| Library / Tipiṭaka / तिपिटक • Tipiṭaka / उदानपाळि • Udānapāḷi |
५. उपासकसुत्तं
5. Upāsakasuttaṃ
१५. एवं मे सुतं – एकं समयं भगवा सावत्थियं विहरति जेतवने अनाथपिण्डिकस्स आरामे। तेन खो पन समयेन अञ्ञतरो इच्छानङ्गलको उपासको सावत्थिं अनुप्पत्तो होति केनचिदेव करणीयेन। अथ खो सो उपासको सावत्थियं तं करणीयं तीरेत्वा येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं निसीदि। एकमन्तं निसिन्नं खो तं उपासकं भगवा एतदवोच – ‘‘चिरस्सं खो त्वं, उपासक, इमं परियायमकासि यदिदं इधागमनाया’’ति।
15. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro icchānaṅgalako upāsako sāvatthiṃ anuppatto hoti kenacideva karaṇīyena. Atha kho so upāsako sāvatthiyaṃ taṃ karaṇīyaṃ tīretvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho taṃ upāsakaṃ bhagavā etadavoca – ‘‘cirassaṃ kho tvaṃ, upāsaka, imaṃ pariyāyamakāsi yadidaṃ idhāgamanāyā’’ti.
‘‘चिरपटिकाहं, भन्ते, भगवन्तं दस्सनाय उपसङ्कमितुकामो, अपि चाहं केहिचि केहिचि किच्चकरणीयेहि ब्यावटो। एवाहं नासक्खिं भगवन्तं दस्सनाय उपसङ्कमितु’’न्ति।
‘‘Cirapaṭikāhaṃ, bhante, bhagavantaṃ dassanāya upasaṅkamitukāmo, api cāhaṃ kehici kehici kiccakaraṇīyehi byāvaṭo. Evāhaṃ nāsakkhiṃ bhagavantaṃ dassanāya upasaṅkamitu’’nti.
अथ खो भगवा एतमत्थं विदित्वा तायं वेलायं इमं उदानं उदानेसि –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘सुखं वत तस्स न होति किञ्चि,
‘‘Sukhaṃ vata tassa na hoti kiñci,
सङ्खातधम्मस्स बहुस्सुतस्स।
Saṅkhātadhammassa bahussutassa;
सकिञ्चनं पस्स विहञ्ञमानं,
Sakiñcanaṃ passa vihaññamānaṃ,
जनो जनस्मिं पटिबन्धरूपो’’ति॥ पञ्चमं।
Jano janasmiṃ paṭibandharūpo’’ti. pañcamaṃ;
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / उदान-अट्ठकथा • Udāna-aṭṭhakathā / ५. उपासकसुत्तवण्णना • 5. Upāsakasuttavaṇṇanā
