| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২৩. উপসম্পাদেতব্বপঞ্চককথা
23. Upasampādetabbapañcakakathā
৮৪. ইদানি =০১ যং লক্খণং ৰুত্তন্তি সম্বন্ধো। সঙ্খেপতোতি অঙ্গানি অনুদ্ধরিত্ৰা সমাসতো। তত্থাতি যং ‘‘পঞ্চহি ভিক্খৰে অঙ্গেহি সমন্নাগতেন ভিক্খুনা’’তিআদিমাহ, তত্থ। অগুণঙ্গেহীতি গুণৰিরহিতেহি অঙ্গেহি। সোতি ভিক্খু। ন উপসম্পাদেতব্বন্তি এত্থ কম্মৰাচাচরিযেন হুত্ৰা ন উপসম্পাদেতব্বন্তি আসঙ্কা ভৰেয্যাতি আহ ‘‘উপজ্ঝাযেন হুত্ৰা ন উপসম্পাদেতব্ব’’ন্তি। এত্থাতি এতেসু পঞ্চকেসু। আদীসূতি এত্থ পুব্বো নিদস্সনত্থো ইতিসদ্দো লোপো হোতি। ইতিআদীসূতি হি অত্থো। অযুত্তৰসেনাতি অননুরূপৰসেন। যোতি ভিক্খু। হীতি সচ্চং, যস্মা ৰা। পরে চ সমাদপেতুন্তি সম্বন্ধো। তত্থাতি সীলক্খন্ধাদিকে। পরিহরতীতি পরিসং পরিস্সযতো হরতি অপনেতি। তস্সাতি ভিক্খুনো। ‘‘সীলাদীহী’’তিপদং ‘‘পরিহাযতিযেৰা’’তিপদে অপাদানং, ‘‘ন ৰড্ঢতী’’তিপদে করণং। তস্মাতিআদি লদ্ধগুণং। তেনাতি ভিক্খুনা। কস্মা আপত্তিঅঙ্গৰসেন ন ৰুত্তন্তি আহ ‘‘ন হী’’তিআদি। হীতি যস্মা। তস্সেৰাতি খীণাসৰস্সেৰ। ন ৰদেয্যাতি খীণাসৰানং অনভিরতিযা অনুপ্পন্নত্তা ন ৰদেয্য। যদি ন খীণাসৰস্সেৰ উপজ্ঝাযাচরিযভাৰো অনুঞ্ঞাতো, অথ কস্মা খীণাসৰপঞ্চকো ৰুত্তোতি আহ ‘‘যস্মা পনা’’তিআদি। যস্মা ন পরিহাযতীতি সম্বন্ধো।
84. Idāni =01 yaṃ lakkhaṇaṃ vuttanti sambandho. Saṅkhepatoti aṅgāni anuddharitvā samāsato. Tatthāti yaṃ ‘‘pañcahi bhikkhave aṅgehi samannāgatena bhikkhunā’’tiādimāha, tattha. Aguṇaṅgehīti guṇavirahitehi aṅgehi. Soti bhikkhu. Na upasampādetabbanti ettha kammavācācariyena hutvā na upasampādetabbanti āsaṅkā bhaveyyāti āha ‘‘upajjhāyena hutvā na upasampādetabba’’nti. Etthāti etesu pañcakesu. Ādīsūti ettha pubbo nidassanattho itisaddo lopo hoti. Itiādīsūti hi attho. Ayuttavasenāti ananurūpavasena. Yoti bhikkhu. Hīti saccaṃ, yasmā vā. Pare ca samādapetunti sambandho. Tatthāti sīlakkhandhādike. Pariharatīti parisaṃ parissayato harati apaneti. Tassāti bhikkhuno. ‘‘Sīlādīhī’’tipadaṃ ‘‘parihāyatiyevā’’tipade apādānaṃ, ‘‘na vaḍḍhatī’’tipade karaṇaṃ. Tasmātiādi laddhaguṇaṃ. Tenāti bhikkhunā. Kasmā āpattiaṅgavasena na vuttanti āha ‘‘na hī’’tiādi. Hīti yasmā. Tassevāti khīṇāsavasseva. Na vadeyyāti khīṇāsavānaṃ anabhiratiyā anuppannattā na vadeyya. Yadi na khīṇāsavasseva upajjhāyācariyabhāvo anuññāto, atha kasmā khīṇāsavapañcako vuttoti āha ‘‘yasmā panā’’tiādi. Yasmā na parihāyatīti sambandho.
অন্তগ্গাহিকাযাতি সস্সতুচ্ছেদসঙ্খাতং অন্তং লামকং গণ্হাতি, গণ্হাপেতীতি ৰা অন্তগ্গাহিকা, তায। দিট্ঠিযাতি মিচ্ছাদিট্ঠিযা। যত্তকং সুতন্তি ভিক্খুনোৰাদকসিক্খাপদে (পাচি॰ অট্ঠ॰ ১৪৫-১৪৭) ৰুত্তং যত্তকং সুতং। তেনাতি সুতেন ঋ। যং আপত্তাদি তেন জানিতব্বন্তি যোজনা।
Antaggāhikāyāti sassatucchedasaṅkhātaṃ antaṃ lāmakaṃ gaṇhāti, gaṇhāpetīti vā antaggāhikā, tāya. Diṭṭhiyāti micchādiṭṭhiyā. Yattakaṃ sutanti bhikkhunovādakasikkhāpade (pāci. aṭṭha. 145-147) vuttaṃ yattakaṃ sutaṃ. Tenāti sutena ऋ. Yaṃ āpattādi tena jānitabbanti yojanā.
আপত্তিং ন জানাতীতি এত্থ আপত্তিং আপন্নোতি ন জানাতীতি অত্থং দস্সেন্তো আহ ‘‘ইদং নামা’’তিআদি। তত্থ ‘‘আপন্নো’’তি ইমিনা ‘‘আপত্তি’’ন্তিপদং ‘‘আপন্নো’’তিপাঠসেসেন যোজেতব্বন্তি দস্সেতি।
Āpattiṃna jānātīti ettha āpattiṃ āpannoti na jānātīti atthaṃ dassento āha ‘‘idaṃ nāmā’’tiādi. Tattha ‘‘āpanno’’ti iminā ‘‘āpatti’’ntipadaṃ ‘‘āpanno’’tipāṭhasesena yojetabbanti dasseti.
আভিসমাচারিকাযাতি এত্থ উভতোৰিভঙ্গপরিযাপন্নসীলতো অভিৰিসেসেন সম্মা চরিতব্বন্তি আভিসমাচারং, খন্ধকপরিযাপন্নং ৰত্তপটিপত্তিসীলং, তং আরব্ভ পঞ্ঞত্তা আভিসমাচারিকা, খন্ধকপরিযাপন্না সিক্খা, তায। আদিব্রহ্মচারিযকাযাতি এত্থ মগ্গসঙ্খাতস্স ব্রহ্মচরিযস্স আদি মরিযাদো আদিব্রহ্মচরিযো, তস্মিং পৰত্তা আদিব্রহ্মচরিযকা =০২, উভতোৰিভঙ্গপরিযাপন্না সিক্খা, তায। সেক্খপণ্ণত্তিযন্তি সিক্খিতব্বট্ঠেন সিক্খা, সা এৰ ভগৰতা পঞ্ঞত্তত্তা সেক্খপণ্ণত্তি। অথ ৰা সিক্খনং সিক্খা, তায সিক্খনত্থায ভগৰতা পঞ্ঞপীযতীতি সেক্খপণ্ণত্তি উভতোৰিভঙ্গপরিযাপন্নসিক্খাযেৰ, তস্সং। অভিধম্মেতি এত্থ সুত্তন্তপাল়িতো অভি অতিরেকো, অভিৰিসিট্ঠো ৰা ধম্মো অভিধম্মোতি ৰুত্তে নামরূপপরিচ্ছেদকং অভিধম্মপিটকন্তি আহ ‘‘নামরূপপরিচ্ছেদে’’তি। অভিৰিনযেতি এত্থ অভিভৰিত্ৰা কাযৰাচং ৰিনেতীতি অভিৰিনযো, অভিভৰিত্ৰা কাযৰাচং ৰিনেতি এত্থ, এতেনাতি ৰা অভিৰিনযোতি ৰুত্তে ৰিনযপিটকন্তি আহ ‘‘সকলে ৰিনযপিটকে’’তি। সব্বত্থাতি সব্বেসু পদেসু, সব্বেসং ৰা পদানং। অত্থো দট্ঠব্বোতি যোজনা। ‘‘কারণেনা’’তি এত্থ কারণসদ্দেন ‘‘ধম্মতো’’তি এত্থ ধম্মসদ্দস্স সভাৰত্থাদযো নিৰারেত্ৰা কারণত্থতং দীপেতি, এনসদ্দেন তোপচ্চযস্স ৰিসেসনত্থং। ইতীতি এৰং যথাৰুত্তনযেনাতি অত্থো। চতুত্থেতি চতুত্থপঞ্চকে। চতুত্থপঞ্চকতো তীণি পদানি, পঞ্চমপঞ্চকতো দ্ৰে পদানি গহেত্ৰা পঞ্চকং কত্ৰা ৰুত্তং ‘‘চত্তারো পঞ্চকা’’তি। অট্ঠসু পঞ্চকেসূতি সম্বন্ধো।
Ābhisamācārikāyāti ettha ubhatovibhaṅgapariyāpannasīlato abhivisesena sammā caritabbanti ābhisamācāraṃ, khandhakapariyāpannaṃ vattapaṭipattisīlaṃ, taṃ ārabbha paññattā ābhisamācārikā, khandhakapariyāpannā sikkhā, tāya. Ādibrahmacāriyakāyāti ettha maggasaṅkhātassa brahmacariyassa ādi mariyādo ādibrahmacariyo, tasmiṃ pavattā ādibrahmacariyakā =02, ubhatovibhaṅgapariyāpannā sikkhā, tāya. Sekkhapaṇṇattiyanti sikkhitabbaṭṭhena sikkhā, sā eva bhagavatā paññattattā sekkhapaṇṇatti. Atha vā sikkhanaṃ sikkhā, tāya sikkhanatthāya bhagavatā paññapīyatīti sekkhapaṇṇatti ubhatovibhaṅgapariyāpannasikkhāyeva, tassaṃ. Abhidhammeti ettha suttantapāḷito abhi atireko, abhivisiṭṭho vā dhammo abhidhammoti vutte nāmarūpaparicchedakaṃ abhidhammapiṭakanti āha ‘‘nāmarūpaparicchede’’ti. Abhivinayeti ettha abhibhavitvā kāyavācaṃ vinetīti abhivinayo, abhibhavitvā kāyavācaṃ vineti ettha, etenāti vā abhivinayoti vutte vinayapiṭakanti āha ‘‘sakale vinayapiṭake’’ti. Sabbatthāti sabbesu padesu, sabbesaṃ vā padānaṃ. Attho daṭṭhabboti yojanā. ‘‘Kāraṇenā’’ti ettha kāraṇasaddena ‘‘dhammato’’ti ettha dhammasaddassa sabhāvatthādayo nivāretvā kāraṇatthataṃ dīpeti, enasaddena topaccayassa visesanatthaṃ. Itīti evaṃ yathāvuttanayenāti attho. Catuttheti catutthapañcake. Catutthapañcakato tīṇi padāni, pañcamapañcakato dve padāni gahetvā pañcakaṃ katvā vuttaṃ ‘‘cattāro pañcakā’’ti. Aṭṭhasu pañcakesūti sambandho.
ইতি সোল়সপঞ্চকৰিনিচ্ছযে যোজনা সমত্তা।
Iti soḷasapañcakavinicchaye yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২৩. উপসম্পাদেতব্বপঞ্চকং • 23. Upasampādetabbapañcakaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / উপসম্পাদেতব্বপঞ্চককথা • Upasampādetabbapañcakakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উপসম্পাদেতব্বপঞ্চককথাৰণ্ণনা • Upasampādetabbapañcakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপসম্পাদেতব্বপঞ্চককথাৰণ্ণনা • Upasampādetabbapañcakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপসম্পাদেতব্বপঞ্চককথাৰণ্ণনা • Upasampādetabbapañcakakathāvaṇṇanā
