| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
убасамбад̣̇аавид̇хигат̇ааван̣н̣анаа
Upasampadāvidhikathāvaṇṇanā
126. убаж̇жхаад̇и убаж̇жхааяа-сад̣̇д̣̇асамаанад̇т̇о аагааранд̇о убаж̇жхаасад̣̇д̣̇од̇и д̣̇ассзд̇и. убаж̇жхааяа-сад̣̇д̣̇о зва ваа убаж̇жхаа убаяог̇абажжад̇д̇аважанзсу яа-гааралобам̣ гад̇ваа звам̣ вуд̇д̇о гаран̣аважанаад̣̇ийсу убаж̇жхаа-сад̣̇д̣̇асса баяог̇аабхааваад̇и д̣̇адтаб̣б̣ам̣. баал̣ияам̣ ад̇д̇анаава ад̇д̇аанам̣ самманнид̇аб̣б̣анд̇и ад̇д̇анаава гад̇д̇убхууд̇зна гаран̣абхууд̇зна ад̇д̇аанамзва гаммабхууд̇ам̣ бад̇и саммананагижжам̣ гаад̇аб̣б̣ам̣. ад̇д̇аананд̇и ваа бажжад̇д̇з убаяог̇аважанам̣, ад̇д̇анаава ад̇д̇аа самманнид̇аб̣б̣од̇и ад̇т̇о. на гзвалан̃жа зд̇т̇зва, ан̃н̃ад̇рааби д̇зрасасаммуд̇иаад̣̇ийсу иминаава лагкан̣зна ад̇д̇анаава ад̇д̇аа самманнид̇аб̣б̣ова. абижа саяам̣ гаммаарахад̇д̇аа ад̇д̇аанам̣ мун̃жид̇ваа жад̇уваг̇г̇аад̣̇иго г̇ан̣о саб̣б̣ад̇т̇а ижчид̇аб̣б̣о.
126.Upajjhāti upajjhāya-saddasamānattho ākāranto upajjhāsaddoti dasseti. Upajjhāya-saddo eva vā upajjhā upayogapaccattavacanesu ya-kāralopaṃ katvā evaṃ vutto karaṇavacanādīsu upajjhā-saddassa payogābhāvāti daṭṭhabbaṃ. Pāḷiyaṃ attanāva attānaṃ sammannitabbanti attanāva kattubhūtena karaṇabhūtena attānameva kammabhūtaṃ pati sammananakiccaṃ kātabbaṃ. Attānanti vā paccatte upayogavacanaṃ, attanāva attā sammannitabboti attho. Na kevalañca ettheva, aññatrāpi terasasammutiādīsu imināva lakkhaṇena attanāva attā sammannitabbova. Apica sayaṃ kammārahattā attānaṃ muñcitvā catuvaggādiko gaṇo sabbattha icchitabbo.
сажжагаалод̇и ‘‘ниг̇уухиссаамий’’д̇и ван̃жанам̣ бахааяа сажжассзва д̇з ижчид̇аб̣б̣агаало. бхууд̇агаалод̇и ван̃жанааяа абхаавзби мануссад̇д̇аад̣̇ивад̇т̇уно бхууд̇ад̇ааяа авассам̣ ижчид̇аб̣б̣агаало, ид̇арат̇аа гаммагобаад̣̇ианд̇арааяо ход̇ийд̇и ад̇хиббааяо. ман̇гууд̇и ад̇хомуко. уд̣̇д̇харад̇ууд̇и анубасамбаннабхаавад̇о убасамбад̇д̇ияам̣ бад̇идтабзд̇ууд̇и ад̇т̇о.
Saccakāloti ‘‘nigūhissāmī’’ti vañcanaṃ pahāya saccasseva te icchitabbakālo. Bhūtakāloti vañcanāya abhāvepi manussattādivatthuno bhūtatāya avassaṃ icchitabbakālo, itarathā kammakopādiantarāyo hotīti adhippāyo. Maṅkūti adhomukho. Uddharatūti anupasampannabhāvato upasampattiyaṃ patiṭṭhapetūti attho.
саб̣б̣агаммаваажаасу ад̇т̇агосаллад̇т̇ам̣ банзд̇т̇а убасамбад̣̇аагаммаваажааяа звамад̇т̇о д̣̇адтаб̣б̣о – сун̣аад̇ууд̇и саванаан̣ад̇д̇ияам̣ батамабурисзгаважанам̣. д̇ан̃жа гин̃жааби яо сан̇гхо саванагирияааяа нияож̇ийяад̇и, д̇асса саммукад̇д̇аа ‘‘сун̣аахий’’д̇и маж̇жхимабурисзгаважанзна вад̇д̇аб̣б̣ам̣, д̇ат̇ааби яасмаа сан̇гха-сад̣̇д̣̇асаннид̇хаанз батамабурисабаяог̇ова сад̣̇д̣̇авид̇хуухи самаажин̣н̣о бхаг̇аванд̇аааяасманд̇аад̣̇исад̣̇д̣̇асаннид̇хаанзсу вияа ‘‘ад̇хиваасзд̇у мз бхавам̣ г̇од̇амо (баараа. 22). зд̇асса суг̇ад̇а гаало, яам̣ бхаг̇аваа саавагаанам̣ сигкаабад̣̇ам̣ бан̃н̃абзяяа (баараа. 21). баггамад̇ааяасмаа (баараа. 436). сун̣анд̇у мз ааяасманд̇о’’д̇иаад̣̇ийсу вияа. д̇асмаа ид̇ха батамабурисабаяог̇о гад̇о. ат̇а ваа г̇аарававасзнзвзд̇ам̣ вуд̇д̇ам̣. г̇арудтаанийязсу хи г̇аарававасзна маж̇жхимабурисабаяог̇уббад̇д̇ияамби батамабурисабаяог̇ам̣ баяуж̇ж̇анд̇и ‘‘д̣̇зсзд̇у суг̇ад̇о д̇хамма’’нд̇иаад̣̇ийсу (д̣̇ий. ни. 2.66; ма. ни. 2.338; сам̣. ни. 1.172; махаава. 8) вияаад̇и д̣̇адтаб̣б̣ам̣. гзжи бана ‘‘бханд̇з, аавусод̇и сад̣̇д̣̇з абзгкид̇ваа ид̇ха батамабурисабаяог̇о’’д̇и вад̣̇анд̇и, д̇ам̣ на яуд̇д̇ам̣ ‘‘аажарияо мз бханд̇з хохи, (махаава. 77) ин̇гхаавусо убаали, имам̣ баб̣б̣аж̇ид̇ам̣ ануяун̃ж̇аахий’’д̇иаад̣̇ийсу (баараа. 517) д̇аббаяог̇зби маж̇жхимабурисабаяог̇ассзва д̣̇ассанад̇о.
Sabbakammavācāsu atthakosallatthaṃ panettha upasampadākammavācāya evamattho daṭṭhabbo – suṇātūti savanāṇattiyaṃ paṭhamapurisekavacanaṃ. Tañca kiñcāpi yo saṅgho savanakiriyāya niyojīyati, tassa sammukhattā ‘‘suṇāhī’’ti majjhimapurisekavacanena vattabbaṃ, tathāpi yasmā saṅgha-saddasannidhāne paṭhamapurisapayogova saddavidhūhi samāciṇṇo bhagavantaāyasmantādisaddasannidhānesu viya ‘‘adhivāsetu me bhavaṃ gotamo (pārā. 22). Etassa sugata kālo, yaṃ bhagavā sāvakānaṃ sikkhāpadaṃ paññapeyya (pārā. 21). Pakkamatāyasmā (pārā. 436). Suṇantu me āyasmanto’’tiādīsu viya. Tasmā idha paṭhamapurisapayogo kato. Atha vā gāravavasenevetaṃ vuttaṃ. Garuṭṭhānīyesu hi gāravavasena majjhimapurisapayoguppattiyampi paṭhamapurisapayogaṃ payujjanti ‘‘desetu sugato dhamma’’ntiādīsu (dī. ni. 2.66; ma. ni. 2.338; saṃ. ni. 1.172; mahāva. 8) viyāti daṭṭhabbaṃ. Keci pana ‘‘bhante, āvusoti sadde apekkhitvā idha paṭhamapurisapayogo’’ti vadanti, taṃ na yuttaṃ ‘‘ācariyo me bhante hohi, (mahāva. 77) iṅghāvuso upāli, imaṃ pabbajitaṃ anuyuñjāhī’’tiādīsu (pārā. 517) tappayogepi majjhimapurisapayogasseva dassanato.
мзд̇и яо саавзд̇и, д̇асса ад̇д̇анид̣̇д̣̇зсз саамиважанам̣. бханд̇зд̇и аалабанад̇т̇з вуд̣дхзсу саг̇аарававажанам̣. ‘‘аавусо’’д̇и бад̣̇ам̣ бана навагзсу. д̇ад̣̇убхаяамби нибаад̇о ‘‘д̇умхз бханд̇з, д̇умхз аавусо’’д̇и б̣ахуусуби самаанаруубад̇д̇аа. сан̇гход̇и ависзсад̇о жад̇уваг̇г̇аад̣̇игз багад̇ад̇д̇абуг̇г̇аласамуухз вад̇д̇ад̇и. ид̇ха бана бажжанд̇имзсу ж̇анабад̣̇зсу бан̃жаваг̇г̇ад̇о бадтааяа, маж̇жхимзсу ж̇анабад̣̇зсу д̣̇асаваг̇г̇ад̇о бадтааяа сан̇гход̇и г̇ахзд̇аб̣б̣о. д̇ад̇рааяам̣ бин̣д̣ад̇т̇о – бханд̇з, сан̇гхо мама важанам̣ сун̣аад̇ууд̇и. ид̣̇ан̃жа навагад̇арзна вад̇д̇аб̣б̣аважанам̣. сажз бана ануссааваго саб̣б̣зхи бхигкуухи вуд̣дхад̇аро ход̇и, ‘‘сун̣аад̇у мз, аавусо, сан̇гхо’’д̇и вад̇д̇аб̣б̣ам̣. соби жз ‘‘бханд̇з’’д̇и вад̣̇зяяа, навагад̇аро ваа ‘‘аавусо’’д̇и, гаммагобо над̇т̇и. гзжи бана ‘‘згад̇т̇а ‘аавусо’д̇и вад̇ваа ан̃н̃ад̇т̇а ‘бханд̇з’д̇и вуд̇д̇зби над̇т̇и д̣̇осо убхаязнааби аалабанасса сиж̇жханад̇о’’д̇и вад̣̇анд̇и.
Meti yo sāveti, tassa attaniddese sāmivacanaṃ. Bhanteti ālapanatthe vuḍḍhesu sagāravavacanaṃ. ‘‘Āvuso’’ti padaṃ pana navakesu. Tadubhayampi nipāto ‘‘tumhe bhante, tumhe āvuso’’ti bahūsupi samānarūpattā. Saṅghoti avisesato catuvaggādike pakatattapuggalasamūhe vattati. Idha pana paccantimesu janapadesu pañcavaggato paṭṭhāya, majjhimesu janapadesu dasavaggato paṭṭhāya saṅghoti gahetabbo. Tatrāyaṃ piṇḍattho – bhante, saṅgho mama vacanaṃ suṇātūti. Idañca navakatarena vattabbavacanaṃ. Sace pana anussāvako sabbehi bhikkhūhi vuḍḍhataro hoti, ‘‘suṇātu me, āvuso, saṅgho’’ti vattabbaṃ. Sopi ce ‘‘bhante’’ti vadeyya, navakataro vā ‘‘āvuso’’ti, kammakopo natthi. Keci pana ‘‘ekattha ‘āvuso’ti vatvā aññattha ‘bhante’ti vuttepi natthi doso ubhayenāpi ālapanassa sijjhanato’’ti vadanti.
ид̣̇аани яамад̇т̇ам̣ н̃аабзд̇угаамо ‘‘сун̣аад̇уу’’д̇и сан̇гхам̣ саванз нияож̇зд̇и, д̇ам̣ н̃аабзнд̇о ‘‘аяам̣ ид̇т̇аннаамо’’д̇иаад̣̇имааха. д̇ад̇т̇а аяанд̇и убасамбад̣̇аабзгкасса хад̇т̇абаасз саннихид̇абхаавад̣̇ассанам̣. д̇зна жа хад̇т̇абаасз тид̇ассзва убасамбад̣̇аа рухад̇ийд̇и сиж̇жхад̇и хад̇т̇абаасад̇о б̣ахи тид̇асса ‘‘аяа’’нд̇и на вад̇д̇аб̣б̣ад̇о. д̇знзва анусаасагасаммуд̇ияам̣ со хад̇т̇абаасад̇о б̣ахи тид̇ад̇д̇аа ‘‘аяа’’нд̇и на вуд̇д̇о. д̇асмаа убасамбад̣̇аабзгко анубасамбанно хад̇т̇абаасз табзд̇аб̣б̣о. аяам̣ ид̇т̇аннаамод̇и аяам̣-сад̣̇д̣̇о жа авассам̣ баяуж̇ж̇ид̇аб̣б̣о. со жа имасмим̣ батаманаамабаяог̇з зваад̇и г̇ахзд̇аб̣б̣ам̣ . ‘‘ид̇т̇аннаамо’’д̇и ид̣̇ам̣ анияамад̇о д̇асса наамад̣̇ассанам̣. убхаязнаби аяам̣ б̣уд̣̇д̇харагкид̇од̇иаад̣̇инаамам̣ д̣̇ассзд̇и. ‘‘убасамбад̣̇аабзгко’’д̇и бхиннаад̇хигаран̣ависаяз б̣ахуб̣б̣ийхисамааасо, убасамбад̣̇ам̣ мз сан̇гхо абзгкамаанод̇и ад̇т̇о. д̇асса жа убаж̇жхааяад̇ам̣ саман̇г̇ибхаавзна д̣̇ассзд̇ум̣ ‘‘ид̇т̇аннамасса ааяасмад̇о’’д̇и вуд̇д̇ам̣. зд̇зна ‘‘аяам̣ б̣уд̣̇д̇харагкид̇о ааяасмад̇о д̇хаммарагкид̇асса сад̣̇д̇хивихааригабхууд̇о убасамбад̣̇аабзгко’’д̇и звамаад̣̇инаа наязна наамаяож̇анааяа саха ад̇т̇о д̣̇ассид̇од̇и. зд̇т̇а жа ‘‘ааяасмад̇о’’д̇и бад̣̇ам̣ авад̇вааби ‘‘аяам̣ б̣уд̣̇д̇харагкид̇о д̇хаммарагкид̇асса убасамбад̣̇аабзгко’’д̇и вад̇д̇ум̣ ваддад̇и. д̇знзва баал̣ияам̣ ‘‘ид̇т̇аннаамзна убаж̇жхааязнаа’’д̇и зд̇т̇а ‘‘ааяасмад̇о’’д̇и бад̣̇ам̣ на вуд̇д̇ам̣. яан̃жзд̇т̇а вад̇д̇аб̣б̣ам̣, д̇ам̣ хздтаа вуд̇д̇амзва.
Idāni yamatthaṃ ñāpetukāmo ‘‘suṇātū’’ti saṅghaṃ savane niyojeti, taṃ ñāpento ‘‘ayaṃ itthannāmo’’tiādimāha. Tattha ayanti upasampadāpekkhassa hatthapāse sannihitabhāvadassanaṃ. Tena ca hatthapāse ṭhitasseva upasampadā ruhatīti sijjhati hatthapāsato bahi ṭhitassa ‘‘aya’’nti na vattabbato. Teneva anusāsakasammutiyaṃ so hatthapāsato bahi ṭhitattā ‘‘aya’’nti na vutto. Tasmā upasampadāpekkho anupasampanno hatthapāse ṭhapetabbo. Ayaṃ itthannāmoti ayaṃ-saddo ca avassaṃ payujjitabbo. So ca imasmiṃ paṭhamanāmapayoge evāti gahetabbaṃ . ‘‘Itthannāmo’’ti idaṃ aniyamato tassa nāmadassanaṃ. Ubhayenapi ayaṃ buddharakkhitotiādināmaṃ dasseti. ‘‘Upasampadāpekkho’’ti bhinnādhikaraṇavisaye bahubbīhisamaāso, upasampadaṃ me saṅgho apekkhamānoti attho. Tassa ca upajjhāyataṃ samaṅgibhāvena dassetuṃ ‘‘itthannamassa āyasmato’’ti vuttaṃ. Etena ‘‘ayaṃ buddharakkhito āyasmato dhammarakkhitassa saddhivihārikabhūto upasampadāpekkho’’ti evamādinā nayena nāmayojanāya saha attho dassitoti. Ettha ca ‘‘āyasmato’’ti padaṃ avatvāpi ‘‘ayaṃ buddharakkhito dhammarakkhitassa upasampadāpekkho’’ti vattuṃ vaṭṭati. Teneva pāḷiyaṃ ‘‘itthannāmena upajjhāyenā’’ti ettha ‘‘āyasmato’’ti padaṃ na vuttaṃ. Yañcettha vattabbaṃ, taṃ heṭṭhā vuttameva.
нану жзд̇т̇а убаж̇жхааяоби убасамбад̣̇аабзгко вияа хад̇т̇абаасз тид̇о зва ижчид̇аб̣б̣о, ат̇а гасмаа ‘‘аяам̣ ид̇т̇аннаамо имасса ид̇т̇аннаамасса убасамбад̣̇аабзгко’’д̇и звам̣ убаж̇жхааяабараамасанзби има-сад̣̇д̣̇асса баяог̇о на гад̇од̇и? нааяам̣ вирод̇хо убаж̇жхааяасса абхаавзби гаммагобаабхаавад̇о. гзвалан̃хи гамманибпад̇д̇ияаа санд̇абад̣̇авасзна авиж̇ж̇амаанассаби убаж̇жхааяасса наамагид̇д̇анам̣ анубаж̇жхааяасса убасамбад̣̇аад̣̇ийсуби гарийяад̇и. д̇асмаа убаж̇жхааяасса асаннихид̇ад̇ааяаби д̇аббараамасанамад̇д̇знзва гаммасид̣̇д̇хид̇о ‘‘имассаа’’д̇и нид̣̇д̣̇исид̇ум̣ на ваддад̇и.
Nanu cettha upajjhāyopi upasampadāpekkho viya hatthapāse ṭhito eva icchitabbo, atha kasmā ‘‘ayaṃ itthannāmo imassa itthannāmassa upasampadāpekkho’’ti evaṃ upajjhāyaparāmasanepi ima-saddassa payogo na katoti? Nāyaṃ virodho upajjhāyassa abhāvepi kammakopābhāvato. Kevalañhi kammanipphattiyā santapadavasena avijjamānassapi upajjhāyassa nāmakittanaṃ anupajjhāyassa upasampadādīsupi karīyati. Tasmā upajjhāyassa asannihitatāyapi tapparāmasanamatteneva kammasiddhito ‘‘imassā’’ti niddisituṃ na vaṭṭati.
барисуд̣̇д̇хо анд̇арааяигзхи д̇хаммзхийд̇и абхаб̣б̣ад̇аад̣̇игзхи убасамбад̣̇ааяа авад̇т̇угарзхи жзва бан̃жааб̣аад̇хахад̇т̇ажчиннаад̣̇ийхи жа аабад̇д̇имад̇д̇агарзхи анд̇арааяигзхи сабхаавзхи баримуд̇д̇о. звам̣ вуд̇д̇о зва жа аабад̇д̇имад̇д̇агарзхи бан̃жааб̣аад̇хаад̣̇ийхи абаримуд̇д̇ассаби убасамбад̣̇аа рухад̇и, наан̃н̃ат̇аа. барибун̣н̣асса бад̇д̇ажийваранд̇и барибун̣н̣амасса убасамбад̣̇аабзгкасса бад̇д̇ажийварам̣. звам̣ вуд̇д̇з зва абад̇д̇ажийварассааби убасамбад̣̇аа рухад̇и, наан̃н̃ат̇аа. убасамбад̣̇ам̣ яаажад̇ийд̇и ‘‘сан̇гхам̣, бханд̇з, убасамбад̣̇ам̣ яаажаамий’’д̇иаад̣̇инаа (махаава. 71, 126) яаажид̇абхаавам̣ санд̇хааяа вуд̇д̇ам̣. звам̣ д̇зна сан̇гхз аяаажид̇зби ‘‘ид̇т̇аннаамо сан̇гхам̣ убасамбад̣̇ам̣ яаажад̇ий’’д̇и вуд̇д̇з зва гаммам̣ авибаннам̣ ход̇и, наан̃н̃ат̇аа. убаж̇жхааязнаад̇и убаж̇жхааязна гаран̣абхууд̇зна ид̇т̇аннаамам̣ убаж̇жхааяам̣ гад̇ваа гаммабхууд̇ам̣ убасамбад̣̇ам̣ д̣̇аад̇ум̣ нибпаад̣̇зд̇ум̣ гад̇д̇убхууд̇ам̣ сан̇гхам̣ яаажад̇ийд̇и ад̇т̇о. яаажад̇хаад̇уно бана д̣̇вигаммагад̇д̇аа ‘‘сан̇гхам̣, убасамбад̣̇а’’нд̇и д̣̇вз гаммабад̣̇аани вуд̇д̇аани.
Parisuddho antarāyikehi dhammehīti abhabbatādikehi upasampadāya avatthukarehi ceva pañcābādhahatthacchinnādīhi ca āpattimattakarehi antarāyikehi sabhāvehi parimutto. Evaṃ vutto eva ca āpattimattakarehi pañcābādhādīhi aparimuttassapi upasampadā ruhati, nāññathā. Paripuṇṇassa pattacīvaranti paripuṇṇamassa upasampadāpekkhassa pattacīvaraṃ. Evaṃ vutte eva apattacīvarassāpi upasampadā ruhati, nāññathā. Upasampadaṃ yācatīti ‘‘saṅghaṃ, bhante, upasampadaṃ yācāmī’’tiādinā (mahāva. 71, 126) yācitabhāvaṃ sandhāya vuttaṃ. Evaṃ tena saṅghe ayācitepi ‘‘itthannāmo saṅghaṃ upasampadaṃ yācatī’’ti vutte eva kammaṃ avipannaṃ hoti, nāññathā. Upajjhāyenāti upajjhāyena karaṇabhūtena itthannāmaṃ upajjhāyaṃ katvā kammabhūtaṃ upasampadaṃ dātuṃ nipphādetuṃ kattubhūtaṃ saṅghaṃ yācatīti attho. Yācadhātuno pana dvikammakattā ‘‘saṅghaṃ, upasampada’’nti dve kammapadāni vuttāni.
яад̣̇и сан̇гхасса бад̇д̇агалланд̇и зд̇т̇а бад̇д̇о гаало имассаад̇и бад̇д̇агаалам̣, абалоганаад̣̇ижад̇уб̣б̣ид̇хасан̇гхагаммам̣, д̇ад̣̇зва сагад̇т̇з яа-бажжаязна ‘‘бад̇д̇агалла’’нд̇и вужжад̇и. ид̇ха бана н̃ад̇д̇ижад̇уд̇т̇аубасамбад̣̇аагаммам̣ ад̇хиббзд̇ам̣, д̇ам̣ гаад̇ум̣ сан̇гхасса бад̇д̇агаллам̣ ж̇аад̇ам̣. яад̣̇ийд̇и анумад̇иг̇ахан̣авасзна гаммасса бад̇д̇агаллад̇ам̣ н̃аабзд̇и. яо хи гожи д̇ад̇т̇а абад̇д̇агаллад̇ам̣ ман̃н̃иссад̇и, со вагкад̇и. имамзва хи ад̇т̇ам̣ санд̇хааяа ануссааванаасу ‘‘яассааяасмад̇о камад̇и…бз… со бхаасзяяаа’’д̇и (махаава. 127) вуд̇д̇ам̣. д̇ам̣ банзд̇ам̣ бад̇д̇агаллам̣ вад̇т̇усамбад̣̇аа, анд̇арааяигзхи д̇хаммзхи жасса барисуд̣̇д̇хад̇аа, сиймаасамбад̣̇аа, барисасамбад̣̇аа, буб̣б̣агижжанидтаабананд̇и имзхи бан̃жахи ан̇г̇зхи сан̇г̇ахид̇ам̣.
Yadi saṅghassa pattakallanti ettha patto kālo imassāti pattakālaṃ, apalokanādicatubbidhasaṅghakammaṃ, tadeva sakatthe ya-paccayena ‘‘pattakalla’’nti vuccati. Idha pana ñatticatutthaupasampadākammaṃ adhippetaṃ, taṃ kātuṃ saṅghassa pattakallaṃ jātaṃ. Yadīti anumatigahaṇavasena kammassa pattakallataṃ ñāpeti. Yo hi koci tattha apattakallataṃ maññissati, so vakkhati. Imameva hi atthaṃ sandhāya anussāvanāsu ‘‘yassāyasmato khamati…pe… so bhāseyyā’’ti (mahāva. 127) vuttaṃ. Taṃ panetaṃ pattakallaṃ vatthusampadā, antarāyikehi dhammehi cassa parisuddhatā, sīmāsampadā, parisasampadā, pubbakiccaniṭṭhāpananti imehi pañcahi aṅgehi saṅgahitaṃ.
д̇ад̇т̇а вад̇т̇усамбад̣̇аа наама яат̇аавуд̇д̇зхи згаад̣̇асахи абхаб̣б̣абуг̇г̇алзхи жзва анд̇имавад̇т̇уаж̇жхаабаннзхи жа ан̃н̃о барибун̣н̣авийсад̇ивассо анубасамбаннабхууд̇о мануссабурисо, зд̇асмим̣ буг̇г̇алз сад̇и зва ид̣̇ам̣ сан̇гхасса убасамбад̣̇аагаммам̣ бад̇д̇агаллам̣ наама ход̇и, наасад̇и. гад̇ан̃жа губбамзва ход̇и.
Tattha vatthusampadā nāma yathāvuttehi ekādasahi abhabbapuggalehi ceva antimavatthuajjhāpannehi ca añño paripuṇṇavīsativasso anupasampannabhūto manussapuriso, etasmiṃ puggale sati eva idaṃ saṅghassa upasampadākammaṃ pattakallaṃ nāma hoti, nāsati. Katañca kuppameva hoti.
анд̇арааяигзхи д̇хаммзхи жасса барисуд̣̇д̇хад̇аа наама яат̇аавуд̇д̇ассзва убасамбад̣̇аавад̇т̇убхууд̇асса буг̇г̇аласса яз имз бхаг̇авад̇аа бадигкид̇д̇аа бан̃жааб̣аад̇хапудтад̇аад̣̇аяо маад̇аабид̇уухи ананун̃н̃аад̇ад̇аабарияосаанаа жзва хад̇т̇ажчиннад̇аад̣̇аяо жа д̣̇осад̇хаммаа гаарагасан̇гхасса аабад̇д̇аад̣̇ианд̇арааяахзд̇уд̇ааяа ‘‘анд̇арааяигаа’’д̇и вужжанд̇и д̇зхи анд̇арааяигзхи д̣̇осад̇хаммзхи баримуд̇д̇ад̇д̇аа, имиссаа жа сад̇и зва ид̣̇ам̣ гаммам̣ бад̇д̇агаллам̣ наама ход̇и, наасад̇и. гад̇ам̣ бана гаммам̣ сугад̇амзва ход̇и табзд̇ваа уунавийсад̇ивассабуг̇г̇алам̣.
Antarāyikehi dhammehi cassa parisuddhatā nāma yathāvuttasseva upasampadāvatthubhūtassa puggalassa ye ime bhagavatā paṭikkhittā pañcābādhaphuṭṭhatādayo mātāpitūhi ananuññātatāpariyosānā ceva hatthacchinnatādayo ca dosadhammā kārakasaṅghassa āpattādiantarāyahetutāya ‘‘antarāyikā’’ti vuccanti tehi antarāyikehi dosadhammehi parimuttattā, imissā ca sati eva idaṃ kammaṃ pattakallaṃ nāma hoti, nāsati. Kataṃ pana kammaṃ sukatameva hoti ṭhapetvā ūnavīsativassapuggalaṃ.
сиймаасамбад̣̇аа бана убосат̇агканд̇хагз (махаава. 147-148) вагкамаананаязна саб̣б̣ад̣̇осавирахид̇ааяа б̣ад̣̇д̇хааб̣ад̣̇д̇хавасзна д̣̇увид̇хааяа сиймааяа васзнзва взд̣̇ид̇аб̣б̣аа. д̇аад̣̇исааяа хи сиймааяа сад̇и зва ид̣̇ам̣ гаммам̣ бад̇д̇агаллам̣ наама ход̇и, наасад̇и. гад̇ан̃жа гаммам̣ вибаж̇ж̇ад̇и.
Sīmāsampadā pana uposathakkhandhake (mahāva. 147-148) vakkhamānanayena sabbadosavirahitāya baddhābaddhavasena duvidhāya sīmāya vaseneva veditabbā. Tādisāya hi sīmāya sati eva idaṃ kammaṃ pattakallaṃ nāma hoti, nāsati. Katañca kammaṃ vipajjati.
барисасамбад̣̇аа бана яз имз убасамбад̣̇аагаммасса саб̣б̣анд̇имзна барижчзд̣̇зна гаммаббад̇д̇аа д̣̇асахи ваа бан̃жахи ваа ануунаа баарааж̇игам̣ анаабаннаа, анугкид̇д̇аа жа самаанасам̣ваасагаа бхигкуу, д̇зсам̣ згасиймааяам̣ хад̇т̇абаасам̣ авиж̇ахид̇ваа таанам̣, чанд̣̇аарахаанан̃жа чанд̣̇асса аанаяанам̣, саммукийбхууд̇аанан̃жа аббадиггосанам̣, убасамбад̣̇аабзгкарахид̇аанам̣ убосат̇агканд̇хагз бадигкид̇д̇аанам̣ г̇ахадтаад̣̇ианаубасамбаннаанан̃жзва баарааж̇игугкид̇д̇аганаанаасам̣ваасагабхигкунийнан̃жа важ̇ж̇анийяабуг̇г̇алаанам̣ сан̇гхасса хад̇т̇абаасз абхааво жаад̇и имзхи жад̇уухи ан̇г̇зхи сан̇г̇ахид̇аа. зваруубааяа жа барисасамбад̣̇ааяа сад̇и зва ид̣̇ам̣ бад̇д̇агаллам̣ наама ход̇и, наасад̇и. д̇ад̇т̇а буримаанам̣ д̇ин̣н̣ам̣ ан̇г̇аанам̣ ан̃н̃ад̇арассаби абхаавз гад̇ам̣ гаммам̣ вибаж̇ж̇ад̇и, на бажчимасса.
Parisasampadā pana ye ime upasampadākammassa sabbantimena paricchedena kammappattā dasahi vā pañcahi vā anūnā pārājikaṃ anāpannā, anukkhittā ca samānasaṃvāsakā bhikkhū, tesaṃ ekasīmāyaṃ hatthapāsaṃ avijahitvā ṭhānaṃ, chandārahānañca chandassa ānayanaṃ, sammukhībhūtānañca appaṭikkosanaṃ, upasampadāpekkharahitānaṃ uposathakkhandhake paṭikkhittānaṃ gahaṭṭhādianaupasampannānañceva pārājikukkhittakanānāsaṃvāsakabhikkhunīnañca vajjanīyapuggalānaṃ saṅghassa hatthapāse abhāvo cāti imehi catūhi aṅgehi saṅgahitā. Evarūpāya ca parisasampadāya sati eva idaṃ pattakallaṃ nāma hoti, nāsati. Tattha purimānaṃ tiṇṇaṃ aṅgānaṃ aññatarassapi abhāve kataṃ kammaṃ vipajjati, na pacchimassa.
буб̣б̣агижжанидтаабанам̣ наама яаанимаани ‘‘батамам̣ убаж̇жхам̣ г̇аахаабзд̇аб̣б̣о’’д̇иаад̣̇инаа баал̣ияам̣ вуд̇д̇аани ‘‘убаж̇жхам̣ г̇аахаабанам̣, бад̇д̇ажийвараажигканам̣, д̇ад̇о д̇ам̣ хад̇т̇абаасад̇о б̣ахи табзд̇ваа анусаасагасаммуд̇игаммагаран̣ам̣, саммад̇зна жа г̇анд̇ваа анусаасанам̣, д̇зна жа батамад̇арам̣ ааг̇анд̇ваа сан̇гхасса н̃аабзд̇ваа убасамбад̣̇аабзгкам̣ ‘ааг̇ажчаахий’д̇и хад̇т̇абаасз зва аб̣бхаанам̣, д̇зна жа бхигкуунам̣ баад̣̇з ванд̣̇аабзд̇ваа убасамбад̣̇ааяаажаабанам̣, д̇ад̇о анд̇арааяигад̇хаммабужчагасаммуд̇игаран̣ам̣, саммад̇зна жа бужчана’’нд̇и имаани адта буб̣б̣агижжаани, д̇зсам̣ саб̣б̣зсам̣ яаат̇аавад̇о гаран̣зна нидтаабанам̣. зд̇асмин̃жа буб̣б̣агамманидтаабанз сад̇и зва ид̣̇ам̣ сан̇гхасса убасамбад̣̇аагаммам̣ бад̇д̇агаллам̣ наама ход̇и, наасад̇и. зд̇зсу бана буб̣б̣агаммзсу агад̇зсуби гад̇ам̣ гаммам̣ яат̇аавуд̇д̇авад̇т̇усамбад̇д̇иаад̣̇ийсу виж̇ж̇амаанзсу агуббамзва ход̇и. д̇ад̣̇звамзд̇т̇а бад̇д̇агаллам̣ имзхи бан̃жахи ан̇г̇зхи сан̇г̇ахид̇анд̇и взд̣̇ид̇аб̣б̣ам̣. иминаава наязна хздтаа вуд̇д̇зсу, вагкамаанзсу жа саб̣б̣зсу гаммзсу бад̇д̇агаллад̇аа яат̇аарахам̣ яож̇зд̇ваа н̃аад̇аб̣б̣аа.
Pubbakiccaniṭṭhāpanaṃ nāma yānimāni ‘‘paṭhamaṃ upajjhaṃ gāhāpetabbo’’tiādinā pāḷiyaṃ vuttāni ‘‘upajjhaṃ gāhāpanaṃ, pattacīvarācikkhanaṃ, tato taṃ hatthapāsato bahi ṭhapetvā anusāsakasammutikammakaraṇaṃ, sammatena ca gantvā anusāsanaṃ, tena ca paṭhamataraṃ āgantvā saṅghassa ñāpetvā upasampadāpekkhaṃ ‘āgacchāhī’ti hatthapāse eva abbhānaṃ, tena ca bhikkhūnaṃ pāde vandāpetvā upasampadāyācāpanaṃ, tato antarāyikadhammapucchakasammutikaraṇaṃ, sammatena ca pucchana’’nti imāni aṭṭha pubbakiccāni, tesaṃ sabbesaṃ yāthāvato karaṇena niṭṭhāpanaṃ. Etasmiñca pubbakammaniṭṭhāpane sati eva idaṃ saṅghassa upasampadākammaṃ pattakallaṃ nāma hoti, nāsati. Etesu pana pubbakammesu akatesupi kataṃ kammaṃ yathāvuttavatthusampattiādīsu vijjamānesu akuppameva hoti. Tadevamettha pattakallaṃ imehi pañcahi aṅgehi saṅgahitanti veditabbaṃ. Imināva nayena heṭṭhā vuttesu, vakkhamānesu ca sabbesu kammesu pattakallatā yathārahaṃ yojetvā ñātabbā.
ид̇т̇аннаамам̣ убасамбаад̣̇зяяаад̇и убасамбад̣̇аанибпаад̣̇анзна д̇ам̣саман̇г̇им̣ гарзяяа гарод̇ууд̇и бад̇т̇анааяам̣, вид̇химхи ваа ид̣̇ам̣ д̣̇адтаб̣б̣ам̣. яат̇аа хи ‘‘д̣̇звад̣̇ад̇д̇ам̣ сукаабзяяаа’’д̇и вуд̇д̇з сукамасса нибпаад̣̇зд̇ваа д̇ам̣ сукасаман̇г̇инам̣ гарзяяаад̇и ад̇т̇о ход̇и, звамид̇хааби убасамбад̣̇амасса нибпаад̣̇зд̇ваа д̇ам̣ убасамбад̣̇аасаман̇г̇инам̣ гарзяяаад̇и ад̇т̇о. баяож̇агаб̣яаабаарз жзд̇ам̣ яат̇аа сукаяанд̇ам̣ ган̃жи суд̣̇д̇хагад̇д̇аарам̣ гожи хзд̇угад̇д̇аа сукахзд̇унибпаад̣̇анзна сукаабзяяаад̇и вужжад̇и, звамид̇хааби убасамбаж̇ж̇анд̇ам̣ суд̣̇д̇хагад̇д̇аарам̣ буг̇г̇алам̣ хзд̇угад̇д̇убхууд̇о сан̇гхо убасамбад̣̇аахзд̇унибпаад̣̇анзна убасамбаад̣̇зяяаад̇и вуд̇д̇о. зд̇зна жа сукам̣ вияа сукад̣̇ааяагзна сан̇гхзна буг̇г̇аласса д̣̇ияяамаанаа д̇ат̇аабавад̇д̇абарамад̇т̇ад̇хаммз убаад̣̇ааяа арияаж̇анабан̃н̃ад̇д̇аа убасамбад̣̇аа наама саммуд̇исажжад̇аа ад̇т̇ийд̇и самад̇т̇ид̇ам̣ ход̇и. зд̇т̇а жа ‘‘ид̇т̇аннаамо сан̇гхам̣ убасамбад̣̇ам̣ яаажад̇ий’’д̇и вуд̇д̇ад̇д̇аа бариваасаад̣̇ийсу вияа яаажанаануг̇ун̣ам̣ ‘‘ид̇т̇аннаамасса убасамбад̣̇ам̣ д̣̇ад̣̇зяяаа’’д̇и авад̇ваа ‘‘ид̇т̇аннаамам̣ убасамбаад̣̇зяяаа’’д̇и вуд̇д̇ад̇д̇аа ид̣̇ам̣ убасамбад̣̇аагаммам̣ д̣̇аанз асан̇г̇ахзд̇ваа гаммалагкан̣з зва сан̇г̇ахид̇анд̇и д̣̇адтаб̣б̣ам̣. иминаа наязна ‘‘ид̇т̇аннаамам̣ убасамбаад̣̇зд̇и, убасамбанно сан̇гхзнаа’’д̇и зд̇т̇ааби ад̇т̇о взд̣̇ид̇аб̣б̣о. гзвалан̃хи д̇ад̇т̇а вад̇д̇амаанагаалаад̇ийд̇агаалавасзна, ид̇ха бана анаамадтагаалавасзнаад̇и зд̇д̇агамзва висзсо.
Itthannāmaṃupasampādeyyāti upasampadānipphādanena taṃsamaṅgiṃ kareyya karotūti patthanāyaṃ, vidhimhi vā idaṃ daṭṭhabbaṃ. Yathā hi ‘‘devadattaṃ sukhāpeyyā’’ti vutte sukhamassa nipphādetvā taṃ sukhasamaṅginaṃ kareyyāti attho hoti, evamidhāpi upasampadamassa nipphādetvā taṃ upasampadāsamaṅginaṃ kareyyāti attho. Payojakabyāpāre cetaṃ yathā sukhayantaṃ kañci suddhakattāraṃ koci hetukattā sukhahetunipphādanena sukhāpeyyāti vuccati, evamidhāpi upasampajjantaṃ suddhakattāraṃ puggalaṃ hetukattubhūto saṅgho upasampadāhetunipphādanena upasampādeyyāti vutto. Etena ca sukhaṃ viya sukhadāyakena saṅghena puggalassa diyyamānā tathāpavattaparamatthadhamme upādāya ariyajanapaññattā upasampadā nāma sammutisaccatā atthīti samatthitaṃ hoti. Ettha ca ‘‘itthannāmo saṅghaṃ upasampadaṃ yācatī’’ti vuttattā parivāsādīsu viya yācanānuguṇaṃ ‘‘itthannāmassa upasampadaṃ dadeyyā’’ti avatvā ‘‘itthannāmaṃ upasampādeyyā’’ti vuttattā idaṃ upasampadākammaṃ dāne asaṅgahetvā kammalakkhaṇe eva saṅgahitanti daṭṭhabbaṃ. Iminā nayena ‘‘itthannāmaṃ upasampādeti, upasampanno saṅghenā’’ti etthāpi attho veditabbo. Kevalañhi tattha vattamānakālaatītakālavasena, idha pana anāmaṭṭhakālavasenāti ettakameva viseso.
зсаа н̃ад̇д̇ийд̇и ‘‘сан̇гхо н̃аабзд̇аб̣б̣о’’д̇и вуд̇д̇ан̃аабанаа зсаа. ид̣̇ан̃жа ануссааванаанамби саб̣бхаавасуужанад̇т̇ам̣ вужжад̇и. авассан̃жзд̇ам̣ вад̇д̇аб̣б̣амзва, н̃ад̇д̇игаммз зва д̇ам̣ на вад̇д̇аб̣б̣ам̣. д̇ад̇т̇а бана яяа-гаарз вуд̇д̇амад̇д̇з зва н̃ад̇д̇игаммам̣ нидтид̇ам̣ ход̇ийд̇и д̣̇адтаб̣б̣ам̣. камад̇ийд̇и ружжад̇и. убасамбад̣̇аад̇и сан̇гхзна д̣̇ияяамаанаа нибпаад̣̇ияамаанаа убасамбад̣̇аа яасса камад̇и. со д̇ун̣хассаад̇и яож̇анаа. д̇ун̣хийд̇и жа агат̇анад̇т̇з нибаад̇о, агат̇анаго асса бхавзяяаад̇и ад̇т̇о. камад̇и сан̇гхасса ид̇т̇аннаамасса убасамбад̣̇аад̇и багад̇зна самб̣анд̇хо. д̇ад̇т̇а гааран̣амааха ‘‘д̇асмаа д̇ун̣хий’’д̇и. д̇ад̇т̇а ‘‘аасий’’д̇и сзсо. яасмаа ‘‘яасса нагкамад̇и, со бхаасзяяаа’’д̇и д̇игкад̇д̇ум̣ вужжамааноби сан̇гхо д̇ун̣хий нираво ахоси, д̇асмаа камад̇и сан̇гхассаад̇и ад̇т̇о. званд̇и иминаа багаарзна. д̇ун̣хийбхаавзнзвзд̇ам̣ сан̇гхасса ружжанабхаавам̣ д̇хаараяаами б̣уж̇жхаами баж̇аанаамийд̇и ад̇т̇о. ид̇и-сад̣̇д̣̇о барисамаабанад̇т̇з гад̇о, со жа гаммаваажааяа анан̇г̇ам̣. д̇асмаа ануссаавагзна ‘‘д̇хаараяаамий’’д̇и зд̇т̇а ми-гаарабарияосаанамзва вад̇ваа нидтаабзд̇аб̣б̣ам̣, ид̇и-сад̣̇д̣̇о на баяуж̇ж̇ид̇аб̣б̣од̇и д̣̇адтаб̣б̣ам̣. иминаа наязна саб̣б̣ад̇т̇а гаммаваажаанамад̇т̇о взд̣̇ид̇аб̣б̣о.
Esā ñattīti ‘‘saṅgho ñāpetabbo’’ti vuttañāpanā esā. Idañca anussāvanānampi sabbhāvasūcanatthaṃ vuccati. Avassañcetaṃ vattabbameva, ñattikamme eva taṃ na vattabbaṃ. Tattha pana yya-kāre vuttamatte eva ñattikammaṃ niṭṭhitaṃ hotīti daṭṭhabbaṃ. Khamatīti ruccati. Upasampadāti saṅghena diyyamānā nipphādiyamānā upasampadā yassa khamati. So tuṇhassāti yojanā. Tuṇhīti ca akathanatthe nipāto, akathanako assa bhaveyyāti attho. Khamati saṅghassa itthannāmassa upasampadāti pakatena sambandho. Tattha kāraṇamāha ‘‘tasmā tuṇhī’’ti. Tattha ‘‘āsī’’ti seso. Yasmā ‘‘yassa nakkhamati, so bhāseyyā’’ti tikkhattuṃ vuccamānopi saṅgho tuṇhī niravo ahosi, tasmā khamati saṅghassāti attho. Evanti iminā pakārena. Tuṇhībhāvenevetaṃ saṅghassa ruccanabhāvaṃ dhārayāmi bujjhāmi pajānāmīti attho. Iti-saddo parisamāpanatthe kato, so ca kammavācāya anaṅgaṃ. Tasmā anussāvakena ‘‘dhārayāmī’’ti ettha mi-kārapariyosānameva vatvā niṭṭhāpetabbaṃ, iti-saddo na payujjitabboti daṭṭhabbaṃ. Iminā nayena sabbattha kammavācānamattho veditabbo.
убасамбад̣̇аавид̇хигат̇ааван̣н̣анаа нидтид̇аа.
Upasampadāvidhikathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 63. убасамбад̣̇аавид̇хи • 63. Upasampadāvidhi
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / убасамбад̣̇аавид̇хигат̇аа • Upasampadāvidhikathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / убасамбад̣̇аавид̇хигат̇ааван̣н̣анаа • Upasampadāvidhikathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 63. убасамбад̣̇аавид̇хигат̇аа • 63. Upasampadāvidhikathā
