| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
63. உபஸம்பதா³விதி⁴
63. Upasampadāvidhi
125. தேன கோ² பன ஸமயேன உபஸம்பன்னா தி³ஸ்ஸந்தி குட்டி²காபி க³ண்டி³காபி கிலாஸிகாபி ஸோஸிகாபி அபமாரிகாபி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, உபஸம்பாதெ³ந்தேன தேரஸ 1 அந்தராயிகே த⁴ம்மே புச்சி²துங். ஏவஞ்ச பன, பி⁴க்க²வே, புச்சி²தப்³போ³ – ‘‘ஸந்தி தே ஏவரூபா ஆபா³தா⁴ – குட்ட²ங், க³ண்டோ³, கிலாஸோ, ஸோஸோ, அபமாரோ? மனுஸ்ஸோஸி ? புரிஸோஸி? பு⁴ஜிஸ்ஸோஸி? அணணோஸி? நஸி ராஜப⁴டோ? அனுஞ்ஞாதோஸி மாதாபிதூஹி? பரிபுண்ணவீஸதிவஸ்ஸோஸி? பரிபுண்ணங் தே பத்தசீவரங்? கிங்னாமோஸி? கோனாமோ தே உபஜ்ஜா²யோ’’தி?
125. Tena kho pana samayena upasampannā dissanti kuṭṭhikāpi gaṇḍikāpi kilāsikāpi sosikāpi apamārikāpi. Bhagavato etamatthaṃ ārocesuṃ. Anujānāmi, bhikkhave, upasampādentena terasa 2 antarāyike dhamme pucchituṃ. Evañca pana, bhikkhave, pucchitabbo – ‘‘santi te evarūpā ābādhā – kuṭṭhaṃ, gaṇḍo, kilāso, soso, apamāro? Manussosi ? Purisosi? Bhujissosi? Aṇaṇosi? Nasi rājabhaṭo? Anuññātosi mātāpitūhi? Paripuṇṇavīsativassosi? Paripuṇṇaṃ te pattacīvaraṃ? Kiṃnāmosi? Konāmo te upajjhāyo’’ti?
தேன கோ² பன ஸமயேன பி⁴க்கூ² அனநுஸிட்டே² உபஸம்பதா³பெக்கே² அந்தராயிகே த⁴ம்மே புச்ச²ந்தி. உபஸம்பதா³பெக்கா² வித்தா²யந்தி, மங்கூ ஹொந்தி, ந ஸக்கொந்தி விஸ்ஸஜ்ஜேதுங். ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, பட²மங் அனுஸாஸித்வா பச்சா² அந்தராயிகே த⁴ம்மே புச்சி²துந்தி.
Tena kho pana samayena bhikkhū ananusiṭṭhe upasampadāpekkhe antarāyike dhamme pucchanti. Upasampadāpekkhā vitthāyanti, maṅkū honti, na sakkonti vissajjetuṃ. Bhagavato etamatthaṃ ārocesuṃ. Anujānāmi, bhikkhave, paṭhamaṃ anusāsitvā pacchā antarāyike dhamme pucchitunti.
தத்தே²வ ஸங்க⁴மஜ்ஜே² அனுஸாஸந்தி. உபஸம்பதா³பெக்கா² ததே²வ வித்தா²யந்தி, மங்கூ ஹொந்தி, ந ஸக்கொந்தி விஸ்ஸஜ்ஜேதுங். ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஏகமந்தங் அனுஸாஸித்வா ஸங்க⁴மஜ்ஜே² அந்தராயிகே த⁴ம்மே புச்சி²துங். ஏவஞ்ச பன, பி⁴க்க²வே, அனுஸாஸிதப்³போ³ –
Tattheva saṅghamajjhe anusāsanti. Upasampadāpekkhā tatheva vitthāyanti, maṅkū honti, na sakkonti vissajjetuṃ. Bhagavato etamatthaṃ ārocesuṃ. Anujānāmi, bhikkhave, ekamantaṃ anusāsitvā saṅghamajjhe antarāyike dhamme pucchituṃ. Evañca pana, bhikkhave, anusāsitabbo –
126. பட²மங் உபஜ்ஜ²ங் கா³ஹாபேதப்³போ³. உபஜ்ஜ²ங் கா³ஹாபெத்வா பத்தசீவரங் ஆசிக்கி²தப்³ப³ங் – அயங் தே பத்தோ, அயங் ஸங்கா⁴டி, அயங் உத்தராஸங்கோ³, அயங் அந்தரவாஸகோ. க³ச்ச², அமும்ஹி ஓகாஸே திட்டா²ஹீதி.
126. Paṭhamaṃ upajjhaṃ gāhāpetabbo. Upajjhaṃ gāhāpetvā pattacīvaraṃ ācikkhitabbaṃ – ayaṃ te patto, ayaṃ saṅghāṭi, ayaṃ uttarāsaṅgo, ayaṃ antaravāsako. Gaccha, amumhi okāse tiṭṭhāhīti.
பா³லா அப்³யத்தா அனுஸாஸந்தி. து³ரனுஸிட்டா² உபஸம்பதா³பெக்கா² வித்தா²யந்தி, மங்கூ ஹொந்தி, ந ஸக்கொந்தி விஸ்ஸஜ்ஜேதுங். ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, பா³லேன அப்³யத்தேன அனுஸாஸிதப்³போ³. யோ அனுஸாஸெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன அனுஸாஸிதுந்தி.
Bālā abyattā anusāsanti. Duranusiṭṭhā upasampadāpekkhā vitthāyanti, maṅkū honti, na sakkonti vissajjetuṃ. Bhagavato etamatthaṃ ārocesuṃ. Na, bhikkhave, bālena abyattena anusāsitabbo. Yo anusāseyya, āpatti dukkaṭassa. Anujānāmi, bhikkhave, byattena bhikkhunā paṭibalena anusāsitunti.
கத²ஞ்ச அத்தனாவ அத்தானங் ஸம்மன்னிதப்³ப³ங்? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ – ‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ². யதி³ ஸங்க⁴ஸ்ஸ பத்தகல்லங், அஹங் இத்த²ன்னாமங் அனுஸாஸெய்ய’’ந்தி. ஏவங் அத்தனாவ அத்தானங் ஸம்மன்னிதப்³ப³ங்.
Kathañca attanāva attānaṃ sammannitabbaṃ? Byattena bhikkhunā paṭibalena saṅgho ñāpetabbo – ‘‘suṇātu me, bhante, saṅgho. Itthannāmo itthannāmassa āyasmato upasampadāpekkho. Yadi saṅghassa pattakallaṃ, ahaṃ itthannāmaṃ anusāseyya’’nti. Evaṃ attanāva attānaṃ sammannitabbaṃ.
கத²ஞ்ச பன பரேன பரோ ஸம்மன்னிதப்³போ³? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ – ‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ². யதி³ ஸங்க⁴ஸ்ஸ பத்தகல்லங், இத்த²ன்னாமோ இத்த²ன்னாமங் அனுஸாஸெய்யா’’தி . ஏவங் பரேன பரோ ஸம்மன்னிதப்³போ³.
Kathañca pana parena paro sammannitabbo? Byattena bhikkhunā paṭibalena saṅgho ñāpetabbo – ‘‘suṇātu me, bhante, saṅgho. Itthannāmo itthannāmassa āyasmato upasampadāpekkho. Yadi saṅghassa pattakallaṃ, itthannāmo itthannāmaṃ anusāseyyā’’ti . Evaṃ parena paro sammannitabbo.
தேன ஸம்மதேன பி⁴க்கு²னா உபஸம்பதா³பெக்கோ² உபஸங்கமித்வா ஏவமஸ்ஸ வசனீயோ – ‘‘ஸுணஸி, இத்த²ன்னாம, அயங் தே ஸச்சகாலோ பூ⁴தகாலோ. யங் ஜாதங் தங் ஸங்க⁴மஜ்ஜே² புச்ச²ந்தே ஸந்தங் அத்தீ²தி வத்தப்³ப³ங், அஸந்தங் நத்தீ²’’தி வத்தப்³ப³ங். மா கோ² வித்தா²யி, மா கோ² மங்கு அஹோஸி. ஏவங் தங் புச்சி²ஸ்ஸந்தி – ‘‘ஸந்தி தே ஏவரூபா ஆபா³தா⁴ – குட்ட²ங், க³ண்டோ³, கிலாஸோ, ஸோஸோ, அபமாரோ? மனுஸ்ஸோஸி? புரிஸோஸி? பு⁴ஜிஸ்ஸோஸி? அணணோஸி? நஸி ராஜப⁴டோ? அனுஞ்ஞாதோஸி மாதாபிதூஹி? பரிபுண்ணவீஸதிவஸ்ஸோஸி? பரிபுண்ணங் தே பத்தசீவரங்? கிங்னாமோஸி? கோனாமோ தே உபஜ்ஜா²யோ’’தி?
Tena sammatena bhikkhunā upasampadāpekkho upasaṅkamitvā evamassa vacanīyo – ‘‘suṇasi, itthannāma, ayaṃ te saccakālo bhūtakālo. Yaṃ jātaṃ taṃ saṅghamajjhe pucchante santaṃ atthīti vattabbaṃ, asantaṃ natthī’’ti vattabbaṃ. Mā kho vitthāyi, mā kho maṅku ahosi. Evaṃ taṃ pucchissanti – ‘‘santi te evarūpā ābādhā – kuṭṭhaṃ, gaṇḍo, kilāso, soso, apamāro? Manussosi? Purisosi? Bhujissosi? Aṇaṇosi? Nasi rājabhaṭo? Anuññātosi mātāpitūhi? Paripuṇṇavīsativassosi? Paripuṇṇaṃ te pattacīvaraṃ? Kiṃnāmosi? Konāmo te upajjhāyo’’ti?
ஏகதோ ஆக³ச்ச²ந்தி. ந, பி⁴க்க²வே, ஏகதோ ஆக³ந்தப்³ப³ங். அனுஸாஸகேன பட²மதரங் ஆக³ந்த்வா ஸங்கோ⁴ ஞாபேதப்³போ³ – ‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ² . அனுஸிட்டோ² ஸோ மயா. யதி³ ஸங்க⁴ஸ்ஸ பத்தகல்லங், இத்த²ன்னாமோ ஆக³ச்செ²ய்யா’’தி. ஆக³ச்சா²ஹீதி வத்தப்³போ³.
Ekato āgacchanti. Na, bhikkhave, ekato āgantabbaṃ. Anusāsakena paṭhamataraṃ āgantvā saṅgho ñāpetabbo – ‘‘suṇātu me, bhante, saṅgho. Itthannāmo itthannāmassa āyasmato upasampadāpekkho . Anusiṭṭho so mayā. Yadi saṅghassa pattakallaṃ, itthannāmo āgaccheyyā’’ti. Āgacchāhīti vattabbo.
ஏகங்ஸங் உத்தராஸங்க³ங் காராபெத்வா பி⁴க்கூ²னங் பாதே³ வந்தா³பெத்வா உக்குடிகங் நிஸீதா³பெத்வா அஞ்ஜலிங் பக்³க³ண்ஹாபெத்வா உபஸம்பத³ங் யாசாபேதப்³போ³ – ‘‘ஸங்க⁴ங், ப⁴ந்தே, உபஸம்பத³ங் யாசாமி. உல்லும்பது மங், ப⁴ந்தே, ஸங்கோ⁴ அனுகம்பங் உபாதா³ய. து³தியம்பி, ப⁴ந்தே, ஸங்க⁴ங் உபஸம்பத³ங் யாசாமி. உல்லும்பது மங், ப⁴ந்தே, ஸங்கோ⁴ அனுகம்பங் உபாதா³ய. ததியம்பி, ப⁴ந்தே, ஸங்க⁴ங் உபஸம்பத³ங் யாசாமி. உல்லும்பது மங் , ப⁴ந்தே, ஸங்கோ⁴ அனுகம்பங் உபாதா³யா’’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Ekaṃsaṃ uttarāsaṅgaṃ kārāpetvā bhikkhūnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā upasampadaṃ yācāpetabbo – ‘‘saṅghaṃ, bhante, upasampadaṃ yācāmi. Ullumpatu maṃ, bhante, saṅgho anukampaṃ upādāya. Dutiyampi, bhante, saṅghaṃ upasampadaṃ yācāmi. Ullumpatu maṃ, bhante, saṅgho anukampaṃ upādāya. Tatiyampi, bhante, saṅghaṃ upasampadaṃ yācāmi. Ullumpatu maṃ , bhante, saṅgho anukampaṃ upādāyā’’ti. Byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ². யதி³ ஸங்க⁴ஸ்ஸ பத்தகல்லங், அஹங் இத்த²ன்னாமங் அந்தராயிகே த⁴ம்மே புச்செ²ய்ய’’ந்தி? ஸுணஸி, இத்த²ன்னாம, அயங் தே ஸச்சகாலோ பூ⁴தகாலோ. யங் ஜாதங் தங் புச்சா²மி. ஸந்தங் அத்தீ²தி வத்தப்³ப³ங், அஸந்தங் நத்தீ²தி வத்தப்³ப³ங். ஸந்தி தே ஏவரூபா ஆபா³தா⁴ – குட்ட²ங் க³ண்டோ³ கிலேஸோ ஸோஸோ அபமாரோ, மனுஸ்ஸோஸி, புரிஸோஸி, பு⁴ஜிஸ்ஸோஸி, அணணோஸி, நஸி ராஜப⁴டோ, அனுஞ்ஞாதோஸி மாதாபிதூஹி, பரிபுண்ணவீஸதிவஸ்ஸோஸி, பரிபுண்ணங் தே பத்தசீவரங், கிங்னாமோஸி, கோனாமோ தே உபஜ்ஜா²யோதி? ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘Suṇātu me, bhante, saṅgho. Ayaṃ itthannāmo itthannāmassa āyasmato upasampadāpekkho. Yadi saṅghassa pattakallaṃ, ahaṃ itthannāmaṃ antarāyike dhamme puccheyya’’nti? Suṇasi, itthannāma, ayaṃ te saccakālo bhūtakālo. Yaṃ jātaṃ taṃ pucchāmi. Santaṃ atthīti vattabbaṃ, asantaṃ natthīti vattabbaṃ. Santi te evarūpā ābādhā – kuṭṭhaṃ gaṇḍo kileso soso apamāro, manussosi, purisosi, bhujissosi, aṇaṇosi, nasi rājabhaṭo, anuññātosi mātāpitūhi, paripuṇṇavīsativassosi, paripuṇṇaṃ te pattacīvaraṃ, kiṃnāmosi, konāmo te upajjhāyoti? Byattena bhikkhunā paṭibalena saṅgho ñāpetabbo –
127. ‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ பத்தசீவரங். இத்த²ன்னாமோ ஸங்க⁴ங் உபஸம்பத³ங் யாசதி இத்த²ன்னாமேன உபஜ்ஜா²யேன. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் உபஸம்பாதெ³ய்ய இத்த²ன்னாமேன உபஜ்ஜா²யேன. ஏஸா ஞத்தி.
127. ‘‘Suṇātu me, bhante, saṅgho. Ayaṃ itthannāmo itthannāmassa āyasmato upasampadāpekkho, parisuddho antarāyikehi dhammehi, paripuṇṇassa pattacīvaraṃ. Itthannāmo saṅghaṃ upasampadaṃ yācati itthannāmena upajjhāyena. Yadi saṅghassa pattakallaṃ, saṅgho itthannāmaṃ upasampādeyya itthannāmena upajjhāyena. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ பத்தசீவரங். இத்த²ன்னாமோ ஸங்க⁴ங் உபஸம்பத³ங் யாசதி இத்த²ன்னாமேன உபஜ்ஜா²யேன. ஸங்கோ⁴ இத்த²ன்னாமங் உபஸம்பாதே³தி இத்த²ன்னாமேன உபஜ்ஜா²யேன . யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ itthannāmo itthannāmassa āyasmato upasampadāpekkho, parisuddho antarāyikehi dhammehi, paripuṇṇassa pattacīvaraṃ. Itthannāmo saṅghaṃ upasampadaṃ yācati itthannāmena upajjhāyena. Saṅgho itthannāmaṃ upasampādeti itthannāmena upajjhāyena . Yassāyasmato khamati itthannāmassa upasampadā itthannāmena upajjhāyena, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ பத்தசீவரங். இத்த²ன்னாமோ ஸங்க⁴ங் உபஸம்பத³ங் யாசதி இத்த²ன்னாமேன உபஜ்ஜா²யேன. ஸங்கோ⁴ இத்த²ன்னாமங் உபஸம்பாதே³தி இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Dutiyampi etamatthaṃ vadāmi – suṇātu me, bhante, saṅgho. Ayaṃ itthannāmo itthannāmassa āyasmato upasampadāpekkho, parisuddho antarāyikehi dhammehi, paripuṇṇassa pattacīvaraṃ. Itthannāmo saṅghaṃ upasampadaṃ yācati itthannāmena upajjhāyena. Saṅgho itthannāmaṃ upasampādeti itthannāmena upajjhāyena. Yassāyasmato khamati itthannāmassa upasampadā itthannāmena upajjhāyena, so tuṇhassa; yassa nakkhamati, so bhāseyya.
‘‘ததியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ², பரிஸுத்³தோ⁴ அந்தராயிகேஹி த⁴ம்மேஹி, பரிபுண்ணஸ்ஸ பத்தசீவரங். இத்த²ன்னாமோ ஸங்க⁴ங் உபஸம்பத³ங் யாசதி இத்த²ன்னாமேன உபஜ்ஜா²யேன. ஸங்கோ⁴ இத்த²ன்னாமங் உபஸம்பாதே³தி இத்த²ன்னாமேன உபஜ்ஜா²யேன. யஸ்ஸாயஸ்மதோ க²மதி இத்த²ன்னாமஸ்ஸ உபஸம்பதா³ இத்த²ன்னாமேன உபஜ்ஜா²யேன, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Tatiyampi etamatthaṃ vadāmi – suṇātu me, bhante, saṅgho. Ayaṃ itthannāmo itthannāmassa āyasmato upasampadāpekkho, parisuddho antarāyikehi dhammehi, paripuṇṇassa pattacīvaraṃ. Itthannāmo saṅghaṃ upasampadaṃ yācati itthannāmena upajjhāyena. Saṅgho itthannāmaṃ upasampādeti itthannāmena upajjhāyena. Yassāyasmato khamati itthannāmassa upasampadā itthannāmena upajjhāyena, so tuṇhassa; yassa nakkhamati, so bhāseyya.
‘‘உபஸம்பன்னோ ஸங்கே⁴ன இத்த²ன்னாமோ இத்த²ன்னாமேன உபஜ்ஜா²யேன. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Upasampanno saṅghena itthannāmo itthannāmena upajjhāyena. Khamati saṅghassa, tasmā tuṇhī, evametaṃ dhārayāmī’’ti.
உபஸம்பதா³கம்மங் நிட்டி²தங்.
Upasampadākammaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / உபஸம்பதா³விதி⁴கதா² • Upasampadāvidhikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபஸம்பதா³விதி⁴கதா²வண்ணனா • Upasampadāvidhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உபஸம்பதா³விதி⁴கதா²வண்ணனா • Upasampadāvidhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபஸம்பதா³விதி⁴கதா²வண்ணனா • Upasampadāvidhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 63. உபஸம்பதா³விதி⁴கதா² • 63. Upasampadāvidhikathā
