| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๗. อุปเสนอาสีวิสสุตฺตวณฺณนา
7. Upasenaāsīvisasuttavaṇṇanā
๖๙. สตฺตเม สีตวเนติ เอวํนามเก สุสานวเนฯ สปฺปโสณฺฑิกปพฺภาเรติ สปฺปผณสทิสตาย เอวํลทฺธนาเม ปพฺภาเรฯ อุปเสนสฺสาติ ธมฺมเสนาปติโน กนิฎฺฐภาติกอุปเสนเตฺถรสฺสฯ อาสีวิโส ปติโต โหตีติ เถโร กิร กตภตฺตกิโจฺจ มหาจีวรํ คเหตฺวา เลณจฺฉายาย มนฺทมเนฺทน วาตปานวาเตน พีชิยมาโน นิสีทิตฺวา ทุปฎฺฎนิวาสเน สูจิกมฺมํ กโรติฯ ตสฺมิํ ขเณ เลณจฺฉทเน เทฺว อาสีวิสโปตกา กีฬนฺติฯ เตสุ เอโก ปติตฺวา เถรสฺส อํสกูเฎ อวตฺถาสิฯ โส จ ผุฎฺฐวิโส โหติฯ ตสฺมา ปติตฎฺฐานโต ปฎฺฐาย เถรสฺส กาเย ทีปสิขา วิย วฎฺฎิํ ปริยาทิยมานเมวสฺส วิสํ โอติณฺณํฯ เถโร วิสสฺส ตถาคมนํ ทิสฺวา กิญฺจาปิ ตํ ปติตมตฺตเมว ยถาปริเจฺฉเทน คตํ, อตฺตโน ปน อิทฺธิพเลน ‘‘อยํ อตฺตภาโว เลเณ มา วินสฺสตู’’ติ อธิฎฺฐหิตฺวา ภิกฺขู อามเนฺตสิฯ ปุรายํ กาโย อิเธว วิกิรตีติ ยาว น วิกิรติ, ตาว นํ พหิทฺธา นีหรถาติ อโตฺถฯ อญฺญถตฺตนฺติ อญฺญถาภาวํฯ อินฺทฺริยานํ วา วิปริณามนฺติ จกฺขุโสตาทีนํ อินฺทฺริยานํ ปกติวิชหนภาวํฯ ตเตฺถว วิกิรีติ พหิ นีหริตฺวา ฐปิตฎฺฐาเน มญฺจกสฺมิํเยว วิกิริฯ
69. Sattame sītavaneti evaṃnāmake susānavane. Sappasoṇḍikapabbhāreti sappaphaṇasadisatāya evaṃladdhanāme pabbhāre. Upasenassāti dhammasenāpatino kaniṭṭhabhātikaupasenattherassa. Āsīviso patito hotīti thero kira katabhattakicco mahācīvaraṃ gahetvā leṇacchāyāya mandamandena vātapānavātena bījiyamāno nisīditvā dupaṭṭanivāsane sūcikammaṃ karoti. Tasmiṃ khaṇe leṇacchadane dve āsīvisapotakā kīḷanti. Tesu eko patitvā therassa aṃsakūṭe avatthāsi. So ca phuṭṭhaviso hoti. Tasmā patitaṭṭhānato paṭṭhāya therassa kāye dīpasikhā viya vaṭṭiṃ pariyādiyamānamevassa visaṃ otiṇṇaṃ. Thero visassa tathāgamanaṃ disvā kiñcāpi taṃ patitamattameva yathāparicchedena gataṃ, attano pana iddhibalena ‘‘ayaṃ attabhāvo leṇe mā vinassatū’’ti adhiṭṭhahitvā bhikkhū āmantesi. Purāyaṃ kāyo idheva vikiratīti yāva na vikirati, tāva naṃ bahiddhā nīharathāti attho. Aññathattanti aññathābhāvaṃ. Indriyānaṃ vā vipariṇāmanti cakkhusotādīnaṃ indriyānaṃ pakativijahanabhāvaṃ. Tattheva vikirīti bahi nīharitvā ṭhapitaṭṭhāne mañcakasmiṃyeva vikiri.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๗. อุปเสนอาสีวิสสุตฺตํ • 7. Upasenaāsīvisasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๗. อุปเสนอาสีวิสสุตฺตวณฺณนา • 7. Upasenaāsīvisasuttavaṇṇanā
