| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
6. உபஸீவமாணவஸுத்தனித்³தே³ஸவண்ணனா
6. Upasīvamāṇavasuttaniddesavaṇṇanā
38. ச²ட்டே² உபஸீவஸுத்தே – மஹந்தமோக⁴ந்தி மஹந்தங் ஓக⁴ங். அனிஸ்ஸிதோதி புக்³க³லங் வா த⁴ம்மங் வா அனல்லீனோ. நோ விஸஹாமீதி ந ஸக்கோமி. ஆரம்மணந்தி நிஸ்ஸயங். யங் நிஸ்ஸிதோதி யங் த⁴ம்மங் வா புக்³க³லங் வா நிஸ்ஸிதோ.
38. Chaṭṭhe upasīvasutte – mahantamoghanti mahantaṃ oghaṃ. Anissitoti puggalaṃ vā dhammaṃ vā anallīno. No visahāmīti na sakkomi. Ārammaṇanti nissayaṃ. Yaṃ nissitoti yaṃ dhammaṃ vā puggalaṃ vā nissito.
நித்³தே³ஸே காமோக⁴ந்தி அனாகா³மிமக்³கே³ன காமோக⁴ங். அரஹத்தமக்³கே³ன ப⁴வோக⁴ங். ஸோதாபத்திமக்³கே³ன தி³ட்டோ²க⁴ங். அரஹத்தமக்³கே³ன அவிஜ்ஜோக⁴ங் தரெய்யங். ஸக்யகுலா பப்³ப³ஜிதோதி ப⁴க³வதோ உச்சாகுலபரிதீ³பனவஸேன வுத்தங். ஆலம்ப³ணந்தி அவத்த²ரித்வா டா²னங். நிஸ்ஸயந்தி அல்லீயனங். உபனிஸ்ஸயந்தி அபஸ்ஸயனங்.
Niddese kāmoghanti anāgāmimaggena kāmoghaṃ. Arahattamaggena bhavoghaṃ. Sotāpattimaggena diṭṭhoghaṃ. Arahattamaggena avijjoghaṃ tareyyaṃ. Sakyakulā pabbajitoti bhagavato uccākulaparidīpanavasena vuttaṃ. Ālambaṇanti avattharitvā ṭhānaṃ. Nissayanti allīyanaṃ. Upanissayanti apassayanaṃ.
39. இதா³னி யஸ்மா ப்³ராஹ்மணோ ஆகிஞ்சஞ்ஞாயதனலாபீ⁴ தஞ்ச ஸந்தம்பி நிஸ்ஸயங் ந ஜானாதி. தேனஸ்ஸ ப⁴க³வா தஞ்ச நிஸ்ஸயங் உத்தரிஞ்ச நிய்யானபத²ங் த³ஸ்ஸெந்தோ ‘‘ஆகிஞ்சஞ்ஞ’’ந்தி கா³த²மாஹ. தத்த² பெக்க²மானோதி தங் ஆகிஞ்சஞ்ஞாயதனஸமாபத்திங் ஸதோ ஸமாபஜ்ஜித்வா வுட்ட²ஹித்வா ச அனிச்சாதி³வஸேன பஸ்ஸமானோ. நத்தீ²தி நிஸ்ஸாயாதி தங் ‘‘நத்தி² கிஞ்சீ’’தி பவத்தங் ஸமாபத்திங் ஆரம்மணங் கத்வா. தரஸ்ஸு ஓக⁴ந்தி ததோ பபு⁴தி பவத்தாய விபஸ்ஸனாய யதா²னுரூபங் சதுப்³பி³த⁴ம்பி ஓக⁴ங் தரஸ்ஸு. கதா²ஹீதி கத²ங்கதா²ஹி. தண்ஹக்க²யங் நத்தமஹாபி⁴பஸ்ஸாதி ரத்திந்தி³வங் நிப்³பா³னங் விபூ⁴தங் கத்வா பஸ்ஸ. ஏதேனஸ்ஸ தி³ட்ட²த⁴ம்மஸுக²விஹாரங் கதே²ஸி.
39. Idāni yasmā brāhmaṇo ākiñcaññāyatanalābhī tañca santampi nissayaṃ na jānāti. Tenassa bhagavā tañca nissayaṃ uttariñca niyyānapathaṃ dassento ‘‘ākiñcañña’’nti gāthamāha. Tattha pekkhamānoti taṃ ākiñcaññāyatanasamāpattiṃ sato samāpajjitvā vuṭṭhahitvā ca aniccādivasena passamāno. Natthīti nissāyāti taṃ ‘‘natthi kiñcī’’ti pavattaṃ samāpattiṃ ārammaṇaṃ katvā. Tarassu oghanti tato pabhuti pavattāya vipassanāya yathānurūpaṃ catubbidhampi oghaṃ tarassu. Kathāhīti kathaṃkathāhi. Taṇhakkhayaṃ nattamahābhipassāti rattindivaṃ nibbānaṃ vibhūtaṃ katvā passa. Etenassa diṭṭhadhammasukhavihāraṃ kathesi.
நித்³தே³ஸே தஞ்ஞேவ விஞ்ஞாணங் அபா⁴வேதீதி ஆகாஸாலம்ப³ணங் கத்வா பவத்தமஹக்³க³தவிஞ்ஞாணங் அபா⁴வேதி அபா⁴வங் க³மேதி. விபா⁴வேதீதி விவிதா⁴ அபா⁴வங் க³மேதி. அந்தரதா⁴பேதீதி அத³ஸ்ஸனங் க³மேதி. நத்தி² கிஞ்சீதி பஸ்ஸதீதி அந்தமஸோ ப⁴ங்க³மத்தம்பிஸ்ஸ நத்தீ²தி பஸ்ஸதி.
Niddese taññeva viññāṇaṃ abhāvetīti ākāsālambaṇaṃ katvā pavattamahaggataviññāṇaṃ abhāveti abhāvaṃ gameti. Vibhāvetīti vividhā abhāvaṃ gameti. Antaradhāpetīti adassanaṃ gameti. Natthi kiñcīti passatīti antamaso bhaṅgamattampissa natthīti passati.
40. இதா³னி ‘‘காமே பஹாயா’’தி ஸுத்வா விக்க²ம்ப⁴னவஸேன அத்தனா பஹீனே காமே ஸம்பஸ்ஸமானோ ‘‘ஸப்³பே³ஸூ’’தி கா³த²மாஹ. தத்த² ஹித்வா மஞ்ஞந்தி அஞ்ஞங் ததோ ஹெட்டா² ச²ப்³பி³த⁴ம்பி ஸமாபத்திங் ஹித்வா. ஸஞ்ஞாவிமொக்கே² பரமேதி ஸத்தஸு ஸஞ்ஞாவிமொக்கே²ஸு உத்தமே ஆகிஞ்சஞ்ஞாயதனே. திட்டே² நு ஸோ தத்த² அனானுயாயீதி ஸோ புக்³க³லோ தத்த² ஆகிஞ்சஞ்ஞாயதனப்³ரஹ்மலோகே அவிக³ச்ச²மானோ திட்டெ²ய்ய நூதி புச்ச²தி.
40. Idāni ‘‘kāme pahāyā’’ti sutvā vikkhambhanavasena attanā pahīne kāme sampassamāno ‘‘sabbesū’’ti gāthamāha. Tattha hitvāmaññanti aññaṃ tato heṭṭhā chabbidhampi samāpattiṃ hitvā. Saññāvimokkhe parameti sattasu saññāvimokkhesu uttame ākiñcaññāyatane. Tiṭṭhe nu so tattha anānuyāyīti so puggalo tattha ākiñcaññāyatanabrahmaloke avigacchamāno tiṭṭheyya nūti pucchati.
நித்³தே³ஸே அவிச்சமானோதி அவியுஜ்ஜமானோ. அவிக³ச்ச²மானோதி வியோக³ங் அனாபஜ்ஜமானோ. அனந்தரதா⁴யமானோதி அந்தரதா⁴னங் அனாபஜ்ஜமானோ. அபரிஹாயமானோதி அனந்தரா பரிஹானங் அனாபஜ்ஜமானோ.
Niddese aviccamānoti aviyujjamāno. Avigacchamānoti viyogaṃ anāpajjamāno. Anantaradhāyamānoti antaradhānaṃ anāpajjamāno. Aparihāyamānoti anantarā parihānaṃ anāpajjamāno.
41-2. அத²ஸ்ஸ ப⁴க³வா ஸட்டி²கப்பஸஹஸ்ஸமத்தகங்யேவ டா²னங் அனுஜானந்தோ சதுத்த²ங் கா³த²மாஹ. ஏவங் தஸ்ஸ தத்த² டா²னங் ஸுத்வா இதா³னிஸ்ஸ ஸஸ்ஸதுச்சே²த³பா⁴வங் புச்ச²ந்தோ ‘‘திட்டே² சே’’தி கா³த²மாஹ. தத்த² பூக³ம்பி வஸ்ஸானந்தி அனேகஸங்க்²யம்பி வஸ்ஸானங், க³ணனராஸிந்தி அத்தோ². ‘‘பூக³ம்பி வஸ்ஸானீ’’திபி பாடோ². தத்த² விப⁴த்திப்³யத்தயேன ஸாமிவசனஸ்ஸ பச்சத்தவசனங் காதப்³ப³ங், பூக³ந்தி வா ஏதஸ்ஸ ப³ஹூனீதி அத்தோ² வத்தப்³போ³. ‘‘பூகா³னீ’’தி வாபி பட²ந்தி, புரிமபாடோ²யேவ ஸப்³ப³ஸுந்த³ரோ. தத்தே²வ ஸோ ஸீதி ஸியா விமுத்தோதி ஸோ புக்³க³லோ தத்தே²வாகிஞ்சஞ்ஞாயதனே நானாது³க்கே²ஹி விமுத்தோ ஸீதிபா⁴வப்பத்தோ ப⁴வெய்ய, நிப்³பா³னப்பத்தோ ஸஸ்ஸதோ ஹுத்வா திட்டெ²ய்யாதி அதி⁴ப்பாயோ. சவேத² விஞ்ஞாணங் ததா²வித⁴ஸ்ஸாதி ‘‘உதா³ஹு ததா²வித⁴ஸ்ஸ விஞ்ஞாணங் அனுபாதா³ய பரினிப்³பா³யெய்யா’’தி உச்சே²த³ங் புச்ச²தி, ‘‘படிஸந்தி⁴க்³க³ஹணத்த²ங் வாபி ப⁴வெய்யா’’தி படிஸந்தி⁴ம்பி தஸ்ஸ புச்ச²தி.
41-2. Athassa bhagavā saṭṭhikappasahassamattakaṃyeva ṭhānaṃ anujānanto catutthaṃ gāthamāha. Evaṃ tassa tattha ṭhānaṃ sutvā idānissa sassatucchedabhāvaṃ pucchanto ‘‘tiṭṭhe ce’’ti gāthamāha. Tattha pūgampi vassānanti anekasaṅkhyampi vassānaṃ, gaṇanarāsinti attho. ‘‘Pūgampi vassānī’’tipi pāṭho. Tattha vibhattibyattayena sāmivacanassa paccattavacanaṃ kātabbaṃ, pūganti vā etassa bahūnīti attho vattabbo. ‘‘Pūgānī’’ti vāpi paṭhanti, purimapāṭhoyeva sabbasundaro. Tattheva so sīti siyā vimuttoti so puggalo tatthevākiñcaññāyatane nānādukkhehi vimutto sītibhāvappatto bhaveyya, nibbānappatto sassato hutvā tiṭṭheyyāti adhippāyo. Cavetha viññāṇaṃ tathāvidhassāti ‘‘udāhu tathāvidhassa viññāṇaṃ anupādāya parinibbāyeyyā’’ti ucchedaṃ pucchati, ‘‘paṭisandhiggahaṇatthaṃ vāpi bhaveyyā’’ti paṭisandhimpi tassa pucchati.
தஸ்ஸ விஞ்ஞாணங் சவெய்யாதி தஸ்ஸ ஆகிஞ்சஞ்ஞாயதனே உப்பன்னஸ்ஸ விஞ்ஞாணங் சுதிங் பாபுணெய்ய. உச்சி²ஜ்ஜெய்யாதி உச்சே²த³ங் ப⁴வெய்ய. வினஸ்ஸெய்யாதி வினாஸங் பாபுணெய்ய. ந ப⁴வெய்யாதி அபா⁴வங் க³மெய்ய. உபபன்னஸ்ஸாதி படிஸந்தி⁴வஸேன உபபன்னஸ்ஸ.
Tassa viññāṇaṃ caveyyāti tassa ākiñcaññāyatane uppannassa viññāṇaṃ cutiṃ pāpuṇeyya. Ucchijjeyyāti ucchedaṃ bhaveyya. Vinasseyyāti vināsaṃ pāpuṇeyya. Na bhaveyyāti abhāvaṃ gameyya. Upapannassāti paṭisandhivasena upapannassa.
43. அத²ஸ்ஸ ப⁴க³வா உச்சே²த³ஸஸ்ஸதங் அனுபக³ம்ம தத்து²பபன்னஸ்ஸ அரியஸாவகஸ்ஸ அனுபாதா³ய பரினிப்³பா³னங் த³ஸ்ஸெந்தோ ‘‘அச்சீ யதா²’’தி கா³த²மாஹ. தத்த² அத்த²ங் பலேதீதி அத்த²ங் க³ச்ச²தி. ந உபேதி ஸங்க²ந்தி ‘‘அஸுகங் நாம தி³ஸங் க³தோ’’தி வோஹாரங் ந க³ச்ச²தி. ஏவங் முனீ நாமகாயா விமுத்தோதி ஏவங் தத்த² உப்பன்னோ ஸெக்க²முனி பகதியா புப்³பே³வ ரூபகாயா விமுத்தோ, தத்த² சதுத்த²மக்³க³ங் நிப்³ப³த்தெத்வா த⁴ம்மகாயஸ்ஸ பரிஞ்ஞாதத்தா புன நாமகாயாபி விமுத்தோ உப⁴தோபா⁴க³விமுத்தோ கீ²ணாஸவோ ஹுத்வா அனுபாதா³னிப்³பா³னஸங்கா²தங் அத்த²ங் பலேதி ந உபேதி ஸங்க²ங் ‘‘க²த்தியோ வா ப்³ராஹ்மணோ வா’’தி ஏவமாதி³கங்.
43. Athassa bhagavā ucchedasassataṃ anupagamma tatthupapannassa ariyasāvakassa anupādāya parinibbānaṃ dassento ‘‘accī yathā’’ti gāthamāha. Tattha atthaṃ paletīti atthaṃ gacchati. Na upeti saṅkhanti ‘‘asukaṃ nāma disaṃ gato’’ti vohāraṃ na gacchati. Evaṃ munī nāmakāyā vimuttoti evaṃ tattha uppanno sekkhamuni pakatiyā pubbeva rūpakāyā vimutto, tattha catutthamaggaṃ nibbattetvā dhammakāyassa pariññātattā puna nāmakāyāpi vimutto ubhatobhāgavimutto khīṇāsavo hutvā anupādānibbānasaṅkhātaṃ atthaṃ paleti na upeti saṅkhaṃ ‘‘khattiyo vā brāhmaṇo vā’’ti evamādikaṃ.
நித்³தே³ஸே கி²த்தாதி சலிதா. உக்கி²த்தாதி அதிசலிதா. நுன்னாதி பப்போ²டியா. பணுன்னாதி தூ³ரீகதா. க²ம்பி⁴தாதி படிக்கமாபிதா. விக்க²ம்பி⁴தாதி ந ஸந்திகே கதா.
Niddese khittāti calitā. Ukkhittāti aticalitā. Nunnāti papphoṭiyā. Paṇunnāti dūrīkatā. Khambhitāti paṭikkamāpitā. Vikkhambhitāti na santike katā.
44. இதா³னி ‘‘அத்த²ங் பலேதீ’’தி ஸுத்வா தஸ்ஸ யோனிஸோ அத்த²மஸல்லக்கெ²ந்தோ ‘‘அத்த²ங்க³தோ ஸோ’’தி கா³த²மாஹ. தஸ்ஸத்தோ² – ஸோ அத்த²ங்க³தோ உதா³ஹு நத்தி², உதா³ஹு வே ஸஸ்ஸதியா ஸஸ்ஸதபா⁴வேன அரோகோ³ அவிபரிணாமத⁴ம்மோ ஸோதி ஏவங் தங் மே முனீ ஸாது⁴ ப்³யாகரோஹி. கிங்காரணா? ததா² ஹி தே விதி³தோ ஏஸ த⁴ம்மோதி.
44. Idāni ‘‘atthaṃ paletī’’ti sutvā tassa yoniso atthamasallakkhento ‘‘atthaṅgato so’’ti gāthamāha. Tassattho – so atthaṅgato udāhu natthi, udāhu ve sassatiyā sassatabhāvena arogo avipariṇāmadhammo soti evaṃ taṃ me munī sādhu byākarohi. Kiṃkāraṇā? Tathā hi te vidito esa dhammoti.
நித்³தே³ஸே நிருத்³தோ⁴தி நிரோத⁴ங் பத்தோ. உச்சி²ன்னோதி உச்சி²ன்னஸந்தானோ. வினட்டோ²தி வினாஸங் பத்தோ.
Niddese niruddhoti nirodhaṃ patto. Ucchinnoti ucchinnasantāno. Vinaṭṭhoti vināsaṃ patto.
45. அத²ஸ்ஸ ப⁴க³வா ததா² அவத்தப்³ப³தங் த³ஸ்ஸெந்தோ ‘‘அத்த²ங்க³தஸ்ஸா’’தி கா³த²மாஹ. தத்த² அத்த²ங்க³தஸ்ஸாதி அனுபாதா³பரினிப்³பு³தஸ்ஸ. ந பமாணமத்தீ²தி ரூபாதி³பமாணங் நத்தி². யேன நங் வஜ்ஜுந்தி யேன ராகா³தி³னா நங் வதெ³ய்யுங். ஸப்³பே³ஸு த⁴ம்மேஸூதி ஸப்³பே³ஸு க²ந்தா⁴தி³த⁴ம்மேஸு.
45. Athassa bhagavā tathā avattabbataṃ dassento ‘‘atthaṅgatassā’’ti gāthamāha. Tattha atthaṅgatassāti anupādāparinibbutassa. Na pamāṇamatthīti rūpādipamāṇaṃ natthi. Yena naṃ vajjunti yena rāgādinā naṃ vadeyyuṃ. Sabbesu dhammesūti sabbesu khandhādidhammesu.
நித்³தே³ஸே அதி⁴வசனானி சாதி ஸிரிவட்³ட⁴கோ த⁴னவட்³ட⁴கோதிஆத³யோ ஹி வசனமத்தங்யேவ அதி⁴காரங் கத்வா பவத்தா அதி⁴வசனா நாம. அதி⁴வசனானங் பதா² அதி⁴வசனபதா² நாம. ‘‘அபி⁴ஸங்க²ரொந்தீதி கோ², பி⁴க்க²வே, தஸ்மா ஸங்கா²ரா’’தி (ஸங்॰ நி॰ 3.79) ஏவங் நித்³தா⁴ரித்வா ஸஹேதுகங் கத்வா வுச்சமானா அபி⁴லாபா நிருத்தி நாம. நிருத்தீனங் பதா² நிருத்திபதா² நாம. ‘‘தக்கோ விதக்கோ ஸங்கப்போ’’தி (த⁴॰ ஸ॰ 7) ஏவங் தேன தேன பகாரேன பஞ்ஞாபனதோ பஞ்ஞத்தி நாம. பஞ்ஞத்தீனங் பதா² பஞ்ஞத்திபதா² (த⁴॰ ஸ॰ அட்ட²॰ 101-108) நாம. ஸேஸங் ஸப்³ப³த்த² பாகடமேவ.
Niddese adhivacanāni cāti sirivaḍḍhako dhanavaḍḍhakotiādayo hi vacanamattaṃyeva adhikāraṃ katvā pavattā adhivacanā nāma. Adhivacanānaṃ pathā adhivacanapathā nāma. ‘‘Abhisaṅkharontīti kho, bhikkhave, tasmā saṅkhārā’’ti (saṃ. ni. 3.79) evaṃ niddhāritvā sahetukaṃ katvā vuccamānā abhilāpā nirutti nāma. Niruttīnaṃ pathā niruttipathā nāma. ‘‘Takko vitakko saṅkappo’’ti (dha. sa. 7) evaṃ tena tena pakārena paññāpanato paññatti nāma. Paññattīnaṃ pathā paññattipathā (dha. sa. aṭṭha. 101-108) nāma. Sesaṃ sabbattha pākaṭameva.
ஏவங் ப⁴க³வா இத³ம்பி ஸுத்தங் அரஹத்தனிகூடேனேவ தே³ஸேஸி, தே³ஸனாபரியோஸானே ச வுத்தஸதி³ஸோவ த⁴ம்மாபி⁴ஸமயோ அஹோஸீதி.
Evaṃ bhagavā idampi suttaṃ arahattanikūṭeneva desesi, desanāpariyosāne ca vuttasadisova dhammābhisamayo ahosīti.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
உபஸீவமாணவஸுத்தனித்³தே³ஸவண்ணனா நிட்டி²தா.
Upasīvamāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
6. உபஸீவமாணவபுச்சா² • 6. Upasīvamāṇavapucchā
6. உபஸீவமாணவபுச்சா²னித்³தே³ஸோ • 6. Upasīvamāṇavapucchāniddeso
