| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༢. ཨུཔཔཏྟིཀཐཱཝཎྞནཱ
2. Upapattikathāvaṇṇanā
༣༨༨. ཨིདཱནི ཨུཔཔཏྟིཀཐཱ ནཱམ ཧོཏི། ཏཏྠ ཡེསཾ ‘‘ཨོཔཔཱཏིཀོ ཧོཏི ཏཏྠཔརིནིབྦཱཡཱི’’ཏིཝཙནཱནི (པུ॰ པ॰ ༣༥-༤༠) ཨཡོནིསོ གཧེཏྭཱ སུདྡྷཱཝཱསེསུ ཨུཔཔཏྟིཡཱ ཨརཧཱཏི ལདྡྷི, ‘‘ཡེསཾ ཝཱ ཨུཔཧཙྩཔརིནིབྦཱཡཱི’’ཏི པདཾ པརིཝཏྟིཏྭཱ ‘‘ཨུཔཔཛྫཔརིནིབྦཱཡཱི’’ཏི པརིཡཱཔུཎནྟཱནཾ སཧ ཨུཔཔཏྟིཡཱ ཨརཧཱ ཧོཏཱིཏི ལདྡྷི, སེཡྻཐཱཔི ཨེཏརཧི ཨུཏྟརཱཔཐཀཱནཾ; ཏེ སནྡྷཱཡ པུཙྪཱ སཀཝཱདིསྶ, པཊིཉྙཱ ཨིཏརསྶ། ཏཏྠ ཡསྨཱ ཨུཔཔཏྟིཙིཏྟཾ ནཱམ ལོཀིཡཾ, ཏེན སོཏཱཔནྣཱདཡོཔི ན ཧོནྟི, པགེཝ ཨརཧཱ། ཏསྨཱསྶ ཨིམཾ ནཡཾ དསྶེཏུཾ སཧ ཨུཔཔཏྟིཡཱ སོཏཱཔནྣོཏིཨཱདི ཨཱརདྡྷཾ།
388. Idāni upapattikathā nāma hoti. Tattha yesaṃ ‘‘opapātiko hoti tatthaparinibbāyī’’tivacanāni (pu. pa. 35-40) ayoniso gahetvā suddhāvāsesu upapattiyā arahāti laddhi, ‘‘yesaṃ vā upahaccaparinibbāyī’’ti padaṃ parivattitvā ‘‘upapajjaparinibbāyī’’ti pariyāpuṇantānaṃ saha upapattiyā arahā hotīti laddhi, seyyathāpi etarahi uttarāpathakānaṃ; te sandhāya pucchā sakavādissa, paṭiññā itarassa. Tattha yasmā upapatticittaṃ nāma lokiyaṃ, tena sotāpannādayopi na honti, pageva arahā. Tasmāssa imaṃ nayaṃ dassetuṃ saha upapattiyā sotāpannotiādi āraddhaṃ.
༣༨༩. སཱརིཔུཏྟོཏིཨཱདི ཨིམེསུ མཧཱཐེརེསུ ཀོ ཨེཀོཔི སཧ ཨུཔཔཏྟིཡཱ ཨརཧཱ ནཱམཱཏི ཙོདནཏྠཾ ཝུཏྟཾ།
389. Sāriputtotiādi imesu mahātheresu ko ekopi saha upapattiyā arahā nāmāti codanatthaṃ vuttaṃ.
༣༩༠. ཨུཔཔཏྟེསིཡེནཱཏི པཊིསནྡྷིཙིཏྟེན། ཏཉྷི ཨུཔཔཏྟིཾ ཨེསཏི གཝེསཏི, ཏསྨཱ ཨུཔཔཏྟེསིཡནྟི ཝུཙྩཏི། སེསམེཏྠ ཨུཏྟཱནཏྠམེཝཱཏི།
390. Upapattesiyenāti paṭisandhicittena. Tañhi upapattiṃ esati gavesati, tasmā upapattesiyanti vuccati. Sesamettha uttānatthamevāti.
ཨུཔཔཏྟིཀཐཱཝཎྞནཱ།
Upapattikathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༣༤) ༢. ཨུཔཔཏྟིཀཐཱ • (34) 2. Upapattikathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༢. ཨུཔཔཏྟིཀཐཱཝཎྞནཱ • 2. Upapattikathāvaṇṇanā
