| Library / Tipiṭaka / д̇ибидага • Tipiṭaka / суд̇д̇анибаад̇а-адтагат̇аа • Suttanipāta-aṭṭhakathā |
6. убасийвасуд̇д̇аван̣н̣анаа
6. Upasīvasuttavaṇṇanā
1076. зго аханд̇и убасийвасуд̇д̇ам̣. д̇ад̇т̇а маханд̇амогханд̇и маханд̇ам̣ огхам̣. аниссид̇од̇и буг̇г̇алам̣ ваа д̇хаммам̣ ваа аниссид̇о. но висахаамийд̇и на саггоми. аарамман̣анд̇и ниссаяам̣. яам̣ ниссид̇од̇и яам̣ буг̇г̇алам̣ ваа д̇хаммам̣ ваа ниссид̇о.
1076.Ekoahanti upasīvasuttaṃ. Tattha mahantamoghanti mahantaṃ oghaṃ. Anissitoti puggalaṃ vā dhammaṃ vā anissito. No visahāmīti na sakkomi. Ārammaṇanti nissayaṃ. Yaṃ nissitoti yaṃ puggalaṃ vā dhammaṃ vā nissito.
1077. ид̣̇аани яасмаа со б̣раахман̣о аагин̃жан̃н̃ааяад̇аналаабхий д̇ан̃жа санд̇амби ниссаяам̣ на ж̇аанаад̇и, д̇знасса бхаг̇аваа д̇ан̃жа ниссаяам̣ уд̇д̇ари жа нияяаанабат̇ам̣ д̣̇ассзнд̇о ‘‘аагин̃жан̃н̃а’’нд̇и г̇аат̇амааха. д̇ад̇т̇а бзгкамаанод̇и д̇ам̣ аагин̃жан̃н̃ааяад̇анасамаабад̇д̇им̣ сад̇о самаабаж̇ж̇ид̇ваа вудтахид̇ваа жа анижжаад̣̇ивасзна бассамаано. над̇т̇ийд̇и ниссааяаад̇и д̇ам̣ ‘‘над̇т̇и гин̃жий’’д̇и бавад̇д̇асамаабад̇д̇им̣ аарамман̣ам̣ гад̇ваа. д̇арассу огханд̇и д̇ад̇о бабхуд̇и бавад̇д̇ааяа вибассанааяа яат̇аануруубам̣ жад̇уб̣б̣ид̇хамби огхам̣ д̇арассу. гат̇аахийд̇и гат̇ам̣гат̇аахи. д̇ан̣хагкаяам̣ над̇д̇амахаабхибассаад̇и рад̇д̇инд̣̇ивам̣ ниб̣б̣аанам̣ вибхууд̇ам̣ гад̇ваа басса. зд̇знасса д̣̇идтад̇хаммасукавихаарам̣ гат̇зд̇и.
1077. Idāni yasmā so brāhmaṇo ākiñcaññāyatanalābhī tañca santampi nissayaṃ na jānāti, tenassa bhagavā tañca nissayaṃ uttari ca niyyānapathaṃ dassento ‘‘ākiñcañña’’nti gāthamāha. Tattha pekkhamānoti taṃ ākiñcaññāyatanasamāpattiṃ sato samāpajjitvā vuṭṭhahitvā ca aniccādivasena passamāno. Natthīti nissāyāti taṃ ‘‘natthi kiñcī’’ti pavattasamāpattiṃ ārammaṇaṃ katvā. Tarassu oghanti tato pabhuti pavattāya vipassanāya yathānurūpaṃ catubbidhampi oghaṃ tarassu. Kathāhīti kathaṃkathāhi. Taṇhakkhayaṃ nattamahābhipassāti rattindivaṃ nibbānaṃ vibhūtaṃ katvā passa. Etenassa diṭṭhadhammasukhavihāraṃ katheti.
1078-9. ид̣̇аани ‘‘гаамз бахааяаа’’д̇и суд̇ваа вигкамбханавасзна ад̇д̇анаа бахийнз гаамз самбассамаано ‘‘саб̣б̣зсуу’’д̇и г̇аат̇амааха. д̇ад̇т̇а хид̇ваа ман̃н̃анд̇и ан̃н̃ам̣ д̇ад̇о хздтаа чаб̣б̣ид̇хамби самаабад̇д̇им̣ хид̇ваа. сан̃н̃аавимогкз барамзд̇и сад̇д̇асу сан̃н̃аавимогкзсу уд̇д̇амз аагин̃жан̃н̃ааяад̇анз. д̇идтз ну со д̇ад̇т̇а анаануяааяийд̇и со буг̇г̇ало д̇ад̇т̇а аагин̃жан̃н̃ааяад̇анаб̣рахмалогз авиг̇ажчамаано д̇идтзяяа нууд̇и бужчад̇и. ат̇асса бхаг̇аваа садтигаббасахассамад̇д̇ам̣язва таанам̣ ануж̇аананд̇о д̇ад̇ияаг̇аат̇амааха.
1078-9. Idāni ‘‘kāme pahāyā’’ti sutvā vikkhambhanavasena attanā pahīne kāme sampassamāno ‘‘sabbesū’’ti gāthamāha. Tattha hitvā maññanti aññaṃ tato heṭṭhā chabbidhampi samāpattiṃ hitvā. Saññāvimokkhe parameti sattasu saññāvimokkhesu uttame ākiñcaññāyatane. Tiṭṭhe nuso tattha anānuyāyīti so puggalo tattha ākiñcaññāyatanabrahmaloke avigacchamāno tiṭṭheyya nūti pucchati. Athassa bhagavā saṭṭhikappasahassamattaṃyeva ṭhānaṃ anujānanto tatiyagāthamāha.
1080. звам̣ д̇асса д̇ад̇т̇а таанам̣ суд̇ваа ид̣̇аанисса сассад̇ужчзд̣̇абхаавам̣ бужчанд̇о ‘‘д̇идтз жз’’д̇и г̇аат̇амааха. д̇ад̇т̇а бууг̇амби вассаананд̇и анзгасан̇кяамби вассаанам̣, г̇ан̣араасинд̇и ад̇т̇о. ‘‘бууг̇амби вассааний’’д̇иби баато, д̇ад̇т̇а вибхад̇д̇иб̣яад̇д̇аязна саамиважанасса бажжад̇д̇аважанам̣ гад̇д̇аб̣б̣ам̣, бууг̇анд̇и ваа зд̇асса б̣ахуунийд̇и ад̇т̇о вад̇д̇аб̣б̣о. ‘‘бууг̇ааний’’д̇и вааби батанд̇и, буримабаатоязва саб̣б̣асунд̣̇аро. д̇ад̇т̇зва со сийд̇и сияаа вимуд̇д̇од̇и со буг̇г̇ало д̇ад̇т̇зваагин̃жан̃н̃ааяад̇анз наанаад̣̇угкзхи вимуд̇д̇о сийд̇ибхааваббад̇д̇о бхавзяяа, ниб̣б̣аанаббад̇д̇о сассад̇о худ̇ваа д̇идтзяяаад̇и ад̇хиббааяо. жавзт̇а вин̃н̃аан̣ам̣ д̇ат̇аавид̇хассаад̇и уд̣̇ааху д̇ат̇аавид̇хасса вин̃н̃аан̣ам̣ анубаад̣̇ааяа бариниб̣б̣ааязяяаад̇и ужчзд̣̇ам̣ бужчад̇и, бадисанд̇хиг̇г̇ахан̣ад̇т̇ам̣ вааби бхавзяяаад̇и бадисанд̇химби д̇асса бужчад̇и.
1080. Evaṃ tassa tattha ṭhānaṃ sutvā idānissa sassatucchedabhāvaṃ pucchanto ‘‘tiṭṭhe ce’’ti gāthamāha. Tattha pūgampi vassānanti anekasaṅkhyampi vassānaṃ, gaṇarāsinti attho. ‘‘Pūgampi vassānī’’tipi pāṭho, tattha vibhattibyattayena sāmivacanassa paccattavacanaṃ kattabbaṃ, pūganti vā etassa bahūnīti attho vattabbo. ‘‘Pūgānī’’ti vāpi paṭhanti, purimapāṭhoyeva sabbasundaro. Tattheva so sīti siyā vimuttoti so puggalo tatthevākiñcaññāyatane nānādukkhehi vimutto sītibhāvappatto bhaveyya, nibbānappatto sassato hutvā tiṭṭheyyāti adhippāyo. Cavetha viññāṇaṃ tathāvidhassāti udāhu tathāvidhassa viññāṇaṃ anupādāya parinibbāyeyyāti ucchedaṃ pucchati, paṭisandhiggahaṇatthaṃ vāpi bhaveyyāti paṭisandhimpi tassa pucchati.
1081. ат̇асса бхаг̇аваа ужчзд̣̇асассад̇ам̣ анубаг̇амма д̇ад̇т̇а уббаннасса арияасаавагасса анубаад̣̇ааяа бариниб̣б̣аанам̣ д̣̇ассзнд̇о ‘‘ажжий яат̇аа’’д̇и г̇аат̇амааха. д̇ад̇т̇а ад̇т̇ам̣ балзд̇ийд̇и ад̇т̇ам̣ г̇ажчад̇и. на убзд̇и сан̇канд̇и ‘‘асугам̣ наама д̣̇исам̣ г̇ад̇о’’д̇и вохаарам̣ на г̇ажчад̇и. звам̣ муний наамагааяаа вимуд̇д̇од̇и звам̣ д̇ад̇т̇а уббанно сзгкамуни багад̇ияаа буб̣б̣зва руубагааяаа вимуд̇д̇о д̇ад̇т̇а жад̇уд̇т̇амаг̇г̇ам̣ ниб̣б̣ад̇д̇зд̇ваа д̇хаммагааяасса барин̃н̃аад̇ад̇д̇аа буна наамагааяааби вимуд̇д̇о убхад̇обхааг̇авимуд̇д̇о кийн̣аасаво худ̇ваа анубаад̣̇аабариниб̣б̣аанасан̇каад̇ам̣ ад̇т̇ам̣ балзд̇и, на убзд̇и сан̇кам̣ ‘‘кад̇д̇ияо ваа б̣раахман̣о ваа’’д̇и звамаад̣̇игам̣.
1081. Athassa bhagavā ucchedasassataṃ anupagamma tattha uppannassa ariyasāvakassa anupādāya parinibbānaṃ dassento ‘‘accī yathā’’ti gāthamāha. Tattha atthaṃ paletīti atthaṃ gacchati. Na upeti saṅkhanti ‘‘asukaṃ nāma disaṃ gato’’ti vohāraṃ na gacchati. Evaṃ munī nāmakāyā vimuttoti evaṃ tattha uppanno sekkhamuni pakatiyā pubbeva rūpakāyā vimutto tattha catutthamaggaṃ nibbattetvā dhammakāyassa pariññātattā puna nāmakāyāpi vimutto ubhatobhāgavimutto khīṇāsavo hutvā anupādāparinibbānasaṅkhātaṃ atthaṃ paleti, na upeti saṅkhaṃ ‘‘khattiyo vā brāhmaṇo vā’’ti evamādikaṃ.
1082. ид̣̇аани ‘‘ад̇т̇ам̣ балзд̇ий’’д̇и суд̇ваа д̇асса яонисо ад̇т̇ам̣ асаллагкзнд̇о ‘‘ад̇т̇ан̇г̇ад̇о со’’д̇и г̇аат̇амааха. д̇ассад̇т̇о – со ад̇т̇ан̇г̇ад̇о уд̣̇ааху над̇т̇и, уд̣̇ааху вз сассад̇ияаа сассад̇абхаавзна арог̇о авибарин̣аамад̇хаммо сод̇и звам̣ д̇ам̣ мз муний саад̇ху вияаагарохи. гим̣ гааран̣ам̣? д̇ат̇аа хи д̇з вид̣̇ид̇о зса д̇хаммод̇и.
1082. Idāni ‘‘atthaṃ paletī’’ti sutvā tassa yoniso atthaṃ asallakkhento ‘‘atthaṅgato so’’ti gāthamāha. Tassattho – so atthaṅgato udāhu natthi, udāhu ve sassatiyā sassatabhāvena arogo avipariṇāmadhammo soti evaṃ taṃ me munī sādhu viyākarohi. Kiṃ kāraṇaṃ? Tathā hi te vidito esa dhammoti.
1083. ат̇асса бхаг̇аваа д̇ат̇аа авад̇д̇аб̣б̣ад̇ам̣ д̣̇ассзнд̇о ‘‘ад̇т̇ан̇г̇ад̇ассаа’’д̇и г̇аат̇амааха. д̇ад̇т̇а ад̇т̇ан̇г̇ад̇ассаад̇и анубаад̣̇аабариниб̣б̣уд̇асса. на бамаан̣амад̇т̇ийд̇и руубаад̣̇иббамаан̣ам̣ над̇т̇и. язна нам̣ важ̇ж̇унд̇и язна рааг̇аад̣̇инаа нам̣ вад̣̇зяяум̣. саб̣б̣зсу д̇хаммзсууд̇и саб̣б̣зсу канд̇хаад̣̇ид̇хаммзсу. сзсам̣ саб̣б̣ад̇т̇а баагадамзва.
1083. Athassa bhagavā tathā avattabbataṃ dassento ‘‘atthaṅgatassā’’ti gāthamāha. Tattha atthaṅgatassāti anupādāparinibbutassa. Na pamāṇamatthīti rūpādippamāṇaṃ natthi. Yena naṃ vajjunti yena rāgādinā naṃ vadeyyuṃ. Sabbesu dhammesūti sabbesu khandhādidhammesu. Sesaṃ sabbattha pākaṭameva.
звам̣ бхаг̇аваа имам̣ суд̇д̇ам̣ арахад̇д̇анигуудзнзва д̣̇зсзси. д̣̇зсанаабарияосаанз жа вуд̇д̇асад̣̇исо зва д̇хаммаабхисамаяо ахосийд̇и.
Evaṃ bhagavā imaṃ suttaṃ arahattanikūṭeneva desesi. Desanāpariyosāne ca vuttasadiso eva dhammābhisamayo ahosīti.
барамад̇т̇аж̇од̇игааяа куд̣̇д̣̇ага-адтагат̇ааяа
Paramatthajotikāya khuddaka-aṭṭhakathāya
суд̇д̇анибаад̇а-адтагат̇ааяа убасийвасуд̇д̇аван̣н̣анаа нидтид̇аа.
Suttanipāta-aṭṭhakathāya upasīvasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / суд̇д̇анибаад̇абаал̣и • Suttanipātapāḷi / 6. убасийвамаан̣авабужчаа • 6. Upasīvamāṇavapucchā
