| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
উপাসকত্তপটিৰেদনাকথা
Upāsakattapaṭivedanākathā
এৰং ধারেতূতি এৰং জানাতূতি অত্থো। এত্থ কো উপাসকোতি সরূপপুচ্ছা, তস্মা কিংলক্খণো উপাসকোতি ৰুত্তং হোতি। কস্মাতি হেতুপুচ্ছা। তেন কেন পৰত্তিনিমিত্তেন উপাসকসদ্দো তস্মিং পুগ্গলে নিরুল়্হোতি দস্সেতি। তেনাহ ‘‘কস্মা উপাসকোতি ৰুচ্চতী’’তি। সদ্দস্স হি অভিধেয্যপৰত্তিনিমিত্তং তদত্থস্স তব্ভাৰকারণং। কিমস্স সীলন্তি কীদিসং অস্স উপাসকস্স সীলং, কিত্তকেন সীলেনাযং সীলসম্পন্নো নাম হোতীতি অত্থো। কো আজীৰোতি কো অস্স সম্মাআজীৰো। সো পন মিচ্ছাজীৰস্স পরিৰজ্জনেন হোতীতি সোপি ৰিভজীযতি। কা ৰিপত্তীতি কস্স সীলস্স আজীৰস্স ৰা ৰিপত্তি। অনন্তরস্স হি ৰিধি ৰা পটিসেধো ৰা। সম্পত্তীতি এত্থাপি এসেৰ নযো।
Evaṃdhāretūti evaṃ jānātūti attho. Ettha ko upāsakoti sarūpapucchā, tasmā kiṃlakkhaṇo upāsakoti vuttaṃ hoti. Kasmāti hetupucchā. Tena kena pavattinimittena upāsakasaddo tasmiṃ puggale niruḷhoti dasseti. Tenāha ‘‘kasmā upāsakoti vuccatī’’ti. Saddassa hi abhidheyyapavattinimittaṃ tadatthassa tabbhāvakāraṇaṃ. Kimassa sīlanti kīdisaṃ assa upāsakassa sīlaṃ, kittakena sīlenāyaṃ sīlasampanno nāma hotīti attho. Ko ājīvoti ko assa sammāājīvo. So pana micchājīvassa parivajjanena hotīti sopi vibhajīyati. Kā vipattīti kassa sīlassa ājīvassa vā vipatti. Anantarassa hi vidhi vā paṭisedho vā. Sampattīti etthāpi eseva nayo.
ইদং পকিণ্ণকং ৰেদিতব্বন্তি কথং ৰেদিতব্বং? ৰুচ্চতে – কো উপাসকোতি খত্তিযাদীসু যো কোচি তিসরণং গতো গহট্ঠো। সরণগমনমেৰ হেত্থ কারণং, ন জাতিআদিৰিসেসো। ৰুত্তঞ্হেতং ‘‘যতো খো, মহানাম, বুদ্ধং সরণং গতো হোতি, ধম্মং, সঙ্ঘং সরণং গতো হোতি। এত্তাৰতা খো, মহানাম, উপাসকো হোতী’’তি (সং॰ নি॰ ৫.১০৩৩)।
Idaṃ pakiṇṇakaṃ veditabbanti kathaṃ veditabbaṃ? Vuccate – ko upāsakoti khattiyādīsu yo koci tisaraṇaṃ gato gahaṭṭho. Saraṇagamanameva hettha kāraṇaṃ, na jātiādiviseso. Vuttañhetaṃ ‘‘yato kho, mahānāma, buddhaṃ saraṇaṃ gato hoti, dhammaṃ, saṅghaṃ saraṇaṃ gato hoti. Ettāvatā kho, mahānāma, upāsako hotī’’ti (saṃ. ni. 5.1033).
কস্মা উপাসকোতি রতনত্তযউপাসনতো। তেনেৰ সরণগমনেন তত্থ চ সক্কচ্চকিরিযায আদরগারৰবহুমানাদিযোগেন পযিরুপাসনতোতি ৰুত্তং হোতি। সো হি বুদ্ধং উপাসতীতি উপাসকো। ধম্মং, সঙ্ঘং উপাসতীতি উপাসকো।
Kasmā upāsakoti ratanattayaupāsanato. Teneva saraṇagamanena tattha ca sakkaccakiriyāya ādaragāravabahumānādiyogena payirupāsanatoti vuttaṃ hoti. So hi buddhaṃ upāsatīti upāsako. Dhammaṃ, saṅghaṃ upāsatīti upāsako.
কিমস্স সীলন্তি পঞ্চ ৰেরমণিযো। ৰেরমণিযোতি চেত্থ ৰেরং ৰুচ্চতি পাণাতিপাতাদীসু দুস্সীল্যং, তস্স মননতো হননতো ৰিনাসনতো ৰেরমণিযো পঞ্চ ৰিরতিযো ৰিরতিপ্পধানত্তা তস্স সীলস্স। ৰুত্তঞ্হেতং ‘‘যতো খো, মহানাম, উপাসকো পাণাতিপাতা পটিৰিরতো হোতি, অদিন্নাদানা, কামেসুমিচ্ছাচারা, মুসাৰাদা, সুরামেরযমজ্জপমাদট্ঠানা পটিৰিরতো হোতি। এত্তাৰতা খো, মহানাম, উপাসকো সীলৰা হোতী’’তি (সং॰ নি॰ ৫.১০৩৩)।
Kimassasīlanti pañca veramaṇiyo. Veramaṇiyoti cettha veraṃ vuccati pāṇātipātādīsu dussīlyaṃ, tassa mananato hananato vināsanato veramaṇiyo pañca viratiyo viratippadhānattā tassa sīlassa. Vuttañhetaṃ ‘‘yato kho, mahānāma, upāsako pāṇātipātā paṭivirato hoti, adinnādānā, kāmesumicchācārā, musāvādā, surāmerayamajjapamādaṭṭhānā paṭivirato hoti. Ettāvatā kho, mahānāma, upāsako sīlavā hotī’’ti (saṃ. ni. 5.1033).
কো আজীৰোতি পঞ্চ মিচ্ছাৰণিজ্জা পহায ধম্মেন সমেন জীৰিতকপ্পনং। ৰুত্তঞ্হেতং – ‘‘পঞ্চিমা, ভিক্খৰে, ৰণিজ্জা উপাসকেন অকরণীযা। কতমা পঞ্চ? সত্থৰণিজ্জা সত্তৰণিজ্জা মংসৰণিজ্জা মজ্জৰণিজ্জা ৰিসৰণিজ্জা। ইমা খো, ভিক্খৰে, পঞ্চ ৰণিজ্জা উপাসকেন অকরণীযা’’তি (অ॰ নি॰ ৫.১৭৭)।
Ko ājīvoti pañca micchāvaṇijjā pahāya dhammena samena jīvitakappanaṃ. Vuttañhetaṃ – ‘‘pañcimā, bhikkhave, vaṇijjā upāsakena akaraṇīyā. Katamā pañca? Satthavaṇijjā sattavaṇijjā maṃsavaṇijjā majjavaṇijjā visavaṇijjā. Imā kho, bhikkhave, pañca vaṇijjā upāsakena akaraṇīyā’’ti (a. ni. 5.177).
এত্থ চ সত্থৰণিজ্জাতি আৰুধভণ্ডং কত্ৰা ৰা কারেত্ৰা ৰা যথাকতং ৰা পটিলভিত্ৰা তস্স ৰিক্কযো। সত্তৰণিজ্জাতি মনুস্সৰিক্কযো। মংসৰণিজ্জাতি সূনকারাদযো ৰিয মিগসূকরাদিকে পোসেত্ৰা মংসং সম্পাদেত্ৰা ৰিক্কযো। মজ্জৰণিজ্জাতি যং কিঞ্চি মজ্জং যোজেত্ৰা তস্স ৰিক্কযো। ৰিসৰণিজ্জাতি ৰিসং যোজেত্ৰা সঙ্গহেত্ৰা ৰা তস্স ৰিক্কযো। তত্থ সত্থৰণিজ্জা পরোপরোধনিমিত্ততায অকরণীযা ৰুত্তা, সত্তৰণিজ্জা অভুজিস্সভাৰকরণতো, মংসৰিসৰণিজ্জা ৰধহেতুতো, মজ্জৰণিজ্জা পমাদট্ঠানতোতি ৰেদিতব্বা।
Ettha ca satthavaṇijjāti āvudhabhaṇḍaṃ katvā vā kāretvā vā yathākataṃ vā paṭilabhitvā tassa vikkayo. Sattavaṇijjāti manussavikkayo. Maṃsavaṇijjāti sūnakārādayo viya migasūkarādike posetvā maṃsaṃ sampādetvā vikkayo. Majjavaṇijjāti yaṃ kiñci majjaṃ yojetvā tassa vikkayo. Visavaṇijjāti visaṃ yojetvā saṅgahetvā vā tassa vikkayo. Tattha satthavaṇijjā paroparodhanimittatāya akaraṇīyā vuttā, sattavaṇijjā abhujissabhāvakaraṇato, maṃsavisavaṇijjā vadhahetuto, majjavaṇijjā pamādaṭṭhānatoti veditabbā.
কা ৰিপত্তীতি যা তস্সেৰ সীলস্স চ আজীৰস্স চ ৰিপত্তি ভেদো কোপো পকোপো চ, অযমস্স ৰিপত্তি। অপিচ যায এস চণ্ডালো চেৰ হোতি মলঞ্চ পটিকুট্ঠো চ, সাপিস্স ৰিপত্তীতি ৰেদিতব্বা। তে চ অত্থতো অস্সদ্ধিযাদযো পঞ্চ ধম্মা হোন্তি। যথাহ –
Kā vipattīti yā tasseva sīlassa ca ājīvassa ca vipatti bhedo kopo pakopo ca, ayamassa vipatti. Apica yāya esa caṇḍālo ceva hoti malañca paṭikuṭṭho ca, sāpissa vipattīti veditabbā. Te ca atthato assaddhiyādayo pañca dhammā honti. Yathāha –
‘‘পঞ্চহি, ভিক্খৰে, ধম্মেহি সমন্নাগতো উপাসকো উপাসকচণ্ডালো চ হোতি উপাসকমলঞ্চ উপাসকপটিকুট্ঠো চ। কতমেহি পঞ্চহি? অস্সদ্ধো হোতি, দুস্সীলো হোতি, কোতূহলমঙ্গলিকো হোতি, মঙ্গলং পচ্চেতি, নো কম্মং , ইতো চ বহিদ্ধা দক্খিণেয্যং পরিযেসতি, তত্থ চ পুব্বকারং করোতী’’তি (অ॰ নি॰ ৫.১৭৫)।
‘‘Pañcahi, bhikkhave, dhammehi samannāgato upāsako upāsakacaṇḍālo ca hoti upāsakamalañca upāsakapaṭikuṭṭho ca. Katamehi pañcahi? Assaddho hoti, dussīlo hoti, kotūhalamaṅgaliko hoti, maṅgalaṃ pacceti, no kammaṃ , ito ca bahiddhā dakkhiṇeyyaṃ pariyesati, tattha ca pubbakāraṃ karotī’’ti (a. ni. 5.175).
এত্থ চ উপাসকপটিকুট্ঠোতি উপাসকনিহীনো। বুদ্ধাদীসু কম্মকম্মফলেসু চ সদ্ধাৰিপরিযাযো অস্সদ্ধিযং মিচ্ছাধিমোক্খো, যথাৰুত্তেন অস্সদ্ধিযেন সমন্নাগতো অস্সদ্ধো। যথাৰুত্তসীলৰিপত্তিআজীৰৰিপত্তিৰসেন দুস্সীলো। ‘‘ইমিনা দিট্ঠাদিনা ইদং নাম মঙ্গলং হোতী’’তি এৰং বালজনপরিকপ্পিতকোতূহলসঙ্খাতেন দিট্ঠসুতমুতমঙ্গলেন সমন্নাগতো কোতূহলমঙ্গলিকো। মঙ্গলং পচ্চেতীতি দিট্ঠমঙ্গলাদিভেদং মঙ্গলমেৰ পত্তিযাযতি। নো কম্মন্তি কম্মস্সকতং নো পত্তিযাযতি। ইতোবহিদ্ধাতি ইতো সব্বঞ্ঞুবুদ্ধসাসনতো বহিদ্ধা বাহিরকসমযে। দক্খিণেয্যং পরিযেসতীতি দুপ্পটিপন্নং দক্খিণারহসঞ্ঞী গৰেসতি। পুব্বকারং করোতীতি দানমাননাদিকং কুসলকিরিযং পঠমতরং করোতি। এত্থ চ দক্খিণেয্যপঅযেসনপুব্বকারে একং কত্ৰা পঞ্চ ধম্মা ৰেদিতব্বা।
Ettha ca upāsakapaṭikuṭṭhoti upāsakanihīno. Buddhādīsu kammakammaphalesu ca saddhāvipariyāyo assaddhiyaṃ micchādhimokkho, yathāvuttena assaddhiyena samannāgato assaddho. Yathāvuttasīlavipattiājīvavipattivasena dussīlo. ‘‘Iminā diṭṭhādinā idaṃ nāma maṅgalaṃ hotī’’ti evaṃ bālajanaparikappitakotūhalasaṅkhātena diṭṭhasutamutamaṅgalena samannāgato kotūhalamaṅgaliko. Maṅgalaṃ paccetīti diṭṭhamaṅgalādibhedaṃ maṅgalameva pattiyāyati. No kammanti kammassakataṃ no pattiyāyati. Itobahiddhāti ito sabbaññubuddhasāsanato bahiddhā bāhirakasamaye. Dakkhiṇeyyaṃ pariyesatīti duppaṭipannaṃ dakkhiṇārahasaññī gavesati. Pubbakāraṃ karotīti dānamānanādikaṃ kusalakiriyaṃ paṭhamataraṃ karoti. Ettha ca dakkhiṇeyyapaayesanapubbakāre ekaṃ katvā pañca dhammā veditabbā.
কা সম্পত্তীতি সাৰ তস্স সীলসম্পদা চ আজীৰসম্পদা চ সম্পত্তি, যে চস্স রতনভাৰাদিকরা সদ্ধাদযো পঞ্চ ধম্মা। যথাহ –
Kāsampattīti sāva tassa sīlasampadā ca ājīvasampadā ca sampatti, ye cassa ratanabhāvādikarā saddhādayo pañca dhammā. Yathāha –
‘‘পঞ্চহি, ভিক্খৰে, ধম্মেহি সমন্নাগতো উপাসকো উপাসকরতনঞ্চ হোতি উপাসকপদুমঞ্চ উপাসকপুণ্ডরীকো চ। কতমেহি পঞ্চহি? সদ্ধো হোতি, সীলৰা হোতি, ন কোতূহলমঙ্গলিকো হোতি, কম্মং পচ্চেতি, নো মঙ্গলং, ন ইতো বহিদ্ধা দক্খিণেয্যং পরিযেসতি, ইধ চ পুব্বকারং করোতী’’তি।
‘‘Pañcahi, bhikkhave, dhammehi samannāgato upāsako upāsakaratanañca hoti upāsakapadumañca upāsakapuṇḍarīko ca. Katamehi pañcahi? Saddho hoti, sīlavā hoti, na kotūhalamaṅgaliko hoti, kammaṃ pacceti, no maṅgalaṃ, na ito bahiddhā dakkhiṇeyyaṃ pariyesati, idha ca pubbakāraṃ karotī’’ti.
এত্থ চ চতুন্নম্পি পরিসানং রতিজননট্ঠেন উপাসকোৰ রতনং উপাসকরতনং, গুণসোভাকিত্তিসদ্দসুগন্ধতাহি উপাসকোৰ পদুমং উপাসকপদুমং, তথা উপাসকপুণ্ডরীকো চ ৰেদিতব্বো। সেসমেত্থ ৰিপত্তিযং ৰুত্তৰিপরিযাযেন ৰিঞ্ঞেয্যং। এৰমিদং ‘‘কো উপাসকো’’তিআদিকং পকিণ্ণকং ৰিত্থারতো ৰেদিতব্বং। ইমস্স পন পকিণ্ণকস্স ইধ ৰিত্থারেত্ৰা অৰচনে কারণং দস্সেন্তো আহ ‘‘তং অতিভারিযকরণতো’’তিআদি।
Ettha ca catunnampi parisānaṃ ratijananaṭṭhena upāsakova ratanaṃ upāsakaratanaṃ, guṇasobhākittisaddasugandhatāhi upāsakova padumaṃ upāsakapadumaṃ, tathā upāsakapuṇḍarīko ca veditabbo. Sesamettha vipattiyaṃ vuttavipariyāyena viññeyyaṃ. Evamidaṃ ‘‘ko upāsako’’tiādikaṃ pakiṇṇakaṃ vitthārato veditabbaṃ. Imassa pana pakiṇṇakassa idha vitthāretvā avacane kāraṇaṃ dassento āha ‘‘taṃ atibhāriyakaraṇato’’tiādi.
আদিম্হীতি আদিঅত্থে। কোটিযন্তি পরিযন্তকোটিযং। ৰিহারগ্গেনাতি ওৰরককোট্ঠাসেন, ‘‘ইমস্মিং গব্ভে ৰসন্তানং ইদং পনসফলং পাপুণাতী’’তিআদিনা তংতংৰসনট্ঠানকোট্ঠাসেনাতি অত্থো। অজ্জতন্তি অজ্জ ইচ্চেৰ অত্থো। পাণেহি উপেতন্তি ইমিনা তস্স সরণগমনস্স আপাণকোটিকতং দস্সেন্তো ‘‘যাৰ মে জীৰিতং পৰত্ততী’’তিআদীনি ৰত্ৰা পুন জীৰিতেনপহং ৰত্থুত্তযং পটিপূজেন্তো সরণগমনঞ্চ রক্খামীতি উপ্পন্নং তস্স ব্রাহ্মণস্স অধিপ্পাযং ৰিভাৰেন্তো ‘‘অহঞ্হী’’তিআদিমাহ। পাণেহি উপেতন্তি হি যাৰ মে পাণা ধরন্তি, তাৰ সরণং উপেতং, উপেন্তো ন ৰাচামত্তেন ন একৰারং চিত্তুপ্পাদনমত্তেন, অথ খো পাণানং পরিচ্চজনৰসেন যাৰজীৰং উপেতন্তি এৰমেত্থ অত্থো ৰেদিতব্বো।
Ādimhīti ādiatthe. Koṭiyanti pariyantakoṭiyaṃ. Vihāraggenāti ovarakakoṭṭhāsena, ‘‘imasmiṃ gabbhe vasantānaṃ idaṃ panasaphalaṃ pāpuṇātī’’tiādinā taṃtaṃvasanaṭṭhānakoṭṭhāsenāti attho. Ajjatanti ajja icceva attho. Pāṇehi upetanti iminā tassa saraṇagamanassa āpāṇakoṭikataṃ dassento ‘‘yāva me jīvitaṃ pavattatī’’tiādīni vatvā puna jīvitenapahaṃ vatthuttayaṃ paṭipūjento saraṇagamanañca rakkhāmīti uppannaṃ tassa brāhmaṇassa adhippāyaṃ vibhāvento ‘‘ahañhī’’tiādimāha. Pāṇehi upetanti hi yāva me pāṇā dharanti, tāva saraṇaṃ upetaṃ, upento na vācāmattena na ekavāraṃ cittuppādanamattena, atha kho pāṇānaṃ pariccajanavasena yāvajīvaṃ upetanti evamettha attho veditabbo.
অধিৰাসেতূতি সাদিযতু, তং পন সাদিযনং মনসা সম্পটিগ্গহো হোতীতি আহ ‘‘সম্পটিচ্ছতূ’’তি। কাযঙ্গন্তি কাযমেৰ অঙ্গন্তি ৰদন্তি, কাযস্স ৰা অঙ্গং সীসাদি কাযঙ্গং, সীসাদি সরীরাৰযৰন্তি ৰুত্তং হোতি। ৰাচঙ্গন্তি ‘‘হোতু সাধূ’’তি এৰমাদিৰাচায অঙ্গং অৰযৰং। ৰাচঙ্গস্স চোপনং ৰাচায পৰত্তনমেৰাতি ৰেদিতব্বং। অব্ভন্তরেযেৰাতি অত্তনো চিত্তসন্তানেযেৰ। খন্তিং চারেত্ৰাতি খন্তিং পৰত্তেত্ৰা, রুচিং উপ্পাদেত্ৰাতি ৰুত্তং হোতি। ‘‘খন্তিং ধারেত্ৰা’’তিপি পাঠো, উপ্পন্নং রুচিং অব্ভন্তরেযেৰ ধারেত্ৰা ৰচীভেদেন অপকাসেত্ৰাতি ৰুত্তং হোতি।
Adhivāsetūti sādiyatu, taṃ pana sādiyanaṃ manasā sampaṭiggaho hotīti āha ‘‘sampaṭicchatū’’ti. Kāyaṅganti kāyameva aṅganti vadanti, kāyassa vā aṅgaṃ sīsādi kāyaṅgaṃ, sīsādi sarīrāvayavanti vuttaṃ hoti. Vācaṅganti ‘‘hotu sādhū’’ti evamādivācāya aṅgaṃ avayavaṃ. Vācaṅgassa copanaṃ vācāya pavattanamevāti veditabbaṃ. Abbhantareyevāti attano cittasantāneyeva. Khantiṃ cāretvāti khantiṃ pavattetvā, ruciṃ uppādetvāti vuttaṃ hoti. ‘‘Khantiṃ dhāretvā’’tipi pāṭho, uppannaṃ ruciṃ abbhantareyeva dhāretvā vacībhedena apakāsetvāti vuttaṃ hoti.
কথং পন ৰেরঞ্জো ব্রাহ্মণো ভগৰতো অধিৰাসনং অঞ্ঞাসি। ন হি তেন সক্কা ভগৰতো চিত্তপ্পৰত্তি পচ্চক্খতো ৰিঞ্ঞাতুং, তস্মা ‘‘ভগৰতো অধিৰাসনং ৰিদিত্ৰা’’তি কস্মা ৰুত্তন্তি চে? কিঞ্চাপি তেন ন সক্কা চিত্তপ্পৰত্তি পচ্চক্খতো ৰিঞ্ঞাতুং, তথাপি আকারসল্লক্খণকুসলতায অন্ৰযব্যতিরেকৰসেন অনুমানতো অঞ্ঞাসীতি দস্সেন্তো আহ ‘‘সচে মে সমণো গোতমো’’তিআদি। আকারসল্লক্খণকুসলতাযাতি চিত্তপ্পৰত্তিআকারৰিজাননে ছেকতায, অধিপ্পাযৰিজাননে কুসলতাযাতি ৰুত্তং হোতি। দসনখসমোধানসমুজ্জলন্তি দ্ৰীসু হত্থেসু দসন্নং নখানং সমোধানেন একীভাৰেন সমুজ্জলন্তং। অঞ্জলিন্তি হত্থপুটং। পটিমুখোযেৰাতি অভিমুখোযেৰ, ন ভগৰতো পিট্ঠিং দস্সেত্ৰাতি অত্থো। ৰন্দিত্ৰাতি পঞ্চপতিট্ঠিতেন ৰন্দিত্ৰা।
Kathaṃ pana verañjo brāhmaṇo bhagavato adhivāsanaṃ aññāsi. Na hi tena sakkā bhagavato cittappavatti paccakkhato viññātuṃ, tasmā ‘‘bhagavato adhivāsanaṃ viditvā’’ti kasmā vuttanti ce? Kiñcāpi tena na sakkā cittappavatti paccakkhato viññātuṃ, tathāpi ākārasallakkhaṇakusalatāya anvayabyatirekavasena anumānato aññāsīti dassento āha ‘‘sace me samaṇo gotamo’’tiādi. Ākārasallakkhaṇakusalatāyāti cittappavattiākāravijānane chekatāya, adhippāyavijānane kusalatāyāti vuttaṃ hoti. Dasanakhasamodhānasamujjalanti dvīsu hatthesu dasannaṃ nakhānaṃ samodhānena ekībhāvena samujjalantaṃ. Añjalinti hatthapuṭaṃ. Paṭimukhoyevāti abhimukhoyeva, na bhagavato piṭṭhiṃ dassetvāti attho. Vanditvāti pañcapatiṭṭhitena vanditvā.
উপাসকত্তপটিৰেদনাকথা নিট্ঠিতা।
Upāsakattapaṭivedanākathā niṭṭhitā.
