| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. উপসেনআসীৰিসসুত্তং
7. Upasenaāsīvisasuttaṃ
৬৯. একং সমযং আযস্মা চ সারিপুত্তো আযস্মা চ উপসেনো রাজগহে ৰিহরন্তি সীতৰনে সপ্পসোণ্ডিকপব্ভারে। তেন খো পন সমযেন আযস্মতো উপসেনস্স কাযে আসীৰিসো পতিতো হোতি। অথ খো আযস্মা উপসেনো ভিক্খূ আমন্তেসি – ‘‘এথ মে, আৰুসো, ইমং কাযং মঞ্চকং আরোপেত্ৰা বহিদ্ধা নীহরথ। পুরাযং কাযো ইধেৰ ৰিকিরতি; সেয্যথাপি ভুসমুট্ঠী’’তি।
69. Ekaṃ samayaṃ āyasmā ca sāriputto āyasmā ca upaseno rājagahe viharanti sītavane sappasoṇḍikapabbhāre. Tena kho pana samayena āyasmato upasenassa kāye āsīviso patito hoti. Atha kho āyasmā upaseno bhikkhū āmantesi – ‘‘etha me, āvuso, imaṃ kāyaṃ mañcakaṃ āropetvā bahiddhā nīharatha. Purāyaṃ kāyo idheva vikirati; seyyathāpi bhusamuṭṭhī’’ti.
এৰং ৰুত্তে, আযস্মা সারিপুত্তো আযস্মন্তং উপসেনং এতদৰোচ – ‘‘ন খো পন মযং পস্সাম আযস্মতো উপসেনস্স কাযস্স ৰা অঞ্ঞথত্তং ইন্দ্রিযানং ৰা ৰিপরিণামং। অথ চ পনাযস্মা উপসেনো এৰমাহ – ‘এথ মে, আৰুসো, ইমং কাযং মঞ্চকং আরোপেত্ৰা বহিদ্ধা নীহরথ। পুরাযং কাযো ইধেৰ ৰিকিরতি; সেয্যথাপি ভুসমুট্ঠী’’’তি। ‘‘যস্স নূন, আৰুসো সারিপুত্ত, এৰমস্স – ‘অহং চক্খূতি ৰা মম চক্খূতি ৰা…পে॰… অহং জিৰ্হাতি ৰা মম জিৰ্হাতি ৰা… অহং মনোতি ৰা মম মনোতি ৰা’। তস্স, আৰুসো সারিপুত্ত, সিযা কাযস্স ৰা অঞ্ঞথত্তং ইন্দ্রিযানং ৰা ৰিপরিণামো। ময্হঞ্চ খো, আৰুসো সারিপুত্ত, ন এৰং হোতি – ‘অহং চক্খূতি ৰা মম চক্খূতি ৰা…পে॰… অহং জিৰ্হাতি ৰা মম জিৰ্হাতি ৰা…পে॰… অহং মনোতি ৰা মম মনোতি ৰা’। তস্স ময্হঞ্চ খো, আৰুসো সারিপুত্ত, কিং কাযস্স ৰা অঞ্ঞথত্তং ভৰিস্সতি, ইন্দ্রিযানং ৰা ৰিপরিণামো’’তি!
Evaṃ vutte, āyasmā sāriputto āyasmantaṃ upasenaṃ etadavoca – ‘‘na kho pana mayaṃ passāma āyasmato upasenassa kāyassa vā aññathattaṃ indriyānaṃ vā vipariṇāmaṃ. Atha ca panāyasmā upaseno evamāha – ‘etha me, āvuso, imaṃ kāyaṃ mañcakaṃ āropetvā bahiddhā nīharatha. Purāyaṃ kāyo idheva vikirati; seyyathāpi bhusamuṭṭhī’’’ti. ‘‘Yassa nūna, āvuso sāriputta, evamassa – ‘ahaṃ cakkhūti vā mama cakkhūti vā…pe… ahaṃ jivhāti vā mama jivhāti vā… ahaṃ manoti vā mama manoti vā’. Tassa, āvuso sāriputta, siyā kāyassa vā aññathattaṃ indriyānaṃ vā vipariṇāmo. Mayhañca kho, āvuso sāriputta, na evaṃ hoti – ‘ahaṃ cakkhūti vā mama cakkhūti vā…pe… ahaṃ jivhāti vā mama jivhāti vā…pe… ahaṃ manoti vā mama manoti vā’. Tassa mayhañca kho, āvuso sāriputta, kiṃ kāyassa vā aññathattaṃ bhavissati, indriyānaṃ vā vipariṇāmo’’ti!
‘‘তথা হি পনাযস্মতো উপসেনস্স দীঘরত্তং অহঙ্কারমমঙ্কারমানানুসযো সুসমূহতো। তস্মা আযস্মতো উপসেনস্স ন এৰং হোতি – ‘অহং চক্খূতি ৰা মম চক্খূতি ৰা…পে॰… অহং জিৰ্হাতি ৰা মম জিৰ্হাতি ৰা…পে॰… অহং মনোতি ৰা মম মনোতি ৰা’’’তি। অথ খো তে ভিক্খূ আযস্মতো উপসেনস্স কাযং মঞ্চকং আরোপেত্ৰা বহিদ্ধা নীহরিংসু। অথ খো আযস্মতো উপসেনস্স কাযো তত্থেৰ ৰিকিরি; সেয্যথাপি ভুসমুট্ঠীতি। সত্তমং।
‘‘Tathā hi panāyasmato upasenassa dīgharattaṃ ahaṅkāramamaṅkāramānānusayo susamūhato. Tasmā āyasmato upasenassa na evaṃ hoti – ‘ahaṃ cakkhūti vā mama cakkhūti vā…pe… ahaṃ jivhāti vā mama jivhāti vā…pe… ahaṃ manoti vā mama manoti vā’’’ti. Atha kho te bhikkhū āyasmato upasenassa kāyaṃ mañcakaṃ āropetvā bahiddhā nīhariṃsu. Atha kho āyasmato upasenassa kāyo tattheva vikiri; seyyathāpi bhusamuṭṭhīti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. উপসেনআসীৰিসসুত্তৰণ্ণনা • 7. Upasenaāsīvisasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. উপসেনআসীৰিসসুত্তৰণ্ণনা • 7. Upasenaāsīvisasuttavaṇṇanā
