| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
உபாஸகத்தபடிவேத³னாகதா²
Upāsakattapaṭivedanākathā
உபாஸகங் மங் ப⁴வங் கோ³தமோ தா⁴ரேதூதி மங் ப⁴வங் கோ³தமோ ‘‘உபாஸகோ அய’’ந்தி ஏவங் தா⁴ரேதூதி அத்தோ². உபாஸகவிதி⁴கோஸல்லத்த²ங் பனெத்த² கோ உபாஸகோ, கஸ்மா உபாஸகோதி வுச்சதி, கிமஸ்ஸ ஸீலங், கோ ஆஜீவோ, கா விபத்தி, கா ஸம்பத்தீதி இத³ங் பகிண்ணகங் வேதி³தப்³ப³ங். தங் அதிபா⁴ரியகரணதோ இத⁴ ந விப⁴த்தங், அத்தி²கேஹி பன பபஞ்சஸூத³னியங் மஜ்ஜி²மட்ட²கதா²யங் (ம॰ நி॰ அட்ட²॰ 1.56) வுத்தனயேனேவ வேதி³தப்³ப³ங். அஜ்ஜதக்³கே³தி எத்த² அயங் அக்³க³ஸத்³தோ³ ஆதி³கோடிகொட்டா²ஸஸெட்டே²ஸு தி³ஸ்ஸதி. ‘‘அஜ்ஜதக்³கே³, ஸம்ம தோ³வாரிக, ஆவராமி த்³வாரங் நிக³ண்டா²னங் நிக³ண்டீ²ன’’ந்திஆதீ³ஸு (ம॰ நி॰ 2.70) ஹி ஆதி³ம்ஹி தி³ஸ்ஸதி. ‘‘தேனேவ அங்கு³லக்³கே³ன தங் அங்கு³லக்³க³ங் பராமஸெய்ய (கதா²॰ 441), உச்ச²க்³க³ங் வேளக்³க³’’ந்திஆதீ³ஸு கோடியங். ‘‘அம்பி³லக்³க³ங் வா மது⁴ரக்³க³ங் வா தித்தகக்³க³ங் வா (ஸங்॰ நி॰ 5.374) அனுஜானாமி, பி⁴க்க²வே, விஹாரக்³கே³ன வா பரிவேணக்³கே³ன வா பா⁴ஜேது’’ந்திஆதீ³ஸு (சூளவ॰ 318) கொட்டா²ஸே. ‘‘யாவதா, பி⁴க்க²வே, ஸத்தா அபதா³ வா த்³விபதா³ வா…பே॰… ததா²க³தோ தேஸங் அக்³க³மக்கா²யதீ’’திஆதீ³ஸு (அ॰ நி॰ 4.34) ஸெட்டே². இத⁴ பனாயங் ஆதி³ம்ஹி த³ட்ட²ப்³போ³. தஸ்மா அஜ்ஜதக்³கே³தி அஜ்ஜதங் ஆதி³ங் கத்வாதி ஏவமெத்த² அத்தோ² வேதி³தப்³போ³. அஜ்ஜதந்தி அஜ்ஜபா⁴வந்தி வுத்தங் ஹோதி. அஜ்ஜத³க்³கே³ இச்சேவ வா பாடோ², த³காரோ பத³ஸந்தி⁴கரோ, அஜ்ஜ அக்³க³ங் கத்வாதி வுத்தங் ஹோதி. பாணுபேதந்தி பாணேஹி உபேதங், யாவ மே ஜீவிதங் பவத்ததி, தாவ உபேதங் அனஞ்ஞஸத்து²கங் தீஹி ஸரணக³மனேஹி ஸரணக³தங் மங் ப⁴வங் கோ³தமோ தா⁴ரேது ஜானாது, அஹஞ்ஹி ஸசேபி மே திகி²ணேன அஸினா ஸீஸங் சி²ந்தெ³ய்யுங், நேவ பு³த்³த⁴ங் ‘‘ந பு³த்³தோ⁴’’தி வா, த⁴ம்மங் ‘‘ந த⁴ம்மோ’’தி வா, ஸங்க⁴ங் ‘‘ந ஸங்கோ⁴’’தி வா வதெ³ய்யந்தி. எத்த² ச ப்³ராஹ்மணோ பாணுபேதங் ஸரணக³தந்தி புன ஸரணக³மனங் வத³ந்தோ அத்தஸன்னிய்யாதனங் பகாஸேதீதி வேதி³தப்³போ³.
Upāsakaṃmaṃ bhavaṃ gotamo dhāretūti maṃ bhavaṃ gotamo ‘‘upāsako aya’’nti evaṃ dhāretūti attho. Upāsakavidhikosallatthaṃ panettha ko upāsako, kasmā upāsakoti vuccati, kimassa sīlaṃ, ko ājīvo, kā vipatti, kā sampattīti idaṃ pakiṇṇakaṃ veditabbaṃ. Taṃ atibhāriyakaraṇato idha na vibhattaṃ, atthikehi pana papañcasūdaniyaṃ majjhimaṭṭhakathāyaṃ (ma. ni. aṭṭha. 1.56) vuttanayeneva veditabbaṃ. Ajjataggeti ettha ayaṃ aggasaddo ādikoṭikoṭṭhāsaseṭṭhesu dissati. ‘‘Ajjatagge, samma dovārika, āvarāmi dvāraṃ nigaṇṭhānaṃ nigaṇṭhīna’’ntiādīsu (ma. ni. 2.70) hi ādimhi dissati. ‘‘Teneva aṅgulaggena taṃ aṅgulaggaṃ parāmaseyya (kathā. 441), ucchaggaṃ veḷagga’’ntiādīsu koṭiyaṃ. ‘‘Ambilaggaṃ vā madhuraggaṃ vā tittakaggaṃ vā (saṃ. ni. 5.374) anujānāmi, bhikkhave, vihāraggena vā pariveṇaggena vā bhājetu’’ntiādīsu (cūḷava. 318) koṭṭhāse. ‘‘Yāvatā, bhikkhave, sattā apadā vā dvipadā vā…pe… tathāgato tesaṃ aggamakkhāyatī’’tiādīsu (a. ni. 4.34) seṭṭhe. Idha panāyaṃ ādimhi daṭṭhabbo. Tasmā ajjataggeti ajjataṃ ādiṃ katvāti evamettha attho veditabbo. Ajjatanti ajjabhāvanti vuttaṃ hoti. Ajjadagge icceva vā pāṭho, dakāro padasandhikaro, ajja aggaṃ katvāti vuttaṃ hoti. Pāṇupetanti pāṇehi upetaṃ, yāva me jīvitaṃ pavattati, tāva upetaṃ anaññasatthukaṃ tīhi saraṇagamanehi saraṇagataṃ maṃ bhavaṃ gotamo dhāretu jānātu, ahañhi sacepi me tikhiṇena asinā sīsaṃ chindeyyuṃ, neva buddhaṃ ‘‘na buddho’’ti vā, dhammaṃ ‘‘na dhammo’’ti vā, saṅghaṃ ‘‘na saṅgho’’ti vā vadeyyanti. Ettha ca brāhmaṇo pāṇupetaṃ saraṇagatanti puna saraṇagamanaṃ vadanto attasanniyyātanaṃ pakāsetīti veditabbo.
ஏவங் அத்தானங் நிய்யாதெத்வா ப⁴க³வந்தங் ஸபரிஸங் உபட்டா²துகாமோ ஆஹ – ‘‘அதி⁴வாஸேது ச மே ப⁴வங் கோ³தமோ வேரஞ்ஜாயங் வஸ்ஸாவாஸங் ஸத்³தி⁴ங் பி⁴க்கு²ஸங்கே⁴னா’’தி. கிங் வுத்தங் ஹோதி – உபாஸகஞ்ச மங் ப⁴வங் கோ³தமோ தா⁴ரேது, அதி⁴வாஸேது ச மே வேரஞ்ஜாயங் வஸ்ஸாவாஸங், தயோ மாஸே வேரஞ்ஜங் உபனிஸ்ஸாய மம அனுக்³க³ஹத்த²ங் வாஸங் ஸம்படிச்ச²தூதி. அதி⁴வாஸேஸி ப⁴க³வா துண்ஹீபா⁴வேனாதி அத²ஸ்ஸ வசனங் ஸுத்வா ப⁴க³வா காயங்க³ங் வா வாசங்க³ங் வா அசோபெத்வா அப்³ப⁴ந்தரேயேவ க²ந்திங் சாரெத்வா துண்ஹீபா⁴வேன அதி⁴வாஸேஸி; ப்³ராஹ்மணஸ்ஸ அனுக்³க³ஹத்த²ங் மனஸாவ ஸம்படிச்சீ²தி வுத்தங் ஹோதி.
Evaṃ attānaṃ niyyātetvā bhagavantaṃ saparisaṃ upaṭṭhātukāmo āha – ‘‘adhivāsetu ca me bhavaṃ gotamo verañjāyaṃ vassāvāsaṃ saddhiṃ bhikkhusaṅghenā’’ti. Kiṃ vuttaṃ hoti – upāsakañca maṃ bhavaṃ gotamo dhāretu, adhivāsetu ca me verañjāyaṃ vassāvāsaṃ, tayo māse verañjaṃ upanissāya mama anuggahatthaṃ vāsaṃ sampaṭicchatūti. Adhivāsesi bhagavā tuṇhībhāvenāti athassa vacanaṃ sutvā bhagavā kāyaṅgaṃ vā vācaṅgaṃ vā acopetvā abbhantareyeva khantiṃ cāretvā tuṇhībhāvena adhivāsesi; brāhmaṇassa anuggahatthaṃ manasāva sampaṭicchīti vuttaṃ hoti.
அத² கோ² வேரஞ்ஜோ ப்³ராஹ்மணோ ப⁴க³வதோ அதி⁴வாஸனங் விதி³த்வாதி அத² வேரஞ்ஜோ ப்³ராஹ்மணோ ஸசே மே ஸமணோ கோ³தமோ நாதி⁴வாஸெய்ய, காயேன வா வாசாய வா படிக்கி²பெய்ய. யஸ்மா பன அப்படிக்கி²பித்வா அப்³ப⁴ந்தரே க²ந்திங் தா⁴ரேஸி, தஸ்மா மே மனஸாவ அதி⁴வாஸேஸீதி ஏவங் ஆகாரஸல்லக்க²ணகுஸலதாய ப⁴க³வதோ அதி⁴வாஸனங் விதி³த்வா, அத்தனோ நிஸின்னாஸனதோ வுட்டா²ய சதூஸு தி³ஸாஸு ப⁴க³வந்தங் ஸக்கச்சங் வந்தி³த்வா திக்க²த்துங் பத³க்கி²ணங் கத்வா ஆக³தகாலதோ பபு⁴தி ஜாதிமஹல்லகப்³ராஹ்மணானங் அபி⁴வாத³னாதீ³னி ந கரோதீதி விக³ரஹித்வாபி இதா³னி விஞ்ஞாதபு³த்³த⁴கு³ணோ காயேன வாசாய மனஸா ச அனேகக்க²த்துங் வந்த³ந்தோபி அதித்தோயேவ ஹுத்வா த³ஸனக²ஸமோதா⁴னஸமுஜ்ஜலங் அஞ்ஜலிங் பக்³க³ய்ஹ ஸிரஸ்மிங் பதிட்டா²பெத்வா யாவ த³ஸ்ஸனவிஸயோ தாவ படிமுகோ²யேவ அபக்கமித்வா த³ஸ்ஸனவிஸயங் விஜஹனட்டா²னே வந்தி³த்வா பக்காமி.
Athakho verañjo brāhmaṇo bhagavato adhivāsanaṃ viditvāti atha verañjo brāhmaṇo sace me samaṇo gotamo nādhivāseyya, kāyena vā vācāya vā paṭikkhipeyya. Yasmā pana appaṭikkhipitvā abbhantare khantiṃ dhāresi, tasmā me manasāva adhivāsesīti evaṃ ākārasallakkhaṇakusalatāya bhagavato adhivāsanaṃ viditvā, attano nisinnāsanato vuṭṭhāya catūsu disāsu bhagavantaṃ sakkaccaṃ vanditvā tikkhattuṃ padakkhiṇaṃ katvā āgatakālato pabhuti jātimahallakabrāhmaṇānaṃ abhivādanādīni na karotīti vigarahitvāpi idāni viññātabuddhaguṇo kāyena vācāya manasā ca anekakkhattuṃ vandantopi atittoyeva hutvā dasanakhasamodhānasamujjalaṃ añjaliṃ paggayha sirasmiṃ patiṭṭhāpetvā yāva dassanavisayo tāva paṭimukhoyeva apakkamitvā dassanavisayaṃ vijahanaṭṭhāne vanditvā pakkāmi.
உபாஸகத்தபடிவேத³னாகதா² நிட்டி²தா.
Upāsakattapaṭivedanākathā niṭṭhitā.
