| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
உபஸம்பாதே³தப்³ப³பஞ்சககதா²வண்ணனா
Upasampādetabbapañcakakathāvaṇṇanā
84. பஞ்சஹி , பி⁴க்க²வே, அங்கே³ஹி ஸமன்னாக³தேனாதிஆதீ³ஸு ந ஸாமணேரோ உபட்டா²பேதப்³போ³தி உபஜ்ஜா²யேன ஹுத்வா ஸாமணேரோ ந க³ஹேதப்³போ³. அயமத்தோ² அங்கு³த்தரனிகாயட்ட²கதா²யங் (அ॰ நி॰ அட்ட²॰ 3.5.251-253) வுத்தோயேவ.
84.Pañcahi, bhikkhave, aṅgehi samannāgatenātiādīsu na sāmaṇero upaṭṭhāpetabboti upajjhāyena hutvā sāmaṇero na gahetabbo. Ayamattho aṅguttaranikāyaṭṭhakathāyaṃ (a. ni. aṭṭha. 3.5.251-253) vuttoyeva.
‘‘அத்தானமேவ பட²மங், பதிரூபே நிவேஸயே;
‘‘Attānameva paṭhamaṃ, patirūpe nivesaye;
அத²ஞ்ஞமனுஸாஸெய்ய, ந கிலிஸ்ஸெய்ய பண்டி³தோ’’தி. (த⁴॰ ப॰ 158) –
Athaññamanusāseyya, na kilisseyya paṇḍito’’ti. (dha. pa. 158) –
இமஸ்ஸ அனுரூபவஸேன பட²மங் தாவ அத்தஸம்பத்தியங் நியோஜேதுங் ‘‘ந அஸெக்கே²ன ஸீலக்க²ந்தே⁴னா’’திஆதி³ வுத்தங், ந ஆபத்திஅங்க³வஸேன. தத்த² அஸெக்கே²ன ஸீலக்க²ந்தே⁴னாதி அஸெக்க²ஸ்ஸ ஸீலக்க²ந்தோ⁴ அஸெக்கோ² ஸீலக்க²ந்தோ⁴ நாம. அஸெக்க²ஸ்ஸ அயந்தி ஹி அஸெக்கோ², ஸீலக்க²ந்தோ⁴. ஏவங் ஸப்³ப³த்த². ஏவஞ்ச கத்வா விமுத்திஞாணத³ஸ்ஸனஸங்கா²தஸ்ஸ பச்சவெக்க²ணஞாணஸ்ஸபி அஸெக்க²தா உபபன்னா. அஸெக்க²ஸீலந்தி ச ந மக்³க³ப²லமேவ அதி⁴ப்பேதங், அத² கோ² யங்கிஞ்சி அஸெக்க²ஸந்தானே பவத்தஸீலங் லோகியலோகுத்தரமிஸ்ஸகஸ்ஸ ஸீலஸ்ஸ இதா⁴தி⁴ப்பேதத்தா. ஸமாதி⁴க்க²ந்தா⁴தீ³ஸுபி விமுத்திக்க²ந்த⁴பரியோஸானேஸு அயமேவ நயோ. தஸ்மா யதா² ஸீலஸமாதி⁴பஞ்ஞக்க²ந்தா⁴ மிஸ்ஸகா அதி⁴ப்பேதா, ஏவங் விமுத்திக்க²ந்தோ⁴பீதி தத³ங்க³விமுத்திஆத³யோபி வேதி³தப்³பா³, ந படிப்பஸ்ஸத்³தி⁴விமுத்தி ஏவ. விமுத்திஞாணத³ஸ்ஸனங் பன லோகியமேவ. தேனேவ ஸங்யுத்தனிகாயட்ட²கதா²யங் (ஸங்॰ நி॰ அட்ட²॰ 1.1.135) வுத்தங் ‘‘புரிமேஹி சதூஹி பதே³ஹி லோகியலோகுத்தரஸீலஸமாதி⁴பஞ்ஞாவிமுத்தியோ கதி²தா, விமுத்திஞாணத³ஸ்ஸனங் பச்சவெக்க²ணஞாணங் ஹோதி, தங் லோகியமேவா’’தி.
Imassa anurūpavasena paṭhamaṃ tāva attasampattiyaṃ niyojetuṃ ‘‘na asekkhena sīlakkhandhenā’’tiādi vuttaṃ, na āpattiaṅgavasena. Tattha asekkhena sīlakkhandhenāti asekkhassa sīlakkhandho asekkho sīlakkhandho nāma. Asekkhassa ayanti hi asekkho, sīlakkhandho. Evaṃ sabbattha. Evañca katvā vimuttiñāṇadassanasaṅkhātassa paccavekkhaṇañāṇassapi asekkhatā upapannā. Asekkhasīlanti ca na maggaphalameva adhippetaṃ, atha kho yaṃkiñci asekkhasantāne pavattasīlaṃ lokiyalokuttaramissakassa sīlassa idhādhippetattā. Samādhikkhandhādīsupi vimuttikkhandhapariyosānesu ayameva nayo. Tasmā yathā sīlasamādhipaññakkhandhā missakā adhippetā, evaṃ vimuttikkhandhopīti tadaṅgavimuttiādayopi veditabbā, na paṭippassaddhivimutti eva. Vimuttiñāṇadassanaṃ pana lokiyameva. Teneva saṃyuttanikāyaṭṭhakathāyaṃ (saṃ. ni. aṭṭha. 1.1.135) vuttaṃ ‘‘purimehi catūhi padehi lokiyalokuttarasīlasamādhipaññāvimuttiyo kathitā, vimuttiñāṇadassanaṃ paccavekkhaṇañāṇaṃ hoti, taṃ lokiyamevā’’ti.
அஸ்ஸத்³தோ⁴திஆதீ³ஸு தீஸு வத்தூ²ஸு ஸத்³தா⁴ ஏதஸ்ஸ நத்தீ²தி அஸ்ஸத்³தோ⁴. ஸுக்கபக்கே² ஸத்³த³ஹதீதி ஸத்³தோ⁴, ஸத்³தா⁴ வா ஏதஸ்ஸ அத்தீ²திபி ஸத்³தோ⁴. நத்தி² ஏதஸ்ஸ ஹிரீதி அஹிரிகோ, அகுஸலஸமாபத்தியா அஜிகு³ச்ச²மானஸ்ஸேதங் அதி⁴வசனங். ஹிரீ ஏதஸ்ஸ அத்தீ²தி ஹிரிமா. ந ஒத்தப்பதீதி அனொத்தப்பீ, அகுஸலஸமாபத்தியா ந பா⁴யதீதி வுத்தங் ஹோதி. தப்³பி³பரீதோ ஒத்தப்பீ. குச்சி²தங் ஸீத³தீதி குஸீதோ, ஹீனவீரியஸ்ஸேதங் அதி⁴வசனங். ஆரத்³த⁴ங் வீரியங் ஏதஸ்ஸாதி ஆரத்³த⁴வீரியோ, ஸம்மப்பதா⁴னயுத்தஸ்ஸேதங் அதி⁴வசனங். முட்டா² ஸதி ஏதஸ்ஸாதி முட்ட²ஸ்ஸதி, நட்ட²ஸ்ஸதீதி வுத்தங் ஹோதி. உபட்டி²தா ஸதி ஏதஸ்ஸாதி உபட்டி²தஸ்ஸதி, நிச்சங் ஆரம்மணாபி⁴முக²ப்பவத்தஸதிஸ்ஸேதங் அதி⁴வசனங்.
Assaddhotiādīsu tīsu vatthūsu saddhā etassa natthīti assaddho. Sukkapakkhe saddahatīti saddho, saddhā vā etassa atthītipi saddho. Natthi etassa hirīti ahiriko, akusalasamāpattiyā ajigucchamānassetaṃ adhivacanaṃ. Hirī etassa atthīti hirimā. Na ottappatīti anottappī, akusalasamāpattiyā na bhāyatīti vuttaṃ hoti. Tabbiparīto ottappī. Kucchitaṃ sīdatīti kusīto, hīnavīriyassetaṃ adhivacanaṃ. Āraddhaṃ vīriyaṃ etassāti āraddhavīriyo, sammappadhānayuttassetaṃ adhivacanaṃ. Muṭṭhā sati etassāti muṭṭhassati, naṭṭhassatīti vuttaṃ hoti. Upaṭṭhitā sati etassāti upaṭṭhitassati, niccaṃ ārammaṇābhimukhappavattasatissetaṃ adhivacanaṃ.
அதி⁴ஸீலே ஸீலவிபன்னோ ச அஜ்ஜா²சாரே ஆசாரவிபன்னோ ச ஆபஜ்ஜித்வா அவுட்டி²தோ. ஸஸ்ஸதுச்சே²த³ஸங்கா²தங் அந்தங் க³ண்ஹாதி கா³ஹயதீதி வா அந்தக்³கா³ஹிகா, மிச்சா²தி³ட்டி². புரிமானி த்³வே பதா³னீதி ‘‘ந படிப³லோ ஹோதி அந்தேவாஸிங் வா ஸத்³தி⁴விஹாரிங் வா கி³லானங் உபட்டா²துங் வா உபட்டா²பேதுங் வா, அனபி⁴ரதங் வூபகாஸேதுங் வா வூபகாஸாபேதுங் வா’’தி இமானி த்³வே பதா³னி.
Adhisīlesīlavipanno ca ajjhācāre ācāravipanno ca āpajjitvā avuṭṭhito. Sassatucchedasaṅkhātaṃ antaṃ gaṇhāti gāhayatīti vā antaggāhikā, micchādiṭṭhi. Purimāni dve padānīti ‘‘na paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā, anabhirataṃ vūpakāsetuṃ vā vūpakāsāpetuṃ vā’’ti imāni dve padāni.
அபி⁴விஸிட்டோ² உத்தமோ ஸமாசாரோதி அபி⁴ஸமாசாரோ, அபி⁴ஸமாசாரோவ ஸிக்கி²தப்³ப³தோ ஸிக்கா²தி ஆபி⁴ஸமாசாரிகா ஸிக்கா², அபி⁴ஸமாசாரங் வா ஆரப்³ப⁴ பஞ்ஞத்தா ஸிக்கா² ஆபி⁴ஸமாசாரிகா. மக்³க³ப்³ரஹ்மசரியஸ்ஸ ஆதி³பூ⁴தாதி ஆதி³ப்³ரஹ்மசரியகா, உப⁴தோவிப⁴ங்க³பரியாபன்னஸிக்கா²யேதங் அதி⁴வசனங். தேனேவ ‘‘உப⁴தோவிப⁴ங்க³பரியாபன்னங் ஆதி³ப்³ரஹ்மசரியகங், க²ந்த⁴கவத்தபரியாபன்னங் ஆபி⁴ஸமாசாரிக’’ந்தி விஸுத்³தி⁴மக்³கே³ (விஸுத்³தி⁴॰ 1.11) வுத்தங். தஸ்மா ஸெக்க²பண்ணத்தியந்தி எத்த² ஸிக்கி²தப்³ப³தோ ஸப்³பா³பி உப⁴தோவிப⁴ங்க³பரியாபன்னா பண்ணத்தீதி க³ஹேதப்³பா³. தேனேவ க³ண்டி²பதே³பி வுத்தங் ‘‘ஸெக்க²பண்ணத்தியந்தி பாராஜிகமாதி³ங் கத்வா ஸிக்கி²தப்³ப³ஸிக்கா²பத³பஞ்ஞத்திய’’ந்தி. ஸேஸமெத்த² உத்தானத்த²மேவ.
Abhivisiṭṭho uttamo samācāroti abhisamācāro, abhisamācārova sikkhitabbato sikkhāti ābhisamācārikā sikkhā, abhisamācāraṃ vā ārabbha paññattā sikkhā ābhisamācārikā. Maggabrahmacariyassa ādibhūtāti ādibrahmacariyakā, ubhatovibhaṅgapariyāpannasikkhāyetaṃ adhivacanaṃ. Teneva ‘‘ubhatovibhaṅgapariyāpannaṃ ādibrahmacariyakaṃ, khandhakavattapariyāpannaṃ ābhisamācārika’’nti visuddhimagge (visuddhi. 1.11) vuttaṃ. Tasmā sekkhapaṇṇattiyanti ettha sikkhitabbato sabbāpi ubhatovibhaṅgapariyāpannā paṇṇattīti gahetabbā. Teneva gaṇṭhipadepi vuttaṃ ‘‘sekkhapaṇṇattiyanti pārājikamādiṃ katvā sikkhitabbasikkhāpadapaññattiya’’nti. Sesamettha uttānatthameva.
உபஸம்பாதே³தப்³ப³பஞ்சககதா²வண்ணனா நிட்டி²தா.
Upasampādetabbapañcakakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 23. உபஸம்பாதே³தப்³ப³பஞ்சகங் • 23. Upasampādetabbapañcakaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / உபஸம்பாதே³தப்³ப³பஞ்சககதா² • Upasampādetabbapañcakakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / உபஸம்பாதே³தப்³ப³பஞ்சககதா²வண்ணனா • Upasampādetabbapañcakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபஸம்பாதே³தப்³ப³பஞ்சககதா²வண்ணனா • Upasampādetabbapañcakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 23. உபஸம்பாதே³தப்³ப³பஞ்சககதா² • 23. Upasampādetabbapañcakakathā
