| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
2. උපපත්‌තිකථාවණ්‌ණනා
2. Upapattikathāvaṇṇanā
388. ඉදානි උපපත්‌තිකථා නාම හොති. තත්‌ථ යෙසං ‘‘ඔපපාතිකො හොති තත්‌ථපරිනිබ්‌බායී’’තිවචනානි (පු. ප. 35-40) අයොනිසො ගහෙත්‌වා සුද්‌ධාවාසෙසු උපපත්‌තියා අරහාති ලද්‌ධි, ‘‘යෙසං වා උපහච්‌චපරිනිබ්‌බායී’’ති පදං පරිවත්‌තිත්‌වා ‘‘උපපජ්‌ජපරිනිබ්‌බායී’’ති පරියාපුණන්‌තානං සහ උපපත්‌තියා අරහා හොතීති ලද්‌ධි, සෙය්‍යථාපි එතරහි උත්‌තරාපථකානං; තෙ සන්‌ධාය පුච්‌ඡා සකවාදිස්‌ස, පටිඤ්‌ඤා ඉතරස්‌ස. තත්‌ථ යස්‌මා උපපත්‌තිචිත්‌තං නාම ලොකියං, තෙන සොතාපන්‌නාදයොපි න හොන්‌ති, පගෙව අරහා. තස්‌මාස්‌ස ඉමං නයං දස්‌සෙතුං සහ උපපත්‌තියා සොතාපන්‌නොතිආදි ආරද්‌ධං.
388. Idāni upapattikathā nāma hoti. Tattha yesaṃ ‘‘opapātiko hoti tatthaparinibbāyī’’tivacanāni (pu. pa. 35-40) ayoniso gahetvā suddhāvāsesu upapattiyā arahāti laddhi, ‘‘yesaṃ vā upahaccaparinibbāyī’’ti padaṃ parivattitvā ‘‘upapajjaparinibbāyī’’ti pariyāpuṇantānaṃ saha upapattiyā arahā hotīti laddhi, seyyathāpi etarahi uttarāpathakānaṃ; te sandhāya pucchā sakavādissa, paṭiññā itarassa. Tattha yasmā upapatticittaṃ nāma lokiyaṃ, tena sotāpannādayopi na honti, pageva arahā. Tasmāssa imaṃ nayaṃ dassetuṃ saha upapattiyā sotāpannotiādi āraddhaṃ.
389. සාරිපුත්‌තොතිආදි ඉමෙසු මහාථෙරෙසු කො එකොපි සහ උපපත්‌තියා අරහා නාමාති චොදනත්‌ථං වුත්‌තං.
389. Sāriputtotiādi imesu mahātheresu ko ekopi saha upapattiyā arahā nāmāti codanatthaṃ vuttaṃ.
390. උපපත්‌තෙසියෙනාති පටිසන්‌ධිචිත්‌තෙන. තඤ්‌හි උපපත්‌තිං එසති ගවෙසති, තස්‌මා උපපත්‌තෙසියන්‌ති වුච්‌චති. සෙසමෙත්‌ථ උත්‌තානත්‌ථමෙවාති.
390. Upapattesiyenāti paṭisandhicittena. Tañhi upapattiṃ esati gavesati, tasmā upapattesiyanti vuccati. Sesamettha uttānatthamevāti.
උපපත්‌තිකථාවණ්‌ණනා.
Upapattikathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (34) 2. උපපත්‌තිකථා • (34) 2. Upapattikathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 2. උපපත්‌තිකථාවණ්‌ණනා • 2. Upapattikathāvaṇṇanā
