| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
ဥပာသကဂုဏံ
Upāsakaguṇaṃ
ထေရော ‘‘သာဓူ’’တိ သမ္ပဋိစ္ဆိတ္ဝာ ဒသ ဥပာသကသ္သ ဥပာသကဂုဏေ ပရိဒီပေသိ။ ‘‘ဒသ ဣမေ, မဟာရာဇ, ဥပာသကသ္သ ဥပာသကဂုဏာ။ ကတမေ ဒသ , ဣဓ, မဟာရာဇ, ဥပာသကော သင္ဃေန သမာနသုခဒုက္ခော ဟောတိ, ဓမ္မာဓိပတေယ္ယော ဟောတိ, ယထာဗလံ သံဝိဘာဂရတော ဟောတိ, ဇိနသာသနပရိဟာနိံ ဒိသ္ဝာ အဘိဝဍ္ဎိယာ ဝာယမတိ။ သမ္မာဒိဋ္ဌိကော ဟောတိ, အပဂတကောတူဟလမင္ဂလိကော ဇီဝိတဟေတုပိ န အညံ သတ္ထာရံ ဥဒ္ဒိသတိ, ကာယိကဝာစသိကဉ္စသ္သ ရက္ခိတံ ဟောတိ, သမဂ္ဂာရာမော ဟောတိ သမဂ္ဂရတော, အနုသူယကော ဟောတိ, န စ ကုဟနဝသေန သာသနေ စရတိ, ဗုဒ္ဓံ သရဏံ ဂတော ဟောတိ, ဓမ္မံ သရဏံ ဂတော ဟောတိ, သင္ဃံ သရဏံ ဂတော ဟောတိ။ ဣမေ ခော, မဟာရာဇ, ဒသ ဥပာသကသ္သ ဥပာသကဂုဏာ, တေ သဗ္ဗေ ဂုဏာ တယိ သံဝိဇ္ဇန္တိ, တံ တေ ယုတ္တံ ပတ္တံ အနုစ္ဆဝိကံ ပတိရူပံ ယံ တ္ဝံ ဇိနသာသနပရိဟာနိံ ဒိသ္ဝာ အဘိဝဍ္ဎိံ ဣစ္ဆသိ, ကရောမိ တေ ဩကာသံ, ပုစ္ဆ မံ တ္ဝံ ယထာသုခ’’န္တိ။
Thero ‘‘sādhū’’ti sampaṭicchitvā dasa upāsakassa upāsakaguṇe paridīpesi. ‘‘Dasa ime, mahārāja, upāsakassa upāsakaguṇā. Katame dasa , idha, mahārāja, upāsako saṅghena samānasukhadukkho hoti, dhammādhipateyyo hoti, yathābalaṃ saṃvibhāgarato hoti, jinasāsanaparihāniṃ disvā abhivaḍḍhiyā vāyamati. Sammādiṭṭhiko hoti, apagatakotūhalamaṅgaliko jīvitahetupi na aññaṃ satthāraṃ uddisati, kāyikavācasikañcassa rakkhitaṃ hoti, samaggārāmo hoti samaggarato, anusūyako hoti, na ca kuhanavasena sāsane carati, buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti. Ime kho, mahārāja, dasa upāsakassa upāsakaguṇā, te sabbe guṇā tayi saṃvijjanti, taṃ te yuttaṃ pattaṃ anucchavikaṃ patirūpaṃ yaṃ tvaṃ jinasāsanaparihāniṃ disvā abhivaḍḍhiṃ icchasi, karomi te okāsaṃ, puccha maṃ tvaṃ yathāsukha’’nti.
မေဏ္ဍကပဉ္ဟာရမ္ဘကထာ နိဋ္ဌိတာ။
Meṇḍakapañhārambhakathā niṭṭhitā.
