| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. உபஸேனஆஸீவிஸஸுத்தவண்ணனா
7. Upasenaāsīvisasuttavaṇṇanā
69. ஸத்தமே ஸீதவனேதி ஏவங்னாமகே ஸுஸானவனே. ஸப்பஸொண்டி³கபப்³பா⁴ரேதி ஸப்பப²ணஸதி³ஸதாய ஏவங்லத்³த⁴னாமே பப்³பா⁴ரே. உபஸேனஸ்ஸாதி த⁴ம்மஸேனாபதினோ கனிட்ட²பா⁴திகஉபஸேனத்தே²ரஸ்ஸ. ஆஸீவிஸோ பதிதோ ஹோதீதி தே²ரோ கிர கதப⁴த்தகிச்சோ மஹாசீவரங் க³ஹெத்வா லேணச்சா²யாய மந்த³மந்தே³ன வாதபானவாதேன பீ³ஜியமானோ நிஸீதி³த்வா து³பட்டனிவாஸனே ஸூசிகம்மங் கரோதி. தஸ்மிங் க²ணே லேணச்ச²த³னே த்³வே ஆஸீவிஸபோதகா கீளந்தி. தேஸு ஏகோ பதித்வா தே²ரஸ்ஸ அங்ஸகூடே அவத்தா²ஸி. ஸோ ச பு²ட்ட²விஸோ ஹோதி. தஸ்மா பதிதட்டா²னதோ பட்டா²ய தே²ரஸ்ஸ காயே தீ³பஸிகா² விய வட்டிங் பரியாதி³யமானமேவஸ்ஸ விஸங் ஓதிண்ணங். தே²ரோ விஸஸ்ஸ ததா²க³மனங் தி³ஸ்வா கிஞ்சாபி தங் பதிதமத்தமேவ யதா²பரிச்சே²தே³ன க³தங், அத்தனோ பன இத்³தி⁴ப³லேன ‘‘அயங் அத்தபா⁴வோ லேணே மா வினஸ்ஸதூ’’தி அதி⁴ட்ட²ஹித்வா பி⁴க்கூ² ஆமந்தேஸி. புராயங் காயோ இதே⁴வ விகிரதீதி யாவ ந விகிரதி, தாவ நங் ப³ஹித்³தா⁴ நீஹரதா²தி அத்தோ². அஞ்ஞத²த்தந்தி அஞ்ஞதா²பா⁴வங். இந்த்³ரியானங் வா விபரிணாமந்தி சக்கு²ஸோதாதீ³னங் இந்த்³ரியானங் பகதிவிஜஹனபா⁴வங். தத்தே²வ விகிரீதி ப³ஹி நீஹரித்வா ட²பிதட்டா²னே மஞ்சகஸ்மிங்யேவ விகிரி.
69. Sattame sītavaneti evaṃnāmake susānavane. Sappasoṇḍikapabbhāreti sappaphaṇasadisatāya evaṃladdhanāme pabbhāre. Upasenassāti dhammasenāpatino kaniṭṭhabhātikaupasenattherassa. Āsīviso patito hotīti thero kira katabhattakicco mahācīvaraṃ gahetvā leṇacchāyāya mandamandena vātapānavātena bījiyamāno nisīditvā dupaṭṭanivāsane sūcikammaṃ karoti. Tasmiṃ khaṇe leṇacchadane dve āsīvisapotakā kīḷanti. Tesu eko patitvā therassa aṃsakūṭe avatthāsi. So ca phuṭṭhaviso hoti. Tasmā patitaṭṭhānato paṭṭhāya therassa kāye dīpasikhā viya vaṭṭiṃ pariyādiyamānamevassa visaṃ otiṇṇaṃ. Thero visassa tathāgamanaṃ disvā kiñcāpi taṃ patitamattameva yathāparicchedena gataṃ, attano pana iddhibalena ‘‘ayaṃ attabhāvo leṇe mā vinassatū’’ti adhiṭṭhahitvā bhikkhū āmantesi. Purāyaṃ kāyo idheva vikiratīti yāva na vikirati, tāva naṃ bahiddhā nīharathāti attho. Aññathattanti aññathābhāvaṃ. Indriyānaṃ vā vipariṇāmanti cakkhusotādīnaṃ indriyānaṃ pakativijahanabhāvaṃ. Tattheva vikirīti bahi nīharitvā ṭhapitaṭṭhāne mañcakasmiṃyeva vikiri.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. உபஸேனஆஸீவிஸஸுத்தங் • 7. Upasenaāsīvisasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. உபஸேனஆஸீவிஸஸுத்தவண்ணனா • 7. Upasenaāsīvisasuttavaṇṇanā
