| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
6. உபஸீவஸுத்தவண்ணனா
6. Upasīvasuttavaṇṇanā
1076. ஏகோ அஹந்தி உபஸீவஸுத்தங். தத்த² மஹந்தமோக⁴ந்தி மஹந்தங் ஓக⁴ங். அனிஸ்ஸிதோதி புக்³க³லங் வா த⁴ம்மங் வா அனிஸ்ஸிதோ. நோ விஸஹாமீதி ந ஸக்கோமி. ஆரம்மணந்தி நிஸ்ஸயங். யங் நிஸ்ஸிதோதி யங் புக்³க³லங் வா த⁴ம்மங் வா நிஸ்ஸிதோ.
1076.Ekoahanti upasīvasuttaṃ. Tattha mahantamoghanti mahantaṃ oghaṃ. Anissitoti puggalaṃ vā dhammaṃ vā anissito. No visahāmīti na sakkomi. Ārammaṇanti nissayaṃ. Yaṃ nissitoti yaṃ puggalaṃ vā dhammaṃ vā nissito.
1077. இதா³னி யஸ்மா ஸோ ப்³ராஹ்மணோ ஆகிஞ்சஞ்ஞாயதனலாபீ⁴ தஞ்ச ஸந்தம்பி நிஸ்ஸயங் ந ஜானாதி, தேனஸ்ஸ ப⁴க³வா தஞ்ச நிஸ்ஸயங் உத்தரி ச நிய்யானபத²ங் த³ஸ்ஸெந்தோ ‘‘ஆகிஞ்சஞ்ஞ’’ந்தி கா³த²மாஹ. தத்த² பெக்க²மானோதி தங் ஆகிஞ்சஞ்ஞாயதனஸமாபத்திங் ஸதோ ஸமாபஜ்ஜித்வா வுட்ட²ஹித்வா ச அனிச்சாதி³வஸேன பஸ்ஸமானோ. நத்தீ²தி நிஸ்ஸாயாதி தங் ‘‘நத்தி² கிஞ்சீ’’தி பவத்தஸமாபத்திங் ஆரம்மணங் கத்வா. தரஸ்ஸு ஓக⁴ந்தி ததோ பபு⁴தி பவத்தாய விபஸ்ஸனாய யதா²னுரூபங் சதுப்³பி³த⁴ம்பி ஓக⁴ங் தரஸ்ஸு. கதா²ஹீதி கத²ங்கதா²ஹி. தண்ஹக்க²யங் நத்தமஹாபி⁴பஸ்ஸாதி ரத்திந்தி³வங் நிப்³பா³னங் விபூ⁴தங் கத்வா பஸ்ஸ. ஏதேனஸ்ஸ தி³ட்ட²த⁴ம்மஸுக²விஹாரங் கதே²தி.
1077. Idāni yasmā so brāhmaṇo ākiñcaññāyatanalābhī tañca santampi nissayaṃ na jānāti, tenassa bhagavā tañca nissayaṃ uttari ca niyyānapathaṃ dassento ‘‘ākiñcañña’’nti gāthamāha. Tattha pekkhamānoti taṃ ākiñcaññāyatanasamāpattiṃ sato samāpajjitvā vuṭṭhahitvā ca aniccādivasena passamāno. Natthīti nissāyāti taṃ ‘‘natthi kiñcī’’ti pavattasamāpattiṃ ārammaṇaṃ katvā. Tarassu oghanti tato pabhuti pavattāya vipassanāya yathānurūpaṃ catubbidhampi oghaṃ tarassu. Kathāhīti kathaṃkathāhi. Taṇhakkhayaṃ nattamahābhipassāti rattindivaṃ nibbānaṃ vibhūtaṃ katvā passa. Etenassa diṭṭhadhammasukhavihāraṃ katheti.
1078-9. இதா³னி ‘‘காமே பஹாயா’’தி ஸுத்வா விக்க²ம்ப⁴னவஸேன அத்தனா பஹீனே காமே ஸம்பஸ்ஸமானோ ‘‘ஸப்³பே³ஸூ’’தி கா³த²மாஹ. தத்த² ஹித்வா மஞ்ஞந்தி அஞ்ஞங் ததோ ஹெட்டா² ச²ப்³பி³த⁴ம்பி ஸமாபத்திங் ஹித்வா. ஸஞ்ஞாவிமொக்கே² பரமேதி ஸத்தஸு ஸஞ்ஞாவிமொக்கே²ஸு உத்தமே ஆகிஞ்சஞ்ஞாயதனே. திட்டே² நு ஸோ தத்த² அனானுயாயீதி ஸோ புக்³க³லோ தத்த² ஆகிஞ்சஞ்ஞாயதனப்³ரஹ்மலோகே அவிக³ச்ச²மானோ திட்டெ²ய்ய நூதி புச்ச²தி. அத²ஸ்ஸ ப⁴க³வா ஸட்டி²கப்பஸஹஸ்ஸமத்தங்யேவ டா²னங் அனுஜானந்தோ ததியகா³த²மாஹ.
1078-9. Idāni ‘‘kāme pahāyā’’ti sutvā vikkhambhanavasena attanā pahīne kāme sampassamāno ‘‘sabbesū’’ti gāthamāha. Tattha hitvā maññanti aññaṃ tato heṭṭhā chabbidhampi samāpattiṃ hitvā. Saññāvimokkhe parameti sattasu saññāvimokkhesu uttame ākiñcaññāyatane. Tiṭṭhe nuso tattha anānuyāyīti so puggalo tattha ākiñcaññāyatanabrahmaloke avigacchamāno tiṭṭheyya nūti pucchati. Athassa bhagavā saṭṭhikappasahassamattaṃyeva ṭhānaṃ anujānanto tatiyagāthamāha.
1080. ஏவங் தஸ்ஸ தத்த² டா²னங் ஸுத்வா இதா³னிஸ்ஸ ஸஸ்ஸதுச்சே²த³பா⁴வங் புச்ச²ந்தோ ‘‘திட்டே² சே’’தி கா³த²மாஹ. தத்த² பூக³ம்பி வஸ்ஸானந்தி அனேகஸங்க்²யம்பி வஸ்ஸானங், க³ணராஸிந்தி அத்தோ². ‘‘பூக³ம்பி வஸ்ஸானீ’’திபி பாடோ², தத்த² விப⁴த்திப்³யத்தயேன ஸாமிவசனஸ்ஸ பச்சத்தவசனங் கத்தப்³ப³ங், பூக³ந்தி வா ஏதஸ்ஸ ப³ஹூனீதி அத்தோ² வத்தப்³போ³. ‘‘பூகா³னீ’’தி வாபி பட²ந்தி, புரிமபாடோ²யேவ ஸப்³ப³ஸுந்த³ரோ. தத்தே²வ ஸோ ஸீதி ஸியா விமுத்தோதி ஸோ புக்³க³லோ தத்தே²வாகிஞ்சஞ்ஞாயதனே நானாது³க்கே²ஹி விமுத்தோ ஸீதிபா⁴வப்பத்தோ ப⁴வெய்ய, நிப்³பா³னப்பத்தோ ஸஸ்ஸதோ ஹுத்வா திட்டெ²ய்யாதி அதி⁴ப்பாயோ. சவேத² விஞ்ஞாணங் ததா²வித⁴ஸ்ஸாதி உதா³ஹு ததா²வித⁴ஸ்ஸ விஞ்ஞாணங் அனுபாதா³ய பரினிப்³பா³யெய்யாதி உச்சே²த³ங் புச்ச²தி, படிஸந்தி⁴க்³க³ஹணத்த²ங் வாபி ப⁴வெய்யாதி படிஸந்தி⁴ம்பி தஸ்ஸ புச்ச²தி.
1080. Evaṃ tassa tattha ṭhānaṃ sutvā idānissa sassatucchedabhāvaṃ pucchanto ‘‘tiṭṭhe ce’’ti gāthamāha. Tattha pūgampi vassānanti anekasaṅkhyampi vassānaṃ, gaṇarāsinti attho. ‘‘Pūgampi vassānī’’tipi pāṭho, tattha vibhattibyattayena sāmivacanassa paccattavacanaṃ kattabbaṃ, pūganti vā etassa bahūnīti attho vattabbo. ‘‘Pūgānī’’ti vāpi paṭhanti, purimapāṭhoyeva sabbasundaro. Tattheva so sīti siyā vimuttoti so puggalo tatthevākiñcaññāyatane nānādukkhehi vimutto sītibhāvappatto bhaveyya, nibbānappatto sassato hutvā tiṭṭheyyāti adhippāyo. Cavetha viññāṇaṃ tathāvidhassāti udāhu tathāvidhassa viññāṇaṃ anupādāya parinibbāyeyyāti ucchedaṃ pucchati, paṭisandhiggahaṇatthaṃ vāpi bhaveyyāti paṭisandhimpi tassa pucchati.
1081. அத²ஸ்ஸ ப⁴க³வா உச்சே²த³ஸஸ்ஸதங் அனுபக³ம்ம தத்த² உப்பன்னஸ்ஸ அரியஸாவகஸ்ஸ அனுபாதா³ய பரினிப்³பா³னங் த³ஸ்ஸெந்தோ ‘‘அச்சீ யதா²’’தி கா³த²மாஹ. தத்த² அத்த²ங் பலேதீதி அத்த²ங் க³ச்ச²தி. ந உபேதி ஸங்க²ந்தி ‘‘அஸுகங் நாம தி³ஸங் க³தோ’’தி வோஹாரங் ந க³ச்ச²தி. ஏவங் முனீ நாமகாயா விமுத்தோதி ஏவங் தத்த² உப்பன்னோ ஸெக்க²முனி பகதியா புப்³பே³வ ரூபகாயா விமுத்தோ தத்த² சதுத்த²மக்³க³ங் நிப்³ப³த்தெத்வா த⁴ம்மகாயஸ்ஸ பரிஞ்ஞாதத்தா புன நாமகாயாபி விமுத்தோ உப⁴தோபா⁴க³விமுத்தோ கீ²ணாஸவோ ஹுத்வா அனுபாதா³பரினிப்³பா³னஸங்கா²தங் அத்த²ங் பலேதி, ந உபேதி ஸங்க²ங் ‘‘க²த்தியோ வா ப்³ராஹ்மணோ வா’’தி ஏவமாதி³கங்.
1081. Athassa bhagavā ucchedasassataṃ anupagamma tattha uppannassa ariyasāvakassa anupādāya parinibbānaṃ dassento ‘‘accī yathā’’ti gāthamāha. Tattha atthaṃ paletīti atthaṃ gacchati. Na upeti saṅkhanti ‘‘asukaṃ nāma disaṃ gato’’ti vohāraṃ na gacchati. Evaṃ munī nāmakāyā vimuttoti evaṃ tattha uppanno sekkhamuni pakatiyā pubbeva rūpakāyā vimutto tattha catutthamaggaṃ nibbattetvā dhammakāyassa pariññātattā puna nāmakāyāpi vimutto ubhatobhāgavimutto khīṇāsavo hutvā anupādāparinibbānasaṅkhātaṃ atthaṃ paleti, na upeti saṅkhaṃ ‘‘khattiyo vā brāhmaṇo vā’’ti evamādikaṃ.
1082. இதா³னி ‘‘அத்த²ங் பலேதீ’’தி ஸுத்வா தஸ்ஸ யோனிஸோ அத்த²ங் அஸல்லக்கெ²ந்தோ ‘‘அத்த²ங்க³தோ ஸோ’’தி கா³த²மாஹ. தஸ்ஸத்தோ² – ஸோ அத்த²ங்க³தோ உதா³ஹு நத்தி², உதா³ஹு வே ஸஸ்ஸதியா ஸஸ்ஸதபா⁴வேன அரோகோ³ அவிபரிணாமத⁴ம்மோ ஸோதி ஏவங் தங் மே முனீ ஸாது⁴ வியாகரோஹி. கிங் காரணங்? ததா² ஹி தே விதி³தோ ஏஸ த⁴ம்மோதி.
1082. Idāni ‘‘atthaṃ paletī’’ti sutvā tassa yoniso atthaṃ asallakkhento ‘‘atthaṅgato so’’ti gāthamāha. Tassattho – so atthaṅgato udāhu natthi, udāhu ve sassatiyā sassatabhāvena arogo avipariṇāmadhammo soti evaṃ taṃ me munī sādhu viyākarohi. Kiṃ kāraṇaṃ? Tathā hi te vidito esa dhammoti.
1083. அத²ஸ்ஸ ப⁴க³வா ததா² அவத்தப்³ப³தங் த³ஸ்ஸெந்தோ ‘‘அத்த²ங்க³தஸ்ஸா’’தி கா³த²மாஹ. தத்த² அத்த²ங்க³தஸ்ஸாதி அனுபாதா³பரினிப்³பு³தஸ்ஸ. ந பமாணமத்தீ²தி ரூபாதி³ப்பமாணங் நத்தி². யேன நங் வஜ்ஜுந்தி யேன ராகா³தி³னா நங் வதெ³ய்யுங். ஸப்³பே³ஸு த⁴ம்மேஸூதி ஸப்³பே³ஸு க²ந்தா⁴தி³த⁴ம்மேஸு. ஸேஸங் ஸப்³ப³த்த² பாகடமேவ.
1083. Athassa bhagavā tathā avattabbataṃ dassento ‘‘atthaṅgatassā’’ti gāthamāha. Tattha atthaṅgatassāti anupādāparinibbutassa. Na pamāṇamatthīti rūpādippamāṇaṃ natthi. Yena naṃ vajjunti yena rāgādinā naṃ vadeyyuṃ. Sabbesu dhammesūti sabbesu khandhādidhammesu. Sesaṃ sabbattha pākaṭameva.
ஏவங் ப⁴க³வா இமங் ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே ச வுத்தஸதி³ஸோ ஏவ த⁴ம்மாபி⁴ஸமயோ அஹோஸீதி.
Evaṃ bhagavā imaṃ suttaṃ arahattanikūṭeneva desesi. Desanāpariyosāne ca vuttasadiso eva dhammābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய உபஸீவஸுத்தவண்ணனா நிட்டி²தா.
Suttanipāta-aṭṭhakathāya upasīvasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 6. உபஸீவமாணவபுச்சா² • 6. Upasīvamāṇavapucchā
