| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
உபஸம்பதா³விதி⁴கதா²வண்ணனா
Upasampadāvidhikathāvaṇṇanā
126. உபஜ்ஜா²தி உபஜ்ஜா²ய-ஸத்³த³ஸமானத்தோ² ஆகாரந்தோ உபஜ்ஜா²ஸத்³தோ³தி த³ஸ்ஸேதி. உபஜ்ஜா²ய-ஸத்³தோ³ ஏவ வா உபஜ்ஜா² உபயோக³பச்சத்தவசனேஸு ய-காரலோபங் கத்வா ஏவங் வுத்தோ கரணவசனாதீ³ஸு உபஜ்ஜா²-ஸத்³த³ஸ்ஸ பயோகா³பா⁴வாதி த³ட்ட²ப்³ப³ங். பாளியங் அத்தனாவ அத்தானங் ஸம்மன்னிதப்³ப³ந்தி அத்தனாவ கத்துபூ⁴தேன கரணபூ⁴தேன அத்தானமேவ கம்மபூ⁴தங் பதி ஸம்மனநகிச்சங் காதப்³ப³ங். அத்தானந்தி வா பச்சத்தே உபயோக³வசனங், அத்தனாவ அத்தா ஸம்மன்னிதப்³போ³தி அத்தோ². ந கேவலஞ்ச எத்தே²வ, அஞ்ஞத்ராபி தேரஸஸம்முதிஆதீ³ஸு இமினாவ லக்க²ணேன அத்தனாவ அத்தா ஸம்மன்னிதப்³போ³வ. அபிச ஸயங் கம்மாரஹத்தா அத்தானங் முஞ்சித்வா சதுவக்³கா³தி³கோ க³ணோ ஸப்³ப³த்த² இச்சி²தப்³போ³.
126.Upajjhāti upajjhāya-saddasamānattho ākāranto upajjhāsaddoti dasseti. Upajjhāya-saddo eva vā upajjhā upayogapaccattavacanesu ya-kāralopaṃ katvā evaṃ vutto karaṇavacanādīsu upajjhā-saddassa payogābhāvāti daṭṭhabbaṃ. Pāḷiyaṃ attanāva attānaṃ sammannitabbanti attanāva kattubhūtena karaṇabhūtena attānameva kammabhūtaṃ pati sammananakiccaṃ kātabbaṃ. Attānanti vā paccatte upayogavacanaṃ, attanāva attā sammannitabboti attho. Na kevalañca ettheva, aññatrāpi terasasammutiādīsu imināva lakkhaṇena attanāva attā sammannitabbova. Apica sayaṃ kammārahattā attānaṃ muñcitvā catuvaggādiko gaṇo sabbattha icchitabbo.
ஸச்சகாலோதி ‘‘நிகூ³ஹிஸ்ஸாமீ’’தி வஞ்சனங் பஹாய ஸச்சஸ்ஸேவ தே இச்சி²தப்³ப³காலோ. பூ⁴தகாலோதி வஞ்சனாய அபா⁴வேபி மனுஸ்ஸத்தாதி³வத்து²னோ பூ⁴ததாய அவஸ்ஸங் இச்சி²தப்³ப³காலோ, இதரதா² கம்மகோபாதி³அந்தராயோ ஹோதீதி அதி⁴ப்பாயோ. மங்கூதி அதோ⁴முகோ². உத்³த⁴ரதூதி அனுபஸம்பன்னபா⁴வதோ உபஸம்பத்தியங் பதிட்ட²பேதூதி அத்தோ².
Saccakāloti ‘‘nigūhissāmī’’ti vañcanaṃ pahāya saccasseva te icchitabbakālo. Bhūtakāloti vañcanāya abhāvepi manussattādivatthuno bhūtatāya avassaṃ icchitabbakālo, itarathā kammakopādiantarāyo hotīti adhippāyo. Maṅkūti adhomukho. Uddharatūti anupasampannabhāvato upasampattiyaṃ patiṭṭhapetūti attho.
ஸப்³ப³கம்மவாசாஸு அத்த²கோஸல்லத்த²ங் பனெத்த² உபஸம்பதா³கம்மவாசாய ஏவமத்தோ² த³ட்ட²ப்³போ³ – ஸுணாதூதி ஸவனாணத்தியங் பட²மபுரிஸேகவசனங். தஞ்ச கிஞ்சாபி யோ ஸங்கோ⁴ ஸவனகிரியாய நியோஜீயதி, தஸ்ஸ ஸம்முக²த்தா ‘‘ஸுணாஹீ’’தி மஜ்ஜி²மபுரிஸேகவசனேன வத்தப்³ப³ங், ததா²பி யஸ்மா ஸங்க⁴-ஸத்³த³ஸன்னிதா⁴னே பட²மபுரிஸபயோகோ³வ ஸத்³த³விதூ⁴ஹி ஸமாசிண்ணோ ப⁴க³வந்தஆயஸ்மந்தாதி³ஸத்³த³ஸன்னிதா⁴னேஸு விய ‘‘அதி⁴வாஸேது மே ப⁴வங் கோ³தமோ (பாரா॰ 22). ஏதஸ்ஸ ஸுக³த காலோ, யங் ப⁴க³வா ஸாவகானங் ஸிக்கா²பத³ங் பஞ்ஞபெய்ய (பாரா॰ 21). பக்கமதாயஸ்மா (பாரா॰ 436). ஸுணந்து மே ஆயஸ்மந்தோ’’திஆதீ³ஸு விய. தஸ்மா இத⁴ பட²மபுரிஸபயோகோ³ கதோ. அத² வா கா³ரவவஸேனேவேதங் வுத்தங். க³ருட்டா²னீயேஸு ஹி கா³ரவவஸேன மஜ்ஜி²மபுரிஸபயோகு³ப்பத்தியம்பி பட²மபுரிஸபயோக³ங் பயுஜ்ஜந்தி ‘‘தே³ஸேது ஸுக³தோ த⁴ம்ம’’ந்திஆதீ³ஸு (தீ³॰ நி॰ 2.66; ம॰ நி॰ 2.338; ஸங்॰ நி॰ 1.172; மஹாவ॰ 8) வியாதி த³ட்ட²ப்³ப³ங். கேசி பன ‘‘ப⁴ந்தே, ஆவுஸோதி ஸத்³தே³ அபெக்கி²த்வா இத⁴ பட²மபுரிஸபயோகோ³’’தி வத³ந்தி, தங் ந யுத்தங் ‘‘ஆசரியோ மே ப⁴ந்தே ஹோஹி, (மஹாவ॰ 77) இங்கா⁴வுஸோ உபாலி, இமங் பப்³ப³ஜிதங் அனுயுஞ்ஜாஹீ’’திஆதீ³ஸு (பாரா॰ 517) தப்பயோகே³பி மஜ்ஜி²மபுரிஸபயோக³ஸ்ஸேவ த³ஸ்ஸனதோ.
Sabbakammavācāsu atthakosallatthaṃ panettha upasampadākammavācāya evamattho daṭṭhabbo – suṇātūti savanāṇattiyaṃ paṭhamapurisekavacanaṃ. Tañca kiñcāpi yo saṅgho savanakiriyāya niyojīyati, tassa sammukhattā ‘‘suṇāhī’’ti majjhimapurisekavacanena vattabbaṃ, tathāpi yasmā saṅgha-saddasannidhāne paṭhamapurisapayogova saddavidhūhi samāciṇṇo bhagavantaāyasmantādisaddasannidhānesu viya ‘‘adhivāsetu me bhavaṃ gotamo (pārā. 22). Etassa sugata kālo, yaṃ bhagavā sāvakānaṃ sikkhāpadaṃ paññapeyya (pārā. 21). Pakkamatāyasmā (pārā. 436). Suṇantu me āyasmanto’’tiādīsu viya. Tasmā idha paṭhamapurisapayogo kato. Atha vā gāravavasenevetaṃ vuttaṃ. Garuṭṭhānīyesu hi gāravavasena majjhimapurisapayoguppattiyampi paṭhamapurisapayogaṃ payujjanti ‘‘desetu sugato dhamma’’ntiādīsu (dī. ni. 2.66; ma. ni. 2.338; saṃ. ni. 1.172; mahāva. 8) viyāti daṭṭhabbaṃ. Keci pana ‘‘bhante, āvusoti sadde apekkhitvā idha paṭhamapurisapayogo’’ti vadanti, taṃ na yuttaṃ ‘‘ācariyo me bhante hohi, (mahāva. 77) iṅghāvuso upāli, imaṃ pabbajitaṃ anuyuñjāhī’’tiādīsu (pārā. 517) tappayogepi majjhimapurisapayogasseva dassanato.
மேதி யோ ஸாவேதி, தஸ்ஸ அத்தனித்³தே³ஸே ஸாமிவசனங். ப⁴ந்தேதி ஆலபனத்தே² வுட்³டே⁴ஸு ஸகா³ரவவசனங். ‘‘ஆவுஸோ’’தி பத³ங் பன நவகேஸு. தது³ப⁴யம்பி நிபாதோ ‘‘தும்ஹே ப⁴ந்தே, தும்ஹே ஆவுஸோ’’தி ப³ஹூஸுபி ஸமானரூபத்தா. ஸங்கோ⁴தி அவிஸேஸதோ சதுவக்³கா³தி³கே பகதத்தபுக்³க³லஸமூஹே வத்ததி. இத⁴ பன பச்சந்திமேஸு ஜனபதே³ஸு பஞ்சவக்³க³தோ பட்டா²ய, மஜ்ஜி²மேஸு ஜனபதே³ஸு த³ஸவக்³க³தோ பட்டா²ய ஸங்கோ⁴தி க³ஹேதப்³போ³. தத்ராயங் பிண்ட³த்தோ² – ப⁴ந்தே, ஸங்கோ⁴ மம வசனங் ஸுணாதூதி. இத³ஞ்ச நவகதரேன வத்தப்³ப³வசனங். ஸசே பன அனுஸ்ஸாவகோ ஸப்³பே³ஹி பி⁴க்கூ²ஹி வுட்³ட⁴தரோ ஹோதி, ‘‘ஸுணாது மே, ஆவுஸோ, ஸங்கோ⁴’’தி வத்தப்³ப³ங். ஸோபி சே ‘‘ப⁴ந்தே’’தி வதெ³ய்ய, நவகதரோ வா ‘‘ஆவுஸோ’’தி, கம்மகோபோ நத்தி². கேசி பன ‘‘ஏகத்த² ‘ஆவுஸோ’தி வத்வா அஞ்ஞத்த² ‘ப⁴ந்தே’தி வுத்தேபி நத்தி² தோ³ஸோ உப⁴யேனாபி ஆலபனஸ்ஸ ஸிஜ்ஜ²னதோ’’தி வத³ந்தி.
Meti yo sāveti, tassa attaniddese sāmivacanaṃ. Bhanteti ālapanatthe vuḍḍhesu sagāravavacanaṃ. ‘‘Āvuso’’ti padaṃ pana navakesu. Tadubhayampi nipāto ‘‘tumhe bhante, tumhe āvuso’’ti bahūsupi samānarūpattā. Saṅghoti avisesato catuvaggādike pakatattapuggalasamūhe vattati. Idha pana paccantimesu janapadesu pañcavaggato paṭṭhāya, majjhimesu janapadesu dasavaggato paṭṭhāya saṅghoti gahetabbo. Tatrāyaṃ piṇḍattho – bhante, saṅgho mama vacanaṃ suṇātūti. Idañca navakatarena vattabbavacanaṃ. Sace pana anussāvako sabbehi bhikkhūhi vuḍḍhataro hoti, ‘‘suṇātu me, āvuso, saṅgho’’ti vattabbaṃ. Sopi ce ‘‘bhante’’ti vadeyya, navakataro vā ‘‘āvuso’’ti, kammakopo natthi. Keci pana ‘‘ekattha ‘āvuso’ti vatvā aññattha ‘bhante’ti vuttepi natthi doso ubhayenāpi ālapanassa sijjhanato’’ti vadanti.
இதா³னி யமத்த²ங் ஞாபேதுகாமோ ‘‘ஸுணாதூ’’தி ஸங்க⁴ங் ஸவனே நியோஜேதி, தங் ஞாபெந்தோ ‘‘அயங் இத்த²ன்னாமோ’’திஆதி³மாஹ. தத்த² அயந்தி உபஸம்பதா³பெக்க²ஸ்ஸ ஹத்த²பாஸே ஸன்னிஹிதபா⁴வத³ஸ்ஸனங். தேன ச ஹத்த²பாஸே டி²தஸ்ஸேவ உபஸம்பதா³ ருஹதீதி ஸிஜ்ஜ²தி ஹத்த²பாஸதோ ப³ஹி டி²தஸ்ஸ ‘‘அய’’ந்தி ந வத்தப்³ப³தோ. தேனேவ அனுஸாஸகஸம்முதியங் ஸோ ஹத்த²பாஸதோ ப³ஹி டி²தத்தா ‘‘அய’’ந்தி ந வுத்தோ. தஸ்மா உபஸம்பதா³பெக்கோ² அனுபஸம்பன்னோ ஹத்த²பாஸே ட²பேதப்³போ³. அயங் இத்த²ன்னாமோதி அயங்-ஸத்³தோ³ ச அவஸ்ஸங் பயுஜ்ஜிதப்³போ³. ஸோ ச இமஸ்மிங் பட²மனாமபயோகே³ ஏவாதி க³ஹேதப்³ப³ங் . ‘‘இத்த²ன்னாமோ’’தி இத³ங் அனியமதோ தஸ்ஸ நாமத³ஸ்ஸனங். உப⁴யேனபி அயங் பு³த்³த⁴ரக்கி²தோதிஆதி³னாமங் த³ஸ்ஸேதி. ‘‘உபஸம்பதா³பெக்கோ²’’தி பி⁴ன்னாதி⁴கரணவிஸயே ப³ஹுப்³பீ³ஹிஸமஆஸோ, உபஸம்பத³ங் மே ஸங்கோ⁴ அபெக்க²மானோதி அத்தோ². தஸ்ஸ ச உபஜ்ஜா²யதங் ஸமங்கி³பா⁴வேன த³ஸ்ஸேதுங் ‘‘இத்த²ன்னமஸ்ஸ ஆயஸ்மதோ’’தி வுத்தங். ஏதேன ‘‘அயங் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸ ஸத்³தி⁴விஹாரிகபூ⁴தோ உபஸம்பதா³பெக்கோ²’’தி ஏவமாதி³னா நயேன நாமயோஜனாய ஸஹ அத்தோ² த³ஸ்ஸிதோதி. எத்த² ச ‘‘ஆயஸ்மதோ’’தி பத³ங் அவத்வாபி ‘‘அயங் பு³த்³த⁴ரக்கி²தோ த⁴ம்மரக்கி²தஸ்ஸ உபஸம்பதா³பெக்கோ²’’தி வத்துங் வட்டதி. தேனேவ பாளியங் ‘‘இத்த²ன்னாமேன உபஜ்ஜா²யேனா’’தி எத்த² ‘‘ஆயஸ்மதோ’’தி பத³ங் ந வுத்தங். யஞ்செத்த² வத்தப்³ப³ங், தங் ஹெட்டா² வுத்தமேவ.
Idāni yamatthaṃ ñāpetukāmo ‘‘suṇātū’’ti saṅghaṃ savane niyojeti, taṃ ñāpento ‘‘ayaṃ itthannāmo’’tiādimāha. Tattha ayanti upasampadāpekkhassa hatthapāse sannihitabhāvadassanaṃ. Tena ca hatthapāse ṭhitasseva upasampadā ruhatīti sijjhati hatthapāsato bahi ṭhitassa ‘‘aya’’nti na vattabbato. Teneva anusāsakasammutiyaṃ so hatthapāsato bahi ṭhitattā ‘‘aya’’nti na vutto. Tasmā upasampadāpekkho anupasampanno hatthapāse ṭhapetabbo. Ayaṃ itthannāmoti ayaṃ-saddo ca avassaṃ payujjitabbo. So ca imasmiṃ paṭhamanāmapayoge evāti gahetabbaṃ . ‘‘Itthannāmo’’ti idaṃ aniyamato tassa nāmadassanaṃ. Ubhayenapi ayaṃ buddharakkhitotiādināmaṃ dasseti. ‘‘Upasampadāpekkho’’ti bhinnādhikaraṇavisaye bahubbīhisamaāso, upasampadaṃ me saṅgho apekkhamānoti attho. Tassa ca upajjhāyataṃ samaṅgibhāvena dassetuṃ ‘‘itthannamassa āyasmato’’ti vuttaṃ. Etena ‘‘ayaṃ buddharakkhito āyasmato dhammarakkhitassa saddhivihārikabhūto upasampadāpekkho’’ti evamādinā nayena nāmayojanāya saha attho dassitoti. Ettha ca ‘‘āyasmato’’ti padaṃ avatvāpi ‘‘ayaṃ buddharakkhito dhammarakkhitassa upasampadāpekkho’’ti vattuṃ vaṭṭati. Teneva pāḷiyaṃ ‘‘itthannāmena upajjhāyenā’’ti ettha ‘‘āyasmato’’ti padaṃ na vuttaṃ. Yañcettha vattabbaṃ, taṃ heṭṭhā vuttameva.
நனு செத்த² உபஜ்ஜா²யோபி உபஸம்பதா³பெக்கோ² விய ஹத்த²பாஸே டி²தோ ஏவ இச்சி²தப்³போ³, அத² கஸ்மா ‘‘அயங் இத்த²ன்னாமோ இமஸ்ஸ இத்த²ன்னாமஸ்ஸ உபஸம்பதா³பெக்கோ²’’தி ஏவங் உபஜ்ஜா²யபராமஸனேபி இம-ஸத்³த³ஸ்ஸ பயோகோ³ ந கதோதி? நாயங் விரோதோ⁴ உபஜ்ஜா²யஸ்ஸ அபா⁴வேபி கம்மகோபாபா⁴வதோ. கேவலஞ்ஹி கம்மனிப்ப²த்தியா ஸந்தபத³வஸேன அவிஜ்ஜமானஸ்ஸபி உபஜ்ஜா²யஸ்ஸ நாமகித்தனங் அனுபஜ்ஜா²யஸ்ஸ உபஸம்பதா³தீ³ஸுபி கரீயதி. தஸ்மா உபஜ்ஜா²யஸ்ஸ அஸன்னிஹிததாயபி தப்பராமஸனமத்தேனேவ கம்மஸித்³தி⁴தோ ‘‘இமஸ்ஸா’’தி நித்³தி³ஸிதுங் ந வட்டதி.
Nanu cettha upajjhāyopi upasampadāpekkho viya hatthapāse ṭhito eva icchitabbo, atha kasmā ‘‘ayaṃ itthannāmo imassa itthannāmassa upasampadāpekkho’’ti evaṃ upajjhāyaparāmasanepi ima-saddassa payogo na katoti? Nāyaṃ virodho upajjhāyassa abhāvepi kammakopābhāvato. Kevalañhi kammanipphattiyā santapadavasena avijjamānassapi upajjhāyassa nāmakittanaṃ anupajjhāyassa upasampadādīsupi karīyati. Tasmā upajjhāyassa asannihitatāyapi tapparāmasanamatteneva kammasiddhito ‘‘imassā’’ti niddisituṃ na vaṭṭati.
பரிஸுத்³தோ⁴ அந்தராயிகேஹி த⁴ம்மேஹீதி அப⁴ப்³ப³தாதி³கேஹி உபஸம்பதா³ய அவத்து²கரேஹி சேவ பஞ்சாபா³த⁴ஹத்த²ச்சி²ன்னாதீ³ஹி ச ஆபத்திமத்தகரேஹி அந்தராயிகேஹி ஸபா⁴வேஹி பரிமுத்தோ. ஏவங் வுத்தோ ஏவ ச ஆபத்திமத்தகரேஹி பஞ்சாபா³தா⁴தீ³ஹி அபரிமுத்தஸ்ஸபி உபஸம்பதா³ ருஹதி, நாஞ்ஞதா². பரிபுண்ணஸ்ஸ பத்தசீவரந்தி பரிபுண்ணமஸ்ஸ உபஸம்பதா³பெக்க²ஸ்ஸ பத்தசீவரங். ஏவங் வுத்தே ஏவ அபத்தசீவரஸ்ஸாபி உபஸம்பதா³ ருஹதி, நாஞ்ஞதா². உபஸம்பத³ங் யாசதீதி ‘‘ஸங்க⁴ங், ப⁴ந்தே, உபஸம்பத³ங் யாசாமீ’’திஆதி³னா (மஹாவ॰ 71, 126) யாசிதபா⁴வங் ஸந்தா⁴ய வுத்தங். ஏவங் தேன ஸங்கே⁴ அயாசிதேபி ‘‘இத்த²ன்னாமோ ஸங்க⁴ங் உபஸம்பத³ங் யாசதீ’’தி வுத்தே ஏவ கம்மங் அவிபன்னங் ஹோதி, நாஞ்ஞதா². உபஜ்ஜா²யேனாதி உபஜ்ஜா²யேன கரணபூ⁴தேன இத்த²ன்னாமங் உபஜ்ஜா²யங் கத்வா கம்மபூ⁴தங் உபஸம்பத³ங் தா³துங் நிப்பா²தே³துங் கத்துபூ⁴தங் ஸங்க⁴ங் யாசதீதி அத்தோ². யாசதா⁴துனோ பன த்³விகம்மகத்தா ‘‘ஸங்க⁴ங், உபஸம்பத³’’ந்தி த்³வே கம்மபதா³னி வுத்தானி.
Parisuddho antarāyikehi dhammehīti abhabbatādikehi upasampadāya avatthukarehi ceva pañcābādhahatthacchinnādīhi ca āpattimattakarehi antarāyikehi sabhāvehi parimutto. Evaṃ vutto eva ca āpattimattakarehi pañcābādhādīhi aparimuttassapi upasampadā ruhati, nāññathā. Paripuṇṇassa pattacīvaranti paripuṇṇamassa upasampadāpekkhassa pattacīvaraṃ. Evaṃ vutte eva apattacīvarassāpi upasampadā ruhati, nāññathā. Upasampadaṃ yācatīti ‘‘saṅghaṃ, bhante, upasampadaṃ yācāmī’’tiādinā (mahāva. 71, 126) yācitabhāvaṃ sandhāya vuttaṃ. Evaṃ tena saṅghe ayācitepi ‘‘itthannāmo saṅghaṃ upasampadaṃ yācatī’’ti vutte eva kammaṃ avipannaṃ hoti, nāññathā. Upajjhāyenāti upajjhāyena karaṇabhūtena itthannāmaṃ upajjhāyaṃ katvā kammabhūtaṃ upasampadaṃ dātuṃ nipphādetuṃ kattubhūtaṃ saṅghaṃ yācatīti attho. Yācadhātuno pana dvikammakattā ‘‘saṅghaṃ, upasampada’’nti dve kammapadāni vuttāni.
யதி³ ஸங்க⁴ஸ்ஸ பத்தகல்லந்தி எத்த² பத்தோ காலோ இமஸ்ஸாதி பத்தகாலங், அபலோகனாதி³சதுப்³பி³த⁴ஸங்க⁴கம்மங், ததே³வ ஸகத்தே² ய-பச்சயேன ‘‘பத்தகல்ல’’ந்தி வுச்சதி. இத⁴ பன ஞத்திசதுத்த²உபஸம்பதா³கம்மங் அதி⁴ப்பேதங், தங் காதுங் ஸங்க⁴ஸ்ஸ பத்தகல்லங் ஜாதங். யதீ³தி அனுமதிக³ஹணவஸேன கம்மஸ்ஸ பத்தகல்லதங் ஞாபேதி. யோ ஹி கோசி தத்த² அபத்தகல்லதங் மஞ்ஞிஸ்ஸதி, ஸோ வக்க²தி. இமமேவ ஹி அத்த²ங் ஸந்தா⁴ய அனுஸ்ஸாவனாஸு ‘‘யஸ்ஸாயஸ்மதோ க²மதி…பே॰… ஸோ பா⁴ஸெய்யா’’தி (மஹாவ॰ 127) வுத்தங். தங் பனேதங் பத்தகல்லங் வத்து²ஸம்பதா³, அந்தராயிகேஹி த⁴ம்மேஹி சஸ்ஸ பரிஸுத்³த⁴தா, ஸீமாஸம்பதா³, பரிஸஸம்பதா³, புப்³ப³கிச்சனிட்டா²பனந்தி இமேஹி பஞ்சஹி அங்கே³ஹி ஸங்க³ஹிதங்.
Yadi saṅghassa pattakallanti ettha patto kālo imassāti pattakālaṃ, apalokanādicatubbidhasaṅghakammaṃ, tadeva sakatthe ya-paccayena ‘‘pattakalla’’nti vuccati. Idha pana ñatticatutthaupasampadākammaṃ adhippetaṃ, taṃ kātuṃ saṅghassa pattakallaṃ jātaṃ. Yadīti anumatigahaṇavasena kammassa pattakallataṃ ñāpeti. Yo hi koci tattha apattakallataṃ maññissati, so vakkhati. Imameva hi atthaṃ sandhāya anussāvanāsu ‘‘yassāyasmato khamati…pe… so bhāseyyā’’ti (mahāva. 127) vuttaṃ. Taṃ panetaṃ pattakallaṃ vatthusampadā, antarāyikehi dhammehi cassa parisuddhatā, sīmāsampadā, parisasampadā, pubbakiccaniṭṭhāpananti imehi pañcahi aṅgehi saṅgahitaṃ.
தத்த² வத்து²ஸம்பதா³ நாம யதா²வுத்தேஹி ஏகாத³ஸஹி அப⁴ப்³ப³புக்³க³லேஹி சேவ அந்திமவத்து²அஜ்ஜா²பன்னேஹி ச அஞ்ஞோ பரிபுண்ணவீஸதிவஸ்ஸோ அனுபஸம்பன்னபூ⁴தோ மனுஸ்ஸபுரிஸோ, ஏதஸ்மிங் புக்³க³லே ஸதி ஏவ இத³ங் ஸங்க⁴ஸ்ஸ உபஸம்பதா³கம்மங் பத்தகல்லங் நாம ஹோதி, நாஸதி. கதஞ்ச குப்பமேவ ஹோதி.
Tattha vatthusampadā nāma yathāvuttehi ekādasahi abhabbapuggalehi ceva antimavatthuajjhāpannehi ca añño paripuṇṇavīsativasso anupasampannabhūto manussapuriso, etasmiṃ puggale sati eva idaṃ saṅghassa upasampadākammaṃ pattakallaṃ nāma hoti, nāsati. Katañca kuppameva hoti.
அந்தராயிகேஹி த⁴ம்மேஹி சஸ்ஸ பரிஸுத்³த⁴தா நாம யதா²வுத்தஸ்ஸேவ உபஸம்பதா³வத்து²பூ⁴தஸ்ஸ புக்³க³லஸ்ஸ யே இமே ப⁴க³வதா படிக்கி²த்தா பஞ்சாபா³த⁴பு²ட்ட²தாத³யோ மாதாபிதூஹி அனநுஞ்ஞாததாபரியோஸானா சேவ ஹத்த²ச்சி²ன்னதாத³யோ ச தோ³ஸத⁴ம்மா காரகஸங்க⁴ஸ்ஸ ஆபத்தாதி³அந்தராயஹேதுதாய ‘‘அந்தராயிகா’’தி வுச்சந்தி தேஹி அந்தராயிகேஹி தோ³ஸத⁴ம்மேஹி பரிமுத்தத்தா, இமிஸ்ஸா ச ஸதி ஏவ இத³ங் கம்மங் பத்தகல்லங் நாம ஹோதி, நாஸதி. கதங் பன கம்மங் ஸுகதமேவ ஹோதி ட²பெத்வா ஊனவீஸதிவஸ்ஸபுக்³க³லங்.
Antarāyikehi dhammehi cassa parisuddhatā nāma yathāvuttasseva upasampadāvatthubhūtassa puggalassa ye ime bhagavatā paṭikkhittā pañcābādhaphuṭṭhatādayo mātāpitūhi ananuññātatāpariyosānā ceva hatthacchinnatādayo ca dosadhammā kārakasaṅghassa āpattādiantarāyahetutāya ‘‘antarāyikā’’ti vuccanti tehi antarāyikehi dosadhammehi parimuttattā, imissā ca sati eva idaṃ kammaṃ pattakallaṃ nāma hoti, nāsati. Kataṃ pana kammaṃ sukatameva hoti ṭhapetvā ūnavīsativassapuggalaṃ.
ஸீமாஸம்பதா³ பன உபோஸத²க்க²ந்த⁴கே (மஹாவ॰ 147-148) வக்க²மானநயேன ஸப்³ப³தோ³ஸவிரஹிதாய ப³த்³தா⁴ப³த்³த⁴வஸேன து³விதா⁴ய ஸீமாய வஸேனேவ வேதி³தப்³பா³. தாதி³ஸாய ஹி ஸீமாய ஸதி ஏவ இத³ங் கம்மங் பத்தகல்லங் நாம ஹோதி, நாஸதி. கதஞ்ச கம்மங் விபஜ்ஜதி.
Sīmāsampadā pana uposathakkhandhake (mahāva. 147-148) vakkhamānanayena sabbadosavirahitāya baddhābaddhavasena duvidhāya sīmāya vaseneva veditabbā. Tādisāya hi sīmāya sati eva idaṃ kammaṃ pattakallaṃ nāma hoti, nāsati. Katañca kammaṃ vipajjati.
பரிஸஸம்பதா³ பன யே இமே உபஸம்பதா³கம்மஸ்ஸ ஸப்³ப³ந்திமேன பரிச்சே²தே³ன கம்மப்பத்தா த³ஸஹி வா பஞ்சஹி வா அனூனா பாராஜிகங் அனாபன்னா, அனுக்கி²த்தா ச ஸமானஸங்வாஸகா பி⁴க்கூ², தேஸங் ஏகஸீமாயங் ஹத்த²பாஸங் அவிஜஹித்வா டா²னங், ச²ந்தா³ரஹானஞ்ச ச²ந்த³ஸ்ஸ ஆனயனங், ஸம்முகீ²பூ⁴தானஞ்ச அப்படிக்கோஸனங், உபஸம்பதா³பெக்க²ரஹிதானங் உபோஸத²க்க²ந்த⁴கே படிக்கி²த்தானங் க³ஹட்டா²தி³அனஉபஸம்பன்னானஞ்சேவ பாராஜிகுக்கி²த்தகனானாஸங்வாஸகபி⁴க்கு²னீனஞ்ச வஜ்ஜனீயபுக்³க³லானங் ஸங்க⁴ஸ்ஸ ஹத்த²பாஸே அபா⁴வோ சாதி இமேஹி சதூஹி அங்கே³ஹி ஸங்க³ஹிதா. ஏவரூபாய ச பரிஸஸம்பதா³ய ஸதி ஏவ இத³ங் பத்தகல்லங் நாம ஹோதி, நாஸதி. தத்த² புரிமானங் திண்ணங் அங்கா³னங் அஞ்ஞதரஸ்ஸபி அபா⁴வே கதங் கம்மங் விபஜ்ஜதி, ந பச்சி²மஸ்ஸ.
Parisasampadā pana ye ime upasampadākammassa sabbantimena paricchedena kammappattā dasahi vā pañcahi vā anūnā pārājikaṃ anāpannā, anukkhittā ca samānasaṃvāsakā bhikkhū, tesaṃ ekasīmāyaṃ hatthapāsaṃ avijahitvā ṭhānaṃ, chandārahānañca chandassa ānayanaṃ, sammukhībhūtānañca appaṭikkosanaṃ, upasampadāpekkharahitānaṃ uposathakkhandhake paṭikkhittānaṃ gahaṭṭhādianaupasampannānañceva pārājikukkhittakanānāsaṃvāsakabhikkhunīnañca vajjanīyapuggalānaṃ saṅghassa hatthapāse abhāvo cāti imehi catūhi aṅgehi saṅgahitā. Evarūpāya ca parisasampadāya sati eva idaṃ pattakallaṃ nāma hoti, nāsati. Tattha purimānaṃ tiṇṇaṃ aṅgānaṃ aññatarassapi abhāve kataṃ kammaṃ vipajjati, na pacchimassa.
புப்³ப³கிச்சனிட்டா²பனங் நாம யானிமானி ‘‘பட²மங் உபஜ்ஜ²ங் கா³ஹாபேதப்³போ³’’திஆதி³னா பாளியங் வுத்தானி ‘‘உபஜ்ஜ²ங் கா³ஹாபனங், பத்தசீவராசிக்க²னங், ததோ தங் ஹத்த²பாஸதோ ப³ஹி ட²பெத்வா அனுஸாஸகஸம்முதிகம்மகரணங், ஸம்மதேன ச க³ந்த்வா அனுஸாஸனங், தேன ச பட²மதரங் ஆக³ந்த்வா ஸங்க⁴ஸ்ஸ ஞாபெத்வா உபஸம்பதா³பெக்க²ங் ‘ஆக³ச்சா²ஹீ’தி ஹத்த²பாஸே ஏவ அப்³பா⁴னங், தேன ச பி⁴க்கூ²னங் பாதே³ வந்தா³பெத்வா உபஸம்பதா³யாசாபனங், ததோ அந்தராயிகத⁴ம்மபுச்ச²கஸம்முதிகரணங், ஸம்மதேன ச புச்ச²ன’’ந்தி இமானி அட்ட² புப்³ப³கிச்சானி, தேஸங் ஸப்³பே³ஸங் யாதா²வதோ கரணேன நிட்டா²பனங். ஏதஸ்மிஞ்ச புப்³ப³கம்மனிட்டா²பனே ஸதி ஏவ இத³ங் ஸங்க⁴ஸ்ஸ உபஸம்பதா³கம்மங் பத்தகல்லங் நாம ஹோதி, நாஸதி. ஏதேஸு பன புப்³ப³கம்மேஸு அகதேஸுபி கதங் கம்மங் யதா²வுத்தவத்து²ஸம்பத்திஆதீ³ஸு விஜ்ஜமானேஸு அகுப்பமேவ ஹோதி. ததே³வமெத்த² பத்தகல்லங் இமேஹி பஞ்சஹி அங்கே³ஹி ஸங்க³ஹிதந்தி வேதி³தப்³ப³ங். இமினாவ நயேன ஹெட்டா² வுத்தேஸு, வக்க²மானேஸு ச ஸப்³பே³ஸு கம்மேஸு பத்தகல்லதா யதா²ரஹங் யோஜெத்வா ஞாதப்³பா³.
Pubbakiccaniṭṭhāpanaṃ nāma yānimāni ‘‘paṭhamaṃ upajjhaṃ gāhāpetabbo’’tiādinā pāḷiyaṃ vuttāni ‘‘upajjhaṃ gāhāpanaṃ, pattacīvarācikkhanaṃ, tato taṃ hatthapāsato bahi ṭhapetvā anusāsakasammutikammakaraṇaṃ, sammatena ca gantvā anusāsanaṃ, tena ca paṭhamataraṃ āgantvā saṅghassa ñāpetvā upasampadāpekkhaṃ ‘āgacchāhī’ti hatthapāse eva abbhānaṃ, tena ca bhikkhūnaṃ pāde vandāpetvā upasampadāyācāpanaṃ, tato antarāyikadhammapucchakasammutikaraṇaṃ, sammatena ca pucchana’’nti imāni aṭṭha pubbakiccāni, tesaṃ sabbesaṃ yāthāvato karaṇena niṭṭhāpanaṃ. Etasmiñca pubbakammaniṭṭhāpane sati eva idaṃ saṅghassa upasampadākammaṃ pattakallaṃ nāma hoti, nāsati. Etesu pana pubbakammesu akatesupi kataṃ kammaṃ yathāvuttavatthusampattiādīsu vijjamānesu akuppameva hoti. Tadevamettha pattakallaṃ imehi pañcahi aṅgehi saṅgahitanti veditabbaṃ. Imināva nayena heṭṭhā vuttesu, vakkhamānesu ca sabbesu kammesu pattakallatā yathārahaṃ yojetvā ñātabbā.
இத்த²ன்னாமங் உபஸம்பாதெ³ய்யாதி உபஸம்பதா³னிப்பா²த³னேன தங்ஸமங்கி³ங் கரெய்ய கரோதூதி பத்த²னாயங், விதி⁴ம்ஹி வா இத³ங் த³ட்ட²ப்³ப³ங். யதா² ஹி ‘‘தே³வத³த்தங் ஸுகா²பெய்யா’’தி வுத்தே ஸுக²மஸ்ஸ நிப்பா²தெ³த்வா தங் ஸுக²ஸமங்கி³னங் கரெய்யாதி அத்தோ² ஹோதி, ஏவமிதா⁴பி உபஸம்பத³மஸ்ஸ நிப்பா²தெ³த்வா தங் உபஸம்பதா³ஸமங்கி³னங் கரெய்யாதி அத்தோ². பயோஜகப்³யாபாரே சேதங் யதா² ஸுக²யந்தங் கஞ்சி ஸுத்³த⁴கத்தாரங் கோசி ஹேதுகத்தா ஸுக²ஹேதுனிப்பா²த³னேன ஸுகா²பெய்யாதி வுச்சதி, ஏவமிதா⁴பி உபஸம்பஜ்ஜந்தங் ஸுத்³த⁴கத்தாரங் புக்³க³லங் ஹேதுகத்துபூ⁴தோ ஸங்கோ⁴ உபஸம்பதா³ஹேதுனிப்பா²த³னேன உபஸம்பாதெ³ய்யாதி வுத்தோ. ஏதேன ச ஸுக²ங் விய ஸுக²தா³யகேன ஸங்கே⁴ன புக்³க³லஸ்ஸ தி³ய்யமானா ததா²பவத்தபரமத்த²த⁴ம்மே உபாதா³ய அரியஜனபஞ்ஞத்தா உபஸம்பதா³ நாம ஸம்முதிஸச்சதா அத்தீ²தி ஸமத்தி²தங் ஹோதி. எத்த² ச ‘‘இத்த²ன்னாமோ ஸங்க⁴ங் உபஸம்பத³ங் யாசதீ’’தி வுத்தத்தா பரிவாஸாதீ³ஸு விய யாசனானுகு³ணங் ‘‘இத்த²ன்னாமஸ்ஸ உபஸம்பத³ங் த³தெ³ய்யா’’தி அவத்வா ‘‘இத்த²ன்னாமங் உபஸம்பாதெ³ய்யா’’தி வுத்தத்தா இத³ங் உபஸம்பதா³கம்மங் தா³னே அஸங்க³ஹெத்வா கம்மலக்க²ணே ஏவ ஸங்க³ஹிதந்தி த³ட்ட²ப்³ப³ங். இமினா நயேன ‘‘இத்த²ன்னாமங் உபஸம்பாதே³தி, உபஸம்பன்னோ ஸங்கே⁴னா’’தி எத்தா²பி அத்தோ² வேதி³தப்³போ³. கேவலஞ்ஹி தத்த² வத்தமானகாலஅதீதகாலவஸேன, இத⁴ பன அனாமட்ட²காலவஸேனாதி எத்தகமேவ விஸேஸோ.
Itthannāmaṃupasampādeyyāti upasampadānipphādanena taṃsamaṅgiṃ kareyya karotūti patthanāyaṃ, vidhimhi vā idaṃ daṭṭhabbaṃ. Yathā hi ‘‘devadattaṃ sukhāpeyyā’’ti vutte sukhamassa nipphādetvā taṃ sukhasamaṅginaṃ kareyyāti attho hoti, evamidhāpi upasampadamassa nipphādetvā taṃ upasampadāsamaṅginaṃ kareyyāti attho. Payojakabyāpāre cetaṃ yathā sukhayantaṃ kañci suddhakattāraṃ koci hetukattā sukhahetunipphādanena sukhāpeyyāti vuccati, evamidhāpi upasampajjantaṃ suddhakattāraṃ puggalaṃ hetukattubhūto saṅgho upasampadāhetunipphādanena upasampādeyyāti vutto. Etena ca sukhaṃ viya sukhadāyakena saṅghena puggalassa diyyamānā tathāpavattaparamatthadhamme upādāya ariyajanapaññattā upasampadā nāma sammutisaccatā atthīti samatthitaṃ hoti. Ettha ca ‘‘itthannāmo saṅghaṃ upasampadaṃ yācatī’’ti vuttattā parivāsādīsu viya yācanānuguṇaṃ ‘‘itthannāmassa upasampadaṃ dadeyyā’’ti avatvā ‘‘itthannāmaṃ upasampādeyyā’’ti vuttattā idaṃ upasampadākammaṃ dāne asaṅgahetvā kammalakkhaṇe eva saṅgahitanti daṭṭhabbaṃ. Iminā nayena ‘‘itthannāmaṃ upasampādeti, upasampanno saṅghenā’’ti etthāpi attho veditabbo. Kevalañhi tattha vattamānakālaatītakālavasena, idha pana anāmaṭṭhakālavasenāti ettakameva viseso.
ஏஸா ஞத்தீதி ‘‘ஸங்கோ⁴ ஞாபேதப்³போ³’’தி வுத்தஞாபனா ஏஸா. இத³ஞ்ச அனுஸ்ஸாவனானம்பி ஸப்³பா⁴வஸூசனத்த²ங் வுச்சதி. அவஸ்ஸஞ்சேதங் வத்தப்³ப³மேவ, ஞத்திகம்மே ஏவ தங் ந வத்தப்³ப³ங். தத்த² பன ய்ய-காரே வுத்தமத்தே ஏவ ஞத்திகம்மங் நிட்டி²தங் ஹோதீதி த³ட்ட²ப்³ப³ங். க²மதீதி ருச்சதி. உபஸம்பதா³தி ஸங்கே⁴ன தி³ய்யமானா நிப்பா²தி³யமானா உபஸம்பதா³ யஸ்ஸ க²மதி. ஸோ துண்ஹஸ்ஸாதி யோஜனா. துண்ஹீதி ச அகத²னத்தே² நிபாதோ, அகத²னகோ அஸ்ஸ ப⁴வெய்யாதி அத்தோ². க²மதி ஸங்க⁴ஸ்ஸ இத்த²ன்னாமஸ்ஸ உபஸம்பதா³தி பகதேன ஸம்ப³ந்தோ⁴. தத்த² காரணமாஹ ‘‘தஸ்மா துண்ஹீ’’தி. தத்த² ‘‘ஆஸீ’’தி ஸேஸோ. யஸ்மா ‘‘யஸ்ஸ நக்க²மதி, ஸோ பா⁴ஸெய்யா’’தி திக்க²த்துங் வுச்சமானோபி ஸங்கோ⁴ துண்ஹீ நிரவோ அஹோஸி, தஸ்மா க²மதி ஸங்க⁴ஸ்ஸாதி அத்தோ². ஏவந்தி இமினா பகாரேன. துண்ஹீபா⁴வேனேவேதங் ஸங்க⁴ஸ்ஸ ருச்சனபா⁴வங் தா⁴ரயாமி பு³ஜ்ஜா²மி பஜானாமீதி அத்தோ². இதி-ஸத்³தோ³ பரிஸமாபனத்தே² கதோ, ஸோ ச கம்மவாசாய அனங்க³ங். தஸ்மா அனுஸ்ஸாவகேன ‘‘தா⁴ரயாமீ’’தி எத்த² மி-காரபரியோஸானமேவ வத்வா நிட்டா²பேதப்³ப³ங், இதி-ஸத்³தோ³ ந பயுஜ்ஜிதப்³போ³தி த³ட்ட²ப்³ப³ங். இமினா நயேன ஸப்³ப³த்த² கம்மவாசானமத்தோ² வேதி³தப்³போ³.
Esā ñattīti ‘‘saṅgho ñāpetabbo’’ti vuttañāpanā esā. Idañca anussāvanānampi sabbhāvasūcanatthaṃ vuccati. Avassañcetaṃ vattabbameva, ñattikamme eva taṃ na vattabbaṃ. Tattha pana yya-kāre vuttamatte eva ñattikammaṃ niṭṭhitaṃ hotīti daṭṭhabbaṃ. Khamatīti ruccati. Upasampadāti saṅghena diyyamānā nipphādiyamānā upasampadā yassa khamati. So tuṇhassāti yojanā. Tuṇhīti ca akathanatthe nipāto, akathanako assa bhaveyyāti attho. Khamati saṅghassa itthannāmassa upasampadāti pakatena sambandho. Tattha kāraṇamāha ‘‘tasmā tuṇhī’’ti. Tattha ‘‘āsī’’ti seso. Yasmā ‘‘yassa nakkhamati, so bhāseyyā’’ti tikkhattuṃ vuccamānopi saṅgho tuṇhī niravo ahosi, tasmā khamati saṅghassāti attho. Evanti iminā pakārena. Tuṇhībhāvenevetaṃ saṅghassa ruccanabhāvaṃ dhārayāmi bujjhāmi pajānāmīti attho. Iti-saddo parisamāpanatthe kato, so ca kammavācāya anaṅgaṃ. Tasmā anussāvakena ‘‘dhārayāmī’’ti ettha mi-kārapariyosānameva vatvā niṭṭhāpetabbaṃ, iti-saddo na payujjitabboti daṭṭhabbaṃ. Iminā nayena sabbattha kammavācānamattho veditabbo.
உபஸம்பதா³விதி⁴கதா²வண்ணனா நிட்டி²தா.
Upasampadāvidhikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 63. உபஸம்பதா³விதி⁴ • 63. Upasampadāvidhi
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / உபஸம்பதா³விதி⁴கதா² • Upasampadāvidhikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபஸம்பதா³விதி⁴கதா²வண்ணனா • Upasampadāvidhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 63. உபஸம்பதா³விதி⁴கதா² • 63. Upasampadāvidhikathā
