| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
উপসম্পদাৰিধিকথাৰণ্ণনা
Upasampadāvidhikathāvaṇṇanā
১২৫. কুট্ঠং গণ্ডোতি এত্থ কুট্ঠাদিগ্গহণেন হত্থচ্ছিন্নাদযোপি গহিতাৰ হোন্তীতি পোরাণা, তস্মা ‘‘মনুস্সোসি পুরিসোসী’’তি এতেহি ভব্বাভব্বপুগ্গলপরিৰজ্জনং করোতি। ‘‘ভুজিস্সোসি অণণোসী’’তিআদীহি পুব্বে হত্থচ্ছিন্নাধিকারে ৰুত্তঅত্থৰিকপ্পেসু দুতিযং ৰিকপ্পং উপথম্ভেতি। তত্থ ‘‘অণণোসি ভুজিস্সোসী’’তি অনুক্কমেন অৰত্ৰা উপ্পটিপাটিযা ৰচনেন ভুজিস্সো হোতি, ন চ রঞ্ঞো ভত্তৰেতনৰসেন ভটো। রাজাধীনত্তা পন সো রাজভটপক্খং ভজতীতি তব্বিপক্খভাৰপুচ্ছনত্থং ‘‘নসি রাজভটো’’তি ৰুত্তং। অঞ্ঞথা পঞ্চহি আবাধেহি ফুট্ঠানং গহণেনেৰ সব্বেসং গহণে সিদ্ধে ইতরে ন ৰত্তব্বা। অথ ৰত্তব্বা, সব্বেপি ৰত্তব্বা সিযুং।
125.Kuṭṭhaṃ gaṇḍoti ettha kuṭṭhādiggahaṇena hatthacchinnādayopi gahitāva hontīti porāṇā, tasmā ‘‘manussosi purisosī’’ti etehi bhabbābhabbapuggalaparivajjanaṃ karoti. ‘‘Bhujissosi aṇaṇosī’’tiādīhi pubbe hatthacchinnādhikāre vuttaatthavikappesu dutiyaṃ vikappaṃ upathambheti. Tattha ‘‘aṇaṇosi bhujissosī’’ti anukkamena avatvā uppaṭipāṭiyā vacanena bhujisso hoti, na ca rañño bhattavetanavasena bhaṭo. Rājādhīnattā pana so rājabhaṭapakkhaṃ bhajatīti tabbipakkhabhāvapucchanatthaṃ ‘‘nasi rājabhaṭo’’ti vuttaṃ. Aññathā pañcahi ābādhehi phuṭṭhānaṃ gahaṇeneva sabbesaṃ gahaṇe siddhe itare na vattabbā. Atha vattabbā, sabbepi vattabbā siyuṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৬৩. উপসম্পদাৰিধি • 63. Upasampadāvidhi
