| Library / Tipiṭaka / တိပိဋက • Tipiṭaka / ဣတိဝုတ္တကပာဠိ • Itivuttakapāḷi |
၅. ဥပပရိက္ခသုတ္တံ
5. Upaparikkhasuttaṃ
၉၄. ဝုတ္တဉ္ဟေတံ ဘဂဝတာ, ဝုတ္တမရဟတာတိ မေ သုတံ –
94. Vuttañhetaṃ bhagavatā, vuttamarahatāti me sutaṃ –
‘‘တထာ တထာ, ဘိက္ခဝေ, ဘိက္ခု ဥပပရိက္ခေယ္ယ ယထာ ယထာသ္သ 1 ဥပပရိက္ခတော ဗဟိဒ္ဓာ စသ္သ ဝိညာဏံ အဝိက္ခိတ္တံ အဝိသဋံ အဇ္ဈတ္တံ အသဏ္ဌိတံ အနုပာဒာယ န ပရိတသ္သေယ္ယ။ ဗဟိဒ္ဓာ, ဘိက္ခဝေ, ဝိညာဏေ အဝိက္ခိတ္တေ အဝိသဋေ သတိ အဇ္ဈတ္တံ အသဏ္ဌိတေ အနုပာဒာယ အပရိတသ္သတော အာယတိံ ဇာတိဇရာမရဏဒုက္ခသမုဒယသမ္ဘဝော န ဟောတီ’’တိ။ ဧတမတ္ထံ ဘဂဝာ အဝောစ။ တတ္ထေတံ ဣတိ ဝုစ္စတိ –
‘‘Tathā tathā, bhikkhave, bhikkhu upaparikkheyya yathā yathāssa 2 upaparikkhato bahiddhā cassa viññāṇaṃ avikkhittaṃ avisaṭaṃ ajjhattaṃ asaṇṭhitaṃ anupādāya na paritasseyya. Bahiddhā, bhikkhave, viññāṇe avikkhitte avisaṭe sati ajjhattaṃ asaṇṭhite anupādāya aparitassato āyatiṃ jātijarāmaraṇadukkhasamudayasambhavo na hotī’’ti. Etamatthaṃ bhagavā avoca. Tatthetaṃ iti vuccati –
‘‘သတ္တသင္ဂပ္ပဟီနသ္သ၊ နေတ္တိစ္ဆိန္နသ္သ ဘိက္ခုနော။
‘‘Sattasaṅgappahīnassa, netticchinnassa bhikkhuno;
ဝိက္ခီဏော ဇာတိသံသာရော၊ နတ္ထိ တသ္သ ပုနဗ္ဘဝော’’တိ။
Vikkhīṇo jātisaṃsāro, natthi tassa punabbhavo’’ti.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ။ ပဉ္စမံ။
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ဣတိဝုတ္တက-အဋ္ဌကထာ • Itivuttaka-aṭṭhakathā / ၅. ဥပပရိက္ခသုတ္တဝဏ္ဏနာ • 5. Upaparikkhasuttavaṇṇanā
