| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. உபஸ்ஸயஸுத்தவண்ணனா
10. Upassayasuttavaṇṇanā
153. த³ஸமே ஆயாம, ப⁴ந்தேதி கஸ்மா பி⁴க்கு²னீஉபஸ்ஸயக³மனங் யாசதி? ந லாப⁴ஸக்காரஹேது, கம்மட்டா²னத்தி²கா பனெத்த² பி⁴க்கு²னியோ அத்தி², தா உஸ்ஸுக்காபெத்வா கம்மட்டா²னங் கதா²பெஸ்ஸாமீதி யாசதி. நனு ச ஸோ ஸயம்பி தேபிடகோ ப³ஹுஸ்ஸுதோ, கிங் ஸயங் கதே²துங் ந ஸக்கோதீதி? நோ ந ஸக்கோதி. பு³த்³த⁴படிபா⁴க³ஸ்ஸ பன ஸாவகஸ்ஸ கத²ங் ஸத்³தா⁴தப்³ப³ங் மஞ்ஞிஸ்ஸந்தீதி யாசதி. ப³ஹுகிச்சோ த்வங் ப³ஹுகரணீயோதி கிங் தே²ரோ நவகம்மாதி³பஸுதோ, யேன நங் ஏவமாஹாதி? நோ, ஸத்த²ரி பன பரினிப்³பு³தே சதஸ்ஸோ பரிஸா ஆனந்த³த்தே²ரங் உபஸங்கமித்வா, ‘‘ப⁴ந்தே, இதா³னி கஸ்ஸ பத்தசீவரங் க³ஹெத்வா சரத², கஸ்ஸ பரிவேணங் ஸம்மஜ்ஜத², கஸ்ஸ முகோ²த³கங் தே³தா²’’தி ரோத³ந்தி பரிதே³வந்தி. தே²ரோ ‘‘அனிச்சா ஸங்கா²ரா, வுத்³த⁴ஸரீரேபி நில்லஜ்ஜோவ மச்சுராஜா பஹரி. ஏஸா ஸங்கா²ரானங் த⁴ம்மதா, மா ஸோசித்த², மா பரிதே³வித்தா²’’தி பரிஸங் ஸஞ்ஞாபேதி. இத³மஸ்ஸ ப³ஹுகிச்சங். தங் ஸந்தா⁴ய தே²ரோ ஏவமாஹ. ஸந்த³ஸ்ஸேஸீதி படிபத்திகு³ணங் த³ஸ்ஸேஸி. ஸமாத³பேஸீதி க³ண்ஹாபேஸி. ஸமுத்தேஜேஸீதி ஸமுஸ்ஸாஹேஸி. ஸம்பஹங்ஸேஸீதி படிலத்³த⁴கு³ணேன மோதா³பேஸி.
153. Dasame āyāma, bhanteti kasmā bhikkhunīupassayagamanaṃ yācati? Na lābhasakkārahetu, kammaṭṭhānatthikā panettha bhikkhuniyo atthi, tā ussukkāpetvā kammaṭṭhānaṃ kathāpessāmīti yācati. Nanu ca so sayampi tepiṭako bahussuto, kiṃ sayaṃ kathetuṃ na sakkotīti? No na sakkoti. Buddhapaṭibhāgassa pana sāvakassa kathaṃ saddhātabbaṃ maññissantīti yācati. Bahukicco tvaṃ bahukaraṇīyoti kiṃ thero navakammādipasuto, yena naṃ evamāhāti? No, satthari pana parinibbute catasso parisā ānandattheraṃ upasaṅkamitvā, ‘‘bhante, idāni kassa pattacīvaraṃ gahetvā caratha, kassa pariveṇaṃ sammajjatha, kassa mukhodakaṃ dethā’’ti rodanti paridevanti. Thero ‘‘aniccā saṅkhārā, vuddhasarīrepi nillajjova maccurājā pahari. Esā saṅkhārānaṃ dhammatā, mā socittha, mā paridevitthā’’ti parisaṃ saññāpeti. Idamassa bahukiccaṃ. Taṃ sandhāya thero evamāha. Sandassesīti paṭipattiguṇaṃ dassesi. Samādapesīti gaṇhāpesi. Samuttejesīti samussāhesi. Sampahaṃsesīti paṭiladdhaguṇena modāpesi.
து²ல்லதிஸ்ஸாதி ஸரீரேன தூ²லா, நாமேன திஸ்ஸா. வேதே³ஹமுனினோதி பண்டி³தமுனினோ. பண்டி³தோ ஹி ஞாணஸங்கா²தேன வேதே³ன ஈஹதி ஸப்³ப³கிச்சானி கரோதி, தஸ்மா ‘‘வேதே³ஹோ’’தி வுச்சதி. வேதே³ஹோ ச ஸோ முனி சாதி, வேதே³ஹமுனி. த⁴ம்மங் பா⁴ஸிதப்³ப³ங் மஞ்ஞதீதி திபிடகத⁴ரஸ்ஸ த⁴ம்மப⁴ண்டா³கா³ரிகஸ்ஸ ஸம்முகே² ஸயங் அரஞ்ஞவாஸீ பங்ஸுகூலிகோ ஸமானோ ‘‘த⁴ம்மகதி²கோ அஹ’’ந்தி த⁴ம்மங் பா⁴ஸிதப்³ப³ங் மஞ்ஞதி. இத³ங் கிங் பன, கத²ங் பனாதி? அவஜானமானா ப⁴ணதி. அஸ்ஸோஸீதி அஞ்ஞேன ஆக³ந்த்வா ஆரோசிதவஸேன அஸ்ஸோஸி. ஆக³மேஹி த்வங், ஆவுஸோதி திட்ட² த்வங், ஆவுஸோ. மா தே ஸங்கோ⁴ உத்தரி உபபரிக்கீ²தி மா பி⁴க்கு²ஸங்கோ⁴ அதிரேகஓகாஸே தங் உபபரிக்கீ²தி. இத³ங் வுத்தங் ஹோதி – ‘‘ஆனந்தே³ன பு³த்³த⁴படிபா⁴கோ³ ஸாவகோ வாரிதோ, ஏகா பி⁴க்கு²னீ ந வாரிதா, தாய ஸத்³தி⁴ங் ஸந்த²வோ வா ஸினேஹோ வா ப⁴விஸ்ஸதீ’’தி மா தங் ஸங்கோ⁴ ஏவங் அமஞ்ஞீதி.
Thullatissāti sarīrena thūlā, nāmena tissā. Vedehamuninoti paṇḍitamunino. Paṇḍito hi ñāṇasaṅkhātena vedena īhati sabbakiccāni karoti, tasmā ‘‘vedeho’’ti vuccati. Vedeho ca so muni cāti, vedehamuni. Dhammaṃbhāsitabbaṃ maññatīti tipiṭakadharassa dhammabhaṇḍāgārikassa sammukhe sayaṃ araññavāsī paṃsukūliko samāno ‘‘dhammakathiko aha’’nti dhammaṃ bhāsitabbaṃ maññati. Idaṃ kiṃ pana, kathaṃ panāti? Avajānamānā bhaṇati. Assosīti aññena āgantvā ārocitavasena assosi. Āgamehi tvaṃ, āvusoti tiṭṭha tvaṃ, āvuso. Mā te saṅgho uttari upaparikkhīti mā bhikkhusaṅgho atirekaokāse taṃ upaparikkhīti. Idaṃ vuttaṃ hoti – ‘‘ānandena buddhapaṭibhāgo sāvako vārito, ekā bhikkhunī na vāritā, tāya saddhiṃ santhavo vā sineho vā bhavissatī’’ti mā taṃ saṅgho evaṃ amaññīti.
இதா³னி அத்தனோ பு³த்³த⁴படிபா⁴க³பா⁴வங் தீ³பெந்தோ தங் கிங் மஞ்ஞஸி, ஆவுஸோதிஆதி³மாஹ? ஸத்தரதனந்தி ஸத்தஹத்த²ப்பமாணங். நாக³ந்தி ஹத்தி²ங். அட்³ட⁴ட்ட²ரதனங் வாதி அட்³ட⁴ரதனேன ஊனஅட்ட²ரதனங், புரிமபாத³தோ பட்டா²ய யாவ கும்பா⁴ வித³த்தா²தி⁴கஸத்தஹத்து²ப்³பே³த⁴ந்தி அத்தோ². தாலபத்திகாயாதி தருணதாலபண்ணேன. சவித்தா²தி சுதா, ந மதா வா நட்டா² வா, பு³த்³த⁴படிபா⁴க³ஸ்ஸ பன ஸாவகஸ்ஸ உபவாத³ங் வத்வா மஹாகஸ்ஸபத்தே²ரே ச²ஹி அபி⁴ஞ்ஞாஹி ஸீஹனாத³ங் நத³ந்தே தஸ்ஸா காஸாவானி கண்டகஸாகா² விய கச்சு²ஸாகா² விய ச ஸரீரங் கா²தி³துங் ஆரத்³தா⁴னி, தானி ஹாரெத்வா ஸேதகானி நிவத்த²க்க²ணேயேவஸ்ஸா சித்தஸ்ஸாதோ³ உத³பாதீ³தி. த³ஸமங்.
Idāni attano buddhapaṭibhāgabhāvaṃ dīpento taṃ kiṃ maññasi, āvusotiādimāha? Sattaratananti sattahatthappamāṇaṃ. Nāganti hatthiṃ. Aḍḍhaṭṭharatanaṃ vāti aḍḍharatanena ūnaaṭṭharatanaṃ, purimapādato paṭṭhāya yāva kumbhā vidatthādhikasattahatthubbedhanti attho. Tālapattikāyāti taruṇatālapaṇṇena. Cavitthāti cutā, na matā vā naṭṭhā vā, buddhapaṭibhāgassa pana sāvakassa upavādaṃ vatvā mahākassapatthere chahi abhiññāhi sīhanādaṃ nadante tassā kāsāvāni kaṇṭakasākhā viya kacchusākhā viya ca sarīraṃ khādituṃ āraddhāni, tāni hāretvā setakāni nivatthakkhaṇeyevassā cittassādo udapādīti. Dasamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. உபஸ்ஸயஸுத்தங் • 10. Upassayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. உபஸ்ஸயஸுத்தவண்ணனா • 10. Upassayasuttavaṇṇanā
