| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. উপস্সযসুত্তৰণ্ণনা
10. Upassayasuttavaṇṇanā
১৫৩. লাভসক্কারহেতুপি একচ্চে ভিক্খূ ভিক্খুনুপস্সযং গন্ত্ৰা ভিক্খুনিযো ওৰদন্তি, এৰমেৰং অযং পন থেরো ন লাভসক্কারহেতু ভিক্খুনুপস্সযগমনং যাচতি, অথ কস্মাতি আহ ‘‘কম্মট্ঠানত্থিকা’’তিআদি। এসো হি আনন্দত্থেরো উস্সুক্কাপেত্ৰা পটিপত্তিগুণং দস্সেন্তো যস্মা তা ভিক্খুনিযো চতুসচ্চকম্মট্ঠানিকা, তস্মা পঞ্চন্নং উপাদানক্খন্ধানং উদযব্বযাদিপকাসনিযা ধম্মকথায ৰিপস্সনাপটিপত্তিসম্পদং দস্সেসি। অনিচ্চাদিলক্খণানি চেৰ উদযব্বযাদিকে চ সম্মা দস্সেসি। হত্থেন গহেত্ৰা ৰিয পচ্চক্খতো দস্সেসি। সমাদপেসীতি তত্থ লক্খণারম্মণিকৰিপস্সনং সমাদপেসি। যথা ৰীথিপটিপন্নো হুত্ৰা পৰত্ততি, এৰং গণ্হাপেসি। সমুত্তেজেসীতি ৰিপস্সনায আরদ্ধায সঙ্খারানং উদযব্বযাদীসু উপট্ঠহন্তেসু যথাকালং পগ্গহসমুপেক্খণেহি বোজ্ঝঙ্গানং অনুপৰত্তনেন ভাৰনামজ্ঝিমৰীথিং পাপেত্ৰা যথা ৰিপস্সনাঞাণং সুপ্পসন্নং হুত্ৰা ৰহতি, এৰং ইন্দ্রিযানং ৰিসদভাৰকরণেন ৰিপস্সনাচিত্তং সম্মা উত্তেজেসি, নিব্বানৰসেন ৰা সমাদপেসি। সম্পহংসেসীতি তথা পৰত্তিযমানায ৰিপস্সনায সমপ্পৰত্তভাৰনাৰসেন উপরি লদ্ধব্বভাৰনাৰসেন চিত্তং সম্পহংসেসি, লদ্ধস্সাদৰসেন সুট্ঠু তোসেসি। এৰমেত্থ অত্থো ৰেদিতব্বো।
153. Lābhasakkārahetupi ekacce bhikkhū bhikkhunupassayaṃ gantvā bhikkhuniyo ovadanti, evamevaṃ ayaṃ pana thero na lābhasakkārahetu bhikkhunupassayagamanaṃ yācati, atha kasmāti āha ‘‘kammaṭṭhānatthikā’’tiādi. Eso hi ānandatthero ussukkāpetvā paṭipattiguṇaṃ dassento yasmā tā bhikkhuniyo catusaccakammaṭṭhānikā, tasmā pañcannaṃ upādānakkhandhānaṃ udayabbayādipakāsaniyā dhammakathāya vipassanāpaṭipattisampadaṃ dassesi. Aniccādilakkhaṇāni ceva udayabbayādike ca sammā dassesi. Hatthena gahetvā viya paccakkhato dassesi. Samādapesīti tattha lakkhaṇārammaṇikavipassanaṃ samādapesi. Yathā vīthipaṭipanno hutvā pavattati, evaṃ gaṇhāpesi. Samuttejesīti vipassanāya āraddhāya saṅkhārānaṃ udayabbayādīsu upaṭṭhahantesu yathākālaṃ paggahasamupekkhaṇehi bojjhaṅgānaṃ anupavattanena bhāvanāmajjhimavīthiṃ pāpetvā yathā vipassanāñāṇaṃ suppasannaṃ hutvā vahati, evaṃ indriyānaṃ visadabhāvakaraṇena vipassanācittaṃ sammā uttejesi, nibbānavasena vā samādapesi. Sampahaṃsesīti tathā pavattiyamānāya vipassanāya samappavattabhāvanāvasena upari laddhabbabhāvanāvasena cittaṃ sampahaṃsesi, laddhassādavasena suṭṭhu tosesi. Evamettha attho veditabbo.
মনুতে পরিঞ্ঞাদিৰসেন সচ্চানি বুজ্ঝতীতি মুনি। তেতি তং। উপযোগত্থে হি ইদং সামিৰচনং। উত্তরীতি উপরি, তৰ যথাভূতসভাৰতো পরতোতি অত্থো। পক্খপতিতো অগতিগমনং অতিরেকওকাসো। উপপরিক্খীতি অনুৰিচ্চ নিৰারকো ন বহুমতো। বুদ্ধপটিভাগো থেরো। ‘‘বালা ভিক্খুনী দুব্ভাসিতং আহা’’তি অৰত্ৰা ‘‘খমথ, ভন্তে’’তি ৰদন্তেন পক্খপাতেন ৰিয ৰুত্তং হোতীতি আহ ‘‘একা ভিক্খুনী ন ৰারিতা’’তিআদি।
Manute pariññādivasena saccāni bujjhatīti muni. Teti taṃ. Upayogatthe hi idaṃ sāmivacanaṃ. Uttarīti upari, tava yathābhūtasabhāvato paratoti attho. Pakkhapatito agatigamanaṃ atirekaokāso. Upaparikkhīti anuvicca nivārako na bahumato. Buddhapaṭibhāgo thero. ‘‘Bālā bhikkhunī dubbhāsitaṃ āhā’’ti avatvā ‘‘khamatha, bhante’’ti vadantena pakkhapātena viya vuttaṃ hotīti āha ‘‘ekā bhikkhunī na vāritā’’tiādi.
চুতা সলিঙ্গতো নট্ঠা, দেসন্তরপক্কমেন অদস্সনং ন গতা। কণ্টকসাখা ৰিযাতি কুরণ্টকঅপামগ্গকণ্টকলসিকাহি সাখা ৰিয।
Cutā saliṅgato naṭṭhā, desantarapakkamena adassanaṃ na gatā. Kaṇṭakasākhā viyāti kuraṇṭakaapāmaggakaṇṭakalasikāhi sākhā viya.
উপস্সযসুত্তৰণ্ণনা নিট্ঠিতা।
Upassayasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. উপস্সযসুত্তং • 10. Upassayasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. উপস্সযসুত্তৰণ্ণনা • 10. Upassayasuttavaṇṇanā
