| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
ਉਪਾਸਕਗੁਣਂ
Upāsakaguṇaṃ
ਥੇਰੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍વਾ ਦਸ ਉਪਾਸਕਸ੍ਸ ਉਪਾਸਕਗੁਣੇ ਪਰਿਦੀਪੇਸਿ। ‘‘ਦਸ ਇਮੇ, ਮਹਾਰਾਜ, ਉਪਾਸਕਸ੍ਸ ਉਪਾਸਕਗੁਣਾ। ਕਤਮੇ ਦਸ , ਇਧ, ਮਹਾਰਾਜ, ਉਪਾਸਕੋ ਸਙ੍ਘੇਨ ਸਮਾਨਸੁਖਦੁਕ੍ਖੋ ਹੋਤਿ, ਧਮ੍ਮਾਧਿਪਤੇਯ੍ਯੋ ਹੋਤਿ, ਯਥਾਬਲਂ ਸਂવਿਭਾਗਰਤੋ ਹੋਤਿ, ਜਿਨਸਾਸਨਪਰਿਹਾਨਿਂ ਦਿਸ੍વਾ ਅਭਿવਡ੍ਢਿਯਾ વਾਯਮਤਿ। ਸਮ੍ਮਾਦਿਟ੍ਠਿਕੋ ਹੋਤਿ, ਅਪਗਤਕੋਤੂਹਲਮਙ੍ਗਲਿਕੋ ਜੀવਿਤਹੇਤੁਪਿ ਨ ਅਞ੍ਞਂ ਸਤ੍ਥਾਰਂ ਉਦ੍ਦਿਸਤਿ, ਕਾਯਿਕવਾਚਸਿਕਞ੍ਚਸ੍ਸ ਰਕ੍ਖਿਤਂ ਹੋਤਿ, ਸਮਗ੍ਗਾਰਾਮੋ ਹੋਤਿ ਸਮਗ੍ਗਰਤੋ, ਅਨੁਸੂਯਕੋ ਹੋਤਿ, ਨ ਚ ਕੁਹਨવਸੇਨ ਸਾਸਨੇ ਚਰਤਿ, ਬੁਦ੍ਧਂ ਸਰਣਂ ਗਤੋ ਹੋਤਿ, ਧਮ੍ਮਂ ਸਰਣਂ ਗਤੋ ਹੋਤਿ, ਸਙ੍ਘਂ ਸਰਣਂ ਗਤੋ ਹੋਤਿ। ਇਮੇ ਖੋ, ਮਹਾਰਾਜ, ਦਸ ਉਪਾਸਕਸ੍ਸ ਉਪਾਸਕਗੁਣਾ, ਤੇ ਸਬ੍ਬੇ ਗੁਣਾ ਤਯਿ ਸਂવਿਜ੍ਜਨ੍ਤਿ, ਤਂ ਤੇ ਯੁਤ੍ਤਂ ਪਤ੍ਤਂ ਅਨੁਚ੍ਛવਿਕਂ ਪਤਿਰੂਪਂ ਯਂ ਤ੍વਂ ਜਿਨਸਾਸਨਪਰਿਹਾਨਿਂ ਦਿਸ੍વਾ ਅਭਿવਡ੍ਢਿਂ ਇਚ੍ਛਸਿ, ਕਰੋਮਿ ਤੇ ਓਕਾਸਂ, ਪੁਚ੍ਛ ਮਂ ਤ੍વਂ ਯਥਾਸੁਖ’’ਨ੍ਤਿ।
Thero ‘‘sādhū’’ti sampaṭicchitvā dasa upāsakassa upāsakaguṇe paridīpesi. ‘‘Dasa ime, mahārāja, upāsakassa upāsakaguṇā. Katame dasa , idha, mahārāja, upāsako saṅghena samānasukhadukkho hoti, dhammādhipateyyo hoti, yathābalaṃ saṃvibhāgarato hoti, jinasāsanaparihāniṃ disvā abhivaḍḍhiyā vāyamati. Sammādiṭṭhiko hoti, apagatakotūhalamaṅgaliko jīvitahetupi na aññaṃ satthāraṃ uddisati, kāyikavācasikañcassa rakkhitaṃ hoti, samaggārāmo hoti samaggarato, anusūyako hoti, na ca kuhanavasena sāsane carati, buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti. Ime kho, mahārāja, dasa upāsakassa upāsakaguṇā, te sabbe guṇā tayi saṃvijjanti, taṃ te yuttaṃ pattaṃ anucchavikaṃ patirūpaṃ yaṃ tvaṃ jinasāsanaparihāniṃ disvā abhivaḍḍhiṃ icchasi, karomi te okāsaṃ, puccha maṃ tvaṃ yathāsukha’’nti.
ਮੇਣ੍ਡਕਪਞ੍ਹਾਰਮ੍ਭਕਥਾ ਨਿਟ੍ਠਿਤਾ।
Meṇḍakapañhārambhakathā niṭṭhitā.
