| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
3. убанийяасуд̇д̇аван̣н̣анаа
3. Upanīyasuttavaṇṇanā
3. анзгад̇т̇ад̇д̇аа д̇хаад̇усад̣̇д̣̇аанам̣ убасаг̇г̇авасзна ад̇т̇ависзсаваажаго ход̇ийд̇и ааха ‘‘убанийяад̇ийд̇и баригкийяад̇и нируж̇жхад̇ий’’д̇и. винассад̇ийд̇и ад̇т̇о. убанийяад̇ийд̇и ваа сарасзнзва ж̇ийвид̇асса маран̣уубаг̇аманам̣ вуд̇д̇анд̇и ааха – ‘‘убаг̇ажчад̇и ваа, анубуб̣б̣зна маран̣ам̣ убзд̇ийд̇и ад̇т̇о’’д̇и. гааман̃жзд̇т̇а ‘‘убанийяад̇ий’’д̇и бад̣̇ам̣ абаагадагаммависзсам̣ вуд̇д̇ам̣. яат̇аа бана ‘‘саб̣б̣ам̣ аарог̇яам̣ б̣яаад̇хибарияосаанам̣, саб̣б̣ам̣ яоб̣б̣анам̣ ж̇араабарияосаанам̣, саб̣б̣ам̣ ж̇ийвид̇ам̣ маран̣абарияосаана’’нд̇и, ‘‘убанийяад̇и ж̇ийвид̇а’’нд̇и вуд̇д̇ад̇д̇аа ‘‘маран̣ам̣ убзд̇ий’’д̇и вуд̇д̇ам̣. гаммагад̇д̇увасзна хзд̇ам̣ вуд̇д̇ам̣.
3. Anekatthattā dhātusaddānaṃ upasaggavasena atthavisesavācako hotīti āha ‘‘upanīyatīti parikkhīyati nirujjhatī’’ti. Vinassatīti attho. Upanīyatīti vā saraseneva jīvitassa maraṇūpagamanaṃ vuttanti āha – ‘‘upagacchati vā, anupubbena maraṇaṃ upetīti attho’’ti. Kāmañcettha ‘‘upanīyatī’’ti padaṃ apākaṭakammavisesaṃ vuttaṃ. Yathā pana ‘‘sabbaṃ ārogyaṃ byādhipariyosānaṃ, sabbaṃ yobbanaṃ jarāpariyosānaṃ, sabbaṃ jīvitaṃ maraṇapariyosāna’’nti, ‘‘upanīyati jīvita’’nti vuttattā ‘‘maraṇaṃ upetī’’ti vuttaṃ. Kammakattuvasena hetaṃ vuttaṃ.
ид̣̇аани гаммасаад̇ханавасзна ад̇т̇ам̣ д̣̇ассзд̇ум̣ ‘‘яат̇аа ваа’’д̇иаад̣̇и вуд̇д̇ам̣. г̇обаалзна г̇ог̇ан̣о нийяад̇и яат̇ижчид̇ам̣ таанам̣. ж̇ийванд̇и д̇зна сад̇д̇аа, сахаж̇аад̇ад̇хаммаа ваад̇и ж̇ийвид̇ам̣, д̇ад̣̇зва д̇зсам̣ анубааланз аад̇хибажжасаб̣бхаавад̇о инд̣̇рияанд̇и ааха ‘‘ж̇ийвид̇анд̇и ж̇ийвид̇инд̣̇рияа’’нд̇и барид̇д̇анд̇и ид̇д̇арам̣. д̇знааха ‘‘т̇ога’’нд̇и. баб̣анд̇хаанубажчзд̣̇асса бажжаяабхааво ид̇ха ж̇ийвид̇асса маран̣агижжанд̇и ад̇хиббзд̇анд̇и ааха ‘‘сарасабарид̇д̇ад̇ааяа жаа’’д̇иаад̣̇и. ааяууд̇и жа барамааяу ид̇хаад̇хиббзд̇ам̣, д̇ан̃жа аж̇ж̇агаалавасзна взд̣̇ид̇аб̣б̣ам̣.
Idāni kammasādhanavasena atthaṃ dassetuṃ ‘‘yathā vā’’tiādi vuttaṃ. Gopālena gogaṇo nīyati yathicchitaṃ ṭhānaṃ. Jīvanti tena sattā, sahajātadhammā vāti jīvitaṃ, tadeva tesaṃ anupālane ādhipaccasabbhāvato indriyanti āha ‘‘jīvitanti jīvitindriya’’nti parittanti ittaraṃ. Tenāha ‘‘thoka’’nti. Pabandhānupacchedassa paccayabhāvo idha jīvitassa maraṇakiccanti adhippetanti āha ‘‘sarasaparittatāya cā’’tiādi. Āyūti ca paramāyu idhādhippetaṃ, tañca ajjakālavasena veditabbaṃ.
имасмин̃хи б̣уд̣̇д̇хуббаад̣̇з аяам̣ гат̇аад̇и ж̇ийвид̇асса ад̇иид̇д̇арабхаавад̣̇ийбанабараа аяам̣ д̣̇зсанаа. ж̇ийвид̇инд̣̇рияавасзна ж̇ийвид̇агкаяам̣ нияамзнд̇о ‘‘згажид̇д̇аббавад̇д̇имад̇д̇оязваа’’д̇и ааха, згасса жид̇д̇уббаад̣̇асса бавад̇д̇игкан̣амад̇д̇о зваад̇и ад̇т̇о. ид̣̇аани д̇амад̇т̇ам̣ убамааяа вибхаавзд̇ум̣ ‘‘яат̇аа наамаа’’д̇иаад̣̇и вуд̇д̇ам̣. д̇ад̇т̇а бавад̇д̇амаананд̇и нзмират̇ийсаа вад̇д̇анд̇ий згзнзва нзмиббад̣̇зсзна бавад̇д̇ад̇и згасмим̣ кан̣зд̇и ад̇хиббааяо. ‘‘згзнзва д̇идтад̇ий’’д̇и зд̇т̇ааби зсзва наяо. згажид̇д̇агкан̣иганд̇и згажид̇д̇агкан̣амад̇д̇аванд̇ам̣. д̇асмим̣ жид̇д̇зд̇и д̇асмим̣ яасмим̣ гисмин̃жи згасмим̣ жид̇д̇з. нируд̣̇д̇хамад̇д̇зд̇и нируд̣̇д̇хабхааваббад̇д̇амад̇д̇з. нируд̣̇д̇ход̇и вужжад̇ийд̇и мад̇од̇и вужжад̇и д̇ам̣саман̇г̇ий сад̇д̇о барамад̇т̇ад̇о. ависзсавид̣̇уно бана авин̃н̃ааяамаананд̇арзна анусанд̇хаанасса нируд̣̇д̇ханам̣ нирод̇хам̣ саллагкзнд̇и. яат̇аавуд̇д̇амад̇т̇ам̣ суд̇д̇зна вибхаавзд̇ум̣ ‘‘яат̇аахаа’’д̇иаад̣̇и вуд̇д̇ам̣. д̇зна д̇ийсуби гаалзсу сад̇д̇аанам̣ барамад̇т̇ад̇о ж̇ийванам̣ маран̣ам̣ жид̇д̇агкан̣авасзнзваад̇и д̣̇ассзд̇и.
Imasmiñhi buddhuppāde ayaṃ kathāti jīvitassa atiittarabhāvadīpanaparā ayaṃ desanā. Jīvitindriyavasena jīvitakkhayaṃ niyamento ‘‘ekacittappavattimattoyevā’’ti āha, ekassa cittuppādassa pavattikkhaṇamatto evāti attho. Idāni tamatthaṃ upamāya vibhāvetuṃ ‘‘yathā nāmā’’tiādi vuttaṃ. Tattha pavattamānanti nemirathīsā vattantī ekeneva nemippadesena pavattati ekasmiṃ khaṇeti adhippāyo. ‘‘Ekeneva tiṭṭhatī’’ti etthāpi eseva nayo. Ekacittakkhaṇikanti ekacittakkhaṇamattavantaṃ. Tasmiṃ citteti tasmiṃ yasmiṃ kismiñci ekasmiṃ citte. Niruddhamatteti niruddhabhāvappattamatte. Niruddhoti vuccatīti matoti vuccati taṃsamaṅgī satto paramatthato. Avisesaviduno pana aviññāyamānantarena anusandhānassa niruddhanaṃ nirodhaṃ sallakkhenti. Yathāvuttamatthaṃ suttena vibhāvetuṃ ‘‘yathāhā’’tiādi vuttaṃ. Tena tīsupi kālesu sattānaṃ paramatthato jīvanaṃ maraṇaṃ cittakkhaṇavasenevāti dasseti.
ж̇ийвид̇анд̇и ж̇ийвид̇инд̣̇рияам̣. ад̇д̇абхаавод̇и ж̇ийвид̇авзд̣̇анаавин̃н̃аан̣аани табзд̇ваа авасидтад̇хаммаа ад̇хиббзд̇аа. сукад̣̇угкаад̇и сукад̣̇угкаа взд̣̇анаа, убзгкааби ид̇ха сукад̣̇угкаасвзва анд̇ог̇ад̇хаа идтаанидтабхаавад̇о. гзвалаад̇и ад̇д̇анаа, нижжабхаавзна ваа авомиссаа. згажид̇д̇асамааяуд̇д̇аад̇и згагзна жид̇д̇зна сахид̇аа. лахусо вад̇д̇ад̇з кан̣од̇и вуд̇д̇анаязна згажид̇д̇агкан̣игад̇ааяа лахуго ад̇иид̇д̇аро ж̇ийвид̇аад̣̇ийнам̣ кан̣о вад̇д̇ад̇и.
Jīvitanti jīvitindriyaṃ. Attabhāvoti jīvitavedanāviññāṇāni ṭhapetvā avasiṭṭhadhammā adhippetā. Sukhadukkhāti sukhadukkhā vedanā, upekkhāpi idha sukhadukkhāsveva antogadhā iṭṭhāniṭṭhabhāvato. Kevalāti attanā, niccabhāvena vā avomissā. Ekacittasamāyuttāti ekakena cittena sahitā. Lahuso vattate khaṇoti vuttanayena ekacittakkhaṇikatāya lahuko atiittaro jīvitādīnaṃ khaṇo vattati.
яз нируд̣̇д̇хаа маранд̇ассаад̇и жаванд̇асса сад̇д̇асса жуд̇ид̇о уд̣̇д̇хам̣ нируд̣̇д̇хаад̇и вад̇д̇аб̣б̣аа яз канд̇хаа. д̇идтамаанасса ваа ид̇хаад̇и яз ваа ид̇ха бавад̇д̇ияам̣ д̇идтамаанасса д̇харанд̇асса бхан̇г̇аббад̇д̇ияаа нируд̣̇д̇хаа канд̇хаа, саб̣б̣зби сад̣̇исаа д̇з саб̣б̣зби згасад̣̇исаа г̇ад̇аа ад̇т̇ан̇г̇ад̇аа аббадисанд̇хияаа буна ааг̇анд̇ваа бадисанд̇хаанаабхаавзна виг̇ад̇аа. яат̇аа хи жуд̇иканд̇хаа на ниб̣б̣ад̇д̇анд̇и, звам̣ д̇ад̇о буб̣б̣зби канд̇хаа. д̇асмаа згажид̇д̇агкан̣игам̣ сад̇д̇аанам̣ ж̇ийвид̇анд̇и ад̇хиббааяо.
Ye niruddhā marantassāti cavantassa sattassa cutito uddhaṃ niruddhāti vattabbā ye khandhā. Tiṭṭhamānassa vā idhāti ye vā idha pavattiyaṃ tiṭṭhamānassa dharantassa bhaṅgappattiyā niruddhā khandhā, sabbepi sadisā te sabbepi ekasadisā gatā atthaṅgatā appaṭisandhiyā puna āgantvā paṭisandhānābhāvena vigatā. Yathā hi cutikhandhā na nibbattanti, evaṃ tato pubbepi khandhā. Tasmā ekacittakkhaṇikaṃ sattānaṃ jīvitanti adhippāyo.
аниб̣б̣ад̇д̇зна на ж̇аад̇од̇и ануббаннзна жид̇д̇зна ж̇аад̇о на ход̇и ‘‘анааг̇ад̇з жид̇д̇агкан̣з на ж̇ийвид̇т̇а на ж̇ийвад̇и ж̇ийвиссад̇ий’’д̇и вад̇д̇аб̣б̣ад̇о. бажжуббаннзна вад̇д̇амаанзна жид̇д̇зна ж̇ийвад̇и ж̇ийвамаано наама ход̇и, на ж̇ийвид̇т̇а на ж̇ийвиссад̇и. жид̇д̇абхан̇г̇аа мад̇о логод̇и жуд̇ижид̇д̇асса вияа саб̣б̣ассаби д̇асса д̇асса жид̇д̇асса бхан̇г̇аббад̇д̇ияаа аяам̣ лого барамад̇т̇ад̇о мад̇о наама ход̇и ‘‘ад̇ийд̇з жид̇д̇агкан̣з ж̇ийвид̇т̇а на ж̇ийвад̇и на ж̇ийвиссад̇ий’’д̇и вад̇д̇аб̣б̣ад̇о, нируд̣̇д̇хасса аббадисанд̇хигад̇д̇аа. звам̣ санд̇зби бан̃н̃ад̇д̇и барамад̇т̇ияаа, яааяам̣ д̇ам̣ д̇ам̣ бавад̇д̇ам̣ жид̇д̇ам̣ убаад̣̇ааяа ‘‘д̇иссо ж̇ийвад̇и, пуссо ж̇ийвад̇ий’’д̇и важанаббавад̇д̇ияаа висаяабхууд̇аа санд̇аанабан̃н̃ад̇д̇и, саа зд̇т̇а барамад̇т̇ияаа барамад̇т̇абхууд̇аа. д̇ат̇аа хи вуд̇д̇ам̣ ‘‘наамаг̇од̇д̇ам̣ на ж̇ийрад̇ий’’д̇и (сам̣. ни. 1.76).
Anibbattena na jātoti anuppannena cittena jāto na hoti ‘‘anāgate cittakkhaṇe na jīvittha na jīvati jīvissatī’’ti vattabbato. Paccuppannena vattamānena cittena jīvati jīvamāno nāma hoti, na jīvittha na jīvissati. Cittabhaṅgā mato lokoti cuticittassa viya sabbassapi tassa tassa cittassa bhaṅgappattiyā ayaṃ loko paramatthato mato nāma hoti ‘‘atīte cittakkhaṇe jīvittha na jīvati na jīvissatī’’ti vattabbato, niruddhassa appaṭisandhikattā. Evaṃ santepi paññatti paramatthiyā, yāyaṃ taṃ taṃ pavattaṃ cittaṃ upādāya ‘‘tisso jīvati, phusso jīvatī’’ti vacanappavattiyā visayabhūtā santānapaññatti, sā ettha paramatthiyā paramatthabhūtā. Tathā hi vuttaṃ ‘‘nāmagottaṃ na jīratī’’ti (saṃ. ni. 1.76).
на санд̇и д̇аан̣аад̇и ж̇арам̣ убаг̇ад̇асса д̇ад̇о д̇ам̣нимид̇д̇ам̣ яам̣ ваа баабагаарино баабагаммаанам̣ убадтаанавасзна бун̃н̃агаарино бияавиббаяог̇авасзна жид̇д̇ад̣̇угкам̣ убхаязсамби б̣анд̇ханажчзд̣̇анаад̣̇ивасзна вид̇уж̇ж̇амаанам̣ анаббагам̣ сарийрад̣̇угкам̣ саммохаббад̇д̇и жа ход̇и, д̇ад̇о д̇ааяанд̇аа на санд̇и. д̇знааха – ‘‘д̇аан̣ам̣ лзн̣ам̣ саран̣ам̣ бхавид̇ум̣ самад̇т̇аа наама гзжи над̇т̇ий’’д̇и. бхааяад̇и зд̇асмаад̇и бхаяам̣, бхаяанимид̇д̇анд̇и ааха ‘‘бхаяавад̇т̇уу’’д̇и. д̇аг̇г̇ахан̣зна жа жид̇д̇уд̇раасалагкан̣ам̣ бхаяам̣ г̇ахид̇амзва, сад̇и нимид̇д̇з нзмид̇д̇ам̣ санд̇амзваад̇и. буб̣б̣ажзд̇ананд̇и згааваж̇ж̇анавийт̇ияам̣ наанааваж̇ж̇анавийт̇ияам̣ самбавад̇д̇ам̣ убажаараж̇жхаанажзд̇анам̣. абаражзд̇ананд̇и васийбхааваабаад̣̇анавасзна барад̇о самаабаж̇ж̇анавасзна жа бавад̇д̇ам̣ самаабад̇д̇ижзд̇анам̣. мун̃жажзд̇ананд̇и вигкамбханавасзна бавад̇д̇ам̣ батамаббанаажзд̇анам̣. гусалаж̇жхаанасса вибаагаж̇жхаанзва лаб̣бхамаанам̣ сукам̣ жхаанасукам̣. идтабарияааяо жзд̇т̇а сука-сад̣̇д̣̇о. жхаанз абзгкаа жхаананиганд̇и. жхаанасса ассаад̣̇авасзна бавад̇д̇о лобхо жхаанассаад̣̇о. язна д̇з д̇з б̣рахмаано жхаанад̇о вудтааяа ‘‘ахо сукам̣ ахо сука’’нд̇и ваажам̣ нижчаарзсунд̇и. яат̇аа д̣̇зваа сукаб̣ахулаа д̇ихзд̇убадисанд̇хигааваад̇и бадибаж̇ж̇анд̇аа жхаанам̣ ад̇хиг̇анд̇ум̣ бхаб̣б̣аа, на ид̇арзд̇и ‘‘гаамааважарад̣̇звзсуу’’д̇и вуд̇д̇ам̣. гаамааважараа жа убарид̣̇зваа жа гаамааважарад̣̇зваад̇и згад̣̇зсасаруубзгасзсо д̣̇адтаб̣б̣о. д̇зна мануссаанамби згажжаанам̣ саб̣б̣зсамби ваа сан̇г̇ахо сид̣̇д̇хо ход̇и бад̇т̇анаабаригаббанааяа висаяабхаавад̇о. д̇знааха ‘‘ахо вад̇имз жа…бз… д̇идтзяяу’’нд̇и. т̇уллаани пусид̇аани вибпураани зд̇т̇аад̇и т̇уллапусид̇аго, гаало, д̣̇зсо ваа. д̇асмим̣ т̇уллапусид̇агз.
Nasanti tāṇāti jaraṃ upagatassa tato taṃnimittaṃ yaṃ vā pāpakārino pāpakammānaṃ upaṭṭhānavasena puññakārino piyavippayogavasena cittadukkhaṃ ubhayesampi bandhanacchedanādivasena vitujjamānaṃ anappakaṃ sarīradukkhaṃ sammohappatti ca hoti, tato tāyantā na santi. Tenāha – ‘‘tāṇaṃ leṇaṃ saraṇaṃ bhavituṃ samatthā nāma keci natthī’’ti. Bhāyati etasmāti bhayaṃ, bhayanimittanti āha ‘‘bhayavatthū’’ti. Taggahaṇena ca cittutrāsalakkhaṇaṃ bhayaṃ gahitameva, sati nimitte nemittaṃ santamevāti. Pubbacetananti ekāvajjanavīthiyaṃ nānāvajjanavīthiyaṃ sampavattaṃ upacārajjhānacetanaṃ. Aparacetananti vasībhāvāpādanavasena parato samāpajjanavasena ca pavattaṃ samāpatticetanaṃ. Muñcacetananti vikkhambhanavasena pavattaṃ paṭhamappanācetanaṃ. Kusalajjhānassa vipākajjhāneva labbhamānaṃ sukhaṃ jhānasukhaṃ. Iṭṭhapariyāyo cettha sukha-saddo. Jhāne apekkhā jhānanikanti. Jhānassa assādavasena pavatto lobho jhānassādo. Yena te te brahmāno jhānato vuṭṭhāya ‘‘aho sukhaṃ aho sukha’’nti vācaṃ nicchāresunti. Yathā devā sukhabahulā tihetupaṭisandhikāvāti paṭipajjantā jhānaṃ adhigantuṃ bhabbā, na itareti ‘‘kāmāvacaradevesū’’ti vuttaṃ. Kāmāvacarā ca uparidevā ca kāmāvacaradevāti ekadesasarūpekaseso daṭṭhabbo. Tena manussānampi ekaccānaṃ sabbesampi vā saṅgaho siddho hoti patthanāparikappanāya visayabhāvato. Tenāha ‘‘aho vatime ca…pe… tiṭṭheyyu’’nti. Thullāni phusitāni vipphurāni etthāti thullaphusitako, kālo, deso vā. Tasmiṃ thullaphusitake.
‘‘бун̃н̃аани гаяираат̇а сукаавахааний’’д̇и вуд̇д̇ад̇д̇аа ‘‘анияяаанигам̣ ваддагат̇ам̣ гат̇зд̇ий’’д̇и вуд̇д̇ам̣. луж̇ж̇анабалуж̇ж̇анадтзна лого, гилзсзхи аамасид̇аб̣б̣ад̇о аамисан̃жаад̇и логаамисам̣. ниббарияааяаамисам̣ бана логз аамисанд̇иби логаамисам̣. барияааязд̇и сабхаавад̇о баривад̇д̇зд̇ваа н̃аабзд̇и зд̇знаад̇и барияааяо, лзсо, гааран̣ам̣ ваад̇и ааха ‘‘ниббарияааязна жад̇д̇ааро бажжаяаа’’д̇и, ваддасса зганд̇ад̇о б̣аалалогзхзва аамасид̇аб̣б̣абхаавад̇о барияааяаамисад̇аа вуд̇д̇аа. ид̇ха бари..бз… ад̇хиббзд̇ам̣ виваддабадияог̇ино ижчид̇ад̇д̇аа. жад̇убажжаяаабзгкан̃хи бахаанам̣. згажжасса сагалаваддаабзгкаббахаанассаби бажжаяо ход̇ийд̇и ‘‘ваддад̇иязваа’’д̇и саасан̇гам̣ вад̣̇ад̇и. вуубасамад̇и зд̇т̇а сагалаваддад̣̇угканд̇и санд̇и, асан̇кад̇ад̇хаад̇ууд̇и ааха ‘‘ниб̣б̣аанасан̇каад̇а’’нд̇и.
‘‘Puññāni kayirātha sukhāvahānī’’ti vuttattā ‘‘aniyyānikaṃ vaṭṭakathaṃ kathetī’’ti vuttaṃ. Lujjanapalujjanaṭṭhena loko, kilesehi āmasitabbato āmisañcāti lokāmisaṃ. Nippariyāyāmisaṃ pana loke āmisantipi lokāmisaṃ. Pariyāyeti sabhāvato parivattetvā ñāpeti etenāti pariyāyo, leso, kāraṇaṃ vāti āha ‘‘nippariyāyena cattāro paccayā’’ti, vaṭṭassa ekantato bālalokeheva āmasitabbabhāvato pariyāyāmisatā vuttā. Idha pari..pe… adhippetaṃ vivaṭṭapaṭiyogino icchitattā. Catupaccayāpekkhañhi pahānaṃ. Ekaccassa sakalavaṭṭāpekkhappahānassapi paccayo hotīti ‘‘vaṭṭatiyevā’’ti sāsaṅkaṃ vadati. Vūpasamati ettha sakalavaṭṭadukkhanti santi, asaṅkhatadhātūti āha ‘‘nibbānasaṅkhāta’’nti.
убанийяасуд̇д̇аван̣н̣анаа нидтид̇аа.
Upanīyasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 3. убанийяасуд̇д̇ам̣ • 3. Upanīyasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 3. убанийяасуд̇д̇аван̣н̣анаа • 3. Upanīyasuttavaṇṇanā
