuttavaṇṇanā
3. ததியே உபனீயதீதி பரிக்கீ²யதி நிருஜ்ஜ²தி, உபக³ச்ச²தி வா, அனுபுப்³பே³ன மரணங் உபேதீதி அத்தோ². யதா² வா கோ³பாலேன கோ³க³ணோ நீயதி, ஏவங் ஜராய மரணஸந்திகங் உபனீயதீதி அத்தோ². ஜீவிதந்தி ஜீவிதிந்த்³ரியங். அப்பந்தி பரித்தங் தோ²கங். தஸ்ஸ த்³வீஹாகாரேஹி பரித்ததா வேதி³தப்³பா³ ஸரஸபரித்ததாய ச க²ணபரித்ததாய ச. ஸரஸபரித்ததாயபி ஹி ‘‘யோ, பி⁴க்க²வே, சிரங் ஜீவதி, ஸோ வஸ்ஸஸதங் அப்பங் வா பி⁴ய்யோ’’தி (தீ³॰ நி॰ 2.7; ஸங்॰ நி॰ 2.143) வசனதோ பரித்தங். க²ணபரித்ததாயபி. பரமத்த²தோ ஹி அதிபரித்தோ ஸத்தானங் ஜீவிதக்க²ணோ ஏகசித்தப்பவத்திமத்தோயேவ . யதா² நாம ரத²சக்கங் பவத்தமானம்பி ஏகேனேவ நேமிப்பதே³ஸேன பவத்ததி, திட்ட²மானம்பி ஏகேனேவ திட்ட²தி, ஏவமேவங் ஏகசித்தக்க²ணிகங் ஸத்தானங் ஜீவிதங், தஸ்மிங் சித்தே நிருத்³த⁴மத்தே ஸத்தோ நிருத்³தோ⁴தி வுச்சதி. யதா²ஹ – அதீதே சித்தக்க²ணே ஜீவித்த² ந ஜீவதி ந ஜீவிஸ்ஸதி, அனாக³தே சித்தக்க²ணே ஜீவிஸ்ஸதி ந ஜீவதி ந ஜீவித்த², பச்சுப்பன்னே சித்தக்க²ணே ஜீவதி ந ஜீவித்த² ந ஜீவிஸ்ஸதி.
3. Tatiye upanīyatīti parikkhīyati nirujjhati, upagacchati vā, anupubbena maraṇaṃ upetīti attho. Yathā vā gopālena gogaṇo nīyati, evaṃ jarāya maraṇasantikaṃ upanīyatīti attho. Jīvitanti jīvitindriyaṃ. Appanti parittaṃ thokaṃ. Tassa dvīhākārehi parittatā veditabbā sarasaparittatāya ca khaṇaparittatāya ca. Sarasaparittatāyapi hi ‘‘yo, bhikkhave, ciraṃ jīvati, so vassasataṃ appaṃ vā bhiyyo’’ti (dī. ni. 2.7; saṃ. ni. 2.143) vacanato parittaṃ. Khaṇaparittatāyapi. Paramatthato hi atiparitto sattānaṃ jīvitakkhaṇo ekacittappavattimattoyeva . Yathā nāma rathacakkaṃ pavattamānampi ekeneva nemippadesena pavattati, tiṭṭhamānampi ekeneva tiṭṭhati, evamevaṃ ekacittakkhaṇikaṃ sattānaṃ jīvitaṃ, tasmiṃ citte niruddhamatte satto niruddhoti vuccati. Yathāha – atīte cittakkhaṇe jīvittha na jīvati na jīvissati, anāgate cittakkhaṇe jīvissati na jīvati na jīvittha, paccuppanne cittakkhaṇe jīvati na jīvittha na jīvissati.
‘‘ஜீவிதங் அத்தபா⁴வோ ச, ஸுக²து³க்கா² ச கேவலா;
‘‘Jīvitaṃ attabhāvo ca, sukhadukkhā ca kevalā;
ஏகசித்தஸமாயுத்தா, லஹுஸோ வத்ததே க²ணோ.
Ekacittasamāyuttā, lahuso vattate khaṇo.
‘‘யே நிருத்³தா⁴ மரந்தஸ்ஸ, திட்ட²மானஸ்ஸ வா இத⁴;
‘‘Ye niruddhā marantassa, tiṭṭhamānassa vā idha;
ஸப்³பே³பி ஸதி³ஸா க²ந்தா⁴, க³தா அப்படிஸந்தி⁴கா.
Sabbepi sadisā khandhā, gatā appaṭisandhikā.
‘‘அனிப்³ப³த்தேன ந ஜாதோ, பச்சுப்பன்னேன ஜீவதி;
‘‘Anibbattena na jāto, paccuppannena jīvati;
சித்தப⁴ங்கா³ மதோ லோகோ, பஞ்ஞத்தி பரமத்தி²யா’’தி. (மஹானி॰ 10);
Cittabhaṅgā mato loko, paññatti paramatthiyā’’ti. (mahāni. 10);
ஜரூபனீதஸ்ஸாதி ஜரங் உபக³தஸ்ஸ, ஜராய வா மரணஸந்திகங் உபனீதஸ்ஸ. ந ஸந்தி தாணாதி தாணங் லேணங் ஸரணங் ப⁴விதுங் ஸமத்தா² நாம கேசி நத்தி². ஏதங் ப⁴யந்தி ஏதங் ஜீவிதிந்த்³ரியஸ்ஸ மரணூபக³மனங், ஆயுபரித்ததா, ஜரூபனீதஸ்ஸ தாணாபா⁴வோதி திவித⁴ங் ப⁴யங் ப⁴யவத்து² ப⁴யகாரணந்தி அத்தோ². புஞ்ஞானி கயிராத² ஸுகா²வஹானீதி விஞ்ஞூ புரிஸோ ஸுகா²வஹானி ஸுக²தா³யகானி புஞ்ஞானி கரெய்ய. இதி தே³வதா ரூபாவசரஜ்ஜா²னங் ஸந்தா⁴ய புப்³ப³சேதனங் அபரசேதனங் முஞ்சசேதனஞ்ச க³ஹெத்வா ப³ஹுவசனவஸேன ‘‘புஞ்ஞானீ’’தி ஆஹ. ஜா²னஸ்ஸாத³ங் ஜா²னநிகந்திங் ஜா²னஸுக²ஞ்ச க³ஹெத்வா ‘‘ஸுகா²வஹானீ’’தி ஆஹ. தஸ்ஸா கிர தே³வதாய ஸயங் தீ³கா⁴யுகட்டா²னே ப்³ரஹ்மலோகே நிப்³ப³த்தத்தா ஹெட்டா² காமாவசரதே³வேஸு பரித்தாயுகட்டா²னே சவமானே உபபஜ்ஜமானே ச து²ல்லபு²ஸிதகே வுட்டி²பாதஸதி³ஸே ஸத்தே தி³ஸ்வா ஏதத³ஹோஸி ‘‘அஹோவதிமே ஸத்தா ஜா²னங் பா⁴வெத்வா அபரிஹீனஜ்ஜா²னா காலங் கத்வா ப்³ரஹ்மலோகே ஏககப்ப-த்³வேகப்ப-சதுகப்ப-அட்ட²கப்ப-ஸோளஸகப்ப-த்³வத்திங்ஸகப்ப-சதுஸட்டி²கப்பப்பமாணங் அத்³தா⁴னங் திட்டெ²ய்யு’’ந்தி. தஸ்மா ஏவமாஹ.
Jarūpanītassāti jaraṃ upagatassa, jarāya vā maraṇasantikaṃ upanītassa. Na santi tāṇāti tāṇaṃ leṇaṃ saraṇaṃ bhavituṃ samatthā nāma keci natthi. Etaṃ bhayanti etaṃ jīvitindriyassa maraṇūpagamanaṃ, āyuparittatā, jarūpanītassa tāṇābhāvoti tividhaṃ bhayaṃ bhayavatthu bhayakāraṇanti attho. Puññāni kayirātha sukhāvahānīti viññū puriso sukhāvahāni sukhadāyakāni puññāni kareyya. Iti devatā rūpāvacarajjhānaṃ sandhāya pubbacetanaṃ aparacetanaṃ muñcacetanañca gahetvā bahuvacanavasena ‘‘puññānī’’ti āha. Jhānassādaṃ jhānanikantiṃ jhānasukhañca gahetvā ‘‘sukhāvahānī’’ti āha. Tassā kira devatāya sayaṃ dīghāyukaṭṭhāne brahmaloke nibbattattā heṭṭhā kāmāvacaradevesu parittāyukaṭṭhāne cavamāne upapajjamāne ca thullaphusitake vuṭṭhipātasadise satte disvā etadahosi ‘‘ahovatime sattā jhānaṃ bhāvetvā aparihīnajjhānā kālaṃ katvā brahmaloke ekakappa-dvekappa-catukappa-aṭṭhakappa-soḷasakappa-dvattiṃsakappa-catusaṭṭhikappappamāṇaṃ addhānaṃ tiṭṭheyyu’’nti. Tasmā evamāha.
அத² ப⁴க³வா – ‘‘அயங் தே³வதா அனிய்யானிகங் வட்டகத²ங் கதே²தீ’’தி விவட்டமஸ்ஸா த³ஸ்ஸெந்தோ து³தியங் கா³த²மாஹ. தத்த² லோகாமிஸந்தி த்³வே லோகாமிஸா பரியாயேன ச நிப்பரியாயேன ச. பரியாயேன தேபூ⁴மகவட்டங் லோகாமிஸங், நிப்பரியாயேன சத்தாரோ பச்சயா. இத⁴ பரியாயலோகாமிஸங் அதி⁴ப்பேதங். நிப்பரியாயலோகாமிஸம்பி வட்டதியேவ. ஸந்திபெக்கோ²தி நிப்³பா³னஸங்கா²தங் அச்சந்தஸந்திங் பெக்க²ந்தோ இச்ச²ந்தோ பத்த²யந்தோதி.
Atha bhagavā – ‘‘ayaṃ devatā aniyyānikaṃ vaṭṭakathaṃ kathetī’’ti vivaṭṭamassā dassento dutiyaṃ gāthamāha. Tattha lokāmisanti dve lokāmisā pariyāyena ca nippariyāyena ca. Pariyāyena tebhūmakavaṭṭaṃ lokāmisaṃ, nippariyāyena cattāro paccayā. Idha pariyāyalokāmisaṃ adhippetaṃ. Nippariyāyalokāmisampi vaṭṭatiyeva. Santipekkhoti nibbānasaṅkhātaṃ accantasantiṃ pekkhanto icchanto patthayantoti.
உபனீயஸுத்தவண்ணனா நிட்டி²தா.
Upanīyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. உபனீயஸுத்தங் • 3. Upanīyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. உபனீயஸுத்தவண்ணனா • 3. Upanīyasuttavaṇṇanā
