| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
६. उपसीवमाणवपुच्छा
6. Upasīvamāṇavapucchā
१०७५.
1075.
‘‘एको अहं सक्क महन्तमोघं, (इच्चायस्मा उपसीवो)
‘‘Eko ahaṃ sakka mahantamoghaṃ, (iccāyasmā upasīvo)
अनिस्सितो नो विसहामि तारितुं।
Anissito no visahāmi tārituṃ;
आरम्मणं ब्रूहि समन्तचक्खु, यं निस्सितो ओघमिमं तरेय्यं’’॥
Ārammaṇaṃ brūhi samantacakkhu, yaṃ nissito oghamimaṃ tareyyaṃ’’.
१०७६.
1076.
‘‘आकिञ्चञ्ञं पेक्खमानो सतिमा, (उपसीवाति भगवा)
‘‘Ākiñcaññaṃ pekkhamāno satimā, (upasīvāti bhagavā)
नत्थीति निस्साय तरस्सु ओघं।
Natthīti nissāya tarassu oghaṃ;
कामे पहाय विरतो कथाहि, तण्हक्खयं नत्तमहाभिपस्स’’ 1॥
Kāme pahāya virato kathāhi, taṇhakkhayaṃ nattamahābhipassa’’ 2.
१०७७.
1077.
‘‘सब्बेसु कामेसु यो वीतरागो, (इच्चायस्मा उपसीवो)
‘‘Sabbesu kāmesu yo vītarāgo, (iccāyasmā upasīvo)
आकिञ्चञ्ञं निस्सितो हित्वा मञ्ञं।
Ākiñcaññaṃ nissito hitvā maññaṃ;
१०७८.
1078.
‘‘सब्बेसु कामेसु यो वीतरागो, (उपसीवाति भगवा)
‘‘Sabbesu kāmesu yo vītarāgo, (upasīvāti bhagavā)
आकिञ्चञ्ञं निस्सितो हित्वा मञ्ञं।
Ākiñcaññaṃ nissito hitvā maññaṃ;
सञ्ञाविमोक्खे परमे विमुत्तो, तिट्ठेय्य सो तत्थ अनानुयायी’’॥
Saññāvimokkhe parame vimutto, tiṭṭheyya so tattha anānuyāyī’’.
१०७९.
1079.
‘‘तिट्ठे चे सो तत्थ अनानुयायी, पूगम्पि वस्सानं समन्तचक्खु।
‘‘Tiṭṭhe ce so tattha anānuyāyī, pūgampi vassānaṃ samantacakkhu;
तत्थेव सो सीतिसिया विमुत्तो, चवेथ विञ्ञाणं तथाविधस्स’’॥
Tattheva so sītisiyā vimutto, cavetha viññāṇaṃ tathāvidhassa’’.
१०८०.
1080.
‘‘अच्ची यथा वातवेगेन खित्ता 7, (उपसीवाति भगवा)
‘‘Accī yathā vātavegena khittā 8, (upasīvāti bhagavā)
अत्थं पलेति न उपेति सङ्खं।
Atthaṃ paleti na upeti saṅkhaṃ;
एवं मुनी नामकाया विमुत्तो, अत्थं पलेति न उपेति सङ्खं’’॥
Evaṃ munī nāmakāyā vimutto, atthaṃ paleti na upeti saṅkhaṃ’’.
१०८१.
1081.
‘‘अत्थङ्गतो सो उद वा सो नत्थि, उदाहु वे सस्सतिया अरोगो।
‘‘Atthaṅgato so uda vā so natthi, udāhu ve sassatiyā arogo;
तं मे मुनी साधु वियाकरोहि, तथा हि ते विदितो एस धम्मो’’॥
Taṃ me munī sādhu viyākarohi, tathā hi te vidito esa dhammo’’.
१०८२.
1082.
‘‘अत्थङ्गतस्स न पमाणमत्थि, (उपसीवाति भगवा)
‘‘Atthaṅgatassa na pamāṇamatthi, (upasīvāti bhagavā)
येन नं वज्जुं तं तस्स नत्थि।
Yena naṃ vajjuṃ taṃ tassa natthi;
सब्बेसु धम्मेसु समोहतेसु, समूहता वादपथापि सब्बे’’ति॥
Sabbesu dhammesu samohatesu, samūhatā vādapathāpi sabbe’’ti.
उपसीवमाणवपुच्छा छट्ठी निट्ठिता।
Upasīvamāṇavapucchā chaṭṭhī niṭṭhitā.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ६. उपसीवसुत्तवण्णना • 6. Upasīvasuttavaṇṇanā
