| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၇. ဥပသေနအာသီဝိသသုတ္တဝဏ္ဏနာ
7. Upasenaāsīvisasuttavaṇṇanā
၆၉. သတ္တမေ သီတဝနေတိ ဧဝံနာမကေ သုသာနဝနေ။ သပ္ပသောဏ္ဍိကပဗ္ဘာရေတိ သပ္ပဖဏသဒိသတာယ ဧဝံလဒ္ဓနာမေ ပဗ္ဘာရေ။ ဥပသေနသ္သာတိ ဓမ္မသေနာပတိနော ကနိဋ္ဌဘာတိကဥပသေနတ္ထေရသ္သ။ အာသီဝိသော ပတိတော ဟောတီတိ ထေရော ကိရ ကတဘတ္တကိစ္စော မဟာစီဝရံ ဂဟေတ္ဝာ လေဏစ္ဆာယာယ မန္ဒမန္ဒေန ဝာတပာနဝာတေန ဗီဇိယမာနော နိသီဒိတ္ဝာ ဒုပဋ္ဋနိဝာသနေ သူစိကမ္မံ ကရောတိ။ တသ္မိံ ခဏေ လေဏစ္ဆဒနေ ဒ္ဝေ အာသီဝိသပောတကာ ကီဠန္တိ။ တေသု ဧကော ပတိတ္ဝာ ထေရသ္သ အံသကူဋေ အဝတ္ထာသိ။ သော စ ဖုဋ္ဌဝိသော ဟောတိ။ တသ္မာ ပတိတဋ္ဌာနတော ပဋ္ဌာယ ထေရသ္သ ကာယေ ဒီပသိခာ ဝိယ ဝဋ္ဋိံ ပရိယာဒိယမာနမေဝသ္သ ဝိသံ ဩတိဏ္ဏံ။ ထေရော ဝိသသ္သ တထာဂမနံ ဒိသ္ဝာ ကိဉ္စာပိ တံ ပတိတမတ္တမေဝ ယထာပရိစ္ဆေဒေန ဂတံ, အတ္တနော ပန ဣဒ္ဓိဗလေန ‘‘အယံ အတ္တဘာဝော လေဏေ မာ ဝိနသ္သတူ’’တိ အဓိဋ္ဌဟိတ္ဝာ ဘိက္ခူ အာမန္တေသိ။ ပုရာယံ ကာယော ဣဓေဝ ဝိကိရတီတိ ယာဝ န ဝိကိရတိ, တာဝ နံ ဗဟိဒ္ဓာ နီဟရထာတိ အတ္ထော။ အညထတ္တန္တိ အညထာဘာဝံ။ ဣန္ဒ္ရိယာနံ ဝာ ဝိပရိဏာမန္တိ စက္ခုသောတာဒီနံ ဣန္ဒ္ရိယာနံ ပကတိဝိဇဟနဘာဝံ။ တတ္ထေဝ ဝိကိရီတိ ဗဟိ နီဟရိတ္ဝာ ဌပိတဋ္ဌာနေ မဉ္စကသ္မိံယေဝ ဝိကိရိ။
69. Sattame sītavaneti evaṃnāmake susānavane. Sappasoṇḍikapabbhāreti sappaphaṇasadisatāya evaṃladdhanāme pabbhāre. Upasenassāti dhammasenāpatino kaniṭṭhabhātikaupasenattherassa. Āsīviso patito hotīti thero kira katabhattakicco mahācīvaraṃ gahetvā leṇacchāyāya mandamandena vātapānavātena bījiyamāno nisīditvā dupaṭṭanivāsane sūcikammaṃ karoti. Tasmiṃ khaṇe leṇacchadane dve āsīvisapotakā kīḷanti. Tesu eko patitvā therassa aṃsakūṭe avatthāsi. So ca phuṭṭhaviso hoti. Tasmā patitaṭṭhānato paṭṭhāya therassa kāye dīpasikhā viya vaṭṭiṃ pariyādiyamānamevassa visaṃ otiṇṇaṃ. Thero visassa tathāgamanaṃ disvā kiñcāpi taṃ patitamattameva yathāparicchedena gataṃ, attano pana iddhibalena ‘‘ayaṃ attabhāvo leṇe mā vinassatū’’ti adhiṭṭhahitvā bhikkhū āmantesi. Purāyaṃ kāyo idheva vikiratīti yāva na vikirati, tāva naṃ bahiddhā nīharathāti attho. Aññathattanti aññathābhāvaṃ. Indriyānaṃ vā vipariṇāmanti cakkhusotādīnaṃ indriyānaṃ pakativijahanabhāvaṃ. Tattheva vikirīti bahi nīharitvā ṭhapitaṭṭhāne mañcakasmiṃyeva vikiri.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. ဥပသေနအာသီဝိသသုတ္တံ • 7. Upasenaāsīvisasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဥပသေနအာသီဝိသသုတ္တဝဏ္ဏနာ • 7. Upasenaāsīvisasuttavaṇṇanā
