| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
7. උපසෙනආසීවිසසුත්‌තවණ්‌ණනා
7. Upasenaāsīvisasuttavaṇṇanā
69. සත්‌තමෙ සීතවනෙති එවංනාමකෙ සුසානවනෙ. සප්‌පසොණ්‌ඩිකපබ්‌භාරෙති සප්‌පඵණසදිසතාය එවංලද්‌ධනාමෙ පබ්‌භාරෙ. උපසෙනස්‌සාති ධම්‌මසෙනාපතිනො කනිට්‌ඨභාතිකඋපසෙනත්‌ථෙරස්‌ස. ආසීවිසො පතිතො හොතීති ථෙරො කිර කතභත්‌තකිච්‌චො මහාචීවරං ගහෙත්‌වා ලෙණච්‌ඡායාය මන්‌දමන්‌දෙන වාතපානවාතෙන බීජියමානො නිසීදිත්‌වා දුපට්‌ටනිවාසනෙ සූචිකම්‌මං කරොති. තස්‌මිං ඛණෙ ලෙණච්‌ඡදනෙ ද්‌වෙ ආසීවිසපොතකා කීළන්‌ති. තෙසු එකො පතිත්‌වා ථෙරස්‌ස අංසකූටෙ අවත්‌ථාසි. සො ච ඵුට්‌ඨවිසො හොති. තස්‌මා පතිතට්‌ඨානතො පට්‌ඨාය ථෙරස්‌ස කායෙ දීපසිඛා විය වට්‌ටිං පරියාදියමානමෙවස්‌ස විසං ඔතිණ්‌ණං. ථෙරො විසස්‌ස තථාගමනං දිස්‌වා කිඤ්‌චාපි තං පතිතමත්‌තමෙව යථාපරිච්‌ඡෙදෙන ගතං, අත්‌තනො පන ඉද්‌ධිබලෙන ‘‘අයං අත්‌තභාවො ලෙණෙ මා විනස්‌සතූ’’ති අධිට්‌ඨහිත්‌වා භික්‌ඛූ ආමන්‌තෙසි. පුරායං කායො ඉධෙව විකිරතීති යාව න විකිරති, තාව නං බහිද්‌ධා නීහරථාති අත්‌ථො. අඤ්‌ඤථත්‌තන්‌ති අඤ්‌ඤථාභාවං. ඉන්‌ද්‍රියානං වා විපරිණාමන්‌ති චක්‌ඛුසොතාදීනං ඉන්‌ද්‍රියානං පකතිවිජහනභාවං. තත්‌ථෙව විකිරීති බහි නීහරිත්‌වා ඨපිතට්‌ඨානෙ මඤ්‌චකස්‌මිංයෙව විකිරි.
69. Sattame sītavaneti evaṃnāmake susānavane. Sappasoṇḍikapabbhāreti sappaphaṇasadisatāya evaṃladdhanāme pabbhāre. Upasenassāti dhammasenāpatino kaniṭṭhabhātikaupasenattherassa. Āsīviso patito hotīti thero kira katabhattakicco mahācīvaraṃ gahetvā leṇacchāyāya mandamandena vātapānavātena bījiyamāno nisīditvā dupaṭṭanivāsane sūcikammaṃ karoti. Tasmiṃ khaṇe leṇacchadane dve āsīvisapotakā kīḷanti. Tesu eko patitvā therassa aṃsakūṭe avatthāsi. So ca phuṭṭhaviso hoti. Tasmā patitaṭṭhānato paṭṭhāya therassa kāye dīpasikhā viya vaṭṭiṃ pariyādiyamānamevassa visaṃ otiṇṇaṃ. Thero visassa tathāgamanaṃ disvā kiñcāpi taṃ patitamattameva yathāparicchedena gataṃ, attano pana iddhibalena ‘‘ayaṃ attabhāvo leṇe mā vinassatū’’ti adhiṭṭhahitvā bhikkhū āmantesi. Purāyaṃ kāyo idheva vikiratīti yāva na vikirati, tāva naṃ bahiddhā nīharathāti attho. Aññathattanti aññathābhāvaṃ. Indriyānaṃ vā vipariṇāmanti cakkhusotādīnaṃ indriyānaṃ pakativijahanabhāvaṃ. Tattheva vikirīti bahi nīharitvā ṭhapitaṭṭhāne mañcakasmiṃyeva vikiri.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. උපසෙනආසීවිසසුත්‌තං • 7. Upasenaāsīvisasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. උපසෙනආසීවිසසුත්‌තවණ්‌ණනා • 7. Upasenaāsīvisasuttavaṇṇanā
