உபஸம்பாதே³தப்³ப³பஞ்சககதா²வண்ணனா

84. உபஜ்ஜா²சரியலக்க²ணகதா²யங் ந ஸாமணேரோ உபட்டா²பேதப்³போ³தி உபஜ்ஜா²யேன ஹுத்வா ந பப்³பா³ஜேதப்³போ³. அஸெக்க²ஸ்ஸ அயந்தி அஸெக்கோ², லோகியலோகுத்தரோ ஸீலக்க²ந்தோ⁴.

அந்தக்³கா³ஹிகாயாதி ஸஸ்ஸதுச்சே²த³கொட்டா²ஸக்³கா³ஹிகாய. பச்சி²மானி த்³வேதி அப்பஸ்ஸுதோ ஹோதி, து³ப்பஞ்ஞோ ஹோதீதி இமானி த்³வே அங்கா³னி. பச்சி²மானி தீணீதி ந படிப³லோ உப்பன்னங் குக்குச்சங் த⁴ம்மதோ வினோதே³துங், ஆபத்திங் ந ஜானாதி, ஆபத்தியா வுட்டா²னங் ந ஜானாதீதி இமானி தீணி. குக்குச்சஸ்ஸ ஹி பாளிஅட்ட²கதா²னயஸங்கா²தத⁴ம்மதோ வினோதே³துங் அபடிப³லதா நாம அப்³யத்ததா ஏவ ஹோதீதி ஸாபி ஆபத்திஅங்க³மேவ வுத்தா.

அபி⁴விஸிட்டோ² உத்தமோ ஸமாசாரோ ஆபி⁴ஸமாசாரோ, வத்தபடிவத்தஸீலங். தங் ஆரப்³ப⁴ பஞ்ஞத்தா க²ந்த⁴கஸிக்கா²பத³ஸங்கா²தா ஸிக்கா² ஆபி⁴ஸமாசாரிகா. ஸிக்கா²பத³ம்பி ஹி தங் தத்த² படிபூரணத்தி²கேஹி உக்³க³ஹணாதி³வஸேன ஸிக்கி²தப்³ப³தோ ‘‘ஸிக்கா²’’தி வுச்சதி. மக்³க³ப்³ரஹ்மசரியஸ்ஸ ஆதி³பூ⁴தா காரணபூ⁴தாதி ஆதி³ப்³ரஹ்மசரியகா ஸிக்கா², உப⁴தோவிப⁴ங்க³பரியாபன்னஸிக்கா²பத³ங். தேனேவ விஸுத்³தி⁴மக்³கே³பி ‘‘உப⁴தோவிப⁴ங்க³பரியாபன்னஸிக்கா²பத³ங் ஆதி³ப்³ரஹ்மசரியகங், க²ந்த⁴கவத்தபஅயாபன்னங் ஆபி⁴ஸமாசாரிக’’ந்தி (விஸுத்³தி⁴॰ 1.11) வுத்தங். தஸ்மா ஸெக்க²பண்ணத்திய’’ந்தி எத்த² ஸிக்கி²தப்³ப³தோ ஸெக்கா², ப⁴க³வதா பஞ்ஞத்தத்தா பண்ணத்தி. ஸப்³பா³பி உப⁴தோவிப⁴ங்க³பரியாபன்னா ஸிக்கா²பத³பண்ணத்தி ‘‘ஸெக்க²பண்ணத்தீ’’தி வுத்தாதி க³ஹேதப்³பா³. நாமரூபபரிச்சே²தே³தி எத்த² குஸலத்திகாதீ³ஹி வுத்தங் ஜாதிபூ⁴மிபுக்³க³லஸம்பயோக³வத்தா²ரம்மணகம்மத்³வாரலக்க²ணரஸாதி³பே⁴தே³ஹி வேத³னாக்க²ந்தா⁴தி³சதுப்³பி³த⁴ங் ஸனிப்³பா³னங் நாமங், பூ⁴துபாதா³யபே⁴த³ங் ரூபஞ்ச பரிச்சி²ந்தி³த்வா ஜானநபஞ்ஞா, தப்பகாஸகோ ச க³ந்தோ² நாமரூபபரிச்சே²தோ³ நாம. இமினா அபி⁴த⁴ம்மத்த²குஸலேன ப⁴விதப்³ப³ந்தி த³ஸ்ஸேதி. ஸிக்கா²பேதுந்தி உக்³க³ண்ஹாபேதுங்.

உபஸம்பாதே³தப்³ப³பஞ்சககதா²வண்ணனா நிட்டி²தா.