| Library / Tipiṭaka / তিপিটক • Tipiṭaka / উদানপাল়ি • Udānapāḷi |
৫. উপাসকসুত্তং
5. Upāsakasuttaṃ
১৫. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরো ইচ্ছানঙ্গলকো উপাসকো সাৰত্থিং অনুপ্পত্তো হোতি কেনচিদেৰ করণীযেন। অথ খো সো উপাসকো সাৰত্থিযং তং করণীযং তীরেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো তং উপাসকং ভগৰা এতদৰোচ – ‘‘চিরস্সং খো ত্ৰং, উপাসক, ইমং পরিযাযমকাসি যদিদং ইধাগমনাযা’’তি।
15. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro icchānaṅgalako upāsako sāvatthiṃ anuppatto hoti kenacideva karaṇīyena. Atha kho so upāsako sāvatthiyaṃ taṃ karaṇīyaṃ tīretvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho taṃ upāsakaṃ bhagavā etadavoca – ‘‘cirassaṃ kho tvaṃ, upāsaka, imaṃ pariyāyamakāsi yadidaṃ idhāgamanāyā’’ti.
‘‘চিরপটিকাহং, ভন্তে, ভগৰন্তং দস্সনায উপসঙ্কমিতুকামো, অপি চাহং কেহিচি কেহিচি কিচ্চকরণীযেহি ব্যাৰটো। এৰাহং নাসক্খিং ভগৰন্তং দস্সনায উপসঙ্কমিতু’’ন্তি।
‘‘Cirapaṭikāhaṃ, bhante, bhagavantaṃ dassanāya upasaṅkamitukāmo, api cāhaṃ kehici kehici kiccakaraṇīyehi byāvaṭo. Evāhaṃ nāsakkhiṃ bhagavantaṃ dassanāya upasaṅkamitu’’nti.
অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘সুখং ৰত তস্স ন হোতি কিঞ্চি,
‘‘Sukhaṃ vata tassa na hoti kiñci,
সঙ্খাতধম্মস্স বহুস্সুতস্স।
Saṅkhātadhammassa bahussutassa;
সকিঞ্চনং পস্স ৰিহঞ্ঞমানং,
Sakiñcanaṃ passa vihaññamānaṃ,
জনো জনস্মিং পটিবন্ধরূপো’’তি॥ পঞ্চমং।
Jano janasmiṃ paṭibandharūpo’’ti. pañcamaṃ;
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / উদান-অট্ঠকথা • Udāna-aṭṭhakathā / ৫. উপাসকসুত্তৰণ্ণনা • 5. Upāsakasuttavaṇṇanā
