| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
উপসম্পাদেতব্বপঞ্চককথা
Upasampādetabbapañcakakathā
৮৪. ইদানি যং পুব্বে ‘‘অনুজানামি ভিক্খৰে ব্যত্তেন ভিক্খুনা পটিবলেন দসৰস্সেন ৰা অতিরেকদসৰস্সেন ৰা উপসম্পাদেতুং, নিস্সযং দাতু’’ন্তি সঙ্খেপতো উপজ্ঝাযাচরিযানং লক্খণং ৰুত্তং, তং ৰিত্থারতো দস্সেতুং ‘‘পঞ্চহি, ভিক্খৰে, অঙ্গেহি সমন্নাগতেনা’’তিআদিমাহ। তত্থ পঞ্চহি অঙ্গেহীতি পঞ্চহি অগুণঙ্গেহি। সো হি সীলক্খন্ধাদীহি অসমন্নাগতত্তাৰ অগুণঙ্গেহি সমন্নাগতো হোতি। ন উপসম্পাদেতব্বন্তি উপজ্ঝাযেন হুত্ৰা ন উপসম্পাদেতব্বং। ন নিস্সযো দাতব্বোতি আচরিযেন হুত্ৰা নিস্সযো ন দাতব্বো। এত্থ চ ন অসেক্খেন সীলক্খন্ধেনাতি চ অত্তনা ন অসেক্খেনাতি চ অস্সদ্ধোতি চ আদীসু তীসু পঞ্চকেসু অযুত্তৰসেন পটিক্খেপো কতো, ন আপত্তিঅঙ্গৰসেন। যো হি অসেক্খেহি সীলক্খন্ধাদীহি অসমন্নাগতো পরে চ তত্থ সমাদপেতুং অসক্কোন্তো অস্সদ্ধিযাদিদোসযুত্তোৰ হুত্ৰা পরিসং পরিহরতি, তস্স পরিসা সীলাদীহি পরিহাযতিযেৰ, ন ৰড্ঢতি। তস্মা তেন ন উপসম্পাদেতব্বন্তিআদি অযুত্তৰসেন ৰুত্তং, ন আপত্তিঅঙ্গৰসেন। ন হি খীণাসৰস্সেৰ উপজ্ঝাযাচরিযভাৰো ভগৰতা অনুঞ্ঞাতো। যদি তস্সেৰ অনুঞ্ঞাতো অভৰিস্স, ‘‘সচে উপজ্ঝাযস্স অনভিরতি উপ্পন্না হোতী’’তিআদিং ন ৰদেয্য। যস্মা পন খীণাসৰস্স পরিসা সীলাদীহি ন পরিহাযতি, তস্মা ‘‘পঞ্চহি ভিক্খৰে অঙ্গেহি সমন্নাগতেন ভিক্খুনা উপসম্পাদেতব্ব’’ন্তিআদি ৰুত্তং।
84. Idāni yaṃ pubbe ‘‘anujānāmi bhikkhave byattena bhikkhunā paṭibalena dasavassena vā atirekadasavassena vā upasampādetuṃ, nissayaṃ dātu’’nti saṅkhepato upajjhāyācariyānaṃ lakkhaṇaṃ vuttaṃ, taṃ vitthārato dassetuṃ ‘‘pañcahi, bhikkhave, aṅgehi samannāgatenā’’tiādimāha. Tattha pañcahi aṅgehīti pañcahi aguṇaṅgehi. So hi sīlakkhandhādīhi asamannāgatattāva aguṇaṅgehi samannāgato hoti. Na upasampādetabbanti upajjhāyena hutvā na upasampādetabbaṃ. Na nissayo dātabboti ācariyena hutvā nissayo na dātabbo. Ettha ca na asekkhena sīlakkhandhenāti ca attanā na asekkhenāti ca assaddhoti ca ādīsu tīsu pañcakesu ayuttavasena paṭikkhepo kato, na āpattiaṅgavasena. Yo hi asekkhehi sīlakkhandhādīhi asamannāgato pare ca tattha samādapetuṃ asakkonto assaddhiyādidosayuttova hutvā parisaṃ pariharati, tassa parisā sīlādīhi parihāyatiyeva, na vaḍḍhati. Tasmā tena na upasampādetabbantiādi ayuttavasena vuttaṃ, na āpattiaṅgavasena. Na hi khīṇāsavasseva upajjhāyācariyabhāvo bhagavatā anuññāto. Yadi tasseva anuññāto abhavissa, ‘‘sace upajjhāyassa anabhirati uppannā hotī’’tiādiṃ na vadeyya. Yasmā pana khīṇāsavassa parisā sīlādīhi na parihāyati, tasmā ‘‘pañcahi bhikkhave aṅgehi samannāgatena bhikkhunā upasampādetabba’’ntiādi vuttaṃ.
অধিসীলে সীলৰিপন্নোতিআদীসু পারাজিকঞ্চ সঙ্ঘাদিসেসঞ্চ আপন্নো অধিসীলে সীলৰিপন্নো নাম। ইতরে পঞ্চাপত্তিক্খন্ধে আপন্নো অজ্ঝাচারে আচারৰিপন্নো নাম। সম্মাদিট্ঠিং পহায অন্তগ্গাহিকায দিট্ঠিযা সমন্নাগতো অতিদিট্ঠিযা দিট্ঠিৰিপন্নো নাম। যত্তকং সুতং পরিসং পরিহরন্তস্স ইচ্ছিতব্বং, তেন ৰিরহিতত্তা অপ্পস্সুতো। যং তেন জানিতব্বং আপত্তাদি, তস্স অজাননতো দুপ্পঞ্ঞো। ইমস্মিং পঞ্চকে পুরিমানি তীণি পদানি অযুত্তৰসেন ৰুত্তানি, পচ্ছিমানি দ্ৰে আপত্তিঅঙ্গৰসেন।
Adhisīle sīlavipannotiādīsu pārājikañca saṅghādisesañca āpanno adhisīle sīlavipanno nāma. Itare pañcāpattikkhandhe āpanno ajjhācāre ācāravipanno nāma. Sammādiṭṭhiṃ pahāya antaggāhikāya diṭṭhiyā samannāgato atidiṭṭhiyā diṭṭhivipanno nāma. Yattakaṃ sutaṃ parisaṃ pariharantassa icchitabbaṃ, tena virahitattā appassuto. Yaṃ tena jānitabbaṃ āpattādi, tassa ajānanato duppañño. Imasmiṃ pañcake purimāni tīṇi padāni ayuttavasena vuttāni, pacchimāni dve āpattiaṅgavasena.
আপত্তিং ন জানাতীতি ‘‘ইদং নাম মযা কত’’ন্তি ৰুত্তে ‘‘ইমং নাম আপত্তিং অযং আপন্নো’’তি ন জানাতি। ৰুট্ঠানং ন জানাতীতি ৰুট্ঠানগামিনিতো ৰা দেসনাগামিনিতো ৰা আপত্তিতো এৰং নাম ৰুট্ঠানং হোতীতি ন জানাতি। ইমস্মিং পঞ্চকে পুরিমানি দ্ৰে পদানি অযুত্তৰসেন ৰুত্তানি, পচ্ছিমানি তীণি আপত্তিঅঙ্গৰসেন।
Āpattiṃna jānātīti ‘‘idaṃ nāma mayā kata’’nti vutte ‘‘imaṃ nāma āpattiṃ ayaṃ āpanno’’ti na jānāti. Vuṭṭhānaṃ na jānātīti vuṭṭhānagāminito vā desanāgāminito vā āpattito evaṃ nāma vuṭṭhānaṃ hotīti na jānāti. Imasmiṃ pañcake purimāni dve padāni ayuttavasena vuttāni, pacchimāni tīṇi āpattiaṅgavasena.
আভিসমাচারিকায সিক্খাযাতি খন্ধকৰত্তে ৰিনেতুং ন পটিবলো হোতীতি অত্থো। আদিব্রহ্মচরিযকাযাতি সেক্খপণ্ণত্তিযং ৰিনেতুং ন পটিবলোতি অত্থো। অভিধম্মেতি নামরূপপরিচ্ছেদে ৰিনেতুং ন পটিবলোতি অত্থো। অভিৰিনযেতি সকলে ৰিনযপিটকে ৰিনেতুং ন পটিবলোতি অত্থো। ৰিনেতুং ন পটিবলোতি চ সব্বত্থ সিক্খাপেতুং ন সক্কোতীতি অত্থো। ধম্মতো ৰিৰেচেতুন্তি ধম্মেন কারণেন ৰিস্সজ্জাপেতুং। ইমস্মি পঞ্চকে সব্বপদেসু আপত্তি। আপত্তিং ন জানাতীতিআদিপঞ্চকস্মিম্পি সব্বপদেসু আপত্তি। ঊনদসৰস্সপরিযোসানপঞ্চকেপি এসেৰ নযো। ইতি আদিতো তযো পঞ্চকা, চতুত্থে তীণি পদানি, পঞ্চমে দ্ৰে পদানীতি সব্বেপি চত্তারো পঞ্চকা অযুত্তৰসেন ৰুত্তা। চতুত্থপঞ্চকে দ্ৰে পদানি, পঞ্চমে তীণি, ছট্ঠসত্তমঅট্ঠমা তযো পঞ্চকাতি সব্বেপি চত্তারো পঞ্চকা আপত্তিঅঙ্গৰসেন ৰুত্তা; সুক্কপক্খে অট্ঠসু অনাপত্তিযেৰাতি।
Ābhisamācārikāya sikkhāyāti khandhakavatte vinetuṃ na paṭibalo hotīti attho. Ādibrahmacariyakāyāti sekkhapaṇṇattiyaṃ vinetuṃ na paṭibaloti attho. Abhidhammeti nāmarūpaparicchede vinetuṃ na paṭibaloti attho. Abhivinayeti sakale vinayapiṭake vinetuṃ na paṭibaloti attho. Vinetuṃ na paṭibaloti ca sabbattha sikkhāpetuṃ na sakkotīti attho. Dhammato vivecetunti dhammena kāraṇena vissajjāpetuṃ. Imasmi pañcake sabbapadesu āpatti. Āpattiṃ na jānātītiādipañcakasmimpi sabbapadesu āpatti. Ūnadasavassapariyosānapañcakepi eseva nayo. Iti ādito tayo pañcakā, catutthe tīṇi padāni, pañcame dve padānīti sabbepi cattāro pañcakā ayuttavasena vuttā. Catutthapañcake dve padāni, pañcame tīṇi, chaṭṭhasattamaaṭṭhamā tayo pañcakāti sabbepi cattāro pañcakā āpattiaṅgavasena vuttā; sukkapakkhe aṭṭhasu anāpattiyevāti.
উপসম্পাদেতব্বপঞ্চককথা নিট্ঠিতা।
Upasampādetabbapañcakakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২৩. উপসম্পাদেতব্বপঞ্চকং • 23. Upasampādetabbapañcakaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উপসম্পাদেতব্বপঞ্চককথাৰণ্ণনা • Upasampādetabbapañcakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপসম্পাদেতব্বপঞ্চককথাৰণ্ণনা • Upasampādetabbapañcakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপসম্পাদেতব্বপঞ্চককথাৰণ্ণনা • Upasampādetabbapañcakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২৩. উপসম্পাদেতব্বপঞ্চককথা • 23. Upasampādetabbapañcakakathā
