| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. உபஸேனவங்க³ந்தபுத்தத்தே²ரஅபதா³னவண்ணனா
7. Upasenavaṅgantaputtattheraapadānavaṇṇanā
பது³முத்தரங் ப⁴க³வந்தந்திஆதி³கங் ஆயஸ்மதோ உபஸேனவங்க³ந்தபுத்தத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹங்ஸவதீனக³ரே குலகே³ஹே நிப்³ப³த்தித்வா வயப்பத்தோ ஸத்து² ஸந்திகங் க³ந்த்வா த⁴ம்மங் ஸுணந்தோ ஸத்தா²ரங் ஏகங் பி⁴க்கு²ங் ஸமந்தபாஸாதி³கானங் அக்³க³ட்டா²னே ட²பெந்தங் தி³ஸ்வா ஸத்து² அதி⁴காரகம்மங் கத்வா தங் டா²னந்தரங் பத்தெ²த்வா யாவஜீவங் குஸலங் கத்வா தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ நாலககா³மே ரூபஸாரீ ப்³ராஹ்மணியா குச்சி²ம்ஹி நிப்³ப³த்தி, உபஸேனோதிஸ்ஸ நாமங் அஹோஸி. ஸோ வயப்பத்தோ தயோ வேதே³ உக்³க³ண்ஹித்வா ஸத்து² ஸந்திகே த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜித்வா உபஸம்பதா³ய ஏகவஸ்ஸிகோ ‘‘அரியக³ப்³ப⁴ங் வட்³டே⁴மீ’’தி ஏகங் குலபுத்தங் அத்தனோ ஸந்திகே உபஸம்பாதெ³த்வா தேன ஸத்³தி⁴ங் ஸத்து² ஸந்திகங் க³தோ. ஸத்தா²ரா சஸ்ஸ தஸ்ஸ அவஸ்ஸிகஸ்ஸ பி⁴க்கு²னோ ஸத்³தி⁴விஹாரிகபா⁴வங் ஸுத்வா ‘‘அதிலஹுங் கோ² த்வங், மோக⁴புரிஸ, பா³ஹுல்லாய ஆவத்தோ’’தி (மஹாவ॰ 75) க³ரஹிதோ ‘‘இதா³னாஹங் யதி³ பரிஸங் நிஸ்ஸாய ஸத்தா²ரா க³ரஹிதோ, பரிஸங்யேவ பன நிஸ்ஸாய ஸத்து² பஸாத³ங் கரிஸ்ஸாமீ’’தி விபஸ்ஸனாய கம்மங் கரொந்தோ நசிரஸ்ஸேவ அரஹத்தங் பாபுணி. அரஹா பன ஹுத்வா ஸயம்பி ஸப்³பே³ து⁴தங்க³த⁴ம்மே ஸமாதா³ய வத்ததி, அஞ்ஞேபி தத³த்தா²ய ஸமாத³பேஸி, தேன நங் ப⁴க³வா ஸமந்தபாஸாதி³கானங் அக்³க³ட்டா²னே ட²பேஸி. ஸோ அபரேன ஸமயேன கோஸம்பி³யங் கலஹே உப்பன்னே பி⁴க்கு²ஸங்கே⁴ ச த்³விதா⁴பூ⁴தே ஏகேன பி⁴க்கு²னா தங் கலஹங் பரிவஜ்ஜிதுகாமேன ‘‘ஏதரஹி கோ² கலஹோ உப்பன்னோ, பி⁴க்கு²ஸங்கோ⁴ ச த்³விதா⁴பூ⁴தோ, கத²ங் நு கோ² மயா படிபஜ்ஜிதப்³ப³’’ந்தி புட்டோ² விவேகவாஸதோ பட்டா²ய தஸ்ஸ படிபத்திங் கதே²ஸி. ஏவங் தே²ரோ தஸ்ஸ பி⁴க்கு²னோ ஓவாத³தா³னாபதே³ஸேன அத்தனோ ததா² படிபன்னபா⁴வங் தீ³பெந்தோ அஞ்ஞங் ப்³யாகாஸி.
Padumuttaraṃ bhagavantantiādikaṃ āyasmato upasenavaṅgantaputtattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare kulagehe nibbattitvā vayappatto satthu santikaṃ gantvā dhammaṃ suṇanto satthāraṃ ekaṃ bhikkhuṃ samantapāsādikānaṃ aggaṭṭhāne ṭhapentaṃ disvā satthu adhikārakammaṃ katvā taṃ ṭhānantaraṃ patthetvā yāvajīvaṃ kusalaṃ katvā devamanussesu saṃsaranto imasmiṃ buddhuppāde nālakagāme rūpasārī brāhmaṇiyā kucchimhi nibbatti, upasenotissa nāmaṃ ahosi. So vayappatto tayo vede uggaṇhitvā satthu santike dhammaṃ sutvā paṭiladdhasaddho pabbajitvā upasampadāya ekavassiko ‘‘ariyagabbhaṃ vaḍḍhemī’’ti ekaṃ kulaputtaṃ attano santike upasampādetvā tena saddhiṃ satthu santikaṃ gato. Satthārā cassa tassa avassikassa bhikkhuno saddhivihārikabhāvaṃ sutvā ‘‘atilahuṃ kho tvaṃ, moghapurisa, bāhullāya āvatto’’ti (mahāva. 75) garahito ‘‘idānāhaṃ yadi parisaṃ nissāya satthārā garahito, parisaṃyeva pana nissāya satthu pasādaṃ karissāmī’’ti vipassanāya kammaṃ karonto nacirasseva arahattaṃ pāpuṇi. Arahā pana hutvā sayampi sabbe dhutaṅgadhamme samādāya vattati, aññepi tadatthāya samādapesi, tena naṃ bhagavā samantapāsādikānaṃ aggaṭṭhāne ṭhapesi. So aparena samayena kosambiyaṃ kalahe uppanne bhikkhusaṅghe ca dvidhābhūte ekena bhikkhunā taṃ kalahaṃ parivajjitukāmena ‘‘etarahi kho kalaho uppanno, bhikkhusaṅgho ca dvidhābhūto, kathaṃ nu kho mayā paṭipajjitabba’’nti puṭṭho vivekavāsato paṭṭhāya tassa paṭipattiṃ kathesi. Evaṃ thero tassa bhikkhuno ovādadānāpadesena attano tathā paṭipannabhāvaṃ dīpento aññaṃ byākāsi.
86. ஸோ ஏவங் பத்தஏதத³க்³க³ட்டா²னோ அத்தனோ புப்³ப³கம்மங் ஸரித்வா ஸோமனஸ்ஸவஸேன புப்³ப³சரிதாபதா³னங் பகாஸெந்தோ பது³முத்தரங் ப⁴க³வந்தந்திஆதி³மாஹ. பப்³பா⁴ரம்ஹி நிஸீத³ந்தந்தி புரதோ பா⁴ரங் நமிதங் ஓனமிதந்தி பப்³பா⁴ரங் விவேககாமங் வனமஜ்ஜே² ஸயங்ஜாதபப்³ப³தபப்³பா⁴ரே நிஸின்னங் நருத்தமங் ப⁴க³வந்தங் அஹங் உபக³ச்சி²ங் ஸமீபங் க³தோதி அத்தோ².
86. So evaṃ pattaetadaggaṭṭhāno attano pubbakammaṃ saritvā somanassavasena pubbacaritāpadānaṃ pakāsento padumuttaraṃ bhagavantantiādimāha. Pabbhāramhi nisīdantanti purato bhāraṃ namitaṃ onamitanti pabbhāraṃ vivekakāmaṃ vanamajjhe sayaṃjātapabbatapabbhāre nisinnaṃ naruttamaṃ bhagavantaṃ ahaṃ upagacchiṃ samīpaṃ gatoti attho.
87. கணிகாரபுப்ப² தி³ஸ்வாதி ததா² உபக³ச்ச²ந்தோ தஸ்மிங் பதே³ஸே ஸுபுப்பி²தங் கணிகாரங் தி³ஸ்வா. வண்டே செ²த்வானஹங் ததா³தி தஸ்மிங் ததா²க³தஸ்ஸ தி³ட்ட²காலே தங் புப்ப²ங் வண்டே வண்டஸ்மிங் செ²த்வான சி²ந்தி³த்வான. அலங்கரித்வா ச²த்தம்ஹீதி தேன புப்பே²ன ச²த்தங் சா²தெ³த்வா. பு³த்³த⁴ஸ்ஸ அபி⁴ரோபயிந்தி பப்³பா⁴ரே நிஸின்னஸ்ஸ பு³த்³த⁴ஸ்ஸ முத்³த⁴னி அகாஸிந்தி அத்தோ².
87.Kaṇikārapuppha disvāti tathā upagacchanto tasmiṃ padese supupphitaṃ kaṇikāraṃ disvā. Vaṇṭe chetvānahaṃ tadāti tasmiṃ tathāgatassa diṭṭhakāle taṃ pupphaṃ vaṇṭe vaṇṭasmiṃ chetvāna chinditvāna. Alaṅkaritvā chattamhīti tena pupphena chattaṃ chādetvā. Buddhassa abhiropayinti pabbhāre nisinnassa buddhassa muddhani akāsinti attho.
88. பிண்ட³பாதஞ்ச பாதா³ஸிந்தி தஸ்மிங்யேவ நிஸின்னஸ்ஸ ப⁴க³வதோ பிண்ட³பாதங் பகாரேன அதா³ஸிங் போ⁴ஜேஸிந்தி அத்தோ². பரமன்னங் ஸுபோ⁴ஜனந்தி ஸுந்த³ரபோ⁴ஜனஸங்கா²தங் பரமன்னங் உத்தமாஹாரங். பு³த்³தே⁴ன நவமே தத்தா²தி தஸ்மிங் விவேகட்டா²னே பு³த்³தே⁴ன ஸஹ நவமே அட்ட² ஸமணே ஸமிதபாபே கீ²ணாஸவபி⁴க்கூ² போ⁴ஜேஸிந்தி அத்தோ².
88.Piṇḍapātañcapādāsinti tasmiṃyeva nisinnassa bhagavato piṇḍapātaṃ pakārena adāsiṃ bhojesinti attho. Paramannaṃ subhojananti sundarabhojanasaṅkhātaṃ paramannaṃ uttamāhāraṃ. Buddhena navame tatthāti tasmiṃ vivekaṭṭhāne buddhena saha navame aṭṭha samaṇe samitapāpe khīṇāsavabhikkhū bhojesinti attho.
யங் வத³ந்தி ஸுமேதோ⁴தி யங் கோ³தமஸம்மாஸம்பு³த்³த⁴ங் பூ⁴ரிபஞ்ஞங் பத²விஸமானங் பஞ்ஞங் ஸுமேத⁴ங் ஸுந்த³ரங் ஸப்³ப³ஞ்ஞுதாதி³பஞ்ஞவந்தங். ஸுமேதோ⁴ இதி ஸுந்த³ரபஞ்ஞோ இதி வத³ந்தி பண்டி³தா இதோ கப்பதோ ஸதஸஹஸ்ஸே கப்பே ஏஸோ கோ³தமோ ஸம்மாஸம்பு³த்³தோ⁴ ப⁴விஸ்ஸதீதி ஸம்ப³ந்தோ⁴. ஸேஸங் ஸுவிஞ்ஞெய்யமேவாதி.
Yaṃ vadanti sumedhoti yaṃ gotamasammāsambuddhaṃ bhūripaññaṃ pathavisamānaṃ paññaṃ sumedhaṃ sundaraṃ sabbaññutādipaññavantaṃ. Sumedho iti sundarapañño iti vadanti paṇḍitā ito kappato satasahasse kappe eso gotamo sammāsambuddho bhavissatīti sambandho. Sesaṃ suviññeyyamevāti.
உபஸேனவங்க³ந்தபுத்தத்தே²ரஅபதா³னவண்ணனா ஸமத்தா.
Upasenavaṅgantaputtattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. உபஸேனவங்க³ந்தபுத்தத்தே²ரஅபதா³னங் • 7. Upasenavaṅgantaputtattheraapadānaṃ
